Bibliapi kaq yachachikuykunaqa yanapawanchismi Jehová Dios imayna piensasqanta entiendenapaq. Yanapawallanchistaqmi allinta decidinapaq allin kaqta ruwananchispaqpas. Astawanqa juj kamachikuy mana kaqtinmi yanapawanchis allinta decidinanchispaq. Diospa yachachikuyninkunamantan kamachikuyninkunaqa orqosqa kashan.

▸ 1 capítulo, 8 párrafo

Jehová Diosta kasukuqqa kikillanmantan kasukun. Diosqa munan payta munakusqanchisrayku kasukunanchistan (1 Juan 5:3). Sichus Diosta munakunchis, paypitaq confianchis chayqa, tukuypin kasukusun sasaña kaqtinpas. Diosta kasukuyqa allinninchispaqmi, paymi yachachiwanchis kay tiempopi kusisqa kausananchispaq jamuq tiempopitaq askha bendicionkunata qowasunchis (Isaías 48:17).

▸ 1 capítulo, 10 párrafo

Jehová Diosqa kamawaranchis noqallanchismanta imatapas decidinanchispaqmi manan robot-ta jinachu ruwawaranchis (Deuteronomio 30:19; Josué 24:15). Atinchismi allin kaqta decidiyta. Ichaqa sichus mana cuidadowanchu imatapas decidisun chayqa, mana allintan decidisunman. Sapankanchismi decidinanchis kanqa Jehová Diosta kasukuyta mana kasukuytapas.

▸ 1 capítulo, 12 párrafo

Jehová Diosqa allinta portakunanchispaqmi kamachikuykunata qowaranchis. Bibliapin chay kamachikuykunamanta yachanchis, kausayninchispi imaynata yanapawananchistapas (Proverbios 6:16-19; 1 Corintios 6:9-11). Chay consejokunan yanapawanchis imatas  Jehová Dios allinpaq otaq mana allinpaq qhawarisqanta. Yanapawallanchistaqmi munakuywan, sumaq sonqowan jujkunata tratananchispaq, allinta decidinanchispaqpas. Runakunaq kamachikuyninkunaqa cambianmi, Diospa kamachikuyninkunan ichaqa mana cambianchu (Deuteronomio 32:4-6; Malaquías 3:6). Chay kamachikuykunata kasukuspan yuyayninchista cuerponchistapas cuidasunchis.

▸ 1 capítulo, 17 párrafo

Conciencianchisqa allin kaqta mana allin kaqtan reparachiwanchis. Jehová Diosqa sapankanchismanmi concienciata qowaranchis (Romanos 2:14, 15). Conciencianchis allin kananpaqqa Diospa yachachikuyninkunaman jinan educananchis. Chhaynapin yanapawasun Diospa sonqonpaq jina decidinanchispaq (1 Pedro 3:16). Willawanchismi mana allinta decidishaqtinchis otaq malta sientechiwanchis pantaqtinchis. Conciencianchisqa waqllipunmanmi, Diospa yanapayninwanmi ichaqa allinta llank’anman. Allin concienciayoq kasun chayqa allinmi sientekusun.

▸ 2 capítulo, 3 párrafo

Diosta manchakuqqa anchatan Diosta munakun, manataqmi imatapas ruwayta munanchu llakichinanpaq jinaqa. Diosta manchakuspaqa allin kaqtan ruwasun mana allin kaqtataq cheqnikusun (Salmos 111:10). Jinaspapas Diospa nisqantan kasukusun, prometesqanchistan cumplisun, allinta piensaspan imatapas ruwasun, runamasinchistapas sumaqtan tratasun.

▸ 2 capítulo, 9 párrafo

Diosta munakuqkunaqa malmi sientekunchis mana allin ruwasqanchismanta. Sichus ima mana allintapas ruwaranchis chayqa Jehová  Diosmantan perdonta mañakunanchis. Diosqa Jesuspa sacrificakusqanrayku perdonawasunman (Mateo 26:28; 1 Juan 2:1, 2). Jinaspapas Jehová Dios perdonawananchispaqqa kallpachakunanchismi manaña chay juchaman urmananchispaq (Salmos 103:10-14; 1 Juan 1:9; 3:19-22). Tukuy atisqanchistan ruwananchis ima debilidadninchistapas vencenanchispaq, mana allin piensaykunata umanchismanta orqonanchispaq, Diospa kamachikuyninkunaman jina kausananchispaqpas.

