1. Rey David jina, ¿imanispan Jehová Diosta wakin serviqkuna tapukunkuman?

LLIUPAS kusisqa kausaytan munanchis riki. Ichaqa mayninpiqa imaymana sasachakuykunapin tarikunchis, chaymi wakin Jehová Diosta serviqkunaqa rey David jina sientekunkuman, paymi niran: “¿Jayk’aqkamataq yuyayniypi musphasaq, sonqoypipas p’unchay-p’unchay llakipakusaq?”, nispa (Sal. 13:2).

2. ¿Imakunamantan kay yachachikuypi yachasun?

² Ima llakikuypiña tarikusunman chaypas manan chaykunamantaqa nishutachu llakipakunanchis. Kunanmi imakunachus llakichiwanchis chaykunamanta yachasun, chaymantapas yachallasuntaqmi ima soqta ruwaykunas yanapawasunman ama nishuta llakipakunanchispaq chayta.

3. ¿Imakunan kay tiemponchispi llakichiwasunman?

³ Kay tiemponchispiqa imaymana cosaskunan kausananchispaq wichapun chaymi noqanchistaqa llakichiwasunman, chaymantapas llank’anapi escuelapi compañeronchiskunan mana allin ruwaykunaman ima tanqawasunman, chaymantapas manan atisunmanchu llaqtanchispi suwakunata chinkachiytapas. ¿Imarayku? Runakuna mana Diospa kamachikuyninkunata kasukusqankurayku, Satanaspas munanmi imaymana llakikuykunawan pisipananchista, chhaynapi Jehová Diosta saqenanchispaq (Mat. 13:22; 1 Juan 5:19). Chaymi kay tiemponchispi runakunaqa imaymana sasachakuykunapi tarikunku.

4. ¿Imakunamantan llakikullasunmantaq?

 ⁴ ¿Imakunamantan nishuta llakikullasunmantaq? Yaqapaschá mana qolqeyoq kaspa, onqoyniyoq kaspa, mana llank’anayoq kasqanchis ima llakichiwasunman. Chaymantapas Diosta mana kasukusqanchisraykun llakikullasunmantaq, yaqapaschá piensallasunmantaq: “Imatataq ruwasaqri Diospa llaqtanman mana allin runakuna phawaykuqtinri”, nispa. Chaykunamantan llakikullasunmantaq.

5. ¿Imatan Jesús nisharan ama llakipakuychischu nisqanwan?

⁵ Ñaupaqpi Jehová Diosta serviqkunapas llakikurankun, Jehová Diosmi ichaqa paykunata munakushallaran (1 Rey. 19:4; Sal. 6:3). * Jesuspas qatikuqninkunatan niran: “Amaña vidaykichismanta llakipakuychischu”, nispa (Mat. 6:25). ¿Chaywanchu nisharan ama imamantapas llakikunankuta? Manan, aswanpas Jesusqa nisharan, llakikuyninchiskunarayku ama Jehová Dios serviyninchista saqenanchismantan. Chhaynaqa, ¿imatan ruwasunman llakikuypi tarikuspa? (Qhaway “ Imatan ruwasunman llakikuqtinchis” nisqa willakuyta.)

6. Filipenses 4:6, 7 nisqan jina, ¿iman yanapawasunman ama nishuta llakikunanchispaq?

⁶ Juj, tukuy tiempon Jehová Diosmanta mañakunanchis. Sichus ima llakipipas tarikushanchis chayqa Jehová Diosmanmi sonqomanta mañakunanchis (1 Ped. 5:7). Chaymi Jehová Diosqa ‘runaq mana entiendey atisqan thaj kayta qowasunchis’ (leey Filipenses 4:6, 7). Chaymantapas santo espiritunwanmi yanapawanchis ama nishuta llakikunanchispaq (Gál. 5:22).

7. ¿Imakunamantan Jehová Diosman mañakusunman?

