1. ¿Imaraykun munawaq pacienciakuq runakunawan kayta?

 LLAPAPAS munasunmanmi llank’anatapas imatapas pacienciakuq runakunawan ruwayta ¿riki? Pacienciakuq runakunaqa manan aburrisqachu imatapas ruwanku. Imata ruwaspapas pantarunchisña chaypas pacienciakullankun. Chaymantapas maytachá “gracias” ninchis Bibliamanta yachachiwaqninchis hermanotaqa. Paykunaqa yachasqanchisman jinachá mayta noqanchiswanqa pacienciakunanku karqan. Astawanqa, ¡Jehová Diostachá mayta “gracias” ninchis noqanchiswan pacienciakusqanmanta! (Rom. 2:4).

2. ¿Imakunapi tarikuqtinchismi sasa kanman pacienciakuq kay?

² Arí, llapanchismanmi gustawanchis pacienciakuq runakunawan juñukuyqa. Ichaqa, ¿noqanchis imapipas pacienciakunanchis kanqa chayri? Yaqapaschá maytapas apurasqa viajashaqtinchis mana apuraychu carro purinman, ¿imatan ruwasun chhaynapi tarikuspa? Jujkuna nishuta turiawasunman chayri, ¿imatan ruwasun? Mayninpi Diospa gobiernonta mana chayamuq atiqta jina qhawarisunman chayri, ¿imatan chaypipas ruwasunchis? Llapapas munasunmanmi aswan pacienciakuq kayta ¿riki? Kaypin yachasunchis imas pacienciakuq kay chayta, imaraykus pacienciakuq kananchis chaytapas. Yachallasuntaqmi imakunas yanapawasunman aswan pacienciakuq kananchispaq chaytapas.

3. ¿Imatan ruwan pacienciakuq runa jujkuna nishuta turiaqtinku?

³ Kaypi astawan yachasun imaynas pacienciakuq runa chayta. Pacienciakuq runaqa, manan apuraychu imawanpas phiñakun ni renegakun. Aswanmi kallpachakun tranquilolla kananpaq thajlla kananpaq, manataqmi piqpa ima nisqanmanpas  ni ruwasqanmanpas kaqtachu kutichin. Chhayna pacienciakuq kaymanta rimaspaqa Jehová Diosmantan Bibliapiqa ñaupaqta rimashan. Chaypin nin: “Noqaqa khuyapayakuq, sumaq sonqo Diosmi kani, mana usqhaylla phiñakuq, mana tukukuq may jatun munakuyniyoq Diosmi kani”, nispa (Éx. 34:6, ñaupaq kaq willakuy).

4. ¿Imataña suyakuna kaqtinpas imaynatan pacienciakuq runa chayta suyakun?

⁴ Pacienciakuq runaqa pacienciallawanmi imatapas suyan. Imapas mana apuraychu ruwakushan chayqa, manan phiñakunchu ni coleranchu (Mat. 18:26, 27). Sapankan imaymanapi rikuchinanchis pacienciakuq kasqanchista. Ejemplopaq, pipas imatapas willawanchis chayqa pacienciawanmi uyarinanchis, manan sayachinanchischu (Job 36:2). Bibliamanta yachachisqanchis runatapas pacienciawanmi yachachinanchis. Mayninqa manapaschá ratuchu imatapas entiendenqaku manapaschá apuraychu ima viciotapas saqenqaku.

5. ¿Imapin rikuchinallanchistaq pacienciakuq kasqanchista?

⁵ Pacienciakuq runaqa manan imatapas ruwanpachachu nitaqmi rimanpachachu. Arí, mayninqa apuraymi imatapas ruwana. Ichaqa ima ruwanapas importante kaqtinqa pacienciakuq runaqa manan apuraychu ruwanpacha, nitaqmi tukuruy yuyayllañachu ruwanpas. Aswanmi tiempota orqon imaynatas ruwanqa chayta allinta piensarinanpaq, chaymantataq susigollawan chay ruwananta allinta ruwan.

6. ¿Imatan ruwan pacienciakuq runa sasachakuykunapi tarikuspa?