▸ 2 capítulo, 18 párrafo

Sichus pipas jatun juchaman urmaspa mana arrepientekunchu nitaq Jehová Diospa kamachikuyninkunata kasukuyta munanchu chayqa, iñiq t’aqamantan expulsasqa kapun. Expulsasqa runawanqa manañan juñukunanchischu ni rimananchispaschu (1 Corintios 5:11; 2 Juan 9-11). Umalliqkunaqa mana arrepientekuqkunata expulsaspankun protegeshanku Jehová Diospa sutinta hermanonchiskunatapas (1 Corintios 5:6). Jinaspapas chay runatan yanapanman Diospa llaqtanman jujmanta kutimunanpaq (Lucas 15:17).

▸ 3 capítulo, 19 párrafo

Jehová Diosqa munakuwanchismi yanapaytataqmi munawanchis. Chaypaqmi Bibliawan payta munakuq runakunawan consejokunata qowanchis. Pantaq runa kasqanchisraykun llapanchispas necesitanchispuni Diospa yanapayninta (Jeremías 17:9). Sichus kasukusunchis Diospa utilizasqan runakunata chayqa, Jehová Diostan respetashanchis kasukushanchispas (Hebreos 13:7).

▸ 4 capítulo, 2 párrafo

Pantaq runa kasqanchisraykun facil-llata egoistaman orgullosoman tukusunman. Diosqa humilde kananchistan munan. Jehová Dioswan comparakuspaqa manan imapaschu kanchis, chayta yuyariymi yanapawasun humilde kananchispaq (Job 38:1-4). Humilde runaqa jujkunapin astawan piensan, orgulloso runan ichaqa jujkunamanta aswan allinpaq qhawarikun. Humilde runaqa yachanmi imapi allin kasqanta imapi mejoranan kasqantapas. Manataqmi neganchu imapi pantasqanta, yachanmi disculpakuyta, chaskikunmi consejokunata, Jehová Diospin confian, kasukuntaqmi kamachisqantapas (1 Pedro 5:5).

▸ 4 capítulo, 4 párrafo

Autoridadniyoq runaqa derechonpi kashan kamachinanpaq imata decidinanpaqpas. Jehová Diosqa tukuyta kamasqanraykun cielopipas allpapipas aswan autoridadniyoq. Payqa runakunata yanapananpaqmi autoridadninta utilizan. Jinaspapas wakin runakunamanmi autoridadta qoran cuidawananchispaq. Ejemplopaq, tayta-mamakunaman, iñiq t’aqapi umalliqkunaman, llaqtata kamachiqkunapas autoridadniyoqmi kanku. Diosqa munanmi paykunata kasukunanchista (Romanos 13:1-5; 1 Timoteo 5:17). Ichaqa runakunaq churasqan leykuna Diospa kamachikuynin contra kaqtinqa, Diostan ñaupaqta kasukunanchis (Hechos 5:29). Diospa utilizasqan autoridadkunata kasukuspan rikuchishanchis Diospa decidisqanta respetasqanchista.

▸ 4 capítulo, 7 párrafo

Jehová Diosqa umalliqkunawanmi iñiq t’aqakunata cuidan, paykunaqa experienciayoq hermanokunan kanku (Deuteronomio 1:13; Hechos 20:28). Paykunan yanapawanchis Dioswan amigontin kashanallanchispaq, juj nisqalla allin organizasqa Diosta adorananchispaqpas  (1 Corintios 14:33, 40). Umalliqkuna santo espirituwan nombrasqa kanankupaqqa umalliqkunapaq Bibliapi kaq kamachikuykunatan cumplinanku (1 Timoteo 3:1-7; Tito 1:5-9; 1 Pedro 5:2, 3). Noqanchisqa confianchismi apoyanchistaqmi Diospa llaqtanta, chaymi umalliqkunata kasukunchis (Salmos 138:6; Hebreos 13:17).

