Judea ladopi yachachisqan qhepaman, askha runakunatapas qhaliyachisqan qhepamanmi Jesusqa Jordán mayu ladoman riran, chaypin payqa Perea distritopi llaqtan-llaqtanta puriran Diosmanta yachachispa. Pisi tiempollamantan ichaqa Jerusalenta kutinan karan.

Perea ladopi kashaqtinmi juj runa Jesusta tapuran: “Señor, ¿cheqachu pisi runakunalla salvasqa kanqa?”, nispa. Umallikunaqa askhatan rimaqku pikunallachus salvasqa kanankumanta, chaychá chay runaqa chhaynata Jesusta tapuran. Jinan Jesusqa willaran imatachus salvasqa kanapaq ruwana karan chayta. Niranmi: “Tukuy atisqaykichista kallpachakuychis k’illku punkunta jaykunaykichispaq. Niykichismi: Askhan chayninta jaykuyta munanqaku, ichaqa manan atinqakuchu”, nispa (Lucas 13:23, 24).

Jinaspa niran: “Wasiyoq runa jatarispa punkuta candadowan wisq’amuqtinqa, jawapin qhepakapunkichis, jinan punkuta takankichis: ‘¡Señor, kichamuwayku!’, nispa [...]. Paytaq nimusunkichis: ‘Pichá kakunkichispas, ¡Llapaykichis kaymanta ripuychis, mana allin kaqta ruwaqkuna!’”, nispa (Lucas 13:25-27).

Chaywanmi Jesusqa rikuchisharan tardeta chayamuq runaqa wisq’asqata punkuta tarinanta. Sasaña kanman karan tempranota chayamuy chaypas, chay runaqa kallpachakunanmi karan tempranota chayamunanpaq. Chaytan Jesuspa tiemponpi kaq runakunapas ruwananku karan, paykunaqa Dios serviytan ñaupaqta maskhananku karan, ichaqa pisillan chayta ruwaranku; yaqa llapankun mana Diospa yanapayninta chaskiyta munarankuchu. Chaymi Jesusqa niran: ‘Qankunaqa waqankichismi, mana imanakuyta atispataq kiruykichistaraq k’achachachinkichis jawapi wijch’usqa rikukapusqaykichisrayku’, nispa. Jinaspa willaran lliu nacionmanta runakuna ‘Diospa gobiernonpi mesapi tiyaykunankumanta’ (Lucas 13:28, 29).

Chaymantataq Jesusqa judiokunaq pisichasqanku waj llaqtayoq runakunamanta niran: “Wakin qhepapi kaqkunan ñaupaqpi kanqaku”, nispa. Abrahanpa miraynin kasqankumanta jatunchakuq umallikunamantataq niran: “Wakin ñaupaqpi kaqkunataq qhepapi kanqaku”, nispa (Lucas 13:30). Chaywanmi rikuchisharan chay umallikuna Diospa gobiernonman mana jaykunankuta.

Chayllamanmi wakin fariseokuna Jesusta niranku: “Ripuy kaymanta, Herodesmi wañuchiyta munashasunki”, nispa. Kikin Herodespaschá chhayna rimayta qallarichiran, chhaynapi Jesusta ayqechinanpaq. Herodesqa manchakusharanchá bautizaq Juanta jina juj profetatawan wañuchiyta, chaymi chay rimayta qallarichinman karan. Jesusmi ichaqa chay fariseokunata  niran: “Rispaykichis chay atoqta nimuychis: ‘Kunantawan paqarintawanmi supaykunata qarqosaq, onqosqakunatapas qhaliyachisaq, minchhatataq ruwanayta tukusaq’”, nispa (Lucas 13:31, 32). “Atoq” nisqanwanmi Jesusqa rikuchisharan Herodesqa atoq jina yachaysapa kasqanta. Chaywanpas Jesusqa manan pi runaq nisqanman jinachu imatapas ruwanan karan, aswanmi Yayanpa munasqanman jina.

Chaymantan Jesusqa Jerusalenman puririran. Paypa nisqan jina, ‘profetaqa manan waj ladopichu wañunan karan, aswanpas Jerusalén llaqtapin’ (Lucas 13:33). Manaña ima profeciapas willaranchu Mesías Jerusalenpi wañunanmanta chaypas, Jesusqa repararanmi chaypipuni wañunan kasqanta. Jerusalenqa Israel llaqtaq capitalninmi karan, chaypin Diosman sacrificiokunata jaywaqku, chaypin jatun juntapas kasharan 71 umalli runakunayoq, paykunamanmi yanqa profetamanta juchachasqa runakunata apaqku juzgasqa kanankupaq.

Chaymantan Jesusqa Jerusalenmanta niran: “¡Jerusalén, Jerusalén, qanmi kanki profetakunata wañuchiq, qanman kachamusqakunata rumiwan ch’aqeqpas! ¡Askha kutitan wawaykikunata juñuyta munarani imaynan wallpapas chiuchinkunata rafran ukhupi oqllan jinata, qankunan ichaqa mana munarankichischu! Chayraykun wasiykichis qankunaman saqerparisqa kanqa”, nispa (Lucas 13:34, 35). Chhaynapin chay llaqtaqa rikukunan karan Diospa Churinta mana chaskisqanrayku.

Manaraq Jesús Jerusalenman chayashaqtinmi juj fariseo runa payta wasinman invitaran, chay p’unchayqa sábado p’unchaymi karan. Chay wasipin kashasqa juj punkillisqa runa, chaymi chaypi kaqkunaqa makilla Jesusta qhawasharanku “imallatas ruwanqa” nispa. Jinan Jesusqa fariseokunata tapuran: “¿Allinchu kanman sábado p’unchaypi pitapas qhaliyachiy icha manachu?”, nispa (Lucas 14:3).

Paykunataq ch’inlla karanku. Jinan chay onqosqa runata qhaliyachispa Jesusqa niran: “¿Mayqenniykichistaq sábado p’unchaypi wawaykichis otaq toroykichispas pozoman urmaykuqtin mana kaq ratochu orqowaqchis?”, nispa (Lucas 14:5). Paykunataq mana ima nirankupaschu.