1. ¿Imaynan Diosta adoraqkuna kashanchis? ¿Imata ruwananchispaqmi kallpachakunanchis?

 KAY tiempopin juj paraisopi munay kausay kashan, imaymana munay ruwaykunan chaypiqa aparikushan. Chaypiqa askha waranqanpin runakunaqa kashanku, manataqmi chaymantaqa lloqsiytaqa munankuchu. Paykunaqa juj runakunapas chayman jaykunankutan munashanku. ¿Imamantan rimashanchis? Diosta serviqkunapura sumaqta munayta kausasqanchismantan, chayqa juj munay paraíso jinan. Chaypiqa munaytan apanakunchis, juj sonqollan Diostapas servinchis.

2. ¿Imaraykun admirakunapaq kanman kay tiempopi imaynachus kausasqanchis?

² Mana creey atiyraqmi Diospa kay pachapi imachus ruwasqanqa. Paymi kay pachapi paraíso jina munay kausayta rijurichin. Chaypiqa manan kanchu cheqninakuypas, qhawanaykupas, ni ima mana allinpas (1 Juan 5:19; Apo. 12:12). Chaywanpas Satanasqa churawasunmanmi mana allinkunaman, Diosqa allintan yachan chayta, chaymi payqa chay munay paraisopi uywawanchis. Chhaynapi chaypi iñiyninchispi allinta wiñarinanchispaq. Chay munay kausasqanchistan Bibliapi tupanachin “pakakunapaq ch’ujllawan”, “allin qarpasqa jatun huertawan” ima (Isa. 4:6; 58:11). Chaypi tiyaqkunaqa Diospa bendecisqanmi kanku, kusisqan chaypi kausanku. Allin waqaychasqataqmi kashankupas (Isa. 54:14; 2 Tim. 3:1).

3. ¿Jayk’aqmi ñaupaqta junt’akurqan Isaías 65 capitulopi willasqan?

³ Isaías libropin 65 capitulopi willashan imaynas chay paraíso jina kausayqa munay kanan karqan chayta. Chaypi willasqanqa 537 watapin ñaupaqtaqa junt’akurqan, chayqa manaraq Jesús jamushaqtinmi karqan. Chay watapin arrepientekuq judiokuna Babiloniamanta kacharichisqa karqanku, jinaspa llaqtankuman kutimpurqanku. Chaypin paykunaqa Jehová Diospa yanapayninwan Jerusalén llaqtata jujmanta perqarqanku. Chay llaqtaqa lliumi raqay-raqay  kasharqan, chaytan jujmanta munay llaqtaman tukuchipurqanku. Templotapas jujmantan perqapurqanku, jinaspa chaypi Jehová Diosta yupaychayta qallarirqanku (Isa. 51:11; Zac. 8:3).

4. ¿Imaynatan kay tiempopi junt’akushan Isaías 65 capitulopi willasqan?

⁴ Isaiaspa willasqanqa kay tiempopipas junt’akurqanmi. 1919 watapin chayqa junt’akuyta qallarirqan, chay watapin kay tiempopi Diosta serviqkunaqa jatun Babiloniamanta kacharichisqa kapurqanku. Chay tiempomantapachaqa lliu mundomanñan chay munay kausayqa chayashan. Diospa gobiernonmanta willaqkunan kusisqa llank’ayta qallarirqanku. Chhaynapin lliupi askha iñiq t’aqakunata kicharqanku. Askha warmikuna qharikuna iman ñaupa mana allin vidankuta saqespa Diosta servipurqanku. Arí, paykunaqa “mosoq runa kaywanmi p’achakapurqanku; Diospa munayninman jinan kamasqa karqanku” (Efes. 4:24). Isaiaspa willasqanqa Diospa gobiernonpin astawanqa junt’akunqa. Chaywanpas kay tiempopipas imaymana bendicionkunatan Diosqa qowashanchis. Kaypin yachasunchis imaraykus chay munay paraisopi kayqa allinpuni chayta, imaraykus manapuni chaytaqa saqenanchischu chaytapas.

