44 YACHACHIKUY
¿Imaynatan Dios qhawarin fiestakunata?
Jehová Diosqa kusisqa kausananchistan munan. Atisunmanmi mayninqa wakin fiestakunapi kusirikuyta. Ichaqa, ¿llapa fiestakunatachu Dios allinpaq qhawarin? ¿Imaynatan rikuchisunman Diosta munakusqanchista imayna piensasqanta respetasqanchistapas?
1. ¿Imaraykun wakin fiestakuna mana Jehová Diospa sonqonpaq jinachu?
Kaypin yachanki imaynas wakin fiestakunaqa Bibliaq yachachisqan contrapi kashan chayta, imaynas chaykunataqa runakuna paqarichirqan chaytapas. Wakin fiestakunataqa yaqapaschá wakin falso religionkuna paqarichirqan. Wakin fiestakunaqa “wañupuq runaq almanqa kausashanmi” nisqa yachachikuywan layqa ruwaywan iman tupan. Wakin costumbrekunapas imaymana creenciawan, suertewan iman chhaqrusqa kashan (Isaías 65:11). Chaychá Jehová Diosqa serviqninkunata nin: “T’aqakuychis paykunamanta, amaña llamiykuychisñachu imachus qhelli kaqta”, nispa (2 Corintios 6:17). a
2. ¿Imaynatan Dios qhawarin runakunata jatunchanankupaq fiestakuna ruwakusqanta?
Jehová Diosqa manan munanchu “runallapi confiananchista”, manan munanchu wakin runakuna jina chay trampaman urmananchista (leey Jeremías 17:5). Wakin fiestakunataqa ruwanku juj kamachikuqta otaq pitachus libraqta jina rikunku chay runata yuyarinankupaqmi. Mayninpitaq fiestata ruwanku nacionninkupi banderata napaykunankupaq, nacionninku libre kasqanta yuyarinankupaq ima (1 Juan 5:21). Wakin fiestakunatataq ruwanku juj político runata apoyanankupaq, llaqtankupi organizacionta apoyanankupaq ima. Chay runakuna jinachus ima organizaciontapas runakunatapas Diospa nisqanta qhepanchasparaq jatunchashasunman chayqa, ¿imaninmanmi Diosninchis chaymanta?
3. ¿Juj fiestapi imakuna ruwaymi Diosta phiñachinman?
Bibliaq nisqanman jinaqa, “sinchita ujaypas”, “sinchi millay fiestakunapas”, “machay fiestakunapas” juchan (1 Pedro 4:3). Wakin fiestakunapi runakunaqa yuyayninku chinkanankaman ujanku, chhaynapitaq p’enqay ruwaykunata ruwanku. Sichus munanchis tukuy tiempo Jehová Dioswan amigontin kayta chayqa, ayqekunanchismi chhayna millay fiestakunamanta.
ASTAWAN YACHASUNCHIS
¿Imaynatan yachasunman juj fiesta allinchus kanman icha manachus chayta, Diosta kusichinapaq jinachus kanman manachus chayta? Kaypi chaymanta astawan yachasun.
4. Manapunin Diospa contranpi kaq fiestakunataqa ruwaysikunanchischu
Leeychis Efesios 5:10 textota, jinaspa jamuq tapuykunaman jina parlariychis:
-
¿Imatan ruwananchis juj fiestapi participasunchus manachus chayta yachanapaq?
-
¿Ima fiestakunatan llaqtaykipi ruwanku?
-
¿Imaninmanmi Jehová Dios chay fiestakunamanta?
¿Imaynatan Dios qhawarinman nacesqa p’unchay fiestakuyta? Diosta serviqkunaqa manan jayk’aqpas fiestakuqkuchu, manapunin Bibliaqa Diosta serviqkunamantaqa chayta willanchu. Ichaqa willashanmi imaynas Diosta mana serviq runakuna nacesqanku p’unchayta yuyarispa fiestakurqanku chayta, iskaymantan willashan. Leeychis Génesis 40:20-22; Mateo 14:6-10 textokunata, jinaspa jamuq tapuykunaman jina parlariychis:
-
¿Iman pasarqan kay runakunaq fiestakusqan p’unchaypi?
-
Chay willakuykunata leesqanchisman jina, ¿imaynatan Dios qhawarinman nacesqa p’unchay fiestakuyta?
Yaqapaschá nishanki: “¿Fiestakuytapas, Bibliaq contranpi kaq fiestakunaman risqaytapas Dios qhawamushanmanchu?”, nispa. Leeychis Éxodo 32:1-8 textota, chaymantataq VIDEOTA qhawaychis, jinaspa jamuq tapuykunaman jina parlariychis:
-
¿Imaraykun yachananchispuni ima fiestakunas Jehová Diosta phiñachin chayta?
-
¿Imatan ruwasunman chayta yachanapaq?
¿Imaynapin yachasunman juj fiesta Diosta kusichinchus manachus chayta?
-
¿Bibliapi kaq yachachikuykuna contrachu chay fiesta kashan? Chaypaq allinta yachay imaynapis chay fiesta paqarimurqan chayta.
