1. ¿Imayna organizasqan kasharqanku apostolkunaq tiemponpi iñiqkuna?

 JEHOVÁ Diosqa ima llank’anataña kamachinkunaman qon chaypas allinta ruwanankutan munan manan comunta ruwanankutachu (1 Cor. 14:33). Chay llank’ana qosqanmanta jujninmi kashan siminta willay, chaytaqa lliu pachantinmanmi chayachina kashan (Mat. 24:14). Chay llank’anata allinta aparinapaqqa allin organizasqan kana. Chay llank’ana aparikunanpaqqa Jesustan ñaupaqtaqa Diosqa kamachirqan. Jesustaq chaykuna imaynachus ruwakunanpaq allinta organizarqan. Jerusalenpin juj grupo umalliqkuna apostolkuna ima kasharqanku, paykunan imaymana decisionkunata ruwaqku, kamachikuykunata iman iñiqkunaman apachiqku (Hech. 15:2; 16:4). Chaymantapas sapanka iñiq t’aqapin umalliqkunata churakurqan, paykunan iñiqkunaman willaqku chay kamachikuykunata (Hech. 14:23). Hermanokunaqa kasukuqkun chay kamachikuykunata “chaymi iñiq t’aqakunaqa iñiyninkupi aswan-aswanta kallpachakusharqanku” (Hech. 16:5).

2. ¿Imaynatan Jehová Dios llaqtanta pusarishan 1919 watamantapacha?

² Kay tiempopipas Jehová Diospa llaqtanqa allin organizasqan kashan. 1919 watapin Jehová Diospa kamachisqan Jesusqa kay pachapi juj grupo umalliqkunata churarqan Diospa llaqtanta pusarinankupaq. Chay tiempomantapachan paykunaqa Diosmanta willayta umallishanku, paykunan espiritual mijuna nisqatapas qomuwashanchis (Luc. 12:42). a Diosqa bendecishanmi paykunataqa chayqa sut’i reparaymi kashan (Isa. 60:22; 65:​13, 14).

3, 4. a) ¿Imaraykun nisunman organizasqa kayqa allinpunin nispa? Juj ejemplota willay b) ¿Imakunamantan kaypi yachasunchis?

³ Manachus allin organizasqa kasunman chayqa, manan atisunmanchu  Jesuspaq kamachisqanta junt’aytaqa (Mat. 28:​19, 20). Predicananchis partekuna mana allin organizasqachu ni allin t’aqasqachu kanman chayqa, sapankachá may munasqanta ruwanman. Chhaynapitaq sapa ratun kaq partekunallapi predicakunman, juj partekunatataq mana. Piensariy, ¿imakunapin allin kallanmantaq organizasqa kasqanchis?

⁴ Kay tiempopiqa apostolkunaq tiemponpi jinan Jesusqa Diospa llaqtantaqa organizan. Chay tiempopi jinan imapas ruwakushan. ¿Imaraykun chayta ninchis? Chaypaqmi kaypi yachasunchis Jesuspa churasqan wakin ejemplomanta, imaynas Diospa llaqtanpipas paypa ruwasqanta jina ruwakushan chaytawan. Yachallasuntaqmi imatas ruwananchis Diospa llaqtanpi tukuy sonqo confiananchispaq chaytapas.

DIOSPA LLAQTANPIQA JESUSPA EJEMPLONMAN JINAN IMATAPAS RUWAKUN

5. ¿Imata ruwaspan Jesusta qatikushanchis? (Juan 8:28).

⁵ Jesusqa janaq pacha Taytanmantan yacharqan ima ruwaytapas imayna rimaytapas. Chhaynatan Diospa llaqtanpipas ruwakun, Diospa siminman jinan ima yachachikuytapas ima consejotapas orqokamun (leey Juan 8:28; 2 Tim. 3:​16, 17). Chaymantapas chay llaqtapiqa sapa kutillanmi niwashanchis Diospa siminta leenanchispaq, chayman jina kausananchispaqpas. ¿Yanapawanchischu icha manachu chay consejokunata kasukuy?

6. ¿Bibliata estudiasun chayqa imapin allinninchispaq kanqa?

⁶ Bibliatapas qelqanchiskunatapas allinta estudiasun chayqa allinninchispaqmi kanqa. Chaykunata estudiaspan allinta reparasun imaynas Diospa llaqtanpi ima kamachikuypas Bibliaq nisqanman jina kashan chayta. Chayta allinta reparaspaqa astawanmi Diospa llaqtanpi confiasun (Rom. 12:2).

7. ¿Imatan Jesús ruwaq, imatan ruwashanku Diospa llaqtanpi kaqkunapas?

