Dauda nin: “Noqaqa Sierra Leona llaqtapin wiñarqani. Wawallaraq kashaqtiymi juj kutin jallp’a jawa ch’aqway jatarirqan familiaywan juj familiapiwan. Iskaynin familian noqaqmi nirqanku, chayta allichanankupaqtaq juj layqata pusamurqanku. Layqataq juj runaq makinman juj espejota churarqan jinaspa yuraq telawan qataykurqan. Chay telawan qataykusqa runataq khatatatayta jump’iyta qallarirqan. Espejota qhawaspataq qaparirqan: “Juj kuraq runatan qayllaykamuwashaqta rikushani. Payqa yuraq chujchayoq yuraq p’achayoq jatun runan, k’umu-k’umullataqmi purishanpas”, nispa.

Abueloytan espejopiqa rikusharqan, chaymi sinchita mancharikuspa qaparirqan: “¡Nisqayta mana creewankichischu chayqa, jamuychis qankuna kikiykichis espejopi qhawaychis!”, nispa. Ichaqa manan pipas qhawayta munarqanchu. Layqataq unupi imaymana qorakuna tupachisqanwan chay runata ch’aqchurqan amaña manchakunanpaq.

Chay espejota jap’ishaq runawanmi abueloyqa nichirqan chay jallp’aqa familiaypa kasqanta, abuelaytataq nirqan chay jallp’ata llank’ananpaq. Chhaynapin chay ch’aqwaqa allichakurqan”, nispa.

 África ladopiqa askhan chhayna willakuykunaqa kan, juj lado nacionkunapipas kanmi chayqa. Millonninpi runakunan creenku wañupuqkunaqa espiritukunaq kasqanman ripuspanku runakunata ñak’arichinankupaq otaq yanapanankupaq. ¿Cheqaqchu chay kanman? ¿Wañupuqkunaq espiritun kausashanmanraqchu? Mana chhayna kaqtinri, ¿pikunataq wañupuqkunaq espiritunmanta pasachikunku? Chaykunamanta yachayqa ancha importanten.