▸ 4 capítulo, 8 párrafo

Jehová Diosmi tayta-mamakunaman autoridadta qoran wawankunata cuidanankupaq. Biblian ichaqa willawanchis esposo familiapi umalliq kasqanta. Sichus juj familiapi mana tayta kanchu chayqa, esposan familianta umallinan. Familiata umalliqmi mijunata, p’achata, maypi tiyanankutapas qonan. Astawanqa Jehová Diosta servinankupaq yanapanan. Ejemplopaq, familianwan kuska juñunakuykunaman rinan, predicacionman lloqsinan, kuskataqmi Bibliatapas estudiananku. Familiata umalliqmi imachus ruwanankutaqa decidinan. Payqa Jesús jinan familianta sumaqta munakuywan tratanan, manan jayk’aqpas millaytaqa tratananchu. Chayta ruwaqtinmi familianpi llapa kaqkuna kusisqa sientekunqaku, astawanqa Jehová Dioswanmi amigontin kanqaku.

▸ 4 capítulo, 12 párrafo

Janaq pachapaq ajllasqa wakin cristianokunatan Diosqa utilizan llaqtanta diriginanpaq, chay grupo hermanokunatan “umalliq t’aqa” nispa nikun. Apostolkunaq tiemponpin Jehová Diosqa umalliq t’aqawan cristianokunata dirigiran payta adoranankupaq predicanankupaqpas (Hechos 15:2). Kay tiempopipas umalliq t’aqan Diospa llaqtanta dirigishan cuidashanpas. Chay hermanokunaqa imatapas decidinankupaqqa Bibliatan estudianku Diospa santo espirituntataq mañakunku. Chay grupo hermanokunatan Jesusqa “allin yuyayniyoq junt’aq kamachi” nispa sutichallarantaq (Mateo 24:45-47).

▸ 4 capítulo, 15 párrafo

Yaqapaschá mayninpi wakin hermanakunata iñiq t’aqapi hermanokunaq ruwananta ruwanankupaq kamachinkuman. Chayta ruwaq hermanakunaqa umankutan tapakunanku, chhaynapin respetashanku Jehová Diospa churasqan autoridadta. Ichaqa wakin ruwaykunallapin umankuta tapakunanku. Ejemplopaq, Bibliamanta juj runaman estudiota qoshaspa esposon otaq juj bautizasqa hermano chaypi kashaqtin (1 Corintios 11:11-15).

▸ 4 capítulo, 17 párrafo

Cristianokunaqa manan politicapi participanchischu (Juan 17:16). Jehová Diosta serviqkunaqa Diospa gobiernollantan apoyanchis. Jesús jinan mana politicapi nitaq guerrakunapipas participanchischu.

Jehová Diosmi kamachiwanchis ‘autoridadkunata kasukunanchispaq’ (Tito 3:1, 2; Romanos 13:1-7). Ichaqa kamachiwallanchistaqmi ama pitapas wañuchinapaq. Chaymi cristianokunataqa conciencian mana permitinchu guerraman rinanpaq. Sichus juj cristiano ajllakuyta atin servicio militar rantinpi juj formamanta llaqtanta servinanpaq chayqa tapukunanmi: “¿Permitiwanqachu concienciay chayta ruwanaypaq?”, nispa.

Noqanchisqa Jehová Diosllatan adoranchis kamaqninchis kasqanrayku. Respetanchisña nacionninchispa simbolonkunata chaypas, manan banderata napaykunchischu, nitaq himno nacionalta takinchischu (Isaías 43:11; Daniel 3:1-30; 1 Corintios 10:14). Diosta serviqkunaqa llaqtankupi elección kaqtinqa manan pitapas votonkuwan apoyankuchu. Paykunaqa Diospa gobiernollantan apoyanku (Mateo 22:21; Juan 15:19; 18:36).

▸ 5 capítulo, 2 párrafo

¿Iman kay pachaq espiritun? Satanaspa piensasqanman jina piensaymi, ruwasqanman jina ruwaymi. Yaqa llapa runakunan mana Diosta munakunkuchu nitaq kamachikuyninkunatapas kasukunkuchu, chhayna kaspan kay pachaq espiritunwan controlachikushanku (1 Juan 5:19; Efesios 2:2). Jehová Diosta serviqkunan ichaqa chay espirituwan mana controlachikunanchischu (Efesios 6:10-18). Aswanpas kallpachakunchismi Diospa kamachikuyninkunata kasukunanchispaq, Diospa piensasqanman jina piensananchispaqpas.

