1, 2. ¿Mayqen invitacionmi imamantapas aswan allin? ¿Imatan sapankanchis tapukunanchis?

 ¿JAYK’AQLLAPAS sumaq invitacionta chaskikurqankichu? Invitarqasunkikupaschá munasqa amigoykiq casarakusqanman rinaykipaq otaq allin llank’anaman jaykunaykipaq. Anchatachá kusikurqanki chay invitacionta chaskispaqa. Chaywanpas kashanmi juj aswan allin invitación, chaypaqqa ñan invitasqaña kashanki, ichaqa manan qanllachu, aswanpas llapa runakunan. Ima ruwaymantapas chayta kasukuymi aswan allinqa, ancha allinninchispaq kasqanrayku.

² ¿Ima invitacionmantan rimashanchis? Tukuy atiyniyoq Jehová Diospa sapan Churin Jesucristoq invitacionninmantan. Paymi nirqan: “Qatikamuway”, nispa (Marcos 10:21). Chaytaqa sapankanchistan niwashanchis. Chayraykun tapukunanchis: “¿Kasukusaqchu chay nisqanta?”, nispa. Nishankipaschá, “¿imaynapitaq manari kasukusunmanchu?” nispa. Ichaqa yaqa llapa runakunan mana kasukunkuchu. ¿Imanaqtinmi mana kasukunkuchu?

3, 4. a) ¿Imaninmi Biblia wiñay kausaymanta tapukuq runamanta? b) ¿Ima allinkunatan Jesús paypi rikurqan?

³ Chaypaq yachasunchis Jesuspa tiemponpi kausaq  juj runamanta, paytaqa Jesús kikinmi invitarqan qatikuqnin kananpaq. Bibliaq nisqan jina, chay runaqa karqan qhapaq waynan, “kamachiq umallikunamanta jujninmi” karqan (Mateo 19:20; Lucas 18:18, 23). Payqa allin respetasqachá karqan. Paymi Ancha Allin Yachachiq Jesusmanta uyarisqa, anchatataq kusikusqa chay uyarisqanwan.

⁴ Chay tiempopiqa kamachikuqkunapas umallikunapas yaqa llapanmi mana respetowanchu Jesusta qhawariqku (Juan 7:48; 12:42). Chay waynan ichaqa mana chhaynachu karqan. “Ñanninta Jesús rishaqtinmi juj runa phawaylla jamuspa ñaupanpi qonqorikurqan, jinaspa tapurqan: Allin yachachikuq, ¿imatan ruwanay wiñay kausayta chaskinaypaq?, nispa” (Marcos 10:17). Chay waynaqa rimaytapunin munasharqan Cristowan, chaymi phawaylla payman jamurqan, imaynan wajcha runapas ruwanman karqan jinata. Jinaspan respetowan payman qonqoriykukurqan. Chaypin yachanchis juch’uyaykukuq kasqanta, Diosta maskhasqantapas. Jesusqa allinpaqmi qhawarirqan chhayna runakunata (Mateo 5:3; 18:4). Chaychá “munakuywan qhawaykurqan” chay waynataqa (Marcos 10:21). ¿Imanispan tapusqanta kutichirqan?

5. ¿Imanispan Jesús kutichirqan chay qhapaq waynaman? ¿Imaynapin yachanchis mana wajcha kanantachu mañashasqanta? (Qhawariy uranpi willakuyta).

⁵ Jesuspa nisqan jina, Diosqa ñan rimarqanña wiñay kausayman aypanapaq ima ruwanamanta. Jesusmi  willarqan Diospa simin qelqamanta wakin kamachikuykunata, jinan chay waynaqa nirqan: “Moisespa chaskisqan kamachikuykunataqa junt’ashanin”, nispa. Jesusqa allintan yacharqan imachus chay waynaq sonqonpi kasharqan chayta (Juan 2:25). Chaymi nirqan: “Kanraqmi juj ruwanayki: Phaway kaqniykikunata vendemuspa wajchakunaman qomuy”, nispa (Marcos 10:21). ¿Imanaqtinmi Jesús chayta nirqan? ¿Diosta servinanpaq mana imayoq wajcha kanamantachu rimasharqan? Manan. a Aswanmi chay nisqanwan sut’iman orqorqan ima mana allinchus chay waynapi kasqanta.

6. ¿Imanirqanmi Jesús chay qhapaq waynata? ¿Imatan chaywan sut’iman orqorqan?

