1. ¿Imakunatan yacharqanki Biblia estudiayta qallarishaspa?

 ¿YUYASHANKICHU Biblia estudiayta qallarishaspa imakunachus yachasqaykita? Yaqapaschá admirasqa karqanki Diospa sutinta yachaspayki. Yaqapaschá infiernomanta yachaspayki nirqanki: “Diosqa manamá runakunataqa infiernopiqa ñak’arichisqachu”, nispa. Wañusqakuna kausarimpunanta yachaspapas maytachá kusikurqanki, “familiaywanqa tupasaqchá paraisopiqa” nispapaschá nirqanki.

2. Imaymanataña Bibliapi yachasharqanki chaypas, ¿imakunatawanmi ruwarqanki Diosta munakusqaykita rikuchinaykipaq? (Efesios 5:1, 2).

² Bibliata estudiasqaykiman jinachá astawan Jehová Diosta munakurqanki. Chay munakuytaqchá tanqarqasunki yachasqaykiman jina imatapas ruwanaykipaq. Bibliapi yuyaychaykunaman jinachá imatapas ruwayta qallarirqanki, Diospa siminman jinachá kausaytapas qallarirqanki, chayman jinachá piensaytapas qallarirqanki. Imaynan juj wawaqa taytanpa ruwasqanta jina imatapas ruwan, chhaynatachá qanpas janaq pacha Taytanchispa ruwasqanta jina imatapas ruwayta qallarirqanki (leey Efesios 5:1, 2).

3. ¿Imanispan tapukunanchis?

³ Ichaqa sapankanchismi tapukunanchis: “¿Bautizakusqay tiempomanta astawanraqchu kunan Jehová Diosta munakuni? ¿Jehová Dios jinachu piensani, pay jinachu imatapas qhawarini, pay jinachu iñiqmasiykunatas munakuni?”, nispa. Sichus juj chhikanta munakuyniyki pisiyarun chayqa, ama llakikuychu. Chayqa pasarqanmi apostolkunaq tiemponpi iñiqkunatapas. Chaywanpas Jesusqa manan mana valeqpaq jinachu paykunataqa qhawarirqan; noqanchistapas manan chhaynatachu qhawariwasun (Apo. 2:4, 7). Payqa allintan yachan imaynas munakuyninchisqa astawanraq yapakunman chayta.

4. ¿Imakunamantan kaypi yachasunchis?

⁴ Kaypin yachasunchis imatas ruwasunman Jehová Diosta jujkunatapas astawan munakunanchispaq chayta, yachallasuntaqmi  imaynas munakuyqa allinpuni noqanchispaqpas jujkunapaqpas chayta.

5, 6. a) ¿Imakunapin apóstol Pablo tarikurqan Diospa munayninta ruwashaspa? b) ¿Iman kallpacharqan Jehová Diosta servishanallanpaq?

⁵ Apóstol Pabloqa kusisqan Diosta serviq, chaywanpas mayninpiqa imaymana mana allinkunapin tarikuq. Payqa karutan puriq, purisqan wakin ñankunaqa manan fácil puriychu karqan. Wakin ñankunapiqa jatunmi mayukuna kaq, suwakunapas askhan kaq. Mayninqa juj runakunaq maqasqanmi Pabloqa karqan (2 Cor. 11:23-27). Wakin iñiqmasinkunapas manan valoraqkuchu paykunarayku imaymana ruwasqanta (2 Cor. 10:10; Filip. 4:15).

⁶ Chhayna sasachakuykunapiña tarikurqan chaypas, ¿iman apóstol Pablota yanapanman karqan Diosta servishanallanpaq? Payqa Biblia estudiasqanpi vidanpi iman repararqan Jehová Diosqa munakuq kasqanta. Chaymi mana pisipaspa paypa munayninta ruwarqan (Rom. 8:38, 39; Efes. 2:4, 5). Dios imaynachus kasqanta yachaspan Pablopas tukuy sonqo paytaqa munakurqan. Payta munakusqantan rikuchirqan iñiqmasikunata servispa (Heb. 6:10).

7. ¿Iman yanapawasunman Jehová Diosta astawan munakunanchispaq?