▸ 5 capítulo, 7 párrafo

Apóstata runakunaqa Bibliaq yachachisqanta cambiaspan Jehová Diospa Jesuspa contranpi jatarinku, jujkunatataq tanqanku paykunata qatikunankupaq (Romanos 1:25). Paykunaqa iskayachiytan munanku Jehová Diosta imayna adorasqanchista. Apostolkunaq tiemponpipas karanmi apóstata runakunaqa, kunan tiemponpipas kanmi (2 Tesalonicenses 2:3). Diosta tukuy sonqonwan serviqkunaqa manan apóstata runakunawan juñukunanchischu nitaq paykunata uyarinanchispaschu jujkunaña tanqawaqtinchispas. Chayta ruwaspan Jehová Diospaq junt’aq kanchis.

▸ 5 capítulo, 9 párrafo

Diosmi Israel runakunata kamachiran juchankumanta perdonasqa kanankupaqqa sacrificiota jaywanankuta, chaypaqmi aparanku mijuykunata, aceiteta, animalkunatapas. Chaywanmi paykunaqa yacharanku Jehová Dios paykunaq juchanta perdonay munasqanta. Qhepamanqa Jesusmi vidanta entregaran juchanchiskuna  perdonasqa kananpaq. Chaymantapachan manaña necesitakuranchu sacrificiokunata jaywayqa (Hebreos 10:1, 4, 10).

▸ 7 capítulo, 6 párrafo

Moisesman Diospa qosqan kamachikuypin Diosqa permitiran animalkunata wañuchispa mijunankupaq. Permitillarantaqmi sacrificiopi jaywanankupaqpas (Levítico 1:5, 6). Ichaqa manan permitiranchu animalkunata ñak’arichinankuta (Proverbios 12:10). Aswanpas leykunatan qoran animalkunata mana maltrataspa cuidanankupaq (Deuteronomio 22:6, 7).

▸ 7 capítulo, 6 párrafo

Yawarpa aswan juch’uy partenkuna. Yawartan t’aqakun tawa importante partekunaman. Chaykunan glóbulos rojos, glóbulos blancos, plaquetas, plasma ima. Chay partekunatan aswan juch’uy partekunamanraq t’aqakun, chaytataq sutichakun: “Yawarpa aswan juch’uy partenkuna”, nispa. a

Ichaqa, ¿aceptasunmanchu yawarpa aswan juch’uy partenkunata? Bibliaqa manan chaymanta rimanchu, chaymi sapanka cristiano conciencianpa nisqanman jina decidinan.

Wakin cristianokunan yawarpa aswan juch’uy partenkunata rechazanku. Paykunaqa piensankun Diospa kamachisqanman jinaqa llapallan yawarta pampaman jich’akunan kasqanta (Deuteronomio 12:22-24).

Wakin cristianokunan ichaqa jujnirayta decidinku. Concienciankun aceptan yawarpa aswan juch’uy partenkuna churachikuyta, paykunaqa  yawarpa aswan juch’uy partenkunataqa manan yawarta jinañachu qhawarinku.

Yawarpa aswan juch’uy partenkunata aceptankichus icha manachus chayta manaraq decidishaspayki kay tapuykunata ruwakuy:

• ¿Entiendenichu yawarpa aswan juch’uy partenkunata rechazaspayqa wakin medicamentokunata, yawarniy ama lloqsinanpaq tratamientokunatapas rechazasqayta?

• ¿Atiymanchu doctorman explicayta imaraykuchus yawarpa aswan juch’uy partenkunata aceptasqayta otaq mana aceptasqaytapas?

Tratamientokuna. Cristianokunaqa manan yawarninchista donanchischu nitaq waqaychanchischu manaraq operawashaqtinchisqa. Ichaqa wakin tratamientokunapin yawarninchista utilizakunman. Sapanka cristianon decidinan imaynatas yawarninta utilizakunqa operakushaqtin otaq juj examenta ruwakunanpaq. Juj  tratamientota chaskiqtinqa yaqapaschá pisi tiempolla yawarnin mana cuerponpichu kanqa. Chaymanta astawan yachanaykipaq qhaway 2000 wata La Atalaya, 15 octubre, 30, 31 paginakunata.

Ejemplopaq juj tratamientoq sutinmi hemodilución, chay tratamientopiqa operakuq runaq wakin yawarnintan orqonku operanankupaqña kashaqtin, jinaspa orqosqanku yawarpa rantinpi churanku expansor de volumen nisqa unuta. Chaymantataq operashaqtinku otaq operayta tukuqtinku orqosqanku yawarta jujmanta cuerponman churapunku.

