Decápolis ladomanta Jesús kutimpushasqanta yachaspankun “ancha askha runakuna” qocha patapi juñukuranku Jesusta chaskinankupaq, chayqa Capernaum ladopin kanman karan. Paykunamanta askhachá uyariranku Jesús sinchi wayrata thanichisqanmanta, wakinkunapas uyarirankuchá iskay runakunamanta supaykuna qarqosqanmanta (Marcos 5:21). Maytachá paykunaqa Jesusta rikuyta munasharanku.

Sinagogapi umalli Jairo sutiyoq runapas anchatan paywan tupayta munasharan. Paypa ancha munasqa sapallan ususichanmi sinchi onqosqa kasharan, 12 watachallanpiraqmi kasharanpas. Chaymi Jesusman qonqorikuspa yapa-yapamanta rogakuran: “Ususichaymi sinchi onqosqa kashan, jamuy, llamiykampuway, chhaynapi qhaliyapuspa kausananpaq”, nispa (Marcos 5:23; Lucas 8:42).

Jinan Jesusqa Jairowan kuska riran. Runakunapas askhan qhepanta riranku, paykunaqa munasharankuchá ima milagrotapas chayman chayaspa ruwananta. Ñanllapiraq kashaspan ichaqa khuyay onqosqa warmita Jesús yanaparan.

Chay warmiqa 12 watañan yawar apay onqoywan sinchita ñak’arishasqa, askha doctorkunawanmi jampichikusqapas. Tukupusqañan lliu imaymanantapas, ichaqa manan qhaliyayta atisqachu, aswanpas “astawanraqmi onqopusqa” (Marcos 5:26).

Chay onqoyqa sinchi ñak’arichiq kasqanmantapas p’enqaymi karan, chaymi chay warmiqa mana comuntaqa chaymanta rimanmanchu karan. Chaymantapas Diospa kamachikuyninman jinaqa, pipas chhayna onqoyniyoq kaqqa “qhelli” nisqan karan. Pipas payta tupaykuqpas, otaq yawarchasqan p’achallantapas tupaykuqpas “qhelli” nisqallataqmi karan inti chinkaykunankama (Levítico 15:25-27).

Chaymi chay warmiqa ‘Jesusmanta rimasqankuta uyarispa’ maypichus pay kasharan chayman riran. Ichaqa chhayna onqoyniyoqtaq kasharan chayqa, mana reparachikuq jinallan runakuna ukhupi puriran. Paymi sonqollanpi nisqa: “Jawa p’achallantapas llamiyrusaq chayqa, qhaliyarusaqmi”, nispa. Jinan Jesuspa p’achanta llamiykuqtin kaq rato onqoynin chinkapuran, chhaynapin ‘chay ñak’arichiq onqoymanta qhali kapuran’ (Marcos 5:27-29).

Jesustaq paymanta juj chikan kallpa lloqsisqanta reparaspa niran: “¿Pin llamiyramuwan?”, nispa. Llapankupas: “Manan noqachu”, niqtinkutaq Pedroqa niran: “Yachachikuq, runakunan tanqanakuspa ñit’imushasunkiku”, nispa. Jesustaq niran: “Pipunichá llamiramuwan, reparanin noqamanta atiy lloqsisqanta”, nispa (Lucas 8:45, 46). Maytachá chay warmiqa chaywan mancharikuran.

Chaymi payqa manchasqa khatatatasparaq Jesuspa ñaupanpi k’umuykuran. Jinaspa lliu runa uyarishaqtin willakuran chay millay onqoyninmanta qhaliyapusqanta. Jesustaq sumaqllata niran: “Ususilláy, iñiyniykin qhaliyachisunki, ama llakikuspalla ripuy, qhaliñan kapunki chay ñak’arichiq onqoyniykimantaqa”, nispa (Marcos 5:34).

Rikusqanchis jina, kay pachata kamachimunanpaq Diospa ajllasqan reyqa ancha khuyapayakuqmi, ancha atiyniyoqtaqmi kanpas.