Wawaykiq pukllasqan cuartomantan uyarikamun imapas p’akikunman hina. Chayta uyarispan usqhaylla phawanki, chaypin tarinki wawaykita mancharisqa uyantin sayashaqta ñawpaqenpitaq rikunki porcelana maceterota ñut’u p’akisqata.

Qantaq phiñasqa tapunki, “¿qanchu maceterota p’akirurqanki?”, nispa.

Paytaq mancharisqa kutichisunki, “¡manan ñoqachu mamitay!”, nispa.

¡Sut’in kashan llullakusqanqa! Ñawpa kutikunapipas llullakurqanñan. ¿Llakichinasuykichu chay ruwasqan?

Llapa llullakuypas huchan. Jehová Diosqa cheqnikunmi llullakuytaqa (Proverbios 6:16, 17). Chaymi israelitakunaman kamachikuyta qorqan pipas runamasinta q’otuqtaqa castiganankupaq (Levítico 19:11, 12).

Ichaqa manan llapa llullakuychu kaqkama. Wakinqa llullakunku hukkunata dañota ruwanankupaqmi, wakinmi ichaqa mana castigasqa kanankupaq otaq mana p’enqaypi kanankupaq (Génesis 18:12-15). Llapa llullakuyña hucha chaypas wakinmi aswan mana allinmanraq apanman. Wawayki llullakuqtinqa qhawarinaykin hayk’a watayoq kasqanta imaraykuchus llullakusqantapas.

Wawaykita yanapay huch’uyllaraq kashaqtin. David Walsh doctormi nin: “Sasaña kaqtinpas cheqaqta rimaqtiykiqa wawakunaqa allin yachachikuytan chaskinku. Cheqaqta rimaqkunapiqa confianchismi, llullakuqtinmi ichaqa chay confianza mana kapunñachu”, nispa. *

Ichaqa ama manchakuychu. Wawayki llullakuqtinqa manan ninaykichu “kay wawayqa suwachu kanqapas” nispaqa. Bibliaq nisqan hina, yaqapaschá wawaykiq sonqonpiqa saphichasqa kashan ‘loqhe-kay’ otaq mana yuyayniyoq-kay (Proverbios 22:15). Wakin wawakunaqa mana castigasqa kanankupaqmi llullakunku, chhaynapin rikuchinku mana yuyayniyoq kasqankuta. Chayraykun yanapanaykipaqqa allinta reparanayki.

Reparay imarayku wawayki llullakusqanta. Yaqapaschá llullakun castigasqa kayta manchakuspa otaq mana phiñakunaykita munaspa. Sichus allinpi qhepananrayku cuentokunata paqarichispa amigonkunaman willan chayqa, yaqapaschá mana reparanraqchu cheqaq kaqta llullakuymanta. Sichus imarayku llullakusqanta reparanki chayqa atinkin yanapayta (Bibliaq yachachikuynin: 1 Corintios 13:11).

Ruwasqanta yachashaspaykiñaqa ama tapuychu. Qallariypi rimasqanchis mamaqa yacharqanñan wawanpa ruwasqanta, chaywanpas tapurqanmi: “¿qanchu maceterota p’akirurqanki?”, nispa. Wawanqa maman mana phiñakunanraykun “manan” nispa kutichirqan. Ichaqa sichus maman sut’ita ninman karqan “¡ay, maceterota p’akirqosqanki!”, nispa chayqa, wawanqa manapaschá llullakunmanchu karqan. Chhaynatan wawakunataqa yachachina sut’illanta willakunankupaq (Bibliaq yachachikuynin: Colosenses 3:9).

Sut’illanta willakuqtinqa “kusa waway” nispa niy. Wawakunaqa munankupunin tayta-mamanku kusichiyta. Chhaynataq kanku chayqa, yachachiy sut’illanta willakusqankuqa llapaykichispaq ancha allin kasqanta. Kayta niy: “Sut’illanta willawanaykitan munani”, nispa (Bibliaq yachachikuynin: Hebreos 13:18, NM).

Sut’inta niy: “Llullakuqtiykiqa manañan qanpi confiasaqchu, hukmanta qanpi confianaypaqqa sasan kanqa”, nispa. Sut’illanta willakuqtinqa “kusa waway” nispa niy, chhaynapin yachanqa qhepa kutikunapipas sut’illan willakuyta. Yaqapaschá niwaq: “Anchatan kusikuni sut’illanta willakuqtiykiqa”, nispa.

Sut’illanta rimaychis. Sichus wawaykita yachachiwaq: “Manan kaypichu niy”, nispa; otaq uyarisunkiman: “Mana llank’aq risqaymanta tapuwaqtinqa ‘onqosqan karqani’ nispa nisaq”, nispa nisqaykita chayqa, ima uyaykiwanmi wawaykita niwaq “manan llullakunaykichu” nispa (Bibliaq yachachikuynin: Santiago 3:17).

Bibliawan yachachiy. Bibliaqa runakunaq kawsayninmanta willaspan yachachiwanchis honrado kayta. Jehová Diospa testigonkunan ruwanku Aprendamos del Gran Maestro nisqa librota, chay libron wawakunata yachachin honrado kayta. 22 capitulon riman: “¿Imaraykun mana llullakunachu?”, nisqamanta. (Chay capitulomanta huk parteta qhaway “ Wawaykita yanapananpaq libro” nisqa recuadropi.)