Juj tratamientoq sutintaq recuperación de sangre nisqa. Chay tratamientopiqa operashaqtinkun llosisqan yawarta juj maquina ch’onqan jinaspa chay yawarta limpiaspa kaq ratolla otaq operasqanku qhepaman cuerponman churapunku.

Ichaqa sapanka medicokunan chikan jujnirayta chay tratamientokunata ruwanku, chayraykun manaraq operakushaspa otaq manaraq juj examenta ruwachikushaspa allinta entiendenanchis imaynatas yawarninchis chay tratamientopi utilizakunqa chayta.

Yawarniykita imaynatas utilizakunqa chayta decidinaykipaqqa kaykunata tapukuy:

• Yawarniy pisi tiempollapas waqaychasqa kaqtin, ¿yawarniyta jinaraqchu qhawarisaq? Icha, ¿jich’apunaychu kanqa? (Deuteronomio 12:23, 24.)

•   ¿Imaynan sientekusaq tratamiento chaskisqaypi yawarniyta orqospa limpiaqtinku otaq imawanpas yapaykuqtinku, jinaspa jujmanta cuerpoyman churaqtinku?

• ¿Entiendenichu llapa tratamientokunata rechazaspayqa yawarniyta analizanankutapas, hemodiálisis otaq máquina circulación extracorpórea nisqa tratamientotapas rechazasqayta?

Manaraq yawarpa aswan juch’uy partenkunata otaq ima tratamientotapas aceptashaspan Jehová Diospa yanapayninta mañakunanchis astawantaq investigananchis chaykunamanta (Santiago 1:5, 6). Chay qhepamantaq Bibliaq nisqanman jina educasqa conciencianchiswan decidinanchis. Manan pitapas tapunanchischu: “¿Imatan decidiwaq kay situacionpi tarikuspayki?”, nispaqa (Romanos 14:12; Gálatas 6:5).

▸ 7 Capítulo, 11 párrafo

Limpion kananchis piensasqanchispi, rimasqanchispi, ruwasqanchispipas. Jehová Diosmi niwanchis tukuy imaymana qhelli ruwaykunata saqepunanchispaq (Proverbios 1:10; 3:1). Ima tentaciontapas atipananchispaqqa ñaupaqmantapachan decidisqaña kashananchis Jehová Diospa kamachikuyninkunata kasukunanchispaq. Sapa kutillanmi Jehová Diospa yanapayninta mañakunanchis, chhaynapin piensasqanchis limpio kanqa. Decidisqataqmi kashananchis qhelli ruwaykunata rechazananchispaq (1 Corintios 6:9, 10, 18; Efesios 5:5).

▸ 8 capítulo, 11 párrafo

Mana p’enqarikuspa millay qhelli simikunata rimaqkuna otaq millay qhellikunata ruwaqkunapas, manan respetankuchu Jehová Diospa kamachikuyninkunata. Chay juchata ruwaqkunataqa comité judicial nisqatan ruwanku. ‘Millakunapaq kaq ruwaqkunapin’  kan imaymana clase juchakuna. Imayna chay jucha kasqanman jinan comité judicial nisqata ruwakun (Gálatas 5:19-21; Efesios 4:19; astawan yachanaykipaq qhaway “Pregunta de los lectores” La Atalaya 15 Julio, 2006 watamanta).

▸ 9 capítulo, 7 párrafo; 12 capítulo, 10 párrafo

Jehová Diosqa munan casarasqakunalla warmi-qhari puñuspa kusirikunankuta, ichaqa pipas warmikayninta otaq qharikayninta llamikuspa kusirikun chayqa manan allinchu. Chayta ruwaqqa manan Jehová Dioswan amigontinñachu kanman. Jinaspapas warmi-qhari puñuyllapiña piensaspan millaykunata ruwayta munanman (Colosenses 3:5). Sichus chay qhelli ruwaypi kashanki chayqa kallpachakuy chay viciota saqepunaykipaq (Salmos 86:5; 1 Juan 3:20). Chay sasachakuypi tarikunki chayqa Jehová Diospa yanapayninta tukuy sonqoykiwan mañakuy. Amataq qhawaychu pornografiata, chayta qhawaypas qhelli jucha ruwaykunapin piensachisunki. Jinaspapas sichus papayki cristiano chayqa paywanmi rimawaq otaq iñiyninpi allin poqosqa cristianowan (Proverbios 1:8, 9; 1 Tesalonicenses 5:14; Tito 2:3-5). Jehová Diosqa anchatan kusikun kausayninchispi limpio kananchispaq kallpachakuqtinchisqa (Salmos 51:17; Isaías 1:18).