⁶ Ima mana allinchus paypi kasqanta sut’ita reparachinanpaqmi Jesusqa waynata nirqan: “Qatikamuway”, nispa. Chayqa mana creenapaq jina invitacionmi karqan, Tukuy-atiyniyoq Diospa Churintaqmi chayta nisharqan. Jesusqa nillarqantaqmi: “Chhaynapin janaq pachapi qhapaq kayniyki kanqa”, nispa. ¿Ima nirqanmi chay qhapaq wayna? ¿“Qatikamusaykin” nirqanchu? Manan. Aswanmi “Jesuspa chay nisqanwan llakikurqan, sinchi llakisqataq ripurqanpas  askha kaqniyoq kasqanrayku” (Marcos 10:21, 22). Chay waynaqa Cristota munakunanmantaqa nishutan munakurqan qhapaq kayninkunata, runakunaq allin qhawarisqan kayta, atiyniyoq umalli kaynintapas. Chaytan Jesusqa sut’iman orqorqan. Chay waynaqa manan tukuy sonqonwanchu Cristotapas Jehová Diostapas munakurqan, manataqmi imatapas paykunaraykuqa ruwayta munarqanchu. Chayraykun Jesusta mana qatikurqanchu. ¿Imanisunmantaq noqanchismantari?

7. ¿Imaynapin yachanchis Jesusqa sapankanchistapas “qatikamuway” nispa invitawashasqanchista?

⁷ Jesusqa manan chay waynallatachu nitaq wakin runakunallatachu invitarqan qatikunankupaqqa. Payqa “llapa” runakunatan nirqan: “Pipas qhepayta jamuyta munaqqa [...] qhepayta jamushallachun”, nispa (Lucas 9:23). Chhaynaqa pipas munaspaqa qatikullanmanmi Cristotaqa. Diosmi allin sonqoyoq runakunataqa Churinman pusan (Juan 6:44). Jesuspa “qatikamuway” nisqanqa manan qhapaqkunallapaqchu ni wajchakunallapaqchu ni juj llaqtayoqkunallapaqchu nitaq chay tiempopi kausaqkunallapaqchu karqan, aswanmi llapa runakunapaq karqan. Chhaynaqa sapankanchismi invitasqa kashanchis payta qatikunanchispaq. ¿Imaraykun payta qatikunanchis? ¿Imaynatan chayta ruwasunman?

8. ¿Imatan runakuna necesitanchis? ¿Imaraykun chayta necesitanchis?

⁸ Wakinña jujnirayta ninku chaypas, lliumi necesitanchis  allin umalliqta. Profeta Jeremiasmi Diospa yuyaychasqan nirqan: “Diosníy Jehová, allintan noqaqa yachani, manan runachu ninan maynin ñannintachus purinan chaytaqa, manan runaq munayninchu chay ñanpi thaskirinallanpas”, nispa (Jeremías 10:23). Chaypi nisqan jina, runaqa manan atinmanchu runamasinta allinta kamachiytaqa, manataqmi runaq ruwananchu chayqa. Kay pachapi kamachikuqkunaqa ñaupa tiempomantapachan imaymana mana allinkunata ruwarqanku (Eclesiastés 8:9). Jesuspa tiemponpi kamachikuqkunaqa nishutan runakunata ñak’arichiqku, sarunchaqku, q’otuqku ima. Chaychá Jesusqa runakunata qhawarirqan “mana michiqniyoq ovejakunata jina” (Marcos 6:34). Kay tiempopi runakunapas chay jinan kashanku. Chayraykun necesitanchis confianapaq respetanapaq jina juj allin umalliqta. Chay allin umalliqqa señorninchis Jesucriston. Qatiqninpin chaymanta astawan yachasunchis.

9. ¿Pikunaq churasqanmi kanku kamachikuqkuna? ¿Pin Jesusta ajllarqan?

⁹ Jesustaqa Jehová Diosmi ajllarqan. Kay pachapi kamachikuqkunaqa yaqa llapanmi runakunaq churasqan kanku. Runakunaqa pantaqtaq kanku chayqa, manan allintachu ajllanku, ratollataqmi q’otuchikunkupas. Jesusmi ichaqa mana runaq ajllasqanchu karqan, chaytan yachanchis Cristo, Mesías nisqa kasqanpi. Chay sutikunaqa “ajllasqa” ninantan nin. Paytaqa Ancha Jatun Kamachikuq Diosmi ajllarqan paypa munasqanta junt’ananpaq. Chaymi Jehová Diosqa paymanta nirqan:  “Payqa kamachiymi, paytan munakuni! ¡Payqa ajllakusqaymi, payqa sonqoypaq jinan! Paymanmi espirituyta qosaq”, nispa (Mateo 12:18). Diosqa Kamaqninchistaq chayqa, allintan yachan imayna umalliqtachus necesitasqanchista. Jinaspapas paypa yachayninqa mana tukukuqmi, chaymi mana iskayasunmanchu Diospa ajllasqanmantaqa (Proverbios 3:5, 6).

