Esposaykiwan * reqsinakushaspaqa kaqllachá gustoykichis karqan, ichaqa kunanqa manapaschá chaynañachu. Qallariypiqa nirqankichá “payqa ñoqapaq hinapunin” nispa, kunanqa ichaqa manañapaschá chaytachu ninki.

Ichaqa kanmi chaypaq yanapaykuna. Manaraq chay yanapaykunamanta rimashaspa yachasun imarayku chhayna sientekusqankumanta.

Sapa p’unchay kaq ruwaylla. Sapa p’unchay llank’aypas, wawaykikunata uywaypas, suegroykikunawan kawsaypas esposaykiwan munanakusqaykichistan pisiyachinman. Chaymantapas yaqapaschá qolqeykichis pisinman otaq mayqenniykichispas sinchita onqonman, chaykunapas munanakusqaykichistan pisiyachinman.

Hukniray kasqaykichista reparasqaykirayku. Reqsinakushaspaykichisqa manapaschá repararqankichischu imakunapi hukniray kasqaykichista. Ichaqa casarakusqaykichis qhepamanqa repararqankichischá imayna rimasqaykichispi, qolqeta gastaypi, problemakuna allichaypi, hukkunapipas hukniray kasqaykichista. Qallariypi mana reparasqaykichiskunaqa kunanqa mana aguantay hinapaschá.

Imayna sientekusqaychista mana willanakusqaykichisrayku. Sichus sapa kutilla mana allintachu tratanakunkichis, problemaykichistapas mana allichankichischu chayqa, hukniykichismi imayna sientekusqanmanta mana willakuyta munanqachu, hinaspapas yaqapaschá huk runawan hukllachakuyta qallarinqa.

Mana allinta yuyaykuspa casarakusqankurayku. Wakinqa kayta nispan casarakurqanku: “Payqa ñoqapaq hinan”, nispa. Munakuywanña chayta ninku chaypas, problemakuna rikhurimuqtinqa manañan chaytachu ninku, hinaspapas ninkumanpaschá “pantarunin paywan casarakuspaqa” nispa.

Qosaykiq allinkuna ruwasqanpi piensay. Huk listapi qelqay qosaykiq kinsa allinkuna ruwasqanmanta, hinaspa chaykunata churay casarakusqaykichis fotopi otaq celularniykipi, chaytataq sapa kutilla leey. Chhaynapin yuyarinki imarayku casarakusqaykichista. Qosaykiq allinkuna ruwasqankunapi piensanki chayqa, thakpin kawsankichis hinaspapas hukniray kasqaykichistan aguantankichis (Bibliaq yachachikuynin: Romanos 14:19).

Kuska kanaykichispaq tiempota t’aqaychis. Reqsinakushaspaykichisqa imatapas kuskan ruwayta munarqankichis. Kallpachakurqankichismi kuska lloqsinaykichispaq, chaywantaq kusisqa karqankichis. ¿Kallpachakuwaqchischu kunanpas kaqllata ruwanaykichispaq? Kuska kanaykichispaq tiempota t’aqaychis. Chayta ruwaspaqa aswan hukllachasqan kankichis, problemakunatapas allichaytan atinkichis (Bibliaq yachachikuynin: Proverbios 5:18).

Imayna sientekusqaykichismanta rimaychis. Sichus qosayki imatapas nisqanrayku otaq ruwasqanrayku k’irisqa sientekunki chayri, ¿atiwaqchu chay ruwasqanta qonqapuyta? Sichus mana atinkichu chayqa, ama mana rimanakuspaqa kaychischu, aswanpas imayna sientekusqaykichismanta rimaychis, kaq p’unchaypitaq chayta allichaychis (Bibliaq yachachikuynin: Efesios 4:26).

Ama mana allintaqa qosaykimanta piensaychu. Qosaykiqa manachá k’irisqa sientekunaykiraykuchu imatapas ruwarqan. Sichus sonqoykichista k’irinakurqankichis chayqa, pampachanakuychis. Chaymantapas rimaychis chaykuna mana pasananpaq imata ruwanaykichismanta. Bibliaq nisqanta kasukuychis, ninmi: “Sumaq sonqo kaychis, khuyapayanakuq, pampachaykunakuq”, nispa (Efesios 4:32).

Problemakunaqa kallanqapunin. Bibliaqa willanmi casarasqakunapaq problemakuna kananta (1 Corintios 7:28). Chayrayku problemayki kaqtinqa ama niychu “ama casarakuymanchu karqan” nispaqa. Aswanpas problemaykichista kuska allichaychis hinaspapas “paciencianakuychis, [...] pampachaykunakuychis” ima (Colosenses 3:13).