▸ 9 capítulo, 9 párrafo

Jehová Diosqa munan warmipas otaq qharipas jujllawan casarakunankutan. Ñaupa Israel llaqtapin Jehová Diosqa permitiran juj qhari askha esposayoq kananta, ichaqa warmita qharita kamashaspaqa manan chaytachu munaran. Kay tiempopiqa Jehová Diosqa manan munanchu juj qhari askha esposayoq kananta, juj warmipas askha qosayoq kananta (Mateo 19:9; 1 Timoteo 3:2).

▸ 10 capítulo, 12 párrafo

Jehová Diosqa munan casarasqakuna kuskalla tiyanankutan (Génesis 2:24; Malaquías 2:15, 16; Mateo 19:3-6; 1 Corintios 7:39). Jujninku piwanpas pantallaqtinmi Diosqa permiten divorcio kananta. Ichaqa mana juchaman urmaqllatan Diosqa permiten munaspa divorciakunanpaq (Mateo 19:9).

Wakin casarasqa cristianokunan parejankumanta t’aqakuranku manaña parejanku jujwan pantaranchu chaypas (1 Corintios 7:11). Ichaqa kaykuna kallaqtinmi parejanmanta t’aqakuyta atinman:

• Juj esposo familianta mana manteneyta munaqtin, chhaynapi familian tarikuqtinqa manan qolqenku nitaq mijunankupas kanmanchu (1 Timoteo 5:8).

• Juj esposo otaq esposa parejanta nishuta maqaspa parejanpa vidanta peligromanraq churaqtin (Gálatas 5:19-21).

• Jehová Diosta servinanta esposon otaq esposan nishutapuni jark’akuqtin (Hechos 5:29).

▸ 11 capítulo, 19 párrafo

LIapanchispas munanchismi jujkuna felicitawananchista kallpachawananchistapas (Proverbios 12:25; 16:24). Atinchismi jujkuna jujkunawan sumaq simikunawan kallpachanakuyta consolanakuytapas. Chaymi hermanonchiskunata yanapanqa Jehová Diosta servishanallankupaq problemakunapiña tarikuqtinkupas (Proverbios 12:18; Filipenses 2:1-4). Llakipi tarikuq hermanotaqa uyarinanchismi imayna sientekusqanta entiendenapaq, chhaynapin yachasun ima niyta imata paypaq ruwaytapas (Santiago1:19). Hermanokunata allinta reqsinanchispaqmi kallpachakunanchis, chhaynapin entiendesun imayna sientekusqankuta imachus necesitasqankutapas. Jinaspa yanapayta atisunchis Jehová Diospi confianankupaq. Payllan tukuy ima llakipi kallpachaq Diosqa (2 Corintios 1:3, 4; 1 Tesalonicenses 5:11).

▸ 12 capítulo, 16 párrafo

Bibliapiqa manan kanchu juj kamachikuy imayna casarakuymanta. Sapanka llaqtapin jujniray costumbrekuna kan manataqmi kaq documentotachu presentanku (Génesis 24:67; Mateo 1:24; 25:10; Lucas 14:8). Casarakuy p’unchaypiqa aswan importanteqa casarakuqkuna Jehová Diospa ñaupanpi prometenakusqankun. Wakinqa munankun prometenakushaqtinku familianku amigonkupas paykunawan kanankuta. Chay p’unchaymi juj umalliq paykunapaq discursota qon. Sapanka parejakunan decidinanku casarakusqanku p’unchaypi fiesta kanqachus manachus chayta (Lucas 14:28; Juan 2:1-11). Ichaqa Jehová Diosta jatunchanankupaq jinan imatapas decidinanku (Génesis 2:18-24; Mateo 19:5, 6). Bibliapi yachachikuykunan yanapanqa allinta decidinankupaq (1 Juan 2:16, 17). Sichus casarakuqkuna decidinku alcoholniyoq ujanakuna servikunanta chayqa, controlasqan kanan (Proverbios 20:1; Efesios 5:18). Sichus musicata churanqaku otaq tusunqaku chayqa, Jehová Diosta jatunchanapaq jinan kanan. Casarakuqkunaqa Jehová Diosta serviypi paykunapura reqsinakuypin astawanqa preocupakunanku, manan casarakunanku p’unchaypichu (Proverbios 18:22; astawan yachanaykipaq qhaway 2006 wata 15 octubre killamanta La Atalaya revistapi 18-31 paginakunata).