⁶ Pacienciakuq runaqa kallpachakunmi ima sasachakuytapas mana quejakuspa aguantananpaq. Mana pacienciakuq kaspaqa manan imatapas aguantayta atisunmanchu. Ichaqa manan juchachu ima llakipipas tarikuspanchis juj confianza amigonchisman chayta willakuyqa. Chaywanpas pacienciakuq runaqa tukuy atisqantan ruwanqa kusisqalla Jehová Diosta servinanpaq (Col. 1:11). Diosta  serviqkunaqa llapa chaykunapin rikuchinanchis pacienciakuq kasqanchista. ¿Imarayku? Chaykunamanta kunan yachasun.

7. Santiago 5:7, 8 nisqan jina, ¿imaraykun ancha allinpuni pacienciakuq kay? (Qhaway kay parrafopaq dibujokunata).

⁷ Salvasqa kanapaqqa pacienciakuqmi kana. Ñaupa tiempopi Diosta serviqkuna jinan pacienciawan suyakunanchis Diospa promesan junt’akunanta (Heb. 6:11, 12). Bibliaq nisqanman jinaqa chajra llank’aq runakuna jinan noqanchisqa kanchis (leey Santiago 5:7, 8). Chajra llank’aqqa tukuy atisqantan kallpachakun chajranta tarpunanpaq qarpananpaq ima. Ichaqa manan yachanchu jayk’aqchus wiñanqa chaytaqa. Chaywanpas pacienciallawanmi payqa suyakun, yachanmi imaynas mijuytaqa oqarinqapuni chayta. Chhaynan pasan Diosta serviqkunawanpas. Tukuy atisqankutan llank’anku Jehová Diospaq manaña yachankuchu “ima p’unchaytachus Señorninku jamunqa chaypas” (Mat. 24:42). Chhaynaqa pacienciakushallasun tiempollanpin Jehová Diosqa promesankunata junt’anqa. Manachus pacienciakusunman chayqa pisi-pisimantan Diospa ñanninmanta t’aqakusunman. Chaymantapas juj ratulla kusichiq kay pacha cosaskunamanmi yuyayninchista churasunman. Pacienciakuqchus kasun chaytaq tukukuykama aguantasun jinaspa salvasqa kasunchis (Miq. 7:7; Mat. 24:13).

8. ¿Imaraykun nisunman “pacienciakuq kaspaqa allintan jujkunawan apanakusun” nispa? (Colosenses 3:12, 13).

⁸ Pacienciakuq kasun chayqa allintan jujkunawanpas apanakusun. Pacienciawanmi ima niwasqanchistapas uyarisun (Sant. 1:19). Chhaynapitaq thaj kausay kananpaq yanapakusun. Chaymantapas pacienciakuq kaspaqa manan comuntachu imatapas rimasun. Piña sintichiwasun otaq ofendewasun chaypas manan phiñakusun pachachu ni renegasun pachachu. Aswanmi noqanchispura “paciencianakusun perdonanakusun” ima (leey Colosenses 3:12, 13).

9. ¿Imaraykun nisunman “pacienciakuq kaspaqa allinta piensaykuspan imatapas ruwasun” nispa? (Proverbios 21:5).

⁹ Pacienciakuq kaspaqa manan comuntachu imatapas ruwasun. Aswanmi ñaupaqtaqa allintaraq piensarisun, allinta tanteakusun mayqensi allin kanman mayqensi mana chayta (leey Proverbios 21:5). Chaypaq yachasun llank’anamanta. Mana llank’anayoqchus kashanchis chayqa yaqapaschá comunta ima llank’anamanpas jaykusunman. Wakin juñunakuyman rinanchistaña Diosmanta willaq lloqsinanchistaña jark’awasunman chaypas jaykullasunmanpaschá. Ichaqa pacienciakuqchus kasun chayqa allintan qhawarisun maypis chay llank’ana kashan, ima horaskamas llank’akun, imaynas familianchiswan Jehová Dioswanpas kasun chaykunata. Pacienciakuq kaspaqa allin yuyaywanpunin imatapas ruwasun.

10. ¿Imatan ruwananchis astawanraq pacienciakuq kananchispaq?

