CHHAYNAPIQA manan Luiswan Jorgellapiwanchu tarikunku. Runakunaqa imachus yuyaykusqanku mana tupaqtinmi phiñachinakunku, tumpanakunkutaqmi mayqenninkuchus huchayoq kasqankutapas. Chayta mana allichaqtinkuqa amigontin kasqankupas tukupunmanmi.

¿Hayk’aqllapas chhaynapi tarikurqankichu? Manan pipas munanmanchu wasimasinwan amigonkunawanpas problemapi kaytaqa. Chhaynaqa, ¿imatan ruwasunman mana phiñachinakunapaq, mayninpiña sonqonchista k’iriwasunman chaypas? ¿Imatan ruwasunman caracterninchiswan mana atipachikunapaq? ¿Imatan ruwasunman pipas sonqonchista k’iriwaqtinchis? ¿Imaynatan allichasunman phiñachinakuykunata?

¿Imaraykun Luiswan Jorgewan manaña rimanaykakapurqankuñachu? Iskayninkupas mana allinta ruwasqankurayku: 1) Jorgeqa manan wasimasinkunapi piensarqanchu; 2) Luisqa phiñasqan Jorgewan rimarqan, chaymi Jorgeta phiñachirqan; 3) Iskayninkupas phiñakuywanmi atipachikurqanku; 4) Manan mayqenninkupas allichayta munarqanchu.

Tiempowanqa Luispas Jorgepas reqsikurqankun pantasqankuta, chaymi allipunapurqanku. Paykunataqa huk yachachikuymi yanaparqan, chay yachachikuyqa huk runakunatapas yanapallarqantaqmi phiñachinakuyninkuta allichanankupaq.

Chay yachachikuykunaqa Bibliapin tarikun, chay libron yanapawanchis allin yuyaykuq kananchispaq, sumaq sonqo kananchispaq, munakuq pacienciayoq ima kananchispaqpas. Chayna kayqa yanapawanchismi hukkunawan thakpi kawsanapaq, sonqonchispi k’irisqa kasqanchistapas thanichinmi (Proverbios 14:29; 1 Corintios 13:4, 5).

Bibliaqa atiyniyoqmi runakunaq kawsayninta cambiananpaq, chaymi Luistawan Jorgetawan yanaparqan. Wakin runakunapaqqa sinchi  sasan caracterninkuta cambiay, ichaqa paykunatapas Bibliaqa yanaparqanmi. Yachasun iskay runakunamanta: Robertoqa Australia nacionmantan, payqa sinchi k’araq sonqon karqan; Nelsonqa Timor Oriental nacionmantan, payqa sinchi cheqnikuqmi karqan, qhepamanmi ichaqa enemigonpa amigon kapurqan. ¿Imaynatan paykunata Biblia yanaparqan? ¡Rikch’ariy! revistata qelqaqkunan paykunata tapurqanku.

ROBERTO, ¿imayna uywasqan karqanki?

Familiaypiqa manan kusisqachu kawsarqayku. Taytayqa sinchi k’araq sonqo kasqanraykun maqakuq karqan. Mayninpiqa desmayanaykaman maqawaq, yawarkamallatañan saqewaq, chayraykun ñoqapas sinchi maqakuq karqani. Wayna kashaqtiyqa, waynakunapaq carcelmanmi apawarqanku chhaynapi cambianaypaq. Qhepa watakunamanmi runata suwaspa sinchita k’irisqayrayku carcelman wisq’awarqanku; chaymanta lloqsimusqay qhepamanmi Australia nacionman ripurqani, chaypi kawsayniyta cambianaypaq.

¿Huk nacionman ripusqayki yanaparqasunkichu?

Astawanqa yanapawarqan Jehová Diospa testigonkunawan Bibliata estudiasqaymi. Chaywanpas k’araq sonqo kasqaywanmi atipachikuqraq kani, chaymi mana valeqpaq qhawarikurqani. Huk kutinmi yuyaymanarqani Proverbios 19:11 textopi, ninmi: “Runaq allin yuyayniyoq-kayninqa phiñakuytan hark’an, k’amiqninta hinallata qhawaqqa hatunchasqan kanqa”, nispa. Ñoqaqa munarqanin allin yuyayniyoq kayta, chaymi yachayta munarqani imarayku mayninpi comunta rimarparisqanchista, phiñakusqanchista, mana allinta ruwasqanchistapas. Pisi-pisimantan yacharqani entiendeq kayta, pacienciayoq kayta, mana phiñakuq kaytapas.

¿Imaynatan chaykunata rikuchirqanki?

Huk kutinmi amigoyta phiñachirqani, hinan runaq ñawpaqenpi chay ruwasqayta niwarqan. ¡Ñoqaqa sinchi p’enqaypin qheparqani! Chaypin yuyarirqani: “Ama pimanpas mana allinmantaqa mana allinllawantaq kutichiychischu”, nispa (Romanos 12:17). Ñoqaqa pampachaynintan mañakurqani. Amigoy thak kashaqtinmi payllawan rimarqani, chaypin willawarqan familianpi hatun problemakuna kashasqanmanta. Ñoqaykuqa allipunapurqaykun, qhepamantaqmi huk munay abrigota regalawarqan. Kawsayniyta mana cambiaqtiyqa manachá chhaynatachu allichayman karqan.