-
¿Runakunata, juj nacionta, juj organizacionta jatunchanapaqchu kashan? Noqanchisqa Diosninchis Jehová Diosllatan imamantapas mastaqa jatunchanchis, payllan kay pachapi sasachakuykunataqa tukuchinqa.
-
¿Bibliaq yachachisqan contrachu chaypi imatapas ruwakunqa? Noqanchisqa ch’uya yuyayniyoq ch’uya kausayniyoqmi kananchis.
5. Jujkuna respetawananchispaq jinapuni kausasun
Yaqapaschá mayninpiqa pipas Bibliaq yachachisqan contrapi kaq ima fiestamanpas invitawasunman, manataq facilchu kanman “manan” niy. Chhaynapi tarikuspaqa pacienciawan respetowan iman entiendechinanchis imapi creesqanchista. Imatan juj runa ruwarqan chhaynapi tarikuspa, chayta yachanapaq VIDEOTA qhawaychis.
Leeychis Mateo 7:12 textota, jinaspa jamuq tapuykunaman jina parlariychis:
-
Kay textopi leesqanchisman jina, ¿allinchu kanman Diosta mana serviq familianchista “ama kay fiestata ruwaychu” nispa niy?
-
Diospa cheqnisqan fiestakunataña familiayki ruwanman chaypas, ¿imaynatan rikuchiwaq familiaykita munakusqaykita respetasqaykitapas?
6. Jehová Diosqa kusisqa kausananchistan munan
Jehová Diosqa maytan munan familianchiswan amigonchiskunawan juj rato kusirikunanchista pujllarinanchista parlarinanchistapas. Leeychis Eclesiastés 8:15 textota, jinaspa jamuq tapuyman jina parlariychis:
-
Kay textopi leesqanchisman jina, ¿imayna kausakunanchistan Dios munan?
Chaymantapas Jehová Diosqa munanmi llapa serviqninkuna kusirikunankuta juj sonqolla sumaqta pasarinankutapas. VIDEOTA qhawaychis, chaypin rikunkichis imaynas Diosta serviqkunaqa jatun juñunakuykunapi sumaqta kusirikunchis chayta.
Leeychis Gálatas 6:10 textota, jinaspa jamuq tapuykunaman jina parlariychis:
-
¿Fiesta kallaqtinchu jujkunapaq allin kaqta ruwapunanchis?
-
Piqpa regalontan kusisqa chaskikusunman, ¿regalota qonapuni kasqanrayku pipas qowaqtinchischu icha sonqomanta imay ratopas pipas qowaqtinchischu?
-
Diosta wakin serviqkunaqa juñunakuyta iman ruwanku wawanku pujllarinanpaq, mijunankupaq, atikuqtinqa regalokunata ima qonankupaq. Sichus wawayoq kanki chayqa, ¿imatan ruwawaq wawayki sumaqta kusirikunanpaq?
WAKIN RUNAKUNAN NINKU: “Maypitaq kay fiesta ruwasqay jucha kanman. Noqaqa chay fiestataqa ruwani familiaywan amigoykunawan pasarinaypaqmi”, nispa.
-
Personaykiri, ¿imaninkitaq?
IMATAN YACHAMURQANCHIS
Jehová Diosqa munanmi familianchiswanpas amigonchiskunawanpas mijunanchista, parlarinanchista, pujllarinanchista, kusirikunanchistapas. Ichaqa manan chayraykuchu rinanchis Bibliaq yachachisqan contrapi kaq fiestakunaman.
Yuyarisun
-
¿Imatan ruwananchis ima fiestapas Diosta kusichinchus icha phiñachinchus chayta yachananchispaq?
-
¿Imaynatan familianchisman amigonchiskunamanpas allinta entiendechisunman wakin fiestakuna mana ruwasqanchista?
-
¿Imaynapin yachanchis kusirikunanchista Diosninchis munasqanta?
ASTAWAN YACHANAYKIPAQ
Mayqen fiestakunatas Diosta serviqkuna mana ruwankuchu chayta yachanaykipaq kay qelqata leey.
“¿Imaraykun Jehová Diospa testigonkuna mana ruwankuchu wakin fiestakunata?” (jw.org paginapi leey)
¿Imaraykun Dios mana munanchu nacesqa p’unchayta yuyarispa fiestakuyta? Kaypin tawamanta yachanki.
“¿Imaraykun Jehová Diospa testigonkuna mana fiestakunkuchu?” (jw.org paginapi leey)
¿Imatan wawakuna ruwankuman fiestakuna kaqtin Diospa sonqonta kusichinankupaq? Chaypaq kay videota qhaway.
Diosta serviqkunaqa manan Navidad fiestataqa ruwankuchu. ¿Imaynan paykuna kashanku? Chayta yachanaykipaq kay qelqata leey.
“Kunanqa aswan kusisqan kausanku” (Qhawaq, 2012 watapi 1 diciembre)
a Qhaway 5 willakuyta, chaypin yachasun imatas ruwasunman pipas juj fiestaman invitawaqtinchis felicitawaqtinchispas chayta.
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