⁷ Noqanchispas Jehová Diosta astawan munakunanchispaqqa tukuy yuyaywanmi Bibliata estudiananchis. Bibliata leeshaspaqa allintan reparananchis imaynas Jehová Dios chayta. Leesqanchisman jinan tapukunanchis: “¿Imaynatan kay texto rikuchin Jehová Dios munakuwasqanta? ¿Imaynatan noqatapas yanapawanman payta munakunaypaq?”, nispa.

8. ¿Imaraykun nisunman “mañakusun chayqa astawanmi Diosta munakusun” nispa?

⁸ ¿Iman yanapawallasunmantaq Jehová Diosta astawan munakunanchispaq? Paymantan sapa p’unchay mañakunanchis, paymanmi sonqonchista kicharinanchis (Sal. 25:4, 5). Jehová Diosqa uyarinqan chhayna mañakusqanchistaqa (1 Juan 3:21, 22). Chaymanta rimashaspan Asia ladopi tiyaq Karen b sutiyoq hermana nin: “Ñaupaqqa Bibliapi imatachus yachasqayraykullan Jehová Diostaqa munakuq kani. Chaymantan ichaqa allinta repararqani imaynas Jehová Diosqa mañakusqayta uyarin chayta, chhaynapin astawanraq payta munakurqani, munasqanman jinataqmi kausaytapas munarqani”, nispa.

9. ¿Imaraykun nisunman “Timoteoqa allin ejemplon jujkuna munakuypi” nispa?

⁹ Apóstol Pabloqa manaraq unaychu cristiano kashaspan Timoteota reqsirqan. Timoteoqa allin iñiqmi karqan, tukuy sonqon munakurqan Jehová Diostapas jujkunatapas. Paymanta rimashaspan apóstol Pabloqa Filipos llaqtapi iñiqkunata nirqan: “Manan pipas pay jinaqa kanchu, payqa tukuy sonqowanmi qankunata qhawarisunkichis”, nispa (Filip. 2:20). Chaypi rikusqanchis jina, Pabloqa Timoteomanta rimaspaqa manan allin ruwaq allin yachachiq kasqanmantachu rimarqan. Aswanpas chay tiempopi iñiqkunata imayna qhawarisqanmantan payqa admirasqa kasharqan. Chhayna munakuqtaq Timoteo karqan chayqa, maytachá iñiqkunaqa munaqku paypa jamunantaqa (1 Cor. 4:17).

10. ¿Imaynatan Annawan qosanpiwan rikuchirqanku jujkuna munakusqankuta?

¹⁰ Noqanchispas yanapananchismi iñiqmasinchiskunataqa (Heb. 13:16). Yaqapaschá yuyashankichis ñaupaq yachachikuypi rimamusqanchis Annata. Paypa tiyasqan llaqtapis jatun wayra pasasqa, chaysi payqa qosanwan kuska juj familiaman visitaq risqaku. Chay familiaq wasinpi techonsi urmayapusqa. Chaysi p’achanku mana kasqachu cambiakunankupaq. ¿Imatan  Annawan qosanpiwan ruwankuman karqan? Annan nin: “Paykunaq p’achantan wasiman apaspa t’aqsamurqayku, jinaspa planchasqata doblasqata apapurqayku. Chay ruwasqaykuqa manan imapaschu karqan, ichaqa chaymantapachan paykunawan allin amigontin kapurqayku”, nispa. Chaypi rikusqanchis jina, Annapas qosanpas munakuq kasqankuraykun chay hermanokunata yanaparqanku (1 Juan 3:17, 18).

11. a) ¿Imaraykun nisunman “jujkunata munakusqanchisqa manan yanqapaqchu” nispa? b) Proverbios 19:17 nisqan jina, ¿imatan Jehová Dios ruwanqa jujkunaman munakuyninchista rikuchiqtinchis?

