1. ¿Imatan juj wayna iñiqmasinchis yacharan 1935 watapi juj jatun juñunakuypi?

JUJ waynan 18 watanpi bautizakuran 1926 watapi, tayta-mamanqa Jehová Diostan serviranku. Chaymi paykunaqa pisqantin wawankuta Jehová Diosmanta Jesusmantawan yachachiranku, chhaynapi Jehová Diospa testigon kapunankupaq. Chay waynaqa sapa watansi wakin cristianokuna ima, Jesuspa wañupusqanta yuyarinapaq juñunakuypi t’anta mijuypi vino ujaypi ima participaqku. Ichaqa 1935 watapin iñiqmasinchis Joseph Rutherford juj jatun juñunakuypi “Ancha askha runakuna” nisqa yachachikuymanta yachachiran. Chayqa aparikuran Estados Unidos nacionpin. ¿Imatan chaypi sut’inchakuran?

2. ¿Ima yachachikuytan Rutherford iñiqmasinchis sut’incharan?

² Rutherford iñiqmasinchismi chay juñunakuypi sut’ita yachachiran pikunapunichus kanku Apocalipsis 7:9 textopi “ancha askha runakuna” nisqanmanta. Chay kutikamaqa Jehová Diospa llapa serviqninkunaqa janaq pachaman ripunankupaqmi piensaykusharanku, ichaqa iñiqmasinchis Joseph Rutherfordmi Bibliawan allinta chayta sut’incharan. Chay “ancha askha runakunaqa” manan janaq pachapaq ajllasqachu karanku, aswanpas Jesuspa waj ovejankunamantan kanku. * Paykunan manchay ñak’ariyta pasaspa kay pachapi  wiñaypaq tiyanqaku (Apo. 7:14). Chaymi Jesusqa niran: “Kallantaqmi waj ovejaykunapas, paykunaqa manan kay t’aqamantachu kanku; paykunatapas pusamunaymi kashan, jinan kunkayta uyarinqaku, juj t’aqallataqmi kanqaku, juj michiqllayoqtaq kanqakupas”, nispa (Juan 10:16). Paykunaqa kanku Jehová Diospa testigonkunan, paykunan wiñaypaq kay allpapi tiyanqaku (Mat. 25:31-33, 46). ¿Imaynatan kay mosoq yachachikuy askha iñiqmasinchiskunata yanaparan vidankupi cambianankupaq? (Sal. 97:11; Prov. 4:18.)

3, 4. ¿Imatan 1935 watapi askha iñiqmasinchiskuna reparanku?

³ Chay jatun juñunakuypin iñiqmasinchis Rutherford llapa chaypi kaqkunata niran: “Llapa kay pachapi suyakuyniyoq kaqkuna ama jina kaspa sayarikuychis”, nispa. Chayta uyarispan yaqa 20.000 iñiqmasinchiskuna jatariranku. Chayta rikuspan iñiqmasinchis Rutherfordqa niran: “¡Kaymi ancha askha runakunaqa!”, nispa. Chayta uyarispan kusikuranku, chaypin repararanku kay pachapi wiñaypaq tiyanankupaq kasqankuta. Chaymi 840 runakuna chay jatun juñunakuypi bautizakuranku yaqa llapankun karanku waj ovejamanta.

⁴ Chay p’unchaymantapachan askha iñiqmasinchiskuna, ñaupaqpi wayna iñiqmasinchispas manaña Jesuspa wañupusqanta yuyarinapaq juñunakuypi t’antatapas mijurankuñachu ni vinotapas tomarankuñachu. Chaymantan juj iñiqmasinchis nin: “1935 watallapiñan Jesuspa wañupusqanta yuyarinapaq juñunakuypi t’antata mijurani vinotapas ujarani chaymantan ichaqa reparakurani kay pachapi wiñaypaq tiyanaypaq kasqayta”, nispa (Rom. 8:16, 17; 2 Cor. 1:21, 22). Chaymantapachan ancha askha runakunaqa kay pachallapiraq kashaq janaq pachapaq ajllasqa cristianokunata yanapakushanku. *

5. ¿Imaynatan Jehová Dios qhawarin t’anta mijuyta vino ujayta saqepuq iñiqmasikunata?

⁵ Wakin iñiqmasikunaqa piensaykurankun janaq pachaman ripunankupaq, ichaqa manan chhaynachu karan. Chhaynaqa, ¿imaynatan Jehová Dios qhawarin 1935 qhepaman mañana iñiqmasinchiskuna t’antatapas mana mijusqankumanta vinotapas mana ujasqankumanta? Chaymantapas, ¿iman pasanman juj iñiqmasi t’antatapas mijushanman vinotapas ujashanman tiempowantaqmi ichaqa cuentata qokuspa chay ruwayta saqepuqtin? (1 Cor. 11:28.) Sichus paykuna chay ruwasqankuta saqepuspa Jehová Diosta servishallanqaku chayqa Jehová Diosmi paykunataqa allinpaq qhawarinqa. Manaña paykuna t’antatapas mijunkuchu vinotapas ujankuchu chaypas, paykunaqa ancha kusisqan kashanku Jehová Diospas Jesuspas paykunarayku imaymanakunata ruwasqankumanta.

