Jehová Diospa testigonwan estudiashanki chayqa, preparakushankichá estudianaykichis qelqata. Huñunakuykunaman rispa astawan yachanaykipaqpas kaqllatataqmi ruwanayki. Huk programaq nisqanman hina preparakuymi allinta yanapasunki.

Qhawariy hayk’aq, maypi estudianaykita. ¿Ima horapi estudiaspan aswan allinta umaykipi hap’iwaq? ¿Tutamantan manaraq llank’ayta qallarishaspachu, icha ch’isintachu wawakunaq puñusqan qhepata? Pisiña tiempoyki kanman chaypas, qhawariy ima horatan tiempota t’aqawaq estudianaykipaq chayta, amataq chay horapi hukkunata ruwaychu. Maypichus allin kanman estudianaykipaq chayta qhawarispa radiota, televisionta, telefonota ima wañuchiy. Manaraq qallarishaspa Diosmanta mañakuy, chaymi yanapasunki ima llakikuyniykitapas qonqaspa tukuy yuyaywan Diospa Siminta estudianaykipaq (Filipenses 4:6, 7).

Kutichina simikunallata marcaspa kutichiy. Ñawpaqtaqa leey título nisqata, qhaway subtítulo nisqakuna imaynata titulowan tupasqanta, qhaway fotokunata, leeytaq tukupunapaq tapuykunata. Chaykunan yanapasunki chay estudio imamanta kasqanta yachanaykipaq. Chay qhepaman sapanka parrafota leespa tapuykunaman kutichiyta maskhay. Bibliapi maskhay mana copiasqa textokunata, qhawariytaq temawan imayna tupasqanta (Hechos 17:11). Kutichiyta tarispaqa yuyarinaykipaq hinalla iskay kinsa simikunata marcay. Chhaynapin huñunakuypi kaspa makiykita hoqarinki entiendesqaykita pisillapi kutichinaykipaq.

Huñunakuykunapaq sapa semana preparakusqaykiwanmi tukuy ‘kaqniykikuna’ otaq yachasqayki yapakunqa (Mateo 13:51, 52).

• ¿Imatan ruwanayki huñunakuykunaman preparasqa rinaykipaq?

• ¿Imaynatan preparakuwaq huñunakuypi tapuykunaman kutichinaykipaq?