⁷ Jehová Diosmanmi willakunanchis tukuy sasachakuyninchista imayna sientekusqanchistapas. Sichus chay sasachakuyninchiskunata mana allichayta atisunchu chayqa manan nishutachu chaykunamantaqa llakikunanchis, aswanpas Jehová Diosmanmi mañakunanchis chay sasachakuyninchiskunapi ama nishuta piensananchispaq. Tukuy imataña Jehová Diosman mañakunchis chaypas payqa imachus mañakusqanchismanqa kutichimunqan, manapaschá kaqpachachu mañakuyninchismanqa kutichimuwasun chhaynaña kanman chaypas mana sayk’uspan tukuy tiempo Jehová Diosmanqa mañakushanallanchis (Luc. 11:8-10).

8. ¿Imaniytan mana qonqananchischu Jehová Diosman mañakushaspa?

⁸ Jehová Diosninchisqa imaymana sasachakuypiña tarikunchis chaypas imaymanatan qowanchis yanapawananchispaq, chaymi Jehová Diosman mañakushaspaqa gracias ninanchispuni tukuy imaymana qowasqanchismanta. Yaqapaschá mayninpiqa mana imaniytapas atisunchu Jehová Diosman mañakuspaqa, Jehová Diosmi ichaqa “Taytáy yanapaykuway” nisqanchista uyarispa yanapawasunchis (2 Crón. 18:31; Rom. 8:26).

9. ¿Piqpa yanapaynintan maskhananchis?

⁹ Iskay, Jehová Diospin confiananchis manan noqanchispichu. Judá nacionman asirio soldadokuna phawaykushaqtinkuqa sinchitan mancharikuranku, chaymi  paykunaqa Egipto nacionpa yanapayninta mañakuranku (Isa. 30:1, 2). Jehová Diosmi ichaqa willaran chayta ruwaspaqa mana allinkunapi tarikunankuta (Isa. 30:7, 12, 13). Chaymantan Jehová Diosqa paypi confianankupaq Isaiaswan willachiran: ‘Thaj-kayniyoq kaspaykichismi jap’ipakuwaspaykichismi kallpachasqa kankichis’, nispa (Isa. 30:15).

10. ¿Imakunapi tarikuspan Jehová Diospi confiasqanchista rikuchisunman?

¹⁰ ¿Imaynatan Jehová Diospi confiasunman pipas mat’ipayawaqtinchis? Kaypi piensasun: Llank’ananchispin askha qolqeta ganananchispaq niwanchis ichaqa Jehová Diosta servinanchispaqmi mana tiempo aypawasunmanchu. Mayninpiqa yaqapaschá llank’anapi juj compañeronchiskuna qhawapayawasunman paywan kananchispaq ichaqa manan Testigochu. Chaymantapas yaqapaschá munakusqanchis runa niwallasunmantaq: “Pitan munakunki Diosniykitachu icha noqatachu”, nispa. Jehová Diosmi ichaqa imaymana sasachakuykunapi tarikuqtinchis yanapawasun chaymi paypi confiananchis (Mat. 6:33; 10:37; 1 Cor. 7:39).

11. ¿Pikunamanta yachaymi yanapawasunman qatiykachasqaña kaqtinchispas thajlla kananchispaq?

¹¹ Kinsa, ñaupa tiempo Dios serviqkunamanta yachasun. Bibliapin tarinchis ñaupa tiempopi Diosta serviqkunamanta, wakinmi allin kaqta ruwaranku wakintaqmi mana. Paykunamanta yachaymi yanapawasun Jehová Diospi confiananchispaq ima sasachakuypi tarikuspapas piña jark’awaqtinchispas. Chaymi Judío nacionmanta kamachikuqkuna Diosmanta willayta jark’aqtinku apostolkunaqa mana manchakurankuchu aswanpas nirankun: “Noqaykuqa kamachikuq Diostan ñaupaqtaqa kasukunayku, runakunata kasukunaykumantaqa”, nispa (Hech. 5:29). Paykunataqa waqtarankuña chaypas manan manchakurankuchu, ¿imarayku? Paykunaqa Jehová Diospin confiaranku, yacharankun Jehová Diosqa tukuy chaykunata rikumusqanta chaymi paykunaqa mana manchakuspa Diosmanta willashallaranku (Hech. 5:40-42). Estebanpas chhaynallapitaqmi tarikuran, payqa wañuy patapiña tarikuran chaypas thajmi kasharan uyanpas juj angelpa uyan jinan karan, ¿imarayku? Jehová Diospi confiasqanrayku chaymi mana manchakuranchu (Hech. 6:12-15).