Familiaykipi ima problemapas kaqtin, ¿imaynatan allichanki?

Kanmi 20 watayoq wawayku, familia ukhupiqa kanpunin phiñachinakuykunaqa, familiaypipas chaykunaqa kanmi. Ichaqa Bibliapin imaymanata yacharqani, hinallataq pampachay mañakuytapas. Sonqomantapuni “pantarunin, pampachaway” nispa niyqa, phiñachinakuykunatan thasnun, yanapawanchistaqmi aswan facilta problemakunata allichanapaqpas.

NELSON, ñawpaqpiqa k’araq sonqon karqanki, ¿willawankikumanchu?

Wayna kashaspaymi huk político grupopi karqani, chay grupoqa gobiernoq contranpin karqan. Hinaspapas kallarqantaqmi huk grupokunapas, paykunaqa tiyasqay ladotan munaychakusharqanku, paykunataqa sinchitan cheqnikurqani. Chaymantapas allin maqanakuq kayta munaspan maqanakuyta yachachiq escuelaman rirqani, ñoqaqa llapa phiñachiwaqniykunatan maqaq kani.

¿Imaraykun cambiapurqanki?

Biblia estudiaytan qallarirqani, chaypi yachasqayman hinataqmi kawsarqani, astawanqa iskay textokunaq nisqanmi sonqoyman chayarqan. Mateo 7:12 textopin nin: “Imaynatachus runakunaq ruwanasuykichista munankichis, chhaynallatataq qankunapas paykunata ruwaychis”, nispa. Mateo 22:39 textopitaqmi nin: “Runamasiykitan qan kikiykita hina munakunki”, nispa. Jehová Diospa testigonkunan yachachiwarqanku Bibliapi cheqaq kaqkunata, paykunaqa chay textoq nisqanman hinan llapa clase runakunata munakunku. Ñoqaqa paykuna hina kaytan munarqani; ñawpaqpiqa manchakunapaqmi karqani, kunanmi ichaqa manaña manchakuwankuñachu, chhayna cambiasqaytaqa sut’itan hukkunaqa reparanku.

¿Qhepakunapi atipachikurqankiraqchu k’araq sonqo kayniykiwan?

Runakunaq kasqanpiqa manañan, wasiypin ichaqa mayninpi atipachikuqraq kani. Huk kutinmi k’araqta phiñakurqani, hinan esposayta maqarqani. ¡Maytan pesapakuni chay ruwasqaymanta! Payqa pampachawarqanmi, chaytaqmi kallpachawarqan caracterniyta cambiashanallaypaq.

Kunanqa manañan manchakusunkikuñachu. ¿Imaynapin chayta repararqanki?

Político t’aqapi kashaqtiyqa chaypin huk importante runa karqan, Augusto sutiyoq, huk kutinmi paywan tuparqani. Payqa manchan-manchan hinan kasharqan, ñoqan ichaqa sumaq simiwan napaykurqani. Nirqanin ñawpaqpi pasasqankunata qonqapunaykupaq, wasiyman hamunanpaqmi invitarqani, payqa munarqanmi hamuyta. Admirakurqanmi kawsayniyta cambiasqaymanta, hinan paypas Bibliata estudiarqan. Kunanqa Augustowanqa amigontinmi kayku, iñiqmasiytaqmi kapunpas.

Imaymanamantan runaqa phiñachinakun, wakinqa sasa allichaymi kanman. Chaymantapas manan llapa runakunachu allipunayta munanku. Chayraykun Bibliaqa sut’ita kayta niwanchis: “Atisqaykichisman hina allinllatapuni ruwaychis llapa runawan sumaqpi kawsanaykichispaq”, nispa (Romanos 12:18).

¿Imatan reparanchis chaykuna yachasqanchispi? Bibliapi consejokunaqa yachaywan ruwasqan kashan, chaykunaqa manan yanqachu; runakunapaqña sasa kanman caracterninkuta cambiay chaypas, Bibliaq yanapayninwanqa atinkun cambiayta (2 Corintios 10:4). Proverbios 3:17, 18 texton nin: “Yachayqa sumaq ñanninkunatan pusasunki, payqa thak-kaypin kawsachisunki. Yachayqa kawsay sach’a hinan chayta chaskikuqkunapaqqa, kusisamiyoqmi yachayman k’askakuqkunaqa”, nispa.

¿Munawaqchu llanp’u sonqo kayta kusisqa kaytapas? ¿Munawaqchu problemapi tarikushaqtiyki amigoykikuna ama saqerparinasuykikuta? Biblian yanapasunki chaykunapi.