¿Huchachu trago ukyay?

“Kallpachaykuqnin t’antatan ruwan, kusirichiqnin vinotan ruwan, uya llamp’uyachina aceitetapas ruwan” (Salmo 104:15)

¿IMA NINMI RUNAKUNA?

Askha familiakunan mikhusqanku qhepata ima tragollatapas ukyanku. Hukkunataq manapuni chaytaqa ruwankuchu. Chayqa kanman runakunaq religionninman, saludninkuman otaq maypi tiyasqankuman hina.

¿IMA NINMI BIBLIA?

Bibliaqa huchachanmi machayta nishu trago ukyaytapas ichaqa manan huchachanchu pisilla ukyaytaqa (1 Corintios 6:9, 10). Aswanpas willanmi ñawpa tiempokunamantaraq Diospa siervonkuna vino ukyasqankuta, Bibliapiqa askha kutitan vinomanta riman (Génesis 27:25). Eclesiastés 9:7 texton nin: “T’antaykita kusisqa mikhuykamuy, kusisqallataq vinoykitapas ukyaykamuy”, nispa. Vinoqa sonqotan kusichin chaymi casarakuykunapi otaq huk fiestakunapipas ukyaqku. Jesuspas huk casarakuypin unuta ‘sumaqkaq vinoman’ tukuchirqan, chaymi karqan ñawpaq kaq milagro ruwasqan (Juan 2:1-11). Hinaspapas vinowanqa hampikuqkun (Lucas 10:34; 1 Timoteo 5:23).

 ¿Willanchu Biblia maykama trago ukyanata?

“¡Ay, qankunamanta! Machaypi kusa llalliqkuna” (Isaías 5:22)

¿IMARAYKUN YACHANANCHIS?

Sapa watanmi askha familiakuna ñak’arinku tayta-mama otaq huknillanpas machaq kasqankurayku. Nishuta tragota ukyaqqa carronkutan chocanku, urmaykunku imaymana mana allinkunapi tarikunku. Tiempowantaq onqonku ñosqhonninkumanta, sonqonkumanta, higadonkumanta wiksankumantapas.

¿IMA NINMI BIBLIA?

Nishuta mikhuypas ukyaypas Diospa mana allin qhawarisqanmi (Proverbios 23:20; 1 Timoteo 3:2, 3, 8). Payqa munanmi cuerponchis kamachinanchista. Biblian nin: “Vinoqa runatan anchaykachachin, poqosqa ukyanaqa ch’aqwachinmi, chaywan machaqqa mana yachayniyoqmi”, nispa (Proverbios 20:1).

Machayqa runatan waqllichin chaymi qhelli ruwaykunapi urmanku. Oseas 4:11 texton nin: “Upi vinowan poqosqa vinopiwanmi [...] yuyayninta waqllichin”, nispa. Juan sutiyoq runan chayta yacharqan llakikuypi rikukuspa. * Esposanwan phiñachinakusqanku qhepamanmi machaspa huk warmiwan hotelman rispa wasanchay huchapi urmarqan, chay ruwasqanmantan qhepaman pesapakurqan, prometerqantaq manaña hayk’aqpas ruwananpaq. Nishuta tragota ukyayqa cuerponchista, yuyayninchistan dañawanchis, Diosmantapas karunchawanchismi, Bibliaqa sut’itan willan machaqkunaqa mana wiñaypaq kawsanankuta (1 Corintios 6:9, 10).

¿Hayk’aqmi mana pisillatapas ukyanachu?

“Yuyayniyoqqa mana allin kaqtan reparan hinaspan pakakun, pisi yuyayniyoqkunan ichaqa pasallanku hinaspan k’irisqa rikukapunku” (Proverbios 22:3)

¿IMARAYKUN YACHANANCHIS?

Huk libron nirqan “tragoqa fuerte droga kasqanta”. Chayraykun mayninpiqa pisillatapas trago ukyayqa mana allinchu kanman.

¿IMA NINMI BIBLIA?

Askha runakunan imaymana llakipi rikukunku tragota mana ukyananku kaqtin ukyaspanku. Bibliaqa ninmi ‘imaymanapaq tiempo kasqanta’ tragota mana ukyanapaq tiempo kasqantapas (Eclesiastés 3:1). Wakin llaqtakunapiqa kanmi leykuna waynachallaraq kashaspa tragota mana ukyanankupaq. Wakintaq trago ukyayta saqeshanku. Wakintaqmi hampi tomasqankurayku mana ukyanankuchu tragota. Wakintaq tragota mana ukyananchu llank’anankupaq, aswantaqa maquinakunawan llank’aspa. Allin yuyayniyoq runakunaqa Diospa regalonta hinan qhawarinku saludninkuta kawsayninkutapas (Salmo 36:9). Chaytan rikuchinku trago ukyaymanta Bibliaq yachachisqanta kasuspa.