10. ¿Imaraykun Jesuspa ima ruwasqanpas qatikunapaq jina?

¹⁰ Jesusqa payta qatikunanchispaq jinan imaymanata ruwarqan. Allin umalliqqa qatikunapaq jinan, rimasqanwan ruwasqanwan iman sut’ita rikuchin imaynatachus kamachisqan runakuna kausananku chayta, kallpachantaqmi allin runa kanankupaq. ¿Imayna umalliqtan munawaq? ¿Mana manchakuq kaqta? ¿Yachayniyoq kaqta? ¿Khuyapayakuq kaqta? ¿Sasachakuykunawan mana pisipaq kaqta? Jesusqa chay jina umalliqmi, chaytan reparasun imaymana ruwasqanmanta yachaspa. Payqa Taytan jina mana pantaqmi, chaymi Taytan jina tukuy imatapas ruwarqan. Jesuspiqa manan ima mana allinpas karqanchu, chaymi paypa tukuy ima ruwasqanpas qatikunapaq jina. Bibliaq nisqan jina, paymi yachachiwarqanchis Diosta imayna servinanchispaq, chhaynapi tukuy yuyaywan “yupinta qatikunanchispaq” (1 Pedro 2:21).

11. ¿Imaynatan Jesús rikuchirqan “allin michiq kasqanta”?

¹¹ Cristoqa sut’itan rikuchirqan “allin michiq kasqanta” (Juan 10:14). Jesuspa tiemponpi runakunaqa allintan yacharqanku allin michiqqa mana sayk’uspa ovejankunarayku imaymana ruwasqanta, wañuyta  mana manchakusparaq cuidasqantapas. Rey Davidmi chhayna michiq karqan, payqa waynachallaraq kashaspanmi mana manchakuspa ovejankunata cuidaq uywa mijuq animalkunamanta (1 Samuel 17:34-36). Jesusqa aswan allintaraqmi ruwarqan, payqa qatikuqninkunaraykun wañurqan (Juan 10:15). ¿Jayk’a kamachikuqkunan chayta ruwankuman qatikuqninkunarayku?

12, 13. a) ¿Imaynatan michiqqa ovejankunata allinta reqsin? ¿Imaynatan ovejakunapas michiqninkuta reqsinku? b) ¿Imanaqtinmi munanki Allin Michiqwan pusachikuyta?

¹² Jesusmi nirqan: “Noqaqa reqsinin ovejaykunata, paykunapas reqsiwankun”, nispa. Chhaynapin rikuchillarqantaq “allin michiq kasqanta” (Juan 10:14). Wakinqa willmasapa uywata jinallan ovejakunataqa qhawarinku, allin michiqmi ichaqa sapanka ovejankunata reqsin. Yachanmi chichu ovejakunaqa cuidana kasqanta, wakinqa onqosqa otaq k’irisqa kasqanta, mana puriy atiq uñachakunataq marq’arispa apana kasqanta. Jinallataqmi ovejakunapas allinta reqsinku michiqninkuta. Paykunaqa manan kunkantaqa pantachinkumanchu, imamantapas ayqechinanpaq jina wajamuqtinqa usqhayllan ovejakunaqa kasukunku. Chaymantapas mayta riqtinpas qatikullankun. Michiqqa yachanmi maypichus sumaq pastopas unupas kasqanta, maypichus thaj mijunkuman chaytapas. Chaymi ovejakunaqa mana imamantapas manchakunkuchu michiqninku qhawamushaqtinqa (Salmos 23).

¹³ ¿Pin mana munanmanchu chhayna umalliqwan pusachikuyta? Allin Michiq Jesusqa sut’itan  rikuchirqan qatikuqninkunata sumaqta qhawarisqanta. Payqa sapankanchistan prometewanchis kay tiempopi kusisqa kausananchispaq yanapawananchista, jamuq tiempopitaq wiñay kausayman aypananchista (Juan 10:10, 11; Apocalipsis 7:16, 17). Chayraykun yachananchis imaynatachus Jesusta qatikusunman chayta.

14, 15. ¿Imanaqtinmi mana simillawachu ninanchis “cristianon kani” otaq “Cristotan munakuni” nispa?

¹⁴ Waranqa-waranqanpi runakunan piensanku Cristota qatikushasqankuta. Paykunamanta wakintaqa tayta-mamankun religionninkupi bautizachirqanku, chaymi “cristianon kayku” ninku. Wakinqa “Cristotan munakuyku, paymi salvawaqniyqa” ninkuraqmi. ¿Ima nisunmanmi paykunamanta? ¿Cristoq qatikuqninchu kankuman? ¿Chhayna qatikunankumantachu Jesús rimasharqan? Manan. Chhaynaqa, ¿imatan Jesús nisharqan “qatikamuway” nisqanwan?

