KAYMI PASAN.

Llakipakuypi tarikuspaqa preocupasqan manchasqan sientekunku. Mayninpiqa llapanchismi chhaynapi tarikusunman sasa tiempopi kausasqanchisrayku.

¿IMATAN BIBLIA YACHACHIN?

Rey Davidmi qelqaran: “Jayk’aqkamataq yuyayniypi musphasaq, sonqoypipas p’unchay-p’unchay llakipakusaq”, nispa (Salmo 13:2). ¿Imaynatan atiparan? Oracionpi tukuy llakikuyninta Diosman willaspan, yacharanmi Diosqa payta munakusqanta (Salmo 13:5; 62:8). Diosqa invitawanchismi payman llakikuyninchista willananchispaq, payqa anchatan noqanchispi interesakun (1 Pedro 5:7).

Mayninpiqa llakipakuyninchisqa allinmi kanman, ¿imaynapi? Apóstol Pablotaqa iñiq t’aqakunamanta ‘sapa p’unchay yuyariqtinmi llaki ñit’iykuq’, chaymi tukuy atisqanta ruwaq iñiqmasinkunata kallpachananpaq (2 Corintios 11:28). Chay kutipiqa allinmi karan llakipakusqan jujkunata yanapananpaq. Noqanchispas kaqllatataqmi ruwasunman jujkunapi interesakuspa yanapaspa ima, mana chayqa mana munakuyniyoq kasqanchistan rikuchisunman (Proverbios 17:17).

“Ama pipas pay kikinpa allinnillantaqa maskhachunchu, aswanpas jujkunaq allinnintapas maskhallachuntaq” (Filipenses 2:4)

KAYMI PASAN.

Wakinqa nishutan llakipakunku ñaupaqpi imapipas pantasqankumanta, qhepaman imaynapi tarikunankumanta, qolqemanta ima. *

¿IMATAN BIBLIA YACHACHIN?

¿Llakipakushanallachu ñaupaqpi pantasqanchismanta? Qallariy siglopi wakin cristianokunaqa manaraq Diosta reqsishaspankun jatun juchakunapi kausaqku (1 Corintios 6:9-11). Chay cristianokunaqa manan ñaupaqpi pantasqallankupichu yuyaykuranku, aswanpas confiarankun Diospa khuyapayakuyninpi sumaq sonqo kasqanpipas. Salmo 130:4 nin: “Qanmi jucha pampachaykuqqa kanki”, nispa.

¿Llakipakunachu jamuq tiempomanta? Jesusmi niran: “Ama llakipakuychischu paqarinmantaqa”, “sapa p’unchay llakikuyqa chay p’unchayllapaq kachun”, nispa (Mateo 6:25, 34). ¿Imatan chaywan nisharan? Manan jamuq tiempomantaqa llakikunachu, aswanpas kunan problemanchiskunallamanta. Mana chayqa, manan allin yuyaywanchu imatapas ruwasunman. Cheqaqpunin chayqa, mayninpiqa yanqan ima pasananmantapas llakikushanchis nitaq pasanchu.

¿Llakipakunachu qolqemanta? Juj yachayniyoq runan niran: “Ama wajchayachiwaypaschu qhapaqyachiwaypaschu”, nispa (Proverbios 30:8). Necesitasqallanwanmi contento karan. Hebreos 13:5 textopas ninmi: “Ama qolqe sonqo kaychischu, kunan imachus kapusunkichis chayllawan kusisqa kausaychis. Diosmi niran: ‘Manan saqerparisaykichu, manataqmi wikch’urparisaykipaschu’”, nispa. Qolqeqa tukukuqllan Diosmi ichaqa mana jayk’aqpas paypi confiaqkunataqa saqerparinqachu.

“Manan jayk’aqpas rikuranichu chanin runata Señor Diospa saqerparisqanta, manan jayk’aqpas rikuranichu wawankunatapas mijuna mañapakushaqta” (Salmo 37:25)

¿IMA NINKUN RUNAKUNA?

2008 watapin juj periódico niran: “Kay tiempokunapiqa askha runakunan llakikuypi tarikushanku”, nispa (The Guardian). 2014 watapi juj periódico nillarantaq: “Estados Unidospin sinchi askha runakuna nishu llakisqa tarikushanku”, nispa (The Wall Street Journal).

¿IMATAN BIBLIA YACHACHIN?

“Llakipakuyqa runatan ñit’iykun, sumaq simin ichaqa kusichin” (Proverbios 12:25). ‘Sumaq simikunatan’ tarinchis allin willakuykunapi (Mateo 24:14). Diospa gobiernonmi pisi tiempollamanta tukuy llakikuykunata tukuchinqa. Bibliapin prometen: “Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu”, nispa (Apocalipsis 21:4).

“Suyakusqanchis Diosmi iñiyniykichispi junt’aykusunkichis kusikuywan thaj-kaywan ima” (Romanos 15:13)