JUJ kutinmi Jesusqa uyariqnin runakunata tapuran: ‘¿Pitaq mamayri, pikunataq hermanoykunari?’, nispa (Mateo 12:48). ¿Ima nispan qan kutichiwaq?... Jesuspa mamanqa Marian karan ¿riki? ¿Pikunan karan Jesuspa hermanonkuna?... ¿Karanchu hermanankuna?...

Jesuspa hermanonkunan karan: Santiago, José, Simón, Judas ima. Karanmi hermanankunapas. Jesusqa kuraq kaqmi karan, chaymi llapa hermanonkunaqa sullk’ankuna karanku (Mateo 13:55, 56; Lucas 1:34, 35).

¿Iñirankuchu Jesuspi hermanonkuna?... Qallariypiqa manan mayqenninkupas iñirankuchu (Juan 7:5). Qhepamanmi ichaqa Santiagowan Judaswan qatikuqnin kapuranku. Jinaspa Bibliapi kaq iskay cartakunata qelqaranku. ¿Yachankichu mayqenkuna kasqanta?... Santiago carta Judas cartapiwan.

Bibliaqa willanmi hermanankunapas kasqanta ichaqa manan willanchu sutinkuta. Paykunari, ¿iñirankuchu Jesuspi?... Bibliaqa manan willanchu. Chhaynaqa, ¿imaraykun Jesús runakunata tapuran: ‘Pitaq mamayri, pikunataq hermanoykunari’, nispa?... Chaymanta kunan yachasun.

Manaraq chayta tapushaspan Jesusqa runakunaman yachachisharan, chay qhepallamanmi juj runa rimasqanta tatichispa Jesusta niran: ‘Mamayki hermanoykikuna iman jawapi sayashanku qanwan rimayta munaspa’, nispa. Chaymi Jesusqa qatikuqninkunaman  importante yachachikuyta yachachinanpaq tapuran: ‘¿Pitaq mamayri, pikunataq hermanoykunapasri?’, nispa. Qatikuqninkunata makinwan señalaykuspataq niran: ‘¡Paykunan mamaypas hermanoykunapas!’, nispa.

Chay qhepamanmi niran: ‘Janaq pachapi kaq Yayaypa munayninta ruwaqmi hermanoypas, hermanaypas, mamaypas’, nispa (Mateo 12:47-50). Chaypin yachanchis Jesusqa qatikuqninkuna munakusqanta. Payqa qatikuqninkunatan rikuran hermanonta, hermananta, mamanta jina.

Chay tiempopiqa manan Santiagopas, Josepas, Simonpas, Judaspas Jesuspi iñirankuchu, manan Diospa churinta jinachu rikuranku. Manan creerankuchu mamanku Mariaman ángel Gabrielpa willasqantapas (Lucas 1:30-33). Yaqapaschá Jesustapas millayta trataranku. Chhaynata portakuqqa manan cheqaqtachu hermanonta munakun. ¿Reqsinkichu hermanonta maltrataq runata?...

 Yachasun Esaumanta hermanon Jacobmantawan. Juj kutinmi Esauqa Jacobpaq sinchita phiñakuspa niran: ‘Jacob hermanoyta wañurachisaq’, nispa. Chaytan maman Rebeca uyariran, chaymi payqa Jacobta karu llaqtaman kachapuran mana wañuchisqa kananpaq (Génesis 27:41-46). Tiempowanmi ichaqa Esaú cambiapuran, chaymi unaymanta Jacobwan tupaspa abrazaykuran much’aykuran ima (Génesis 33:4).

Kunanqa Jacobpa 12 qhari wawankunamanta yachasun. Jacobpa kuraq wawankunan Joseta cheqnikuranku papan astawan munakusqanrayku. Chaymi Egipto llaqtaman riq runakunaman Joseta venderanku. Papankutataq llullakuspa niranku: ‘Josetaqa phiña animalmi wañurachin’, nispa (Génesis 37:23-36). Millaymi karan chay ruwasqankuqa ¿riki?...

