Satanaspas supaykunapas ¿imaraykun imaymanata ruwaspa runakunata engañanku? Paykunata yupaychananchistan munanku. Chaymi Jehová Diospa cheqnisqan costumbrekunata ruwananchista munanku, chhaynapi juchallikunanchispaq. Chaymanta jujninmi kashan wañupuqkunapaq imaymanata ruwaykuna.

Munasqa familianchis wañukapuqtinqa maytan sonqonchis nanawanchis, khuyaytan waqanchis, chayqa manan juchachu. Jesuspas amigon Lázaro wañukapuqtinqa waqarqanmi (Juan 11:35).

Pipas wañupuqtinqa pachantinpin imaymana costumbrekunata ruwanku. Chay costumbrekunamanta wakinqa manan Bibliapi yachachikuykunaq contranpichu kashan. Ichaqa wakin runakunan piensanku wañuqkuna kausashanankupaq, chaymi manchakuspa imaymanata ruwanku. Chaykunata ruwaspaqa Satanaspa munasqantan ruwashanku. Bibliapi nisqanman jinaqa manan wañusqakunaqa “imatapas yachankuñachu” (Eclesiastés 9:5).

 Wakin runakunaqa wañupuqkunata yanapasun nispan imaymana costumbrekunata ruwanku, mana ruwaqtinkutaqsi paykunata ñak’arichinman. Wakin nacionkunapiqa pipas wañupuqtinqa pusaq p’unchayninta otaq tawa chunka p’unchaynin pasayta otaq juj wata pasayta imaymanata wayk’unku, ofrendakunata iman churanku. Chaytaqa ruwanku wañuqta janaq pachaman chayananpaq yanapanankupaqsi.

Chay ruwaykunaqa manapunin allinchu, chaykunata ruwaspaqa Satanaspa munasqantan ruwashanku. Jehová Diosqa cheqnikunmi chay costumbrekunataqa (2 Corintios 6:14-18).

Chayraykun Diosta serviqkunaqa manapuni chay costumbrekunataqa ruwankuchu. Chayta ruwashanankumantaqa runakunata yanapanankupaqmi kallpachakunku, paykunaqa allintan yachanku wañusqakunataqa  Jehová Dioslla yanapay atisqanta (Job 14:14, 15).

Wakin runakunaqa supaykunawanmi rimanku otaq layqakunaq yanapayninwan, wakintaq rinku watuqkunaman suerte qhawaqkunaman. Chaykunaqa layqa ruwaykunan.

Bibliapin nin: “Aman qankuna ukhupiqa kanqachu suerte qhawaqpas, layqa ruwaykunata ruwaqpas, imata qhawaspa watuqpas, layqapas, runamasinta khipuqpas, wañusqakunata tapuqman riqpas, watuqman riqpas, ni wañusqakunata tapuqpas. Jehová Diosqa cheqnikunmi chaykuna ruwaqtaqa”, nispa (Deuteronomio 18:10-12).

¿Imanaqtinmi Jehová Dios manapuni munanchu chaykuna ruwananchista?

 Munakuwasqanchisraykun Jehová Diosqa chay layqa ruwaykunamanta willawanchis. Payqa yachanmi layqa ruwaykunapi puriqkunaqa ñak’arisqankuta.

Yachasun Brasil nacionpi tiyaq Nilda sutiyoq warmimanta. Payqa layqan karqan, paymi nin: “Supaykunaqa ima munasqankutan ruwawarqanku, manan yuyayniypichu karqani, locayapurqanin, chaymi locokunata jampinapaq wasiman apapuwarqanku. Chaypin qhaliyanaypaq jampita tomarqani, chaymantan ichaqa machayta, cigarro fumayta qallarirqani, unay watakunan chhayna karqani”, nispa.

Nildaqa Jehová Diospa yanapayninwan testigokunaq yanapayninwan iman chaykunamanta librakurqan. Kunanqa kusisqan kausashan, paymi nin: “Manan munaymanchu pipas supaykunawan rimasqanrayku ñak’arinantaqa”, nispa.