6. ¿Imata ruwanankupaqmi Jesús angelkunata kamachin?

⁶ Manchay ñak’ariy tiempoqa cercallapiñan kashan, chaypaqqa maytachá kallpachawasunchis Apocalipsis 7 capitulomanta yachayqa. Chaypin rimashan janaq pachapaq ajllasqa cristianokunamanta ancha askha runakunamantapas paykunan kanku waj t’aqamanta ovejakunaqa. Chaypin Jesusqa kamachishan  angelkunata allpa pachaq tawantin ladomanta jamuq wayrata jark’ashanallankupaq, ¿imanaqtin? Ama kay pachata phukurunanpaq janaq pachapaq ajllasqa cristianokuna sellasqa kanankukama (Apo. 7:1-4). Chaymi ajllasqa cristianokunaqa junt’aq sonqo kasqankurayku janaq pachapi reykuna jina sacerdotekuna jina kanqaku (Apo. 20:6). Chhaynaqa maytachá Jehová Diospas, Jesuspas, angelkunapas kusikunqaku 144.000 janaq pachapaq ajllasqa cristianokuna premionkuta chaskiqtinkuqa.

7. Apocalipsis 7:9, 10 nisqanman jina, ¿imatan apóstol Juan rikuran imatataqmi ruwasharankupas? (Qhaway tapanpi kaq fotota.)

⁷ Apóstol Juanqa 144.000 janaq pachapaq ajllasqa cristianokunatan reykunata jina sacerdotekunata jina rikuran. Chaymantan rikullarantaq mana yupay atina ancha askha runakunata, paykunan armagedón guerrata kausashaqlla pasasqaku. Paykunaqa janaq pachapaq ajllasqa cristianokunamanta aswan askhan karanku (leey Apocalipsis 7:9, 10). Jehová Diospaq Jesuspaqpas junt’aq sonqo kasqankuraykun paykunaqa “pampakama yuraq p’achayoqkama” karanku, manataqmi Satanaspa kamachisqan pachawanpas qhellichakurankuchu. Chaymi paykunaqa fuertetapuni nisharanku: “Salvacionninchisqa tronopi tiyaq Diosmanta corderomantawanmi jamun”, nispa. Chaymantapas paykunaqa palmera k’allma jap’iykusqankuwanmi rikuchisharanku Jehová Diospa churasqan rey Jesusta chaskikusqankuta (tupanachiy Juan 12:12, 13).

8. Apocalipsis 7:11, 12 nisqanman jina, ¿imaynan kasharanku janaq pachapi angelkuna?

⁸ Leey Apocalipsis 7:11, 12. Apóstol Juanqa rikullarantaqmi llapa angelkunapas kusisqa Jehová Diosta yupaychasqankuta, ¿imaraykun kusisqa kasharanku? ‘Mana yupay atina ancha askha runakunata’ rikuspan. Chaymantapas maytaraqchá Jehová Diospas llapa angelkunapas kusikunqaku, ancha askha runakuna manchay ñak’ariy tiempota kausashaqlla pasasqankuta rikuspa.

9. Apocalipsis 7:13-15 nisqanman jina, ¿imakunatan ancha askha runakuna ruwashanku?

⁹ Leey Apocalipsis 7:13-15. Apóstol Juanmi ancha askha runakunamanta nillarantaq: “Paykunan pampakama p’achankuta corderoq yawarninwan t’aqsaspa yuraqyachiranku”, nispa. Chaywanmi apóstol Juanqa nisharan concienciankupas ch’uya kasqanta Jehová Diospa allin qhawarisqa kasqankumantawan (Isa. 1:18). Paykunaqa Jesuspa wañupusqanpin iñinku Jehová Diospa amigontaqmi kankupas (Juan 3:36; 1 Ped. 3:21). “Chayraykun paykunaqa Diospa trononpa ñaupanpi kashanku, Diosta adorana wasipitaqmi tuta-p’unchay payta servishankupas”, chaymi ancha askha runakuna kallpachakushanku Jehová Diosmanta runakunaman yachachinankupaq, ajinapin Diospa gobiernonta ñaupaqman churashanku (Mat. 6:33; 24:14; 28:19, 20).