Unay watakuna qhepamanmi Josepa hermanonkuna pesapakuranku chay juchankumanta, chaymi Joseqa paykunata perdonaran. ¿Imapin José Jesús jina karan?... Jesustan apostolninkuna saqerpariranku  jatun pruebapi tarikushaqtin, Pedropas negaranmi. Chaywanpas Jesusqa llapankutan perdonaran.

Kunanqa Cainmanta hermanon Abelmantawan yachasun. Cainqa manan Abelta munakuranchu. Chayta rikuspan Jehová Diosqa Cainta niran cambiananpaq. Cainqa manan Diosta munakuranchu chaymi mana kasukuranchu nisqanta. Juj p’unchaymi Cainqa hermanonta niran: “Jaku campota”, nispa. Abelqa riysiranmi, jinan campopi kashaqtinku Cainqa hermanonta wañuchiran (Génesis 4:2-8).

¿Imatan chay willakuymanta yachanchis?... Noqanchisqa llapa hermanonchiskunatan munakunanchis. Manan Caín jinachu kananchis. Bibliapunin nin: ‘Manan qonqananchischu qallariymantapacha uyarisqanchis willakuyta, chay willakuypi nisqan jina, noqanchisqa jujkuna-jujkunawanmi munanakunanchis. Manan Satanasmanta jamuq Caín jinachu kananchis’, nispa (1 Juan 3:11, 12).

¿Imaraykun mana Caín jinachu kananchis?... Biblian nin: ‘Cainqa Satanasmantan jamun’, nispa. Cainqa Satanaspa ruwasqanta jinan ruwaran, chaymi payqa Satanaspa wawan kapuran.

Chhaynaqa, ¿imaraykun llapa hermanokunata munakunayki?... Paykunata mana munakuspaqa, ¿pikuna jinan kawaq?... Satanaspa wawankuna jinan. Qanqa manan munawaqchu paykuna jina kaytaqa ¿riki?... ¿Imata ruwaspan rikuchiwaq Diospa wawan kasqaykita?... Hermanonchiskunata munakuspan.

Ichaqa, ¿imataq munakuyri?... Munakuyqa sonqonchispi sientesqanchismi, chaymi tanqawanchis jujkunapaq allinkuna ruwapuyta. Munakuq runaqa sumaq sonqowanmi jujkunata rikun, allin kaqtataq paykunapaq ruwapun. Chhaynatan  hermanokunata munakunanchis. Ichaqa, ¿pikunan hermanonchiskuna? Jehová Diosta serviqkunan.

¿Imaraykun hermanonchiskunata munakunanchis?... Biblia nin: ‘Rikushasqan hermanonta mana munakuqqa, ¿imaynapin mana rikusqan Diosta munakunman?’, nispa (1 Juan 4:20). Chaypi nisqan jina, cristianokunaqa manan wakillantachu munakunanchis aswanpas llapankutan. Jesusmi niran: “Qankunapura munanakusqaykichispin lliupas yachanqaku discipuloykuna kasqaykichista”, nispa (Juan 13:35). Qanri, ¿llapa hermanokunatachu munakunki?... Sichus wakin hermanokunata mana munakunkichu chayqa, manan Diostapas munakushankichu.

¿Imaynatan rikuchiwaq hermanokuna munakusqaykita?... Ima phiñachinakuypas kaqtinqa, manan juj ladontachu pasananchis mana rimaykunanchisrayku. Llapankutan sumaqta rikunanchis, allinkunata ruwapunanchis, qoykunanchistaqmi ima kaqninchistapas. Ima llakipipas tarikuqtinkuqa yanaparinanchismi. Chaykunata ruwaspan rikuchisun juj familia jina kasqanchista.

¿Imatan rikuchisun llapa hermanonchiskunata sonqomanta munakuspa?... Jesuspa qatikuqninkuna kasqanchistan. Maytan munanchis Jesuspa qatikuqnin kaytaqa ¿riki?...