▸ 13 capítulo, 18 párrafo

Bibliaq yachachikuyninkunaman jinan imatapas decidinanchis. Kay ejemplopi piensay, sichus parejayki mana Testigochu kanman, jinaspa invitasunkiman familianwan kuska juj fiestaman rinaykipaq. ¿Imatan ruwawaq? Yaqapaschá concienciaykiqa permitisunki rinaykipaq, ichaqa ñaupaqtan explicanayki kanqa chay fiestapi Diospa cheqnisqan costumbrekunapi mana participanaykita. Jinaspapas qhawarinaykin decidisqayki jujkunaq conciencianta afectanqachus icha manachus chayta (1 Corintios 8:9; 10:23, 24).

Sichus jefeyki fiesta p’unchaypi regalota qosunkiman otaq sueldota yapasunkiman chayri, ¿aceptawaqchu? Chayta chaskinaykipaqqa  allintan reparanayki kanqa imaraykuchus chay regalota qoshasunki chayta. Yaqapaschá chay regalota qoshasunki chay fiestata celebrasqanrayku. Otaq llank’asqaykimanta agradecesqa kasqanrayku. Chaykunata jujkunatawan qhawarispan aceptawaq otaq manapas.

Wakinqa yaqapaschá Navidadpi regalota qoyta munaspa nisunkiman: “Noqaqa yachanin navidadta mana festejasqaykita ichaqa regalaytan munayki”, nispa. Yaqapaschá qoykukuq sonqo kasqanrayku chay regalota qosunki. Mayninpin ichaqa pruebaman churayta munaspa otaq chay fiestapi participanaykita munaspa qosunkiman. Chaykunata allinta reparaspan decidiwaq aceptankichus icha manachus chayta. Imata decidispapas Jehová Diospaqmi junt’aq kananchis chhaynapin conciencianchis thaj kanqa (Hechos 23:1).

▸ 13 capítulo, 22 párrafo

Ima problemapipas tarikuspaqa sumaqllatan usqhaylla allichananchis manaraq chay problema jatunman tukushaqtin (Mateo 5:23-26). Cristianokunapaqqa aswan importanteqa Jehová Diosta jatunchaymi hermanonchiskunawan juj nisqalla kausaymi (Juan 13:34, 35; 1 Corintios 13:4, 5).

Sichus cristianokuna negociota ruwaspa ima problemapipas tarikunku chayqa paykunapuran allichananku, manan juezmanchu rinanku. Apóstol Pablon 1 Corintios 6:1-8 textopi consejota qoran hermanontin juicioman jaykuqkunata. Sichus cristianokuna juicioman jaykusunman chayqa Jehová Diosta iñiq t’aqatawanmi mana allinta qhawachisunman. Mateo 18:15-17 textopin niwanchis pi hermanopas yanqamanta tumpawaqtinchis otaq engañawaqtinchis imakuna ruwananchista. 1) Sapallankupi chay problemata allichananku. 2) Mana allichakuqtintaq juj otaq iskay cristianokunaq yanapayninta mañakunanku, paykunaqa iñiyninkupi allin poqosqan kananku. 3) Manapuni allichakuqtintaq umalliqkunaman willananku. Umalliqkunaqa Bibliaq yachachikuyninkunaman jinan consejota qonqaku, sumaqllata problemankuta allichanankupaq. Sichus chay problemapi tarikuq wakin hermanokuna Bibliapi kaq  kamachikuykunata mana kasukuyta munankuchu chayqa, yaqapaschá comité judicialta ruwananku kanqa.

Mayninpiqa atikunmanmi juicioman riyta divorciakunapaq, wawakunawan qhepakunapaq, wawakunapaq mantencionta mañakunapaq, seguro nisqata chaskinapaq, negociopi fracasaspa otaq testamentota respetachinapaq. Sichus chaykunapaq juiciokunaman rinchis chayqa, kallpachakunanchismi sumaqllata allichananchispaq. Chayta ruwaspaqa manan apóstol Pabloq consejo qosqan contrachu ruwashanchis.

