Yawar apaywan onqoq warmita Jesús qhaliyachisqanta rikuspan Jairoqa allinta yacharan Jesús onqosqakunata qhaliyachinanpaq atiyniyoq kasqanta. Ichaqa ‘ususiyqa wañusqañachá kashan’ nispataq piensasharan chayqa, nisharanchá: ‘¿Atinmanraqchu Jesús ususiyta yanapayta?’, nispa (Mateo 9:18).

Chayllamanmi wakin runakuna Jairoq wasinmanta jamuranku, jinaspa willaranku: “¡Ususiykiqa wañurapunñan! ¿Imapaqñan yachachikuqta sayk’uchiwaq?”, nispa (Marcos 5:35).

Maytachá Jairoqa chayta uyarispa llakikuran. Payqa importante runaña karan chaypas, manañan ima ruwaytapas atiranchu ususinta yanapananpaq. Jesusmi ichaqa chay willasqankuta uyarispa Jairota niran: “Ama manchakuychu, iñillay qanqa”, nispa (Marcos 5:36).

Jinan Jesusqa Jairowan kuska wasinta riran. Chaypin runakuna sinchita waqashasqaku. Chaymi Jesusqa paykunata niran: ‘¿Imanaqtinmi waqashankichis? Sipaschaqa manan wañunchu, puñushallanmi’, nispa (Marcos 5:39). Chayta uyarispan paykunaqa Jesusta asipayaranku. Jesusqa chayta niran Diospa atiyninwan wañusqakunata kausarichiy atisqanta rikuchinanpaqmi. Imaynan pi puñushaqtapas rijch’achikullanman, chhaynatan payqa wañusqakunata kausarichiyta atiran.

Jinan Jesusqa runakunata jawaman lloqsichispa Pedrowan, Santiagowan, Juanwan, chay sipaschaq tayta-mamanwan imalla sipaschaq kasqanman jaykuran. Jinaspa sipaschaq makinta jap’ispa niran: “Talita kumi”, nispa. Chayqa “sipascha, ¡jatariy!” ninantan nin (Marcos 5:41). Jinan sipaschaqa kaq rato jatarispa purikachayta qallariran. Tayta-mamantaq anchatapuni chaywan kusikuranku. Cheqaqtapuni kausarimpusqanta rikuchinanpaqtaq Jesusqa kamachiran sipaschaman mijuchinankupaq.

Chaymantan Jesusqa imaynan ruwallaqpuni jinata paykunatapas kamachiran ama pimanpas chay milagro ruwasqanmanta willanankupaq. Paykunan ichaqa ancha kusisqa kasqankurayku lliuman chayta willaranku (Mateo 9:26). Chaytapaschá noqanchispas ruwasunman karan pi familianchispas kausarimpunman karan chayqa. Jesusqa iskay runatañan chaywanqa kausarichisharan.