57 YACHACHIKUY
¿Imatan ruwananchis jatun juchaman urmaspa?
Maytaña Jehová Diosta munakunchis chaypas, manaña munanchischu sonqonta k’iriyta chaypas, mayninpiqa pantanchispunin imallapipas. Ichaqa manan chayqa kaqllachu jatun jucha ruwaywanqa (1 Corintios 6:9, 10). Sichus jatun juchaman urmawaq chayqa, manan chayraykuchu Jehová Diosqa manaña munakusunki, aswanpas payqa liston kashan perdonanasunkipaq yanapanasunkipaq ima.
1. ¿Imatan ruwananchis Jehová Dios perdonawananchispaq?
Pipas Jehová Diosta munakuq runa jatun juchaman urman chayqa, sinchi sonqo nanaypin tarikun. Ichaqa Jehová Diosmi payta sonqochan, llaqtan runakunatan payqa nirqan: “K’anchaq puka jinaña juchaykichis kanman chaypas, rit’i jinan yuraqllaña kapunqa”, nispa (Isaías 1:18). Sichus tukuy sonqomanta arrepientekusun chayqa, Jehová Diosqa perdonapuwasunmi. Ichaqa, ¿imataq arrepientekuyri? Pipas arrepientekuqqa jucha ruwasqanmantan mayta pesakun, maytan sonqonta nanachikun, manañataq chaytaqa ruwanñachu, aswanmi Diospa perdonninta mañakun. Chaymantapas tukuy atisqantan kallpachakun piensayninta cambiananpaq, imakunachus juchaman aparqan chayta saqenanpaqpas, kallpachakunmi Jehová Diospa ch’uya kamachikuyninkunaman jina kausananpaqpas (leey Isaías 55:6, 7).
2. ¿Imaynatan Jehová Dios yanapawanchis iñiq t’aqapi umalliqkunawan?
Jatun juchaman urmaqtan Jehová Dios nin: “Iñiq t’aqapi umalliqkunata wajakamuchun”, nispa (leey Santiago 5:14, 15). Diospa llaqtanpi umalliqkunaqa santo espirituwan churasqan kanku, paykunaqa munakunkun Jehová Diosta, ovejankunatapas. Chaymantapas paykunaqa allin preparasqan kashanku Jehová Dioswan allipunaypi yanapawananchispaq (Gálatas 6:1).
¿Imaynatan umalliqkuna yanapawanchis jatun juchaman urmaqtinchis? Iskay otaq kinsa umalliqmi Bibliawan entiendechiwasun imaraykus juchapakusqanchis manapuni allinchu kashan chayta. Chaymantapas yuyaychawasun kallpachawasun iman amaña juchaman urmananchispaq. Yaqapaschá niwasun iñiyninchispi qhaliyapunanchiskama iñiq t’aqapi wakin ruwaykunapi manaraq participananchispaq. Ichaqa, pipas jatun juchaman urmaspa mana arrepientekunqachu chayqa umalliqkunan qarqopunqaku chhaynapi iñiq t’aqa ch’uyalla kananpaq.
ASTAWAN YACHASUNCHIS
Pipas jatun juchaman urmaqtin imaynatachus Jehová Dios yanapan chaytaqa allintan entiendenanchis, valorananchistaqmi.
3. Iñiypi qhaliyanapaqqa mana imata pakaspan willakuna
Ima juchamanpas urmaspaqa Jehová Diospa sonqontan k’irinchis, chayraykun juchakusqanchista sut’inta payman willakunanchis. Leeychis Salmos 32:1-5 textota, jinaspa jamuq tapuyman jina parlariychis:
-
¿Imaraykun juchapakusqanchista mana pakaspa Jehová Diosman willakunanchis?
Jehová Diosmanña juchanchista willakusun chaypas, allinmi kanman umalliqkunaq yanapayninta mañakuypas. VIDEOTA qhawaychis, jinaspa jamuq tapuyman jina parlariychis:
-
¿Imaynatan umalliqkuna yanaparqanku Canon iñiqmasi wajmanta Dioswan amigontin kapunanpaq?
Juchanchismanta umalliqkunawan rimaspaqa sut’illantan willakunanchis, paykunaqa yanapawasunpunin. Leeychis Santiago 5:16 textota, jinaspa jamuq tapuyman jina parlariychis:
-
Piensasqaykiman jina, ¿sut’illanta willakusun chayqa faciltachu umalliqkuna yanapawasun?
