“Pipas huk warmita munapakuspa qhawaqqa ñan sonqonpi chay warmiwan wasanchay huchata ruwanña” (Mateo 5:28)

¿IMARAYKUN YACHANANCHIS?

Kay tiempopiqa tukuyneqpin kashan qhelli qhawaykuna chaymi askha runakuna qhawanku. Diospaq hina kawsaspa kusisqa kayta munanki chayqa yachanaykin imatachus Dios chaykuna qhawaymanta yuyaykusqanta.

¿IMA NINMI BIBLIA?

Bibliaqa manan rimanchu qhelli qhawaykunamanta, ichaqa Bibliapi tarikuq kamachikuykunata leespan reparasunman huchachasqanta.

Bibliaqa sut’itan willan sichus huk qhari wak ‘warmita munapakuspa qhawan’ chayqa wasanchay huchamanmi urmanman. Chayqa kaqllataqmi qhelli ruwaykunata ‘qhawaywan’ casarasqaña otaq solteroña kanman chaypas. Chaykunata qhawaqqa rikusqankunatan munapayan. Chayta ruwayqa Jehová Diostan phiñachin.

“Millay ruwaykunamanta t’aqakuychis, ama qhelli huchapi puriychischu, [...] ama cuerpoykichispa munasqanta ruwaychischu, ama mana allinta yuyaykuychischu, ama munapayaychischu” (Colosenses 3:5)

¿IMA NINMI RUNAKUNA?

Chaykunamanta estudiaq runakunan ninku “qhellikunata qhawayqa manan runakunata tanqanchu qhelli huchakuna ruwayman” nispa. Chhaynaqa, ¿allillanchu qhellikunata qhaway?

¿IMA NINMI BIBLIA?

Bibliaqa qhelli ruwaykunata hinan huchachan “asichikuq qhelli simikunatapas” (Efesios 5:3, 4). Ichaqa qhellikunata qhawayqa aswan millayraqmi. Qhelli qhawaykunapiqa rikukunmi warmiwan qhariwan wasanchay hucha ruwasqanku, warmipura otaq qharipura t’inkinakusqanku, huk qhelli ruwaykunapas. Asichikuq qhelli simikunata rimayqa phiñachinmi Diosta, sinchi munapayaywan qhellikunata qhawaymi ichaqa astawanraq.

Qhellikunata qhawaqkuna rikusqankuta hinachus ruwanku icha manachus chaymantaqa wakinmi ninku “chhaynan” nispa wakintaq “manan” nispa. Biblian ichaqa sut’ita willan runaq iñiyninpaq mana allin kasqanta Diospas chay ruwayta cheqnikusqanta. Chaymi kamachiwanchis: “Millay ruwaykunamanta t’aqakuychis, ama qhelli huchapi puriychischu [...], ama cuerpoykichispa munasqanta ruwaychischu”, nispa (Colosenses 3:5). Qhellikunata qhawaqkunaqa manan chaykunamanta t’aqakushankuchu aswanpas astawanraqmi munapayashanku.

“Allinkaqta maskhaychis, amataq mana allinkaqtachu [...] ¡Mana allinkaqta cheqnikuychis! ¡Allinkaqta munakuychis!” (Amós 5:14, 15)

¿IMA NINMI BIBLIA?

Wakin cristianokunaqa ñawpaqpin karqanku qhelli huchapi puriq, machaq suwakuq ichaqa chhayna kawsayninkutan saqepurqanku (1 Corintios 6:9-11). ¿Imaynapin saqepurqanku? Diospa Simin Qelqapi kamachikuykunatan yacharqanku, chhaynapin mana allin kaqkunata cheqnikapurqanku.

Qhellikunata qhawaqkunaqa mana allinkunapin tarikunku, chaypi yuyaykunki chayqa cheqnikunkin chay ruwayta. Utah llaqtapi (Estados Unidos) Universidadmi willarqan qhellikunata qhawaqkunaqa “sinchi llakipi kasqankuta, runakunamanta karunchakusqankuta, hukkunawan mana allinta kawsasqankuta” huk mana allinkunapi tarikusqankutapas. Chaykunamanta aswan mana allinqa Diosmantan runakunata karunchan hinaspapas Jehová Diostan phiñachin.

Bibliaq yachachikuyninkunan yanapawasun allin kaqkunata munakunapaq. Astawan Bibliata leesun chayqa astawanmi munakusun kamachikuyninkunata. Chay munakuymi yanapawasun qhelli qhawaykunata cheqnikunapaq, chhaynapitaqmi salmista hina nisunchis: “Manapunin ima millaykunapipas yuyasaqchu”, nispa (Salmo 101:3).