¿IMAKUNATAN CHASKISHANCHIS KAY PARAÍSO JINA KAUSAYPI KASQANCHISMANTA?

5. Isaías 65:13 textopi willasqanman jina, ¿ima bendicionkunatan chaskishanchis?

⁵ Allin mijusqa, allin kallpayoq iman kashanchis. Isaiasqa admiranapaq jinaraqmi willan imaynas kashanku chay munay paraisopi kaqkuna chayta, imaynataqsi kashanku jawapi kaqkuna chaytapas (leey Isaías 65:13). Chay paraisopi kaqkunaqa allin mijusqan kashanchis, puchu-puchuraqmi kashan espiritual mijunanchisqa. Diosmi espiritunwan askhata chay mijunata qowashanchis, chhaynapi allin mijusqa, allin tomasqa, kusisqa ima kananchispaq (tupanachiy Apocalipsis 22:17 textowan). Jawapi kaqkunan ichaqa “yarqasqa”, “ch’akiymanta” ima kashanku, p’enqaypi iman tarikunku. Paykunaqa manan Diosmantaqa imatapas yachankuchu (Amós 8:11).

6. ¿Ima mijuykunamantan rimashan Joel 2:​21-24 textopi? ¿Imawanmi chay tupan, imaynapin chaykuna allinninchispaq kanman?

⁶ Profeta Joelmi willarqan imaynas Jehová Diosqa llaqtanman necesitasqan mijuykunata askhanpi qonan karqan chayta. Payqa trigota, vinota, olivo aceiteta iman qonan karqan (Joel 2:​21-24). Arí, Jehová Diosqa llaqtanpa tukuy ima necesitasqantan qonan karqan, espiritual nisqa mijunatapas qonanmi karqan. Kay tiempopiri, ¿pay chayta ruwashanchu? Arí, ruwashanmi. Paypa qowasqanchismi kashan Biblianchis, qelqanchiskuna, internetpi qelqakuna, videokuna, juñunakuykuna, asambleakuna ima. Chaykunawanmi sapa p’unchay alimentakunanchis, chhaynapin iñiyninchispiqa qhali kasunchis, kallpayoqtaqmi kasunpas.

7. ¿Imaraykun sonqonchis kusisqa kashan? (Isaías 65:14).

⁷ Sonqopas sonqon, kusisqan kashanchis. Diosta serviqkunaqa maytan Papanchista “gracias” ninchis llaqtanman pusamuwasqanchismanta ¿riki? Sonqonchisraqmi kusikuymanta qaparin (leey Isaías 65:14). Ichaqa, ¿imaraykutaq sonqonchisri kusikuymanta qaparin? Chaypaq kaypi piensasun, ¿kanchu Diospa simin jina juj simi? ¿Kanchu Diospa promesankuna jina juj promesa? Manan maypipas chayta jinaqa tarisunmanchu ¿riki? Wiñay kausay suyakusqanchispas Jesuspa sacrificio ruwasqanwanmi pagasqa kashan. ¡Chaykunata hermanonchiskunawan kuska runamasinchisman willaypas may munaymi ¿riki?! (Sal. 34:8; 133:​1-3).

8. ¿Imayna kausaqkunamantan reqsisqa kanchis?

⁸ Chaymantapas chay paraíso jina kausaypiqa juj sonqollan kanchis, munanasqataqmi kausanchispas, chhayna kausaqkunamantan reqsisqa kanchis. Munakuymi llapanchista “allintapuni jujllaman tukuchiwanchis”, chhayna kasqanchismi rikuchiwanchis imaynas jamuq tiempopi kausay kanqa chayta. Chay tiempopiqa kay tiempomantapas astawanraqmi munanakusun (Col. 3:14). Juj hermanan willakun imaynas tarikurqan Jehová Diospa testigonkunata reqsispa chayta. Paymi nin: “Noqaqa manan yacharqanichu  imaynas kusisqa kausay chayta, manan ni familiay ukhupipas chaytaqa rikurqanichu. Testigokunawan kaspañan allinta yacharqani imas kusisqa kausay chayta”, nispa. Pipas kusisqa, sonqopas sonqo kausayta munan chayqa, chay munay paraisomanmi jaykunan. Imataña noqanchismanta runakuna rimanqaku chaypas Diospa ñawinpaqqa, familianpaq ñawinpaqpas allinmi kashanchis (Isa. 65:15).