¹¹ Jujkunata khuyapayaspaqa paykunata munakuspapas Jehová Dios jina kasqanchistan rikuchishanchis. Chaymantapas jujkunarayku imapas ruwasqanchisqa manan yanqapaqchu. Manapaschá reparasunchu imaynas paykunaqa chay ruwasqanchismanta may agradecesqa kashanku chayta. Pusaq parrafopi rimamusqanchis Karenmanta yachasun, payqa yuyarinpunis llapa yanapaqnin hermanokunata, paymi nin: “Wakin hermanakunaqa wasiyman jamuspan Diosmanta willaq rinaykupaq pusawaqku. Paykunaqa munakuqllañan karqanku, mayninpiqa mijuq iman pusawaqku, chaymantataq wasiypi saqepuwaqku. Chaykunata ruwayqa sasachá karqan, ichaqa kusisqan chaykunata ruwaqku”, nispa. Wakinqa manapaschá “gracias” niwasunchu paykunapaq imachus ruwasqanchismanta. Pikunachus yanaparqan chaymanta rimashaspan Karenqa nillantaq: “Noqapas maytan munayman ñaupaqpi yanapawaqniy hermanakunata yanapayta, ichaqa manan yachanichu maypi tiyasqankuta. Jehová Diosmi ichaqa allinta yachan maypis paykuna kashanku chayta, chaymi paykunapaq mañapuni”, nispa. Jehová Diosqa rikushanmi jujkunarayku llapa ima ruwasqanchista, juch’uytaña ruwanchis chaypas. Jinaspapas chay ruwasqanchismantan mayta kutichipuyta munashawanchis, manuta jinan payqa chayta rikun (leey Proverbios 19:17).

12. ¿Imaynatan bautizasqa qhari hermanokuna rikuchinkuman iñiqmasinku munakusqankuta? (Qhaway kay parrafopaq fotokunata).

 ¹² ¿Imaynatan qhari hermanokuna rikuchinkuman iñiqmasinku munakusqankuta? Paykunata yanapaspan. Jordan sutiyoq hermanos juj umalliqta tapusqa imatas ruwanman hermanokunata astawan yanapananpaq chayta. Chay umalliqqa “kusa” nisqas, willasqas imaynas payqa iñiq t’aqapi allinta kallpachakusharqan chaytapas, nillasqataqsi imatas ruwanan astawan ñauparinanpaq chaytapas. Kallpachasqas tempranota juñunakuyman chayamunanpaq, jujkunata napaykunanpaq, juñunakuypi tapuykuna kaqtin chaypi participananpaq, Diosmanta willaqpas mana faltayta lloqsinanpaq, pipas yanapanata necesitan chayqa yanapananpaq ima. Chaykunata ruwananpaq kallpachakuspan Jordanqa astawan yachasqa jujkuna munakuyta. Chaymantapas allintas yachasqa imaynas juj qhari hermanoqa mana yanapakuq kamachi kasparaqchu jujkunataqa yanapanan chayta; aswanpas imaynas ñaupaqmantapacha hermanokunataqa yanapanan chayta (1 Tim. 3:8-10, 13).

13. ¿Iman Christianta yanaparqan jujmanta umalliq kapunanpaq?

¹³ Sichus ñaupaqpi yanapakuq kamachi karqanki otaq umalliqpas karqanki chayqa, Jehová Diosqa manan qonqanchu hermanokunata munakusqaykirayku tukuy ima ruwasqaykita (1 Cor. 15:58). Kunanpas rikumushanmi hermanokunata munakusqaykita yanapasqaykitapas. Christian sutiyoq hermanonchismanta yachasun. Paytas nisqaku manaña umalliq kananpaq, chaywansi payqa sinchi llakisqa kasqa. Ichaqa manas pisipasqachu, paymi nin: “Manaña umalliqchu karqani chaypas, kallpachakurqanin Jehová Diosta munakusqayrayku hermanokunata yanapashanallaypaq”, nispa. Tiempowansi nisqaku jujmanta umalliq kananpaq, ichaqa manchakusqas chay ruway chaskikuyta, ichaqa nisqas: “Jehová Diostaq khuyapayakuq  kayninpi hermanokuna servinayta munashan chayqa, chaskikullasaq”, nispa. Jinas payqa Jehová Diosta hermanokunatapas munakusqanrayku chaskikullasqa.

14. ¿Imatan yachasunman Georgia nacionpi hermanaq imachus nisqanmanta?