10. ¿Imamantan mana iskayankuchu ancha askha runakuna? ¿Mosoq pachapi ima junt’akunantan rikullanqakutaq?

¹⁰ Jehová Diosmi ancha askha runakunata manchay ñak’ariy tiempota pasaqtinkupas yanapashallanqa. Biblian nin: “Tronopi tiyaqmi juj karpata paykunapaq ruwapunqa chaypi paykunata pakaykunanpaq”, nispa. Jehová Diosmi prometen: “Paymi ñawinkumanta tukuy weqeta pichanqa, manan wañuypas kanqañachu, manañataqmi llakikuypas, waqaypas, ni nanaypas kanqañachu”, nispa. Chay junt’akunantan waj t’aqamanta ovejakunaqa suyakushanku (Apo. 21:3, 4).

11, 12. a) Apocalipsis 7:16, 17 nisqan jina, ¿ima bendicionkunatan ancha askha runakuna suyakushanku? b) ¿Imata ruwaspan waj ovejamanta kaqkuna rikuchinkuman agradecido kasqankuta?

 ¹¹ Leey Apocalipsis 7:16, 17. Kay tiempopi Jehová Diosta serviqkunaqa imaymana sasachakuykunapin tarikushanku: mana qolqe kaqtin yarqaypi, imaymana onqoykunawan, guerrakuna kaqtinpas. Chaymantapas Jehová Diospi iñisqankuraykun carcelpi wisq’asqa kashanku. Chhaynapiña tarikushanku chaypas ancha askha runakunaqa manchay ñak’ariy qhepataqa sumaq kausaytan suyakushanku, chaypiqa askhan kanqa mijuykunapas Jehová Diosmantapas yachashallanqakun. Jehová Diospa phiñakusqan p’unchaypiqa Satanaspa kamachikusqan millay kausaytan tukuchipunqa ancha askha runakunatataqmi sumaqta pakaykunqa. Manchay ñak’ariyta kausashaqlla pasaqkunatan Jesusqa ‘kausay unuman’ pusanqa. Paykunaqa manapaschá jayk’aqpas wañuyta reqsinqakuchu. Chayqa may kusikunapaqmi kanqa (Juan 11:26).

¹² Manaña Jehová Dios waj t’aqamanta ovejakunata janaq pachapi tiyanankupaqchu ajllaran chaypas. Paykunaqa may agradecesqan kashanku kay pachapi suyakuyniyoq kasqankumanta. Jehová Diosqa paykunataqa anchatan munakun imaynan janaq pachapaq ajllasqa cristianokunata munakun jinata. Chaymi paykunaqa janaq pachapaq ajllasqa cristianokunawan kuska Jesuspa wañupusqanta yuyarispa Jehová Diosta Jesustapas jatunchashanku.

13, 14. ¿Imaraykun Jesuspaq wañupusqanta yuyarinapaq juñunakuyman rishanallanchis?

¹³ Askha runakunan Jesuspa wañupusqanta yuyarinku, ichaqa 1.000 runakunamantan jujlla t’antatapas mijun vinotapas ujan. Juj rimaypiqa soqta iñiq t’aqamantan juj iñiq t’aqallapi jujlla kanman t’antatapas mijuq vinotapas ujaq. Chaypin yachanchis yaqa llapa runakunapas kay pachapi tiyanankupaq suyakuyniyoq kasqankuta. Chhaynaqa, ¿imanaqtintaq Jesuspa wañusqantari yuyarinku? Imaynan pipas casarakusqan p’unchayman invitawaqtinchisqa payta munakuspan rinchis, ¿riki? Chhaynatan waj ovejamanta kaqkunapas munakuyninkuta rikuchinku Jesuspa wañupusqanta yuyarispa. Chayta ruwaspan Jesuspa imakunachus ruwasqanmanta  agradecido kasqankuta rikuchishanku. Chayraykun paykunaqa kay pachapi wiñaypaq tiyanqaku.

¹⁴ ¿Imaraykupiwanmi waj ovejamanta kaqkuna Jesuspa wañupusqanta yuyarinku? Paykunaqa Jesuspa kamachisqantan kasukushanku. Jesusmi niran: “Kaytaqa ruwallankichispunin noqata yuyariwanaykichispaq”, nispa (1 Cor. 11:23-26). Chhaynaqa kay pachapi ajllasqa cristianokuna kausashankuraqtaq chayqa waj ovejamanta kaqkunaqa yuyarishallanqakun Jesuspa wañupusqantaqa. Chaymantapas askha runakunatan invitamushanku Jesuspa wañupusqanta yuyarinankupaq.

15. ¿Imata ruwaspan noqanchispas Jehová Diostapas Jesustapas jatunchasunman?