¹⁵ Chaypaq yachasunchis “cristianon kayku” niq llaqtakunamanta. ¿Jesuspa yachachisqanman jinachu chay llaqtakunapi kausashanku? Manan. Aswanmi chaykunapiqa kaqlla kashan cheqninakuy, ñak’arichinakuy, suwanakuy, imaymana mana allinkunapas.

16, 17. ¿Imaynapi reparasunman pikunachus tukuy sonqowan Jesusta qatikuqkunata?

¹⁶ Jesuspa nisqan jina, cheqaq cristianokunataqa manan “cristianon kayku” otaq “Cristotan qatikuyku”  nisqankupichu reqsikunan karqan, aswanpas imachus ruwasqankupin. Paymi juj kutinpi nirqan: “Manan llapa, ¡Señor! ¡Señor!, niwaqniychu janaq pacha gobiernomanqa jaykunqa, aswanpas janaq pachapi kaq Taytaypa munayninta ruwaqllan”, nispa (Mateo 7:21). Chhaynari, ¿imanaqtintaq askha runakuna Jesusta Señorninkuta jina qhawarishaspapas mana ruwankuchu Taytanpa munasqanta? Chay qhapaq wayna jinan mana tukuy sonqowanchu Jehová Diostapas Jesustapas munakunku.

¹⁷ Kay pachapiqa waranqa-waranqanpi runakunan ninku: “Jesustaqa munakuykupunin”, nispa. Jesucristotapas Jehová Diostapas munakusqanchista rikuchinapaqqa manan rimayllachu kanan. Jesusmi nirqan: “Pipas munakuwaqniyqa kasukunqan simiyta”, nispa (Juan 14:23). Ovejankunamanta rimaspataq nirqan: “Ovejaykunaqa uyarinkun kunkayta, noqapas reqsinin paykunataqa, paykunataq qhepayta jamunku”, nispa (Juan 10:27). Rikusqanchis jina, Jesucristota munakusqanchistaqa manan rimayllawanchu rikuchinanchis, aswanpas tukuy sonqomanta payta kasukuspan.

18, 19. a) ¿Ima ruwananchispaqmi kallpachawananchis Jesusmanta yachasqanchis? b) ¿Imapaqmi kay libro ruwakamurqan? ¿Imaynatan yanapanqa Jesusta unayña qatikuqkunatapas?

¹⁸ Jesuspa nisqanta kasukunanchispaqqa kallpachakunanchismi tukuy sonqowan payta munakunanchispaq. Chayta ruwananchispaqmi pay nirqan: “Paykuna wiñay kausayta chaskinankupaqqa qan sapallan cheqaq Diostan reqsinanku, reqsinallankutaqmi kachamusqayki Jesucristotapas”, nispa  (Juan 17:3). Sichus Jesusmanta yachasunchis, chaypitaq yuyaymanasunchis chayqa, astawanmi payta munakusunchis, kallpachakusuntaqmi payta qatikushanallanchispaq.

¹⁹ Chay yuyaywanmi kay librotaqa qelqakamurqan. Kay libroqa manan kay pachapi kashaspa Jesuspa tukuy imaymana ruwasqanmantachu willashan, aswanpas Jesusta imayna qatikunanchismantan willashan. b Kay libroq yanapayninwanmi Diospa palabranta t’aqwisun, jinaspa tapukusun: “¿Imatapas Jesús jinachu ruwashani?”, nispa (Santiago 1:23-25). Unay watañapaschá Allin Michiq Jesusta qatikushanki. Chaywanpas kashanmanraqmi imallapipas vidanchispi cambiananchisqa. Bibliapin nishan: “Qankuna kikiykichista allinta t’aqwikuychis allinchus iñiypi kashankichis icha manachus chayta yachanaykichispaq”, nispa (2 Corintios 13:5). Chayrayku allinta qhawarikusun munakuq Michiwaqninchis Jesuspa kunkanta kasukushanchischu icha manachu chayta, paytan Jehová Diosqa churarqan cuidawananchispaq.

20. ¿Imamantan yachasunchis qatimuq capitulopi?

²⁰ Kay librota estudiaspaykiqa astawanmi munakunki Jesustapas Jehová Diostapas. Paykunatachus munakunki chayqa, thajmi kusisqan kay sasa tiempopi kausanki. Chaymantapas wiñay kausaymanmi chayanki, wiñaypaqtaqmi Jehová Diostapas jatunchanki  Allin Michiqta qowasqanchismanta. Chaypaqqa allintan yachanayki imakunata ruwananpaqchus Jehová Dios Jesusta churarqan chayta, chhaynapi munaynin junt’akunanpaq. Iskay capitulopin chaymanta yachasunchis.