¹⁴ Testigokunaqa Jehová Diosta mana serviqkunatapas munakunanchismi (Mat. 22:37-39). Chaymanta rimashaspan Georgia nacionpi Elena sutiyoq hermana nirqan: “Qallariypiqa Jehová Diosta munakusqayraykullan runakunaman paymanta willaq kani. Ichaqa payta astawan munakusqayman jinan runamasiytapas astawan munakurqani. Chaymi piensaq kani imakunas paykunata llakichishan chaypi, imakunamantas yachayta munankuman chaypi. Chay ruwaymi yanapawarqan astawan paykunata yanapanaypaq”, nispa (Rom. 10:13-15).

15, 16. Fotokunapi rikusqanchis jina, ¿ima allinkunan kanqa jujkunata munakusun chayqa?

¹⁵ Iñiqmasikunata munakusqanchisqa jujkunaq allinninpaq iman kanqa. ¿Imaraykun chayta ninchis? Coronavirus kasqan tiempopin hermano Paolo esposanpiwan kuraq hermanakunata yanapasqaku celularninta, computadoranta, tablet nisqanta ima Diosmanta willanankupaq. Jujnin kuraq hermanapaqqa manan facilchu kasqa chaykuna manejay, ichaqa atirusqan, jinaspa familianta invitasqa Jesuspa wañusqanta yuyarinapaq juñukuyman. Llapankupiqa soqta chunkan chayta uyarikusqaku. Gracias hermano Paolowan esposanpiwan yanapasqankuraykun chay kuraq hermanapas familiankunapas uyarikusqa chay munay juñukuyta. Chay kuraq hermanan hermano Paoloman qelqasqa: “Gracias  kuraqkunata ama qonqawasqaykikumanta, manan jayk’aqpas qonqasaqkuchu Jehová Diospa munakuynintaqa, ni qankunaq pacienciaykichistapas”, nispa.

¹⁶ Chay kutipin Paoloqa yachasqa imaynas munakuyqa ima yachaymantapas ima ruwaymantapas aswan jatun chayta. Pay kikinmi nirqan: “Juj tiempon watukuq umalli jina yanapakurqani, hermanokunaqa manapasñachá yuyarinkuñachu imakunachus yachachisqayta, ichaqa yuyashankuchá paykunata imayna yanapasqaytaqa”, nispa.

17. ¿Piqpa allinninpaq iman jujkunata munakuyqa?

¹⁷ Jujkunatachus munakusun chayqa, noqanchispa allinnillanchispaqtaqmi chayqa kanqa. Chaypaq yachasun Nueva Zelanda ladopi Jonathan sutiyoq hermanomanta. Juj kutinsi payqa juj sábado p’unchaypi rikusqa juj precursor hermanota ruphaypi sapallan predicashaqta. Jinas payqa nisqa: “Kay hermanota sapa sábado tardenkuna compañasaq”, nispa. Chay ratuqa manan reparasqachu imaynas chay ruwasqanqa paypa allinnillanpaqtaq karqan chayta. Paymi willakun: “Chay tiempoqa manan ancha ganasniy kaqchu jujkunaman Diosmanta willanaypaq, ichaqa chay hermanoq imayna yachachisqanta, imayna estudiokuna qosqanta rikuspan noqaqa astawanraq munarqani runakunaman yachachiyta. Chaymantapas juj allin amigotan tarirqani, paymi yanapawarqan allin iñiyniyoq kanaypaq, Jehová Diosta astawan munakunaypaq, paymanta willaypi kusisqa llank’anaypaq ima”, nispa.

18. ¿Ima ruwananchistan Jehová Dios munashan?

¹⁸ Jehová Diosqa paytapas runamasinchistapas astawan munakunanchistan munashan. Kaypi yachasqanchis jina, Jehová Diosta astawan munakunanchispaqqa palabran Bibliatan leenanchis, chaypin yuyaymanananchis, sapa p’unchaytaqmi paywan parlananchis. Hermanonchiskunatapas tukuy sonqon munakunanchis, chaypaqqa imakunapichus yanapanata necesitashanku chaypin yanapananchis. Tukuy sonqo munakuq kasun chayqa, astawanmi Jehová Diosman jujllachakusun, jujllan kasunchis iñiqmasinchiskunawanpas. Chhaynapin, ¡wiñay-wiñaypaq Jehová Dioswan hermanokunawanpas sumaqta kausasunchis!