¹⁰ Jehová Diosmanta mañakusun. Pacienciaqa espirituq jujnin rurunmi (Gál. 5:22, 23). Chayrayku Jehová Diosmanta mañakusun espiritunta, chhaynapi noqanchispi rurunkunata wiñachinanpaq. Imapipas tarikushanchis chayqa reparakunchistaq paciencia faltawasqanchista chayqa, astawan Diospa espiritunta mañakusun (Luc. 11:9, 13). Chaymantapas Jehová Dios jinan imatapas qhawarinanchis, chaypaqpas paypa yanapaynintan mañakunanchis. Diospa yanapayninta mañarukuspaqa tukuy atisqanchistan kallpachakunanchis pacienciakuq kananchispaq. Chhaynaqa Diospa yanapaynintachus mañakushallasun chayqa, tukuy atisqanchistataqchus  kallpachakusunpas chayqa, pisi-pisimantan aswan pacienciakuq kasunchis.

11, 12. ¿Imaynatan Jehová Dios rikuchirqan pacienciakuq kasqanta?

¹¹ Bibliapi kaq ejemplokunapi piensasun. Bibliapiqa askhan ejemplokuna kashan pacienciakuq runakunamanta. Paykunaq ejemplonpichus allinta piensasun chayqa noqanchispas paykuna jinan kasun. Wakinmanta astawan yachasun, ñaupaqtaqa Jehová Diosmanta yachasun, paymi llapamantapas aswan pacienciakuqqa.

¹² Satanasmi Edén huertapi Jehová Diosmanta mana allinta rimarqan, imayna gobernaqchus, imayna Dioschus kasqanmanta iman mana allinta rimarqan. Jehová Diosqa atinmanmi karqan kasqan rato chay llullata chinkachiyta, ichaqa manan chaytachu ruwarqan aswanmi pacienciakurqan; suyakurqanmi tiempowanqa llapa imapas sut’iman orqokunanta. Kunankamapas Diosqa aguantashallanmi chay enemigo paymanta mana allinta rimananta. Chaymantapas gracias Diospa paciencianraykun askha runakuna payta reqsishanku, paykunaqa wiñay kausaytan chaskinqaku (2 Ped. 3:9, 15). Llapanchismi allinta piensarinanchis imakunas karqan Diospa pacienciakusqanrayku chaykunapi. Chaykunapi piensasun chayqa pacienciawanmi noqanchispas suyakusun paypa p’unchayninta.

13. ¿Imaynatan Jesús rikuchirqan papan jina pacienciakuq kasqanta? (Qhaway kay parrafopaq fotota).

¹³ Jesusqa papan jina pacienciakuqmi, kay pachapi kashaqtinmi chayqa sut’ita rikukurqan. Ichaqa manachá paypaqqa facilchu karqan pacienciakuq kayqa. Kamachikuy simita yachachiqkunapas, fariseo runakunapas nishutan paciencianta tukuqku (Juan 8:25-27). Chaywanpas Jesusqa Jehová Dios jinan mana faciltachu phiñakuqpas ni coleraqpas. Cheqnikuqnin runakunaña imaymanata  niqku chaypas, manan payqa kaqtachu kutichiq, manan ni k’amiqpaschu (1 Ped. 2:23). Aswanmi payqa pacienciallawan chaykunata aguantarqan manan ni quejakuqpaschu. Chaychá Bibliapiqa niwanchis: “Tukuy yuyaywan qhawashallaychis juchasapa runakunaq imaymana k’amisqan aguantaqta”, nispa (Heb. 12:2, 3). Jehová Diospa yanapayninwanqa noqanchispas aguantallasunmi ima pruebatapas.

14. ¿Imatan yachasunman Abrahán pacienciakuq kasqanmanta? (Hebreos 6:15; qhaway fotota, dibujotawan).