⁷ Jesusqa “Diospa gobiernonmanta allin willakuykunata willaspan puriq” (Luc. 4:​43, 44). Chaymantapas payqa llapa qatikuqninkunatan kamachirqan chayta ruwanankupaq (Luc. 9:​1, 2; 10:​8, 9). Kay tiempopipas Diospa llaqtanpi kaqkunaqa Diospa gobiernonmanta willakuytan lliuman apashanku, maypiña tiyashanku chaypas ima ruwanayoqña kanku chaypas chaytan paykunaqa ruwashanku.

8. ¿Ima jatun llank’anatan chaskirqanchis?

⁸ Diospa gobiernonmanta willakuyta juj runakunaman apayqa ancha jatun ruwaymi. Manan llapa runakunachu chay ruwaytaqa atinkuman. Chaypaq Jesuspi piensasun, payqa manan munarqanchu supaykuna paymanta rimanankutaqa (Luc. 4:41). Kay tiempopi pipas Jehová Diospa testigonkunawan predicaq puriyta munan chayqa imaymanakunatan junt’anan. Chhaynataq chayqa, ¿imaynatan rikuchisunman Diosmanta willayta valorasqanchista? Tukuy atisqanchistan ruwananchis maypiña kaspapas willananchispaq. Jesús jinan Diosmanta willakuy mujutaqa tarpushanallanchis, ichaqa manan tarpunallanchischu qarpananchis iman (Mat. 13:​3, 23; 1 Cor. 3:6).

9. ¿Imatan Diospa llaqtanpi ruwakushan Diospa sutinta lliu runakuna reqsinankupaq?

⁹ Jesusqa Diospa sutintan lliuman willaq. Chaytan juj kutin willakurqan janaq pacha Taytanwan parlashaspa. Paymi nirqan: “Paykunamanmi noqaqa sutiykita reqsichini”, nispa (Juan 17:26). Diospa llaqtanpipas chaytan ruwakushan, llapa runakunamanmi reqsichikushan Diospa sutinta. Chaypaqmi orqokamurqan Mosoq Pacha Biblia nisqa Bibliata. Chay Bibliaqa 270 más rimaykunapiñan kashan. Chay Bibliapin Diospa sutinta kaqta churakapushan, maypichus qelqasqa karqan chayman. Astawan yachanapaq A4, A5 nisqapin astawan willashan chay ruwakusqanmanta. A5 nisqapiqa willashanmi imaynas griego rimay librokunapiqa 237 kutita Diospa sutin rijurin chayta. b

10. ¿Imatan yachasunman Myanmar ladopi juj señoramanta?

 ¹⁰ Llapanchismi Jesús jina llapa runakunaman Diospa sutinta reqsichinanchis. Myanmar ladopin juj Testigo 67 watayoq señoraman imaynas Diospa sutinqa Jehová chayta willasqa. Chay señoraqa kusikuymantas waqasqaraq. Paysi nisqa: “Manan jayk’aqpas Diospa sutintaqa uyarirqanichu, kunanraqmi uyarishani. [ . . . ] Ima willakuymantapas aswan jatun willakuytan kunanqa willawashanki”, nispa. ¿Imatan chaymanta yachasunman? Allin sonqo runakunaqa Diospa sutinta yachaspaqa yaqapaschá payta servipunkuman.

CONFIASHALLASUN DIOSPA LLAQTANPIQA

11. ¿Imaynatan umalliqkuna rikuchinkuman Diospa llaqtanpi confiasqankuta? (Qhaway kay parrafopaq fotokunata)

¹¹ ¿Imaynatan umalliqkuna rikuchinkuman Diospa llaqtanpi confiasqankuta? Cartakuna chaskisqankuta, kamachikuykuna chaskisqankutapas allinta leespan, chayman jina imatapas ruwaspan. Paykunamanmi willakuykuna chayamushan imaynatas juñunakuykuna aparikunan, imaynatas mañakunanku chaypaqpas. Chaymantapas sut’itan paykunataqa nikushan imaynatas Cristoq ovejankunata qhawarinanku chaytapas. Chaykunata umalliqkuna allinta kasukunqaku chayqa hermanokunaqa kusisqan kanqaku. Jehová Diospas paykunata sumaqta uywashanman jinan kanqaku.

12. a) ¿Imaraykun kasukunanchispuni umalliqkunata? (Hebreos 13:​7, 17). b) ¿Imaraykun umalliqkunaq allinkuna ruwasqankupi yuyayninchista churananchis?