Juchaykita willakuy, ama imata pakaspa umalliqkunaman willay jinan munakuq Diosninchispa yanapayninta chaskinki.
4. Juchanmanta mana arrepientekuq runata qarqoyqa llapanchispa allinninchispaqmi
Pipas jatun juchaman urmaspa mana arrepientekunmanchu chayqa, manan iñiq t’aqapi kayta atinmanchu. Qarqosqan kanan chay runaqa. Manañan paywan juñukunanchischu ni rimananchispaschu. Leeychis 1 Corintios 5:6, 11; 2 Juan 9-11 textokunata, jinaspa jamuq tapuyman jina parlariychis:
-
Levaduraqa llapa masatataq poqochin chayqa, ¿juchanmanta mana arrepientekuq runapas apanmanchu mana allinman juj iñiqkunata? ¿Imarayku?
Wakin qarqosqakunaqa kutimpurqankun, ¿imaraykun kutimpunkuman karqan? Wanachisqa kay sonqo nanayña karqan chaypas, yanaparqanmi yuyayman kutinankupaq (Salmos 141:5). VIDEOTA qhawaychis, jinaspa jamuq tapuykunaman jina parlariychis:
-
¿Imaynatan Soniata yanaparqan Diospa llaqtanmanta qarqosqa kasqan?
-
¿Imaynatan mana arrepientekuqta qarqoy Diospa sutinta jatunchan?
-
¿Imaynatan chay rikuchin Jehová Dios chanin kasqanta, munakuwasqanchistapas?
5. Arrepientekusun chayqa Jehová Diosqa perdonawasunmi
Jesusmi willarqan juj oveja michiqmanta, chay willasqanmi rikuchin imaynatas Jehová Dios qhawarin pipas juchanmanta arrepientekuspa payman kutimuq runata chayta. Leeychis Lucas 15:1-7 textota, jinaspa jamuq tapuyman jina parlariychis:
-
¿Imatan Jehová Diosmanta yachachiwanchis kay willakuy?
Leeychis Ezequiel 33:11 textota, jinaspa jamuq tapuyman jina parlariychis:
-
¿Imatan ruwananchis juchanchismanta arrepientesqa kasqanchista rikuchinanchispaq?
Jehová Diosqa oveja michiq jinan: maytan llakikun ovejankunamanta.
WAKIN RUNAKUNAN NINKU: “Manchakunin umalliqkunawan rimaytaqa. Paykunaman willakusaq chayqa qarqopuwanqakupaschá”, nispa.
-
¿Imaniwaqmi pipas chhaynata nisuqtiyki?
IMATAN YACHAMURQANCHIS
Jatun juchamanchus urmasunman, may arrepientesqataq kashasunman, kallpachakusunmantaq amaña chayta jujmanta ruwanapaq chayqa, perdonawasunmi Jehová Diosqa.
Yuyarisun
-
¿Imaraykun Jehová Diosman willananchis juchanchiskunata?
-
¿Imatan ruwananchis Jehová Dios juchanchista perdonawananchispaq?
-
¿Imaraykun jatun juchaman urmaspa umalliqkunaq yanapayninta mañakunanchis?
ASTAWAN YACHANAYKIPAQ
Kay videopin yachanki imaynatas juj runa Isaías 1:18 textopi nisqanman jina Jehová Diospa khuyapayasqan karqan chayta.
Jehová Diosqa khuyapayanpunin payman kutirikuqkunataqa (5:02)
¿Ima allinkunan kan mana kasukuq qarqosqa kaqtin? Kay qelqapin chayta willashan.
“¿Imaraykun Diospa llaqtanpi wakin runakunata qarqokun?” (Qhawaq, 2015 watapi 15 abril)
¿Imaynatan Diosta mana serviq runaman willawaq imaynachus mana arrepientekuq runata qarqopuy chayta? Kaypin chayta willashan.
Juj runan reparasqa imaynas Jehová Diosqa llaqtanman kutichimusharqan chayta. Chaytan pay kikin willakun.
“Bibliaq yanapayninwan cambianku” (Qhawaq, 2012 watapi 1 abril)
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
