ALLIN tayta kayqa manan facilchu, sichus wawaykikunata wanachina kashaqtin mana wanachinkichu chayqa, mana allinpin tukunqa. ¿Imarayku? Wawaykikunan mana kasukuspa munasqankuta ruwanqaku qantaq llakisqa sientekunki. Chayraykun wanachina kaqtinqa wanachinayki, sut’intataq ninayki imarayku wanachisqaykita.

Wanachina kaqtin munakuywan wanachinki chayqa wawaykikunatan yanapashanki allinta piensanankupaq allinta comportakunankupaq ima. Imata ruwanankupaqpas allintan decidenqaku allin runakunataq kanqakupas. Ichaqa, ¿maypin tariwaq wawaykikunata allinta educanaykipaq allin yachachikuykunata?

Bibliallapin allin yachachikuykunataqa tarisunman, Jehová Diospa testigonkunaqa seguron kashayku chaymanta, ¿imarayku? Biblia kikinpunin nin Bibliaqa “allinpuni yachachinapaq, anyanapaq, wanachinapaq” kasqanta (2 Timoteo 3:16). Bibliaqa aswan allinmi educacionmanta yachachiq librokunamantapas. Kamachikuyninkunamantan yachasunman familiakunapaq allin yachachikuykunata. Chaypaq qhawarisun wakin ejemplokunata.

BIBLIAN NIN: “Loqhe-kayqa waynaq sonqonpin saphichakun”, nispa (Proverbios 22:15).

Wawakuna sumaqña khuyapayakuqña kankuman chaypas, mana experienciayoq kaspan ima ruwasqankupipas pantanku. Chaymi necesitanku wanachinata (Proverbios 13:24). Chaytan tayta-mamakunaqa allinta yachananku, chay hinapin wawankuta allinta yanapanqaku.

BIBLIAN NIN: “Wawachus wanachinapaq kaqtinqa, payta wanachiy”, nispa (Proverbios 23:13).

Manan ninaykichu “sichus wawayta wanachisaq chayqa traumarusaqpaschá” nispaqa, manan traumawaqchu sumaqllata wanachispaqa. Nitaqmi wiñaypaqchu sintikunqapas. Aswanpas yachachishankin humilde kayta consejasqatapas uyarikuqllapuni kaytawan (Hebreos 12:11).

 BIBLIAN NIN: “Imatachus runaqa tarpunqa chayllatataqmi cosechanqapas”, nispa (Gálatas 6:7).

Tayta-mamakuna wawankuta cuidasqankuqa allinmi, chaymi paykunaq deberninqa. Ichaqa wawakuna imapipas pantanku chayqa manan tayta-mamakunachu allichananku, tayta-mamakuna allichanqaku chayqa manan wawankuta yanapashankumanchu. Hinaspapas profesorninku otaq mayqen kurak runapas quejakunqa wawankuq mana allin ruwasqanmanta chayqa, manan tayta-mamakunaqa wawankumanchu sayapakunanku. Chay hinapin wawakunaqa yachanqaku kurakkuna respetayta (Colosenses 3:20).

BIBLIAN NIN: “Ima munasqanta ruwananpaq hinallata qhawasqa wawan ichaqa mamanta p’enqachin”, nispa (Proverbios 29:15).

Tayta-mamakunaqa manan millay patrón hinachu wawankuta kamachinanku, nitaqmi hinallatachu wawankuta qhawananku mana allin ruwasqankuta. Huk libron nin: “Taytankuq mana controlasqan wawakunaqa [manan cuentata qokunkuchu] wasipiqa tayta-mamanku kamachikuq kasqankumanta”, nispa. Sichus tayta-mamakuna mana allintachu wasipi kamachikunqaku chayqa, wawankun piensanqa paykuna wasipi kamachikusqankuta. Chay hinapi ima mana allinpipas urmanqaku, tayta-mamakunataq p’enqaypi kanqaku (Proverbios 17:25; 29:21).

BIBLIAN NIN: “Chayraykun runaqa [...] warminman hukllachaykakapunqa, huk cuerpollataq kapunqaku”, nispa (Mateo 19:5).

Bibliaq yachachisqan hina, huk warmiwan huk qhariwanqa manaraq wawayoq kashaspan casarakunanku, wawanku wiñaruqtinpas kuskallan kashananku (Mateo 19:5, 6). Chaywanmi nishanchis qosaqa qosa kasqanta esposapas esposa kasqanta ñawpaqtaqa hunt’anankuta, chaymantañan tayta-mama kasqankutaqa hunt’ananku. Sichus tayta-mamakuna mana chaytachu ruwanqaku chayqa, wawakunan piensanqaku paykuna imamantapas aswan importante kasqankuta (Romanos 12:3). Tayta-mamakuna wawankuq tukuy necesitasqankuta qoyllapi piensanqaku chayqa matrimonio kawsayninkupin mana allintachu kawsanqaku.

Sichus allin tayta kayta munanki chayqa kasukuy kay yanapaykunata.

Munakuspa uyway. “Tayta-mamakuna, wawaykichista ama k’utuychischu, paqtan unphuyankuman” (Colosenses 3:21).

Ima nisqaykitapas hunt’ay. “‘Arí’ nisqaqa, ‘arí’ nisqallapuni, ‘manan’ nisqapas, ‘manan’ nisqallapuni” kachun (Mateo 5:37).

Wanachina kaqtinqa wanachiy. “Chaywanpas huchaykimantaqa muchuchisqaykipunin, ahinapi wananaykipaq” (Jeremías 30:11) *.