12. 1 Pedro 3:14, 4:14 nisqan jina, ¿imaraykun qatiykachasqaña kaspanchispas kusisqalla kasunman?

¹² Jehová Diosmi apostolkunaman atiyta qoran milagrokunata ruwanankupaq chaypin apostolkunaqa repararanku Jehová Dios yanapashasqanta (Hech. 5:12-16; 6:8). Kunan tiempoqa manaña noqanchisman atiyta qowanchischu milagrokuna ruwananchispaq chaypas, payqa yanapawashanchismi simin qelqawan santo espirituntan qowanchis sasachakuypiña tarikuspapas kusisqalla kananchispaq (leey 1 Pedro 3:14; 4:14). Chaymi imachus ruway atisqallanchista ruwananchis Jehová Diospa yanapayninpitaqmi confiananchispas, manan jamuq tiempopi qatiykachasqa kananchispichu piensananchis aswanpas Jesuspa nisqantan yuyarinanchis, paymi niran: “Noqan yachayta qosaykichis, yanapasaykichistaqmi imaynatachus rimanaykichispaqpas, chhaynapin contraykichispi kaqkunaqa mana ima niytapas  atisunkichischu”, nispa. Chaymantan nillarantaq: “Allinta aguantaspan vidaykichistaqa salvankichis”, nispa (Luc. 21:12-19). Chaymantapas Jehová Diosninchisqa manan qonqanchu imakunachus ruwasqanchistaqa, wañupusunmanña chaypas payqa kausarichimpuwasunmi.

13. ¿Imaynatan yanapawasunman mana Diospi confiaq runakunamanta yachay?

¹³ ¿Imatan yachasunman ñaupa tiempopi mana Diospi confiaq runakunamanta? Paykunamanta yachaymi yanapawasunchis ama paykuna jina kananchispaq aswanpas Jehová Diosllapi confiananchispaq. Rey Asamanta yachasun, payqa ñaupaqpiqa Jehová Diospin confiaran juj jatun ejercitota atipananpaq (2 Crón. 14:9-12). Chaymantan ichaqa mana Jehová Diospichu confiaran rey Baasaqpa ejercitonwan maqanakunanpaq, chay ejercitoqa juch’uyllan karan, chaymi Jehová Diospi confiananmantaqa Siria nacionpa yanapayninpi confiaran (2 Crón. 16:1-3). Chaymantapas wañuy patapiña kashaspapas manapunin Jehová Diospiqa confiaranchu (2 Crón. 16:12).

14. ¿Imatan yachasunman rey Asamanta?

¹⁴ Ñaupaqpiqa rey Asaqa Jehová Diospa yanapaynintan maskharan sasachakuykunapi tarikuspa, chaymantan ichaqa manaña Jehová Diospichu confiaran, aswanpas payllamantan imatapas ruwayta qallariran. Yaqapaschá paypaqqa allin karan Israel nacionwan maqanakunanpaq Siria nacionpa yanapayninta maskhasqan. Ichaqa chay ruwasqanqa manan allinchu karan, Jehová Diosmi chaymanta willachiran juj profetanwan paymi niran: “Qanqa manan Diosniyki Señor Diosmanchu jap’ipakunki, aswanpas Siria reymanmi, ajinapin Siria soldadokunata kacharparinki atipanayki kashaqtin”, nispa (2 Crón. 16:7). Noqanchisqa manan rey Asá jinachu kananchis aswanpas Jehová Diospin confiananchis, mayninpiqa yaqapaschá phawaylla imatapas decidinanchis kanqa, chhaynapiña tarikusunman chaypas Jehová Diospa yanapaynintan maskhananchis chhaynapin ima ruwasqanchispas allillan kanqa.

