Yaqapaschá imamantapas phiñachinakuspaykichis ñawpa tiempopi imapipas pantasqaykichista yuyarichinakunkichis. ¿Imaraykun chaykuna suceden? Mana pampachanakuyta yachasqaykichisraykun.

Ichaqa yachawaqchismi pampachanakuyta. Chaypaqqa entiendenaykichismi imarayku pampachay sasa kasqanta.

Yuyarichinankurayku. Wakinqa manan qosankuta otaq esposankuta pampachayta munankuchu yuyarichinankurayku. Chaymi qhepakunapi ima phiñachinakuypas kaqtinqa pantasqankuta yuyarichinku atipanankupaq.

Sonqonkupi k’irisqa kasqankurayku. Phiñachinakuypi sonqota k’irinakuyqa unaypin chinkanman. Yaqapaschá pipas ninman “pampachaniñan” nispa, sonqonpitaq ichaqa phiñasqalla kashanman otaq qhepakunapi kaqllawan kutichinanpaq yuyaykushanman.

Mana kaqllatachu yuyaykusqankurayku. Wakinqa ninkun: “Casarakuspaqa mana phiñachinakuspallan sumaqta kawsakusaqku”, nispa. Ichaqa reparanku mana kaqllatachu iskayninkupas yuyaykusqankuta, chaymi munasqankuman hinapuni ruwayta munanku. Chaymi pantasqankuta qhawaspa ninku: “Khayna kanaykipaqqa manan yuyaykurqanichu”, nispa, sasachakunkutaqmi pampachanankupaqpas.

Mana allinta yuyaykusqankurayku. Wakinqa ninkun: “Pampachaqtiyqa paychá riki munayninta ruwakapushanman”, nispa. Hinaspapas nillankutaqmi:

“Pampachaspaqa pantasqantapas hinallata qhawayman hinachá kanman”, nispa

“Pampachaspaqa qonqapunaychá kanqa ruwawasqanta”, nispa

“Pampachaqtiyqa qhepakunamanchá kaqllata ruwawanqa”, nispa

Ichaqa pampachayqa manan chhaynata yuyaykuychu. Chaywanpas sasan kanman, astawanqa casarasqakunapaq.

Imachus pampachay kasqanta entiendeychis. Bibliapi tarikuq “pampachay” simiqa, “saqepuy” nispan nikullanmantaq. Chhaynaqa pampachayqa manan pantasqankuta qonqapuyllachu otaq pantasqankuta aguantayllachu. Aswanpas ima phiñachinakuytapas ‘saqepuymi’, chay ruwayqa allinmi kanqa sapankaykichis casado kawsayniykichispi thak kanaykichispaq.

Mana pampachanakuqtiykichis imachus kananpi yuyaykuychis. Wakin yachaqkunaq nisqanman hinaqa sonqonpi phiñasqalla kaqtaqa sinchi llakin hap’in, hinaspapas sonqomanta onqoymi hap’in, casarasqa kawsayninkupas manan allinchu. Chaymi Bibliapas nin: “Aswanpas sumaq sonqo kaychis, khuyapayanakuq, pampachaykunakuq”, nispa (Efesios 4:32).

Pampachanakusqaykichis allinniykichispaq kasqanpi yuyaykuychis. Pampachaq runaqa manan yupashallanchu hayk’a kutitaña qosan otaq esposan phiñachisqanta, imapipas pantaqtinqa manan huchachanpachachu. Chayta ruwaspaqa munanakuspan kawsanqaku, manataq sonqonkuta k’irinakuspachu (Bibliaq yachachikuynin: Colosenses 3:13).

Iskayniykichispas pantaqmi kankichis. Sichus pantaqña kaqtinpas esposaykita otaq qosaykita allinpaq qhawarinki chayqa manan sasachu kanqa pampachay. “Casado kawsayniykipi kallpachakuy” (inglés simipi) nisqa libron nin: “Sichus astawan yuyaykunki imakuna mana chaskisqaykipi chayqa, manan yuyaykuyta atinkichu imakuna chaskisqaykipi. ¿Mayqenkaqpi yuyaykuytan munanki?”, nispa. Iskayniykichispas pantaqmi kankichis, chaytaqa manan qonqanaykichischu (Bibliaq yachachikuynin: Santiago 3:2).

Allinta reparaychis. Hukpi phiñachinakuspaqa kaypi yuyaykuychis: “¿Phiñakunapaq hinapunichu chay ruwasqan otaq rimasqanpas karqan? ¿Pampachakunanpaq hinapunichu ruwasqan karqan icha qonqapunapaq hinallachu?”, nispa (Bibliaq yachachikuynin: 1 Pedro 4:8).

Rimana kaqtinqa rimaychis. Imamantapas phiñakuspaqa sumaqllata rimaychis imachus phiñachisqasuykichismanta imarayku chhayna sientekusqaykichismantapas. Ama ninakuychischu “chayraykun kayraykun chaytaqa ninki otaq ruwanki” nispaqa, nitaq imatapas niychischu chhaynapunipas kanman hinataqa. Chayta ruwaspaqa sapankan rimasqaykichista valechiyta munankichis. Aswanpas imaynatachus phiñachisqallasuykita willay.