Munasqa wayqe-panaykuna:

Jehová Diosta munakusqanchis, runakunata munakusqanchis iman kallpachawanchis kay kamachikuyta kasukunanchispaq: “Llapa nacionmanta runakunaman riychis, jinaspa yachachimuychis discipuloykuna kanankupaq, jinaspa [ . . . ] bautizamuychis” (Mat. 28:​19, 20; Mar. 12:​28-31). Cheqaqtapuni runakunata munakusunchis chayqa, atisunmi “wiñay kausayman apaq ñanninta [ . . . ] puriy munaqkunaq” sonqonman chayayta (Hech. 13:48).

Ñaupaqpiqa anchatan kallpachakuq kanchis imaynatas runakunata rimapayasunman chayta umanchispi jap’inanchispaq, qelqakunata runakunaman qonanchispaq ima. Kunanqa manan chhaynatañachu ruwananchis kanqa, aswanpas kallpachakunanchismi kanqa jujniraykunamantañataq runakunata rimapayananchispaq. Imakunamantachus paykuna yachayta munanku, imakunamantachus rimayta munanku chaykunamanta rimaspan paykunata munakusqanchista rikuchinchis. Sapanka runan jujniray kanchis, chaymi reparananchis imamantachus rimapayasqanchis runa yachayta munanman, imakunas llakichishan chaytapas, jinaspataq chayman jina rimapayananchis. Kay qelqan yanapawasun chayta allinta ruwananchispaq.

Kay qelqapin kashan chunka iskayniyoq yachachikuykuna, sapanka yachachikuymi yanapawasun runakunata munakunanchispaq, chhaynapi Jesuspa discipulonkuna kanankupaq yanapananchispaq. Imaynatas Jesuspas wakin ñaupa cristianokunapas Diosmanta yachachiqku chayman jina ruwasqan kashan sapanka yachachikuypas. Kunanqa manañan runakunawan rimananchispaqqa umanchispiñachu jap’isun, aswanpas jujniraymantañataqmi rimapayasun, chhaynapin paykuna munakusqanchista rikuchisun. Kay qelqapi yachachikuykunaqa llapanmi yanapawasun Diosmanta willananchispaq, wakin yachachikuykunan ichaqa astawan yanapawasun runakunawan rimayta qallarinanchispaq, jujmanta kutinanchispaq, estudiota qonanchispaq ima.

Sapanka yachachikuyta estudiashaspa piensay imaynatas tiyasqayki llaqtapi chay yachachikuypi yachasqaykiman jina Diosmanta willawaq chayta. Imaynatachus runakunaman yachachisqanchismantaqa Jehová Diosta runakunatapas munakusqanchismi aswan importanteqa. Chayrayku kallpachakushallasun chay munakuyta wiñachishanallanchispaq. Chaymi yanapawasun Jesuspa discipulonkuna kanankupaq runakunata yanapananchispaq.

May munaymi qankunawan kuska juj nisqalla Jehová Diosta serviyqa (Sof. 3:9). ¡Jehová Diosmi bendecisunkichis munakusqaykichisrayku runakunata Jesuspa discipulonkuna kanankupaq yanapasqaykichismanta!