9. ¿Iman pasanqa llakikuyninchiskunawan? (Isaías 65:​16, 17).

⁹ Tranquilon kashanchis, thajmi kashanchis. Chay munay kausayman mana jaykuqkunamanta rimaspan lsaías 65:14 nishan: “Qankunataq sonqoykichis nanasqanmanta qaparinkichis, llakiq ñit’isqanmi mayta waqankichis”, nispa. Jehová Diospa kamachinkunamantari, ¿imataq kanqa? Wakinqa imaymana nanaypin tarikurqanku, ¿iman chaywanpas pasanqa? Jehová Diosmi paykunata nin: “Ñaupa ñak’ariykunaqa qonqasqan kanqa, manan chaykunataqa ñawiyqa rikunqañachu”, nispa (leey Isaías 65:​16, 17). Chaypi nisqan jina llapa llakinchismi chinkapunqa, tiempowanqa manan chaykunataqa ni yuyarisunpasñachu.

10. ¿Imaraykun niwaq “may kusikunapaqmi hermanokunawan kuska kayqa” nispa? (Qhaway kay parrafopaq fotota).

¹⁰ Kay tiempopipas sonqonchisqa imaymanamantan thajña kashan. ¿Manachu chay pasawanchis juñunakuykunapipas? Juñunakuypi kaspaqa manan ima llakinchistapas yuyapunchischu ¿riki? ¿Imatan ruwasunman kay munay kausay chhayna munaylla kananpaq? Espirituq rurunkunatan noqanchispi wiñachinanchis. Chay rurukunamanta wakinmi kashan: munakuy, thaj kay, sumaq sonqo kay, llamp’u sonqo kay ima (Gál. 5:​22, 23). ¡May munaypunin Diospa llaqtanpi kayqa! Chayllapi kasun chayqa rikusunmi imaynas Diosqa “mosoq cielota mosoq jallp’a pachatawan” kamanqa chayta. Llapantan chayta rikusunchis.

11. ¿Imaynatan qhawarinanchis Diospa qowasqanchis kay munay kausayta, imarayku? (Isaías 65:​18, 19).

¹¹ May agradecesqan, contenton kashanchis. Isaiasqa willashanmi imaynas Diosta serviqkunaqa kusisqapuni, contentopuni kashananchis chayta. Nimusqanchis jina, noqanchisqa munaytan kausashanchis, paraisopi jinan kashanchis. Jehová Diosmi chay munay kausaytaqa paqarichipuwarqanchis (leey Isaías 65:​18, 19). Payqa chayman runakunata pusamunanchistan munan. Chay runakunaqa yaqa llapankupas ch’aki orqo jina religionkunapin kashanku. ¿Imaniwaqmi? ¡Munaypunin Diospa cheqaq yachachikuyninta reqsiyqa ¿riki?! Chhaynaqa willamusun chayta juj runakunamanpas (Jer. 31:12).

12. ¿Imaynatan qhawarinki Isaías 65:​20-24 textopi willasqan promesata, imarayku?

¹² May munaypunin noqanchispura juj sonqolla kausasqanchisqa, Diospa gobiernonta suyakuypas. Chay gobiernopi piensay, ¿imakunatan chaypi ruwayta munawaq? Chaypi kausaymanta rimaspan Bibliapi nin: “Chaypiqa manañan chayllaraq  naceq wawakunaqa pisi p’unchaykunallamanta wañunqañachu”, nispa. Nillantaqmi: “Wasikunatan ruwakunqaku chaypitaqmi tiyanqaku, uvaskunatan plantanqaku chaypa rurusqantataqmi mijunqaku”, nispa. Imata llank’aspapas “manan yanqapaqchu llank’anqaku” Jehová Diosmi paykunaq llank’asqanta bendecinqa. Chaymantapas Diospa nisqanman jinaqa chaypiqa manan yanqachu imatapas ruwasun, thajmi kasun, kusisqataqmi kausasunpas. Manaraq wajakushaqtinchismi Diosqa imachus munasqanchista qomuwasun. Arí, Diosninchisqa “llapa kausaqkunamanmi munasqankuta qonqa” (Isa. 65:​20-24; Sal. 145:16).

