¿IMA NINMI BIBLIA?
Layqakuy
¿Huchachu wañusqakunawan rimay?
“Amallataq layqamanpas rinkichischu, ama chaykunawan qhellichakunaykichispaq” (Levítico 19:31)
¿IMA NINKUN RUNAKUNA?
Runakunaqa yachaytan munanku munakusqanku wañupuq runakuna ñak’arishankuchus icha manachus chayta. Chayraykun ninku: “Huk layqaman risaq, payqa yanapawanqan wañupuqniywan rimanaypaq. Chhaynapiqa yaqapaschá thak sientekusaq”, nispa.
¿IMA NINMI BIBLIA?
Ñawpa tiempopipas runakunaqa rimaqkun wañusqakunawan, ichaqa Bibliaqa huchachanmi chay ruwayta. Jehová Diosmi Israel nacionman kayta kamachirqan: “Aman qankuna ukhupiqa [...] mana allin espiritukunata rimachiqpas, wañuqpa alman rimachiqpas [...] kanqachu. Chay hina ruwaqkunataqa sinchitan Señor Diosqa cheqnikun”, nispa (Deuteronomio 18:10-12). Chaymantapas layqakuykunata ruwaqkunaqa “manan Diospa qhapaqsuyunman haykunqakuchu”, chaytan Biblia willawanchis (Gálatas 5:19-21).
¿Atinkuchu wañusqakuna kawsaqkunata ima ruwaytapas?
“Kawsashaqkunaqa yachankun wañukapunankuta, wañukapuqkunan ichaqa mana imatapas yachankuchu” (Eclesiastés 9:5)
¿IMA NINKUN RUNAKUNA?
Askha runakunan piensanku “wañusqakunaqa maypipas kawsashanallankupaq”. Chayraykun imatapas yachayta munaspaqa paykunata tapunku otaq mana dañota ruwachikuyta munaspa imatapas wañupuqkunapaq ruwapunku.
¿IMA NINMI BIBLIA?
“Kawsashaqkunaqa yachankun wañukapunankuta, wañukapuqkunan ichaqa mana imatapas yachankuchu [...]. Munakuyninkupas cheqnikuyninkupas envidiakuyninkupas tukukapunñan”, nispa (Eclesiastés 9:5, 6). Bibliaq nisqanman hinaqa wañusqakunaqa wañusqañan kapunku, manan imatapas piensankuñachu, manataqmi Diostapas serviyta atinkuñachu. Salmo 115:17 textoq nisqanman hinaqa wañusqakunaqa manan Diosta yupaychankuchu.
Ichaqa, ¿manachu layqakuna mayninpi yachay munasqanchista willawanchis?
“¿Wañusqakunatachu kawsaqkunamanta tapukunaykichis?” (Isaías 8:19, NM)
¿IMA NINKUN RUNAKUNA?
Wakinqa ninkun: “Layqakunaqa yachay munasqanchistan willawanchis, chaykunataqa wañuqpa familiankunallan, amigonkunallan yachanku”, nispa.
¿IMA NINMI BIBLIA?
1 Samuel libropi 28 capitulopin willan rey Saúl layqaman risqanta, chayta ruwaspaqa Diospa kamachisqan contran ruwasharqan. Saulmi huk layqaman rispa valekurqan profeta Samuelwan rimananpaq, profeta Samuelqa Diospa kamachinmi karqan payqa wañusqañan kasharqan. Ichaqa chay layqaqa manan Samuelwanchu rimachirqan, aswanpas hukmi Samuelpas kanman hina rimarqan.
Samuelpas kanman hina rimaqqa huk supaymi karqan, Satanaspa yanapaqnin, Satanastaqa Biblian sutichan ‘llullakunaq taytan’ nispa (Juan 8:44). Supaykunaqa runakunatan creechiyta munanku wañusqakuna kawsashallasqankuta, ¿imaraykun chayta ruwanku? Diostapas Simin Qelqantapas mana allinpi rikuchiyta munasqankurayku (2 Timoteo 3:16).
Chhaynaqa, ¿manachu ima suyakuypas kan wañusqakunapaq? Manan chhaynachu. Biblian willawanchis aya p’ampanakunapi kaqkuna kawsarimpunankuta, paykunaqa puñusqa hinallan kashanku (Juan 11:11-13; Hechos 24:15). * Hinaspapas munakusqanchis wañupuq runakunaqa manan ñak’arishankuchu, chaytan Biblia willawanchis.
^ párr. 16 ¿Imatapunin Biblia yachachin? nisqa libropin 7 capitulopi “Munakusqanchis wañupuq runakunapaq cheqaq suyakuy” nisqa yachachikuy tarikun. Chaytan leewaq www.pr418.com/quz nisqapi.