¹⁴ Tukukuy p’unchay chayamunanmanta rimasun. Chay p’unchaypi piensaspaqa yaqapaschá nisunman “maytaq chayamunraqchu, manachus jina noqaqa rikuymanñachu” nispa. ¿Iman yanapawasunman chay p’unchayta pacienciallawan suyakunanchispaq? Abrahanpa ejemplonmi. Jehová Diosmi payta nirqan: “Noqan qanta jatun nacionman tukuchipusayki”, nispa. Chay tiempopaqqa 75 watanpin Abrahanqa kasharqan (Gén. 12:1-4). Ichaqa, ¿rikurqanchu chay promesaq junt’akusqanta? Wakichallantan rikurqan. Pay wawayoq kananpaqpas 25 watataraqmi suyakurqan, Diospa milagro ruwasqanwanmi wawan Isaacqa nacerqan. 60 wata qhepamantaq nieton Esaú Jacob ima nacerqan (leey Hebreos 6:15). Ichaqa, Abrahanqa manan rikurqanchu paymanta jamuq runakuna jatun nacionman tukusqantaqa, ni prometesqan jallp’aman jaykusqankutapas. Chaywanpas Abrahanqa allin amigontinmi kamaqninchis Dioswanqa karqanku (Sant. 2:23). Kaypi piensasun: Abrahanqa may kusisqachá kausarimpuspaqa kanqa. ¿Imarayku? Payqa allintachá yachanqa imaynas iñisqanrayku pacienciakusqanrayku ima llapa nacionkuna bendecisqa karqan chayta (Gén. 22:18). ¿Imatan Abrahanmanta yachasunman? Manapaschá Diospa llapa promesankuna junt’akusqantachu  rikusun. Ichaqa sichus Abrahán jina pacienciakuq kasun chayqa, Jehová Diosqa imaymana bendicionkunatan qowasun; gobiernonpipas askha bendicionkunatan chaskisun (Mar. 10:29, 30).

15. ¿Imakunamantan estudiasunman?

¹⁵ Nimusqanchis jina Bibliapiqa askhan ejemplokuna kashan pacienciakuq runakunamantaqa (Sant. 5:10). ¿Sapankankumanta estudiawaq chayri? b Paykunamanta jujninmi kashan David. Paytaqa chikuchallaraq kashaqtinmi ajllarqanku Israelpi rey kananpaq, ichaqa askha watatan suyakunan karqan rey kananpaqqa. Simeonwan Anawanpas allin ejemplon kallankutaq, paykunapas unaymi suyakurqanku Mesías chayamunanta (Luc. 2:25, 36-38). Paykunamanta yachashaspaqa tapukuy: “¿Iman kay runata yanapanman karqan pacienciakuq kananpaq? ¿Ima allinkunatan tarirqan pacienciakuq kasqanmanta? ¿Imaynatan noqapas pay jina kayman?”, nispa. Mana pacienciakuq runakunamantapas imaymanatan yachasunman (1 Sam. 13:8-14). Paykunamanta yachashaspaqa yaqapaschá tapukusunman: “¿Imaraykun mana pacienciakuq kankuman karqan? ¿Ima mana allinkunapin rikukurqanku mana pacienciakuq kasqankumanta?”, nispa.

16. ¿Ima allinkunan kanqa pacienciakuq kaqtinchis?

¹⁶ Pacienciayoq kaspaqa imaymana allinkunatan tarisun. Pacienciakuq kaspaqa kusisqan kausasun, manataqmi imawanpas colerasun pachachu. Pacienciakuq kayqa allinmi saludninchispaqpas yuyayninchispaqpas. Pacienciakuq kaspaqa allintan jujkunawanpas apanakusun, jujllan kasun iñiq t’aqapipas. Jujkunaña imataña ruwankuman chaypas manan phiñakusunchu, aswanmi thajlla kasun (Sal. 37:8; Prov. 14:29). Astawanqa Jehová Dioswanmi allin amigontin kasun; pacienciakuq kaspaqa paytan qatikushanchis.

17. ¿Imapaqmi tukuy atisqanchista kallpachakushanallanchis?

¹⁷ Kaypi yachasqanchis jina, pacienciakuq kayqa may munaypunin. Manaña facilchu pacienciakuq kay chaypas, Jehová Diospa yanapayninwanqa atillasunmi pacienciakuq kayta. Pacienciallawan Diospa gobiernontapas suyakusun. Yachasqanchis jina, “Jehová Diospa ñawinqa manchakuqninkunapin kashan, paypa ñawinqa mana tukukuq munakuyninta suyakuqkunapin kashan” (Sal. 33:18). Chhaynaqa kallpachakushallasun pacienciakuq kaywan p’achakunanchispaq.