Mabelqa Argentina nacionpin tiyan, payqa runakunatan yanapaq onqoyninkumanta allinyanankupaq (fisioterapeuta), payqa qhalin karqan. 2007 watapin sayk’usqa sientekuyta qallarirqan, sapa p’unchaymi uman nishuta nanaq. Ninmi: “Askha doctorkunawanmi qhawachikurqani, imaymana hampikunatan tomarqani, ichaqa manan qhaliyarqanichu”, nispa. Qhepakunamanmi payqa yacharqan umanpi tumorniyoq kasqanta. Paymi willakun: “¡Mosqoypi hinaraqmi tarikurqani! Nirqanin: ‘Chayqa wañuchiwanqachá, imaynapitaq chayri umaypiri kashanman’, nispa.

“Operawasqanku qhepamanñan entienderqani imayna onqoyniyoq kashasqayta. Operawasqanku qhepaman rikch’aspayqa manan kuyuriyta atirqanichu. Manaraq operawashaqtinkuqa k’uchin phawaykacharqani. Chay qhepamanmi ichaqa umaytapas mana kuyurichiyta atirqanichu. Hospitalpi kashaspaqa kaykunallatan uyarirqani: doctorkunaq herramientanpa bulla ruwasqanta, ambulanciakunaq bulla ruwasqanta, onqosqakuna nanaymanta waqasqankutapas; manan imatapas entiendeyta atirqanichu. Chaypiqa nanayta ñak’ariyllatan rikurqani.

“Kunanqa allinñan kashani. Atiniñan sapallaymanta puriytapas, calletapas lloqsirqanin sapallay. Ichaqa iskaytan imatapas rikuni, manan allintachu makiykunatapas chakiykunatapas kuyuchini”, nispa.

Ama pisipaychu. Proverbios 17:22 texton nin: “Kusisqa sonqoqa allin hampin, llakisqa sonqon ichaqa onqochin”, nispa. Mabel yuyarin: “Ñawpaqpiqa ñoqan runakunata ejerciciota ruwachiq kani onqoyninkumanta allinyanankupaq, operawasqanku qhepatan ichaqa ñoqañataq necesitarqani yanapayta. Sinchitan cuerpoy nanawaq ejerciciokunata ruwachiwaqtinku, mayninpiqa saqepuytaraqmi munaq kani. Ichaqa yacharqanin chaykuna allinniypaq kasqanta, chaymi mana pisipanaychu karqan”, nispa.

Suyakushallay. Mabel nin: “Bibliapin yacharqani imaraykun desgraciakuna kasqanta. Chaymantapas yachallarqanitaqmi tukuy nanaykuna chinkapunanpaq pisillaña faltasqanta”, nispa. *

Diosqa sientenmi imaynapi tarikusqaykita (1 Pedro 5:7). ¿Imaynatan chayta yachay Mabelta yanaparqan?, ninmi: “Operawananku salapi kashaspaymi repararqani may cheqaqchus Isaías 41:10 textoq nisqan kasqanta, chaypin nin: ‘Ama manchakuychu, qanwanmi ñoqaqa kashani’, nispa. Jehová Diosqa sientenmi chhaynapi tarikusqayta, chayta yachaymi thakta sientechiwarqan”, nispa.

¿Yacharqankichu kayta? Pisi tiempomantan manaña pipas onqonqañachu, chaytan Biblia willawanchis (Isaías 33:24; 35:5, 6).