“Cesarea Filipo” nisqa ladopi Jesuspa rijch’aynin jujnirayman tukusqan qhepaman, juj waynachatapas qhaliyachisqan qhepamanmi Jesusqa Capernaum ladoman riran. Payqa manan munaranchu runakuna chayta yachananta, chaymi discipulonkunallawan riran (Marcos 9:30). Paykunatan Jesús niran: “Runaq Churinqa enemigonkunaq makinmanmi jap’ichisqa kanqa, paykunan wañuchinqaku, kinsa p’unchaymantataq kausarichisqa kanqa”, nispa (Mateo 17:22, 23). Chhaynapin paykunata preparasharan imachus pasanan karan chaypaq.

Jesusqa manan chay kutillaraqchu wañupunanmantaqa rimasharan. Ñan chaymantaqa juj kutipipas rimaranña, chaymi Pedropas mana wañunanta munaspa Jesusta anyaran (Mateo 16:21, 22). Chaymantapas kinsa apostolkunan juj rijuriypi uyariranku Jesuspa “ripunanmanta” rimakusqanta (Lucas 9:31). Chaywanpas paykunaqa Jesuspa nisqanta mana allinta entiendespan “maytapuni llakikuranku” (Mateo 17:23). Ichaqa manchakurankun chaymanta tapuyta.

Capernaum llaqtapiña kashaqtinkun templopaq impuestota cobraqkunaqa Pedroman achhuykuranku, jinaspa tapuranku: “¿Paganchu yachachiqniykichis templomanta impuestota?”, nispa (Mateo 17:24). Chaytaqa ninkuman karan ima jawallapas Jesusta juchachanankupaqmi.

Jinan Pedroqa “arí, paganmi” niran. Wasiman jaykumuqtintaq Jesusqa chay pasasqanta yachaspa Pedrota niran: “Simón, ¿ima niwaqtaq? ¿Pimantataq kay pacha reykunari impuestokunata cobranku? ¿Wawankunamantachu icha waj runakunamantachu?”, nispa. Pedrotaq niran: “Waj runakunamantan”, nispa, jinaqtinmi Jesusqa niran: “Chhaynaqa wawankunaqa manan paganankuchu ¿riki?”, nispa (Mateo 17:25, 26).

Jesuspa Yayanqa templopi adorasqanku tukuy atiyniyoq Jehová Diosmi karan, chaymi payqa mana obligasqachu kasharan impuestota pagananpaq. Chaywanpas Jesusqa niranmi: “Paykunata ama phiñachinapaq qochaman rispa anzuelota wijch’uykamuy, jinaspa ñaupaqta jap’isqayki challwaq siminta kicharinki, chaypin tarinki juj qolqeta. Chayta paykunaman qomunki noqamanta qanmantawan”, nispa (Mateo 17:27).

Chaymantan apostolkunaqa Jesusta tapuyta munasharanku pichus janaq pacha gobiernopi kuraq kanman chayta. Paykunaqa manchakurankun wañupunanmanta Jesusta tapuyta, ichaqa manan manchakurankuchu imachus paykunamanta kanan karan chayta tapuytaqa. Jesusqa yacharanñan imachus piensasqankuta, yachallarantaqmi imamantachus Capernaum llaqtaman rishaspa discutisharanku chaytapas, chaymi paykunata tapuran: “¿Imamantan ñanpi discutimusharankichis?”, nispa (Marcos 9:33). Paykunataq ch’inlla karanku, mayqenninkuchus kuraq kasqankumanta ñanpi churanakamusqankurayku. Chaywanpas tapurankupunin: “¿Pitaq janaq pacha gobiernopiri kuraq kanqa?”, nispa (Mateo 18:1).

Apostolkunaqa yaqa kinsa watañan Jesuswan purisharanku, chaywanpas discutisharankuraqmi mayqenninkuchus uma kanankumanta. ¿Imaraykun chhayna karanku? Lliu runa jina juchasapa kasqankuraykun. Chaymantapas wiñasqanku judío religionpiqa lliumi importante kayta munaranku. Jinaspapas Pedroqa janaq pacha llavekunatataq chaskiran chayqa, aswan  allinpaqchá pay kikinta qhawarikuq. Santiagowan Juanwanpas chhaynatachá qhawarikuqku Jesuspa rijch’ayninta jujnirayman tukusqanta rikusqankurayku.

Imaynaña kaqtinpas Jesusqa juj erqechata chaupinkupi sayaykachispa discipulonkunata niran: “Manachus cambiankichis, manataqchus erqechakuna jina kankichis chayqa, manapunin janaq pacha gobiernomanqa jaykunkichischu. Chhaynaqa, pipas kay erqecha jina k’umuykukuq kaqmi janaq pacha gobiernopiqa kuraq kanqa. Pipas khayna wawata sutiypi chaskiqqa noqatawanmi chaskiwashan”, nispa (Mateo 18:3-5).

Chhayna munaytan Jesusqa paykunata yachachiran. Payqa manan paykunawan phiñakuranchu manataqmi ima nispapas phiñarikuranchu. Aswanmi juj erqechata qhawarichispa allinta yachachiran mana jatunchakunankupaq. Imaynan erqechakunaqa mana imamantapas jatunchakunkuchu, chhaynan paykunapas kananku karan. Chaymi Jesusqa niran: “Pipas qankuna ukhupi k’umuykukuqmi kuraqqa kanqa”, nispa (Lucas 9:48).