¿Reqsinkichu pillatapas Jehová Diospa testigonkunamanta? Yaqapaschá vecinoyki, llank’aqmasiyki, estudiaqmasiyki kashayku otaq Bibliamanta hayk’aqllapas parlarirqanchis. ¿Pikunan kayku? ¿Imaraykun iñisqaykumanta hukkunawan parlariyku?

Vecinoykikunan kayku. Ñoqayku ukhupiqa kanmi tukuy llaqtakunamanta, rimaykunamanta, qhapaq, wakcha runakuna. Wakinqa huk religionmantan karqayku, wakintaq Diospi mana iñirqaykuchu. Ichaqa manaraq Jehová Diospa testigon kashaspan Bibliapi yachachikuykunata allinta t’aqwirirqayku (Hechos 17:11). Qhepamantaq yachasqayku cheqaq kasqanta qhawarispa Jehová Dios yupaychayta akllakurqayku.

Bibliata estudiasqaykun yanapawanku. Ñoqaykupas llapa runakuna hinan sasachakuykunapi tarikuyku otaq imapipas pantayku. Ichaqa Bibliapi kamachikuykunata kasukunaykupaq kallpachakusqaykun yanapawanku aswan allinta kawsanaykupaq (Salmo 128:1, 2). Chayraykun Bibliapi allinkuna yachasqaykumanta runakunaman willariyku.

Bibliaq yachachisqanman hinan kawsayku. Chay yachachikuykunan yanapawanku kusisqa kawsanaykupaq, honrado, sumaq sonqo kanaykupaq, hukkunata respetanaykupaqpas. Yanapawankun allin yuyaywan kawsanaykupaq, allin llank’aq, ch’uya kawsayniyoq kanaykupaq, familiaykuwan hukllachasqa kawsanaykupaqpas. Yachaykun ‘Diosqa mana mayqen runatapas rikch’ayninta qhawaspachu akllasqanta’. Chaymi yaqa llapa nacionkunapi iñiqmasiyku kan, manataqmi huk llaqtayoq kasqaykupas nitaq politicapas t’aqanachiwankuchu. Testigokunaqa huk llaqta hinallan kawsayku (Hechos 4:13; 10:34, 35).

• ¿Imaynapin Jehová Diospa testigonkuna kaqlla kayku huk runakunawan?

• ¿Imakunapin Biblia yanapawanku?