¹² Umalliqkunachus imatapas kamachiwasunman chayqa, gustowanmi paykunataqa kasukunanchis. Chaytachus ruwasun chayqa faciltan paykunaqa ima ruwanankutapas junt’anqaku. Bibliapipunin willashan imaynas paykunataqa k’umuykukuywan kasukunanchis chayta (leey Hebreos 13:​7, 17). Ichaqa paykunapas noqanchis jina juchasapa runakunataq kanku chayqa, mayninqa manapaschá facilchu kanqa paykunata kasukuyqa. Ichaqa ima pantasqankupipas yuyayta churashanamantaqa, allinkuna ruwasqankupi yuyayta churasunchis. ¿Imaraykun chayta ruway allinpuni kanman? Umalliqkunamantachus malta piensasun chayqa, Diospa llaqtantapas manan allintachu qhawarisunchis. Chaytapunin munashanku Diospa llaqtan contrapi kaq runakunaqa, paykunaqa imaymana cuentotan noqanchismanta rimanku. ¿Imatan ruwasunman paykunaq rimasqankuta ama uyarinanchispaq ni kasunanchispaqpas? Chayta qatiqpi qhawarisun.

AMAPUNI YANQA RIMAYKUNAWANQA APACHIKUSUNCHU

13. ¿Imaynatan qhawariwanchis Diospa llaqtan contrapi kaqkuna?

¹³ Diospa llaqtan contrapi kaqkunaqa Diospa munasqanman jina imapas ruwasqanchistan mana allinpaq qhawarinku. Jujninmanta astawan yachasun, Bibliaq willasqanman jinaqa Jehová Diosqa kamachinkuna limpio kanankutan munan. Cuerponkupipas, kausayninkupipas, iñisqankupipas limpio kanankutan munan. Chaymantapas Bibliaq nisqanman jinaqa pipas qhelli kausayta apashanman manataq arrepientekunmanchu chayqa qarqosqan kanan Diospa llaqtanmantaqa (1 Cor. 5:​11-13; 6:​9, 10). Chay kamachikuyta kasukusqanchismantan Diospa llaqtan contra kaqkunaqa mana munakuqta mana khuyapayakuqta jina rikuwanchis. Jujkunamanta aswan allinpaq creekuqkunata jinan qhawariwanchis.

14. ¿Pin rijurichishan Diospa llaqtanmanta yanqa rimaykunata?

¹⁴ Allintan yachananchis pichus chay runakunaman yuyayta qoshan chayta. Yachasqanchis jina Satanasmi “llullakunaq taytanqa”. Chay enemigon Diospa llaqtanmanta yanqata rimaqkunaq qhepanpiqa kashan (Juan 8:44; Gén. 3:​1-5). Chay enemigoq atipasqanmi wakin runakunaqa imaymana cuentokunata Diospa llaqtanmanta rimashanku. Satanasqa ñan chaytaqa ruwarqanña Jesuspa tiemponpipas.

15. ¿Imatan religionpi umalliqkuna ruwarqanku Jesús contra discipulonkuna contrapas?

¹⁵ Yachasqanchis jinapas Jesusqa mana ima juchayoqmi  karqan, imaymana milagrokunatan ruwaqpas. Satanasmi ichaqa imaymana cuentokunata wakin runakunawan rimachirqan. Religionpi umalliqkunapas “supaykunata kamachiqpa atiyninwanmi supaykunata qarqon”, nispan Jesusmanta rimarqanku (Mar. 3:22). Jesusta juzgashaqtinkupas chay umalliqkunaqa Dios contra rimaqmantan Jesusta tumparqanku, llapa runakunatataqmi kallpacharqanku “Jesusta wañuchiychis” ninankupaq (Mat. 27:20). Tiempowan Jesusta qatikuqkuna Diosmanta willaspa puriyta qallariqtinkupas chay umalliqkuna jina kaq runakunaqa juj runakunatan kallpacharqanku, paykunata cheqnikunankupaq qatikachanankupaq ima (Hech. 14:​2, 19). Hechos 14:2 textomanta rimaspan 1998 watapi 1 diciembre killapi lloqsimuq La Atalaya revistapi nirqan: “Chay judiokunaqa jark’akuqkun discipulokunaq willananta. Ichaqa manan jark’akullaqkuchu, lliu runakunamanmi willarqanku Jesuspa qatikuqninkunamanta imaymana cuentokunata, chhaynapin chay iñiqkunaq contranpi runakunata churaqku”, nispa.

16. ¿Imatan ruwananchis ima yanqa rimaypas chayamuwaqtinchis?

¹⁶ Satanasqa kaqllan kashan, llullakushallanmi, lliutan kay “pacha runakunatapas pantