Unaymantañan runakunaqa kaykunata tapukuranku:

• ¿Yuyarikunchu Dios ñoqanchismanta?

• ¿Hayk’aqllapas tukunqachu guerrakuna llakikuykunapas?

• ¿Maypipas wañupuqkuna kawsashankumanraqchu?

• ¿Hayk’aqllapas wañuqkuna kawsarimpunkumanchu?

• ¿Imaynatan Diosmanta mañakunanchis uyariwananchispaq?

• ¿Imatan ruwananchis kusisqa kawsananchispaq?

Sichus kaykunamanta tapuwaq religionninkuman allin hap’ipasqa runakunata, sacerdotekunata, pastorkunata otaq huk runakunatapas chayqa, manan kaqllatachu kutichisunkikuman, aswanpas huk-huktan kutichisunkikuman. Wakinpa kutichisqanqa allinpaschá chay ratullaqa kanman, tiempowanmi ichaqa yachakun chay kutichiyninku mana cheqaqchu kasqanta.

Ichaqa kanmi huk libro cheqaq kaqllata willaq. Chay librotan sutichakun “Santa Biblia otaq Diospa Simin Qelqa”, nispa. Diospa Siminmanta rimaspan Señorninchis Jesucristo Diosta niran: “Simiykiqa cheqaq-kaypunin”, nispa (Juan 17:17). Kunanmi pisillapi Bibliawan kutichisun runakunaq unayña tapukusqankuta. Bibliaqa sut’itan fácil entiendeyllatataq chay tapuykunata kutichin.

¿IMANAQTINMI RUNAKUNA CHAYTA TAPUKUNKU? Kay pachapiqa sinchitan runakuna sufrinku, mana allin tratasqataq kankupas. Chaymantapas askha religionkunan yachachinku: Tukuy imaymana sufrisqanchisqa Diospa munayninmi, nispa.

KAYTAN BIBLIA YACHACHIN: Diosqa manan mana allintaqa ruwanmanchu. Job 34:10 nin: “¡Diosqa manan hayk’aqpas mana allintaqa ruwanmanchu! ¡Tukuy-atiyniyoqqa manan hayk’aqpas mana chanintaqa ruwanmanchu!”, nispa. Ancha munakuq kaspan Diosqa munayninta kay pachapi ruwachinqa runakuna sumaqta kawsanankupaq. Chayraykun Jesusqa yachachiran Diosmanta khaynata mañakunanchispaq: “Yayayku hanaq pachapi kaq, [...] munayniyki kay pachapi ruwakuchun, imaynan hanaq pachapipas ruwakun hinata”, nispa (Mateo 6:9, 10). Jehová Diosqa anchatan munakuwanchis, chaymi kay pachapi munaynin ruwakunanpaq sapan Churinta kachamuran ñoqanchisrayku wañunanpaq (Juan 3:16).

Qhawallaytaq: Génesis 1:26-28; Santiago 1:13; 1 Pedro 5:6, 7.

¿IMANAQTINMI RUNAKUNA CHAYTA TAPUKUNKU? Kay tiempopipas runakunaqa waranqa-waranqanpin wañushanku guerrakunapi. Chaymantapas llapanchismi sufrinchis imaymana llakikuypi tarikuspa.

KAYTAN BIBLIA YACHACHIN: Diosqa prometeranmi kay pachantinman thak kawsayta apamunanpaq. Kay pachata Dios kamachiqtinqa manañan runakuna guerrakunaman haykunqakuñachu, “espadankumantapas yapuna rejakunatan ruwakapunqaku” (Isaías 2:4). Chaymantapas Diosqa tukuchinqan mana allin ruwaykunata, tukuy llakikuyninchiskunatapas. Kaytan Biblia niwanchis: “Diosmi [runakunaq] ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa [mana allin ruwaykuna, llakikuykunapas] manaña kapusqanrayku”, nispa (Apocalipsis 21:3, 4).

Qhawallaytaq: Salmo 37:10, 11; 46:9; Miqueas 4:1-4.

¿IMANAQTINMI RUNAKUNA CHAYTA TAPUKUNKU? Yaqa llapa religionkunan yachachinku: Runa wañupuqtinqa almanqa otaq espiritunqa kawsashallanmi, nispa. Wakinqa ninkun: Wañuqpa almanqa qhayqawasunmanmi otaq ima dañotapas ruwawasunman, nispa. Hukkunataq ninku: Huchasapa runakunataqa Diosmi infiernopi castiganqa, chaypin wiñaypaq ñak’arimunqaku, nispa.

KAYTAN BIBLIA YACHACHIN: Wañupuqtinchisqa manañan imanchispas kawsanñachu nitaq maypipas kawsanchisñachu. Eclesiastés 9:5 nin: ‘Wañukapuqkunaqa manan imatapas yachankuchu’, nispa. Manañan imatapas yachankuchu sientenkuchu, nitaq imatapas ruwayta atinkuchu, chaymi kawsaqkunataqa mana ima mana allintapas ruwankumanchu nitaq yanapaytapas atinkumanchu (Salmo 146:3, 4).

Qhawallaytaq: Génesis 3:19; Eclesiastés 9:6, 10.

¿IMANAQTINMI RUNAKUNA CHAYTA TAPUKUNKU? Llapanchispas munakusqanchis runakunawan kuska kawsakuytan munanchis. ¡Maytan munanchis wañupuq familianchiskuna amigonchiskunapas ñoqanchiswan kashanankuta!

KAYTAN BIBLIA YACHACHIN: Yaqa llapa wañusqakunan kawsarimpunqaku. Jesusmi prometeran: Diospa yuyarisqan ‘lliw wañuqkunan Runaq Churinpa kunkanta uyarispa kawsarimpunqaku’, nispa (Juan 5:28, 29). Kay pachaqa sumaq huertamanmi tukupunqa, chaypin wañupuqkunaqa kawsarimpunqaku. Diosqa qallariymantapachan munaran runakuna chhayna sumaq huertapi kawsanankuta (Isaías 65:21-25). Chaypin Diospa munayninta ruwaqkunaqa wiñaypaq kawsanqaku mana imamanta onqospa. Biblian niwanchis: “Chanin runakunaqa kay hallp’atan hap’ikapunqaku, chaypin wiñaypaq tiyanqaku”, nispa (Salmo 37:29).

Qhawallaytaq: Job 14:14, 15; Lucas 7:11-17; Hechos 24:15.

¿IMANAQTINMI RUNAKUNA CHAYTA TAPUKUNKU? Llapa religionmanta runakunan Diosmanta mañakunku. Ichaqa askhan ninku: Manachus hina Diosqa uyariwanchu mañakusqayta, nispa.

KAYTAN BIBLIA YACHACHIN: Jesusmi uyariqninkunaman yachachiran Diosmanta mañakushaspa ama kaqllata kuti-kutirispa rimanankupaq. Niranmi: “Mañakushaspaqa ama mana iñiqkuna hina thawtiychischu [otaq kaqllata rimaychischu]”, nispa (Mateo 6:7). Mañakuyninchista Dios uyarinanpaqqa paypa munasqanman hinan mañakunanchis. Chaypaqmi yachananchis imachus Diospa munaynin kasqanta. 1 Juan 5:14 niwanchis: “Ñoqanchisqa [...] yachanchis, munayninman hina imatapas Diosmanta mañakuqtinchisqa pay uyariwananchista”, nispa.

Qhawallaytaq: Salmo 65:2; Juan 14:6; 1 Juan 3:22.

¿IMANAQTINMI RUNAKUNA CHAYTA TAPUKUNKU? Runakunaqa piensankun qhapaq kaspa, allin reqsisqa kaspa otaq sumaq rikch’ayniyoq kaspa kusisqa kawsayta. Ichaqa, tukuy chaykunataña tarinku chaypas, manan kusisqachu kawsanku.

KAYTAN BIBLIA YACHACHIN: Jesusmi yachachiran imatas ruwana kusisqa kawsanapaq chayta. Niranmi: “[Ancha kusisqan kanku] huch’uyyaykukuspa Diosta maskhaqkunaqa”, nispa (Mateo 5:3). Diosta maskhaspallan kusisqaqa kawsasun. ¿Imaynatan Diosta maskhasunman? Payta allinta reqsispa, kasukuq runakunapaq imachus munaynin kasqantawan yachaspan. Chaypaqmi Bibliata estudiananchis. Chhaynapin yachasun ima ruwaymi kawsayninchispi aswan importante kasqanta. Arí, Bibliaq yachachisqanman hina kawsaspaqa cheqaq kusikuytan tarisun (Lucas 11:28).

Qhawallaytaq: Proverbios 3:5, 6, 13-18; 1 Timoteo 6:9, 10.

 Pisillapin Bibliawan kutichiranchis soqta tapuykunata. ¿Munawaqchu astawan yachayta? ‘Diosta maskhashanki’ chayqa munankipunichá astawan yachayta. Yaqapaschá tapukushanki: Diosqa munakuwanchistaq chayqa, ¿imanaqtintaq mana tukuchinchu mana allin ruwaykunata sinchi sufrimiento kasqantapas? Otaq yachayta munawaq imaynata familiaykiwan kusisqa kawsawaq chayta. Bibliaqa sut’itan kay tapuykunaman huk tapuykunamanpas kutichin.

Ichaqa askha runakunan mana munankuchu Biblia estudiayta. Paykunan ninku: Bibliaqa nishu askhan leenapaq, sasa entiendeytaqmi kanpas, nispa. Ichaqa qanqa entiendewaqmi Bibliaq yachachikuyninkunata. Chaypaqmi Jehová Diospa testigonkuna yanapasunkiman.

Paykunan qosunkikuman ¿Imatapunin Biblia yachachin? nisqa librota, chay librowanmi pisi tiempollapi Bibliaq nisqanta entiendenki, unayña tapukusqaykikunatapas kutichinki. Chaymantapas, munanki chayqa, Jehová Diospa testigonkunaqa gratisllan Bibliamanta yachachisunkiman wasiykipi otaq may munasqaykipipas, huk ratulla sapa semana. Waranqa-waranqanpi runakunan chhaynata Bibliata estudiashanku, hinaspa askha kusisqallaña ninku: Biblian unaymantaña tapukusqaykunata allin sut’inchasqata kutichiwan, nispa.

Sichus qanpas Bibliata estudianki chayqa, reparankin Bibliaq yachachisqan ancha valorniyoq kasqanta. Askha runakunan imaymana creenciakunaman yachachikuykunaman ima hap’ipasqa kaspanku manchasqa kawsanku, manataq yachankuchu mayqenchus cheqaq kasqantapas. Bibliapin ichaqa cheqaq kaqta yachanki, chhaynapin chay creenciakunamanta manchakuyniykikunamantapas kacharichikunki, hinaspa kunan tiempopi kusisqa kawsanki, hamuq tiempopitaq sumaq premiota chaskinki. Señorninchis Jesusmi niran: “Cheqaqkaqtan reqsinkichis, chay cheqaqkaqtaqmi kacharichisunkichispas”, nispa (Juan 8:32).