13. Isaías 65:25 nisqanman jinaqa, ¿imakunapin cambiana Jehová Diosta servinapaq?

¹³ Manan pitapas manchakuna kanchu, thaj kausaypin kashanchis. Diospa espiritunpa yanapayninwanmi imaymanapi cambiarqanchis. Wakinqa yaqapaschá salqa animalkuna jina karqanchis, kunanmi ichaqa mana chhaynañachu kapunchis (leey Isaías 65:25). Salqa animaltapas samp’aman tukuchisunman jinan genionchista llamp’uman tukuchipurqanchis (Rom. 12:2; Efes. 4:​22-24). Arí, noqanchisqa juchasapa runakunan kanchis, chaymi mayninpiqa imapipas pantanchisraq. Chaywanpas Jehová Diosmi “imaymana clase runakunata” jujllaman tukuchiwanchis, juj sonqollan kanchis, thajmi kausashanchis (Tito 2:11). ¡May admiranapaqmi Diospa chay ruwasqanqa ¿riki?! Tukuy atiyniyoq Diosllapunin runataqa jujllaman tukuchiyta atinman.

14. ¿Imaynatan Isaías 65:25 textopi willasqan junt’akurqan juj hermanopi?

¹⁴ Ichaqa, ¿atinmanpunichu pipas genion cambiayta? Arí atinmanmi. Chaypaq yachasun juj runamanta. Payqa sinchi millaysi kasqa, qhelli kausaytas apasqapas, 20 watanpaqqa askha kutitañas carcelmanpas jaykusqa. Payqa carrokunatas suwakuq, imaymanakunata suwakuspas puriq. Chaymantapas maypiña kaspapas maqanakuyllamansi jaykuq. Ichaqa juj kutinsi payqa Jehová Diosmanta willakuyta uyarisqa, jinas juñunakuykunaman riyta qallarisqa, chaysi payqa nisqa: “Kaymá vidaqa”, nispa. Paraíso jina munay llaqtatas tarisqa. Chaymantataq bautizakapusqa. Isaías 65:25 textota leespas payqa yuyarillanpuni ñaupaqpi imaynachus karqan chayta. León jina sinchi millay runamantas oveja jina samp’aman tukupusqa.

15. ¿Imaraykun munasunman jujkunapas kay munay kausayman jaykumunankuta, imatan chaypaq ruwananchis?

¹⁵ Isaías 65:13 textopin qallariypi nishan: “Chayraykun tukuy munayniyoq Señor Jehová Diosqa khaynata nin”, nispa. 25 versiculopitaq Diospa rimasqan qhepaman nillantaq: “Ninmi Jehová Dios”, nispa. Chaywanmi Bibliaqa rikuchishan imaynas Diospa siminqa junt’akunpuni chayta (Isa. 55:​10, 11). Jujlla kausasqanchisqa manan mosqoyllachu. Jehová Diospa imachus willachisqanman jinapunin chaykunaqa kashan, paymi khayna munay kausaytaqa paqarichirqan. Lliu kay mundopi sinchi millayña kausay kashan chaypas, noqanchisqa thajmi kausashanchis, munaytan kausashanchis (Sal. 72:7). Llapa munaq runakunatan yanapananchis noqanchiswan kuska kanankupaq kay paraíso jina munay kausayman jaykumunankupaq. Arí, tukuy atisqanchistan kallpachakunanchis paykunaman Diosmanta yachachimunanchispaq (Mat. 28:​19, 20).

¿IMATAN RUWANANCHIS JUJKUNAPAS JAYKUMUNANKUPAQ?

16. ¿Iman jujkunata kallpachan kay paraíso jina munay kausayman jamunankupaq?