15. ¿Imatawanmi ruwasunman Bibliata leeshaspa?

¹⁵ Tawa, Bibliamanta yachasqayki textokunata umaykipi jap’ikuy. Sichus yanapawasqanchis textokunata umanchispi jap’ikusun chayqa, chaykunapi yuyaymanaymi yanapawasunchis astawan Jehová Diospi confiananchispaq. Chaymi Jehová Diosqa Josueta kamachiran sapa kutilla simin qelqata leenanpaq chaypi yuyaymanananpaq ima, chhaynapi yachaywan imatapas ruwananpaq. Chaykuna ruwasqanmi Josuetaqa yanaparan ama manchakuspa ima sasachakuytapas atipananpaq (Jos. 1:8, 9). Mayninpiqa noqanchispas imaymana sasachakuykunapi llakikuykunapin tarikusunman, ichaqa Diospa simin qelqan yanapawasunman ama chaykunamanta nishuta llakikunanchispaq (Sal. 27:1-3; Prov. 3:25, 26).

16. ¿Imaynatan Jehová Dios yanapachiwanchis iñiqmasinchiskunawan astawan paypi confiananchispaq?

¹⁶ Pisqa, tiempota t’aqasun iñiqmasinchiskunawan kananchispaq. Jehová Diosninchismi iñiqmasinchiskunawan yanapachiwanchis juñunakuykunapi imayna yachachisqankuwan, paykunawan parlariymi yanapawanchis Jehová Diospi astawan  confiananchispaq (Heb. 10:24, 25). Chaymantapas iñiq t’aqanchispi amigonchiskuna sumaq simikunawan rimapayawasqanchismi yanapawallasunmantaq, chaymi noqanchisqa imachus sientesqanchista confiasqanchis amigonchisman willakunanchis chhaynapi ama nishuta llakipakunanchispaq (Prov. 12:25).

17. Hebreos 6:19 nisqan jina, ¿ima suyakuyninchismi yanapawasunman sasachakuypi tarikuqtinchis?

¹⁷ Soqta, imachus suyakusqanchispin yuyaymanasun. Noqanchisqa imaymana llakikuykunapin tarikunchis, ichaqa Diospa gobiernonta suyakuymi yanapawanchis chayqa juj ancla jinan vidanchispaq (leey Hebreos 6:19). Chaymi Jehová Diospa promesankunapi yuyaymanananchis (Isa. 65:17). Chaymantapas imaynan mosoq pachapi thaj kausay kanqa chaypin piensanallanchistaq (Miq. 4:4). ¿Imatawanmi ruwananchis? Imatachus suyakushanchis chaytan jujkunaman willananchis, tukuy atisqanchistataqmi ruwananchis Diosmanta jujkunaman willashanallanchispaq, chaytachus ruwasunchis chayqa ‘suyakuyninchisqa tukukuykaman allinpuni kanqa’ (Heb. 6:11).

18. ¿Imakunapin tarikusunchis kay tukukuy p’unchaykunapi? ¿Iman chaykunata atipananchispaq yanapawasunchis?

¹⁸ Tukukuy p’unchaykunapiñataq kashanchis chayqa imaymana sasachakuykunapin imaymana llakikuykunapin tarikusunchis. Ichaqa, ¿iman yanapawasunchis? Jehová Diospi confiaymi, arí Jehová Diospa yanapaynintan maskhananchis sasachakuyninchiskunata atipananchispaq, chayta ruwananchispaqmi kay 2021 watapaq texto kallpachawashanchis chaypin nin:‘Thaj kayniyoq kaspaykichismi jap’ipakuwaspaykichismi kallpachasqa kankichis’, nispa (Isa. 30:15). Chaytachus kausayninchispi ruwasunchis chayqa Jehová Diospi confiasqanchistan rikuchishanchis.