Denunciataqa churasunmanmi violación kaqtin, wawakunata abusaqtinku, askha qolqeta suwaqtinku, maqawaqtinchis, runakunata wañuchiqtinkupas. Chayta ruwaspaqa manan apóstol Pabloq consejo qosqan contrachu ruwashanchis.

▸ 14 capítulo, 14 párrafo

Adán Evaq tiemponmantapachan Satanasqa imaymanawan runakunata engañashan (Génesis 3:1-6; Apocalipsis 12:9). Piensasqanchista waqllichispaqa facil-llatan mana allin ruwaykunaman urmachiwasunman (2 Corintios 4:4; Santiago 1:14, 15). Imayna piensasqanta aceptananchispaqmi utilizan politicata, religionta, negociokunata, kusirikuykunata, educacionta, jujkunatapas (Juan 14:30; 1 Juan 5:19).

Satanasqa yachanmi tiemponqa pisillaña kasqanta, chaymi tukuy atisqanta ruwashan runakunata engañananpaq. Astawanqa Dios serviqkunatan engañayta munan (Apocalipsis 12:12). Sichus mana cuidakusunchu chayqa pisi-pisimanta piensasqanchista cambianqa (1 Corintios 10:12). Ejemplopaq, Jehová Diosqa munan matrimoniokuna kuskalla kanankutan (Mateo 19:5, 6, 9). Kay tiempopin ichaqa askha runakuna ninku: “Matrimonioqa pisi tiempollapaqmi, facil-llatan t’aqakusunman”, nispa. Chhayna piensasqanku askha peliculakunapi televisionpi ima rikukun. Cristianokunaqa manapunin chhaynataqa piensananchischu.

 Satanasqa khayna piensananchistan munan: “Manan pipas niwananchu imachus ruwanaytaqa”, nispa (2 Timoteo 3:4). Chhaynata piensasunman chayqa, facil-llatan Jehová Diospa churasqan umalliqkunata mana respetasunmanchu. Ejemplopaq, yaqapaschá juj hermano iñiq t’aqapi umallikunaq kamachisqanta mana kasukuyta munanmanchu (Hebreos 12:5). Juj hermanataq ninman: “Manan acuerdopichu kashani Jehová Dios familiapi umalliq kananpaq qharita churasqanmanta”, nispa (1 Corintios 11:3).

Manapunin Satanaspa piensasqanman jinaqa piensananchischu, aswanpas Jehová Diospa piensasqanman jinan piensananchis, chayta ruwaspan ‘janaq pacha kaqkunapi yuyayninchista’ churashanchis (Colosenses 3:2; 2 Corintios 2:11).

▸ 16 capítulo, 9 párrafo

Llapanchispas qhalilla kaytan munanchis, onqospataq allin tratamientota chaskiyta munanchis (Isaías 38:21; Marcos 5:25, 26; Lucas 10:34). Kay tiempopiqa imaymana clase tratamientokunan kan, chaymi manaraq ima tratamientotapas aceptashaspa ñaupaqta Bibliapi yachachikuykunata qhawarinanchis. Manan qonqananchischu: Diospa gobiernollanmi ima onqoytapas wiñaypaq chinkachinqa. Onqoyninchispi nishuta piensasun chayqa, Jehová Dios serviytan qhepaman churasunman, chayta ruwayqa manan allinchu (Isaías 33:24; 1 Timoteo 4:16).

Tratamientota chaskisqanchisqa manan supaykunaq ruwayninwan mezclasqachu kanan, chaytan allinta qhawarinanchis (Deuteronomio 18:10-12; Levítico 19:31). Chaymi manaraq ima tratamientotapas chaskishaspa ñaupaqta allinta yachananchis chay tratamientomanta. Yaqapaschá layqa ruwaykunawan mezclasqa kashan (Proverbios 14:15). Satanasqa maytan munan supaykunaq ruwayninpi participananchista. Sichus imallapipas chay tratamiento layqa ruwaykunawan mezclasqa kashan chayqa, manan aceptananchischu (1 Pedro 5:8).

▸ 16 capítulo, 18 párrafo