¹⁶ Llapanchispas munasunmanmi jujkunapas noqanchiswan kuska Jehová Diosta servinankuta ¿riki? Kay munay kausayman jaykumunankuta. ¿Imatan chaypaq ruwasunman? Jehová Dios jinan kananchis. Payqa manan mana munashaqtachu runakunataqa llaqtanman aysamun, aswanmi runakunaqa sumaq sonqo, munakuq kasqanta rikuspa kikillankumanta jamunku (Jer. 31:3; Juan 6:44). Chhaynapunin chayqa, mayqen sumaq sonqo runapas Jehová Diosta allinta reqsin, yachantaq imayna Dios kasqanta chayqa payllamantan chay runaqa jamun. Noqanchispas jujkuna kay munay paraíso jina kausayman jamunankuta munanchis chayqa Jehová Dios jinan kananchis.

17. ¿Imatan ruwananchis jujkuna kay munay kausayman jamuyta munanankupaq?

 ¹⁷ Jujkuna jamuyta munanankupaqqa hermanonchiskunata, hermananchiskunata iman sumaqta qhawarinanchis, munakunanchis ima. Chayta rikuspan juj runakunaqa Corinto llaqtapi juñunakuyman riq runakuna jina ninqaku: “Diosqa qankuna ukhupimá kashasqa”, nispa (1 Cor. 14:​24, 25; Zac. 8:23). Chhaynaqa kasukusun Tesalónica llaqtapi iñiqkunata apóstol Pabloq imachus nisqantapas. Paykunatan nirqan: “Qankunapurapas sumaqta kausaychis”, nispa (1 Tes. 5:13).

18. ¿Imata rikuspan runakuna jamuyta munankuman Diospa llaqtanman?

¹⁸ Chaymantapas tukuy atisqanchistan kallpachakunanchis hermanonchiskunataqa Jehová Dios jina qhawarinanchispaq. Chaypaqqa paykunaq allinkuna ruwasqankupin masta piensananchis, manan imallapipas pantasqankupichu. Yachasqanchis jinapas, chaykunaqa chinkapunqan jamuq tiempopiqa. Chaymantapas paykunata munakusun chayqa, imaña kaqtinpas sumaqtan chayta allichapusunchis, chhaynapin rikuchisun Bibliapi nisqanta kasukusqanchista. Chaypin nin: “Jujkuna-jujkunawan sumaqta qhawarinakuychis, munakuywan khuyapayanakuychis, tukuy sonqowantaq perdonanakuychispas”, nispa (Efes. 4:32). Chhaynata kausasun chayqa jujkunapas noqanchiswan kuskan kayta munanqaku, jaykumuytan munanqaku kay paraíso jina kausayman. a

AMAPUNI LLOQSISUNCHU KAY MUNAY KAUSAYMANTAQA

19. a) ¿Imanirqankun kay munay kausayman kutimpuq wakin hermanokuna? (Qhaway “ Lloqsipurqankun ichaqa kutimurqankun” nisqa willakuyta). b) ¿Imapaqmi tukuy atisqanchista kallpachakunanchis? (Qhaway kay parrafopaq dibujota).

¹⁹ ¡May munaypunin noqanchispura sumaqta munayta kausasqanchisqa! Kay tiempokunapiqa astawanraqmi chhayna kausasqanchisqa k’ancharishan,  aswan askhañataqmi Jehová Diostapas servishanchis. Chaykunamantaqa “gracias” ninanchispunin papachis Jehová Diosta, manapunin payta agradecekuytaqa qonqananchischu. Pipas kallpachasqa, kusisqa, thaj kayta munan chayqa, kay munay kausaymanmi jaykumunan manataqmi jayk’aqpas chaymantaqa lloqsinanchu. Ichaqa atento kasun, Satanasqa qhawamuwashanchismi, kay munay kausaymanta lloqsinanchistataqmi munashanpas (1 Ped. 5:8; Apo. 12:9). Amapuni chay enemigomanqa gustota qosunchu, tukuy atisqanchista kallpachakusun chayllapi kananchispaq. Yanapakusuntaq chaypi munay kausay, ch’uya kausay, thaj kausay kananpaqpas.