Punkillisqa runata qhaliyachisqan qhepamanmi Jesusqa invitaqnin fariseoq wasinpi rikuran wakin invitasqa runakuna ñaupaq tiyanakunata ajllakusqankuta. Chaymi payqa k’umuykukuq kayta yachachinanpaq juj ejemplota churaran.

Niranmi: “Pipas casarakuy fiestaman invitasunki chayqa, ama ñaupaq kaq tiyanapiqa tiyankichu, paqtapas invitaqniyki qanmanta aswan allinpaq jap’isqa runata invitallanmantaq karan, jinaspa nisunkiman: ‘Kay runaman qoy chay tiyanata’, nispa; qantaq p’enqasqa riwaq qhepa tiyanaman”, nispa (Lucas 14:8, 9).

Jinaspa nillarantaq: “Pipas invitasunki chayqa, qhepa tiyanapi tiyaykuy, chhaynapin invitaqniyki runa jamuspa nisunki: ‘Amigolláy, kay ñaupaqman jamuy’, nispa. Chhaynapitaq llapa invitasqakunaq ñaupanpi allin qhawarisqa kanki”, nispa. Chaywanqa manan allin portakuyllatachu Jesusqa yachachisharan, aswanpas k’umuykukuq kanankupaqmi kallpachasharan, chaymi niran: “Pipas jatunchakuqqa k’umuchisqan kanqa, pipas k’umuykukuqtaq jatunchasqa kanqa”, nispa (Lucas 14:10, 11).

Chaymantan Jesusqa invitaqnin fariseota niran: “Almuerzotapas cenatapas wayk’uchispaqa aman wajankichu amigoykikunata, wayqeykikunata, parienteykikunata, ni qhapaq llaqtamasiykikunatapas; yaqapaschá paykunaqa jayk’aqllapas wajarisunkikuman, chhaynapitaq invitasqaykimanta pagapushasunkikuman. Aswanpas jatun mijuyta wayk’uchispaqa invitamuy wajchakunata, ñuk’ukunata, such’ukunata, wist’ukunata, ñausakunatawan, paykunaqa manan imankuwanpas pagapuyta atisunkikumanchu”, nispa (Lucas 14:12-14).

Jesusqa manan prohibisharanchu amigokunata otaq familiakunata mijunaman invitanata, aswanmi payqa discipulonkunata kallpachasharan pisi kaqniyoqkunata invitanankupaq. Chayta ruwaspan paykunaqa allin bendicionta chaskinanku karan. Chaymi Jesusqa niran: “Chay ruwasqaykimantaqa allin runakunaq kausarimpunan tiempopiñan pagasqa kanki”, nispa. Chaykunata uyarispan jujnin invitasqa runa niran: “Kusisqa kachun Diospa gobiernonpi mijuq runaqa”, nispa (Lucas 14:15). Wakin runakunan ichaqa mana chay runa jinachu piensaqku, chaymi Jesusqa niran:

‘Juj runan jatun cenata wayk’uchiran askha invitasqan runakunapaq. Jinaspa kamachinta kacharan: “Jamuychis, ñan tukuy imapas listoña kashan”, nispa nimunanpaq. Invitasqakunan ichaqa sapankanku “manan jamuyta atiymanchu” niranku. Jujninmi niran: “Chajratan rantirukuni, chayta qhawaqmi rinay kashan; manan jamuyta atiruymanchu”, nispa. Jujnintaq niran: “Pisqa masa torokunatan rantirukuni, chaykunaq imayna llank’asqanta qhawaqmi rinay kashan; manan jamuyta atiruymanchu”, nispa. Juj kaqtaq niran: “Kunallanmi casararukuni, chaymi mana jamuyta atiymanchu”’, nispa (Lucas 14:16-20).

Chhayna nisqankuqa manapunin allinchu karan. Pipas chajrata otaq torokunata rantikunanpaqqa ñaupaqtan chaykunata allinta qhawaq. Chay kinsa kaq runapas casarasqañataq kasharan chayqa, atinmanmi karan chay invitacionman riyta. Ichaqa manan mayqenninkupas munarankuchu, chaymi chay invitaq runaqa kamachinta niran:

‘Usqhaylla riy, jinaspa pusamuy wajchakunata, ñuk’ukunata, such’ukunata, ñausakunata, wist’ukunatawan’, nispa. Jinan kamachiqa chayta ruwamuran, chaywanpas kasharanraqmi campoqa. Chaymi patronqa niran: ‘Riy ñankunata, jinaspa llapa tarisqayki runakunata pusamunkipuni,  chhaynapi wasiy junt’a kananpaq. Chay invitasqa runakunamantaqa manapunin mayqenpas wayk’uchisqay cenataqa malliykullanqapaschu’, nispa (Lucas 14:21-24).

Chay ejemplo churasqanwanmi Jesusqa rikuchisharan imaynatas Jehová Diosqa payta utilizasharan gobiernonman runakunata invitananpaq chayta. Ñaupaq invitasqakunan karanku judío umallikuna, ichaqa yaqa llapankun mana kasukurankuchu. Chaymi Jehová Diosqa k’umuykukuq judiokunata, judioman tukupuqkunata ima invitaran. Chaymantataq chay judío umallikunaq pisichasqanku runakunata invitaran, chhaynapi paykunapas gobiernonpi kanankupaq (Hechos 10:28-48).

Chhaynaqa Diospa invitacionninta llapan chaskikuqkunaqa chay jujnin invitasqa runa jinachá ninqaku: “Kusisqa kachun Diospa gobiernonpi mijuq runaqa”, nispa.