Yachasun huk waynamanta, payqa tiontan salvarqan wañuchinankumanta. Chay waynaq tionqa apóstol Pablon karqan. Sutintaqa manan yachanchischu, ichaqa yachanchismi mana manchakuq kasqanta. ¿Munawaqchu yachayta imachus ruwasqanmanta?...

Pabloqa Jesusmanta predicasqanraykun carcelpi wisq’asqa kasharqan Jerusalén llaqtapi. Wakin runakunaqa Pablotan cheqnikurqanku, chaymi yuyaykurqanku wañuchinankupaq. Paykunan comandanteman rispa kayta niyta munarqanku: “Pablota umalli runakunaman pusachiy juzganankupaq”, nispa. Paykunaqa ñanpin pakakunanku karqan, Pablo chayninta pasashaqtintaq wañuchinanku karqan.

Pabloq sobrinonmi chay ruway munasqankumanta yacharqan. ¿Imatan ruwarqan? Payqa Pablomanmi willamurqan. Pablotaq nirqan: “Usqhaylla chayta comandanteman willamuy”, nispa. ¿Facilchu kanman karqan Pabloq sobrinonpaq comandantewan rimay?... Manan, comandanteqa allin qhawarisqa runan karqan. Ichaqa Pabloq sobrinonqa mana manchakuqmi karqan chaymi comandantewan rimarqan.

Comandanteqa makillan payta uyarirqan. Hinan 500 soldadokunata huñuchimurqan Pablota cuidanankupaq, kamachirqantaqmi chay tuta Cesarea llaqtaman Pablota apanankupaq. ¿Kawsashaqllachu Pablo chayarqan? ¿Ima ninkin?... Chay millay runakunaqa manan wañuchiyta atirqankuchu.

¿Gustarasunkichu kay willakuy?... Qanpas atiwaqmi Pabloq sobrinon hina mana manchakuq kayta. Huk runakunaman Jehová Diosmanta yachachinapaqqa mana manchakuqmi kananchis. ¿Mana manchakuqchu kanki? ¿Jehová Diosmantapas rimashallankichu?... Chayta ruwaspaqa runakunatan yanapayta atinki salvakunankupaq.