Leeqkuna:

Jesusmi nirqan: “Qatikamuway”, nispa (Marcos 10:21). Chaywanmi Jesusqa sapankanchista wajashawanchis qatikuqnin kananchispaq. ¿Kasukushankichu wajakuyninta? Chay ruwasqaykiqa ancha allinniykipaqmi kanqa.

Jehová Diosqa sapan Churintan kay pachaman kachamurqan juchamanta wañuymantawan kacharichiwananchispaq (Juan 3:16). Jesusqa allintan yachachiwarqanchis imaynatachus kausananchista. Tukuy ima ruwasqanwanmi Diospa sonqonta kusichirqan, paymantaq jap’ipakurqan. Jesusqa yachachillawarqanchistaqmi Taytan jina kananchispaq. Rimasqanwan ruwasqanwan iman rikuchirqan imaynachus Jehová Dios kasqanta, imatachus munasqantapas (Juan 14:9).

Bibliaq nisqan jina, Jesusqa “ejemplota churawananchispaqmi” jamurqan, “chhaynapi tukuy yuyaywan yupinta qatikunaykichispaq” (1 Pedro 2:21). Chayta ruwasunchis chayqa, Jehová Diosmanmi astawan k’askakusunchis, ancha kusisqan kausasunchis, wiñay kausayman apaq ñanllapitaqmi kashasunchispas.

Ichaqa payta qatikunanchispaqqa, allintaraqmi yachananchis kay pachapi kashaspa imatachus ruwasqanmanta. Jesusmantaqa Bibliapin allinta willakushan, chayraykun tukuy yuyaywan chayta estudiananchis. Chay jinaqa, yuyaymanasunyá rimasqanpi ruwasqanpi, imaynatachus chayman jina ruwananchispipas. Chhaynapin allinta yachasun imayna qatikuyta.

Maytan munayku kay librota leespayki Jesusta Jehová Diostawan astawan munakunaykita, chhaynapi Cristoq yupinta tukuy yuyaywan qatikushanallaykipaq. Chhaynapin Jehová Diospa sonqonta kusichinki kunanpas wiñay-wiñaypaqpas.