¹⁵ Jesuspa wañupusqanta yuyarina tutapiqa takinchis mañakunchis iman. Chayta ruwaspan Jehová Diosta Jesustapas jatunchanchis. Chaymi kay wata juñunakuypiqa “Noqanchisrayku Jesuspas Diospas ruwasqankumanta agradecekusun” nisqa yachachikuymi kanqa. Chay yachachikuyta uyarispaqa maytachá Jehová Diosta Jesustapas sonqomanta gracias nisunchis. Chaymantapas t’antata vinotawan pasachikushaqtinmi llapa chaypi kaqkunaqa yuyarinku chaykunaqa Jesuspa ch’uya cuerpon yawarnin kasqanta. Chaymantapas yuyarillasuntaqmi imaynan Jehová Diosqa churin Jesusta noqanchisrayku wañunanpaq kachamusqanta, chayraykun noqanchisqa sumaq kausayta chaskisunchis (Mat. 20:28). Sichus Jehová Diosta Jesustapas munakunchis chayqa, manan faltakusunchu chay juñunakuyman riytaqa.

16. ¿Imaynapin janaq pachapaq ajllasqa cristianokuna waj ovejamanta kaqkunawan igual-lla kanku?

¹⁶ Jehová Diosqa janaq pachapaq ajllasqa cristianokunata waj t’aqamanta ovejakunatapas allinpaqmi qhawarin igual-llatataqmi munakunpas, ¿imarayku? Paykunaraykun juj preciollata pagaran munakusqan wawanta qospa. Suyakuyninkun ichaqa mana kaqllachu, chaymi janaq pachapaq kaqkunapas kay pachapaq kaqkunapas junt’aq sonqolla kananchis Jehová Diospaq Jesuspaqpas (Sal. 31:23). Chaymantapas manan qonqananchischu Jehová Diosqa llapa serviqninkunaman santo espiritunta qon, janaq pachapaq ajllasqa cristianokunaman waj ovejakunamanpas.

17. ¿Imatan ajllasqa cristianokuna suyakushanku?

¹⁷ Janaq pachapaq ajllasqa cristianokunaqa manan chay suyakuyniyoqchu nacenku, aswanpas Jehová Diosmi sonqonkuman chaytaqa churan. Chaymi paykunaqa chay suyakuyninkupi piensanku, chaykunamanta iman mañakunku. Chaymantapas maytapunin  munashanku janaq pachapi suyakuyninkuta chaskiytaqa. Manaña yachankuchu imayna espíritu cuerpoyoq kanankuta chaypas. Maytapunin munashanku Jehová Dioswan, Jesuswan, angelkunawan, wakin ajllasqa cristianokunawan tupayta Diospa gobiernonpi kamachiytapas (Filip. 3:20, 21; 1 Juan 3:2).

18. ¿Imayna kausaytan waj ovejamanta kaqkuna suyakushanku?

¹⁸ Waj ovejamanta kaqkunaqa maytapunin munanku kay pachapi wiñaypaq kausayta (Ecl. 3:11). Chaymi maytapuni suyakushanku chay p’unchay chayamunanta. Chhaynapi kay pachata sumaq paraisoman tukuchinankupaq. Chaypi wasita ruwakuspa imaymana mijuykunata llank’aspa, familiankuwan kuska wiñaypaq kausaytapas (Isa. 65:21-23). Chaymantapas maytapunin munashallankutaq Jehová Diospa tukuy kamasqankunata rikuyta: jatun orqokunata, lamar-qochata, imaymana clase animalkunatapas. Manan chayllatachu ruwasunchis astawanmi Jehová Diospa amigon kasunchis, munakuyninchispas astawanmi wiñanqa.

19. ¿Imaraykun allinpuni Jesuspa wañupusqanta yuyariy? ¿Jayk’aqmi kay wata chayta ruwakunqa?

¹⁹ Jehová Diosqa llapa serviqninkunamanmi juj sumaq suyakuyta qon (Jer. 29:11). Jehová Diospa testigonkunapaqqa Jesuspa wañupusqanta yuyariymi aswan importante. Chaypin janaq pachapaq ajllasqa cristianokuna waj ovejamanta kaqkunapas Jehová Diosta Jesustapas jatunchayta atinku. Chaymi kay 2021 watapi sábado 27 marzo killapi inti chinkaykusqan qhepaman Jesuspa wañupusqanta yuyarisunchis. Chay juñunakuymanqa askhan riyta atinqaku. Wakinqa jark’asqaña kaspankupas carcelpiña kaspankupas Jesuspa wañupusqantaqa yuyarinqakun. Chhaynaqa llapallanchis kallpachakusun chay juñunakuyman rinanchispaq. Chayta rikuspan Jehová Diospas Jesuspas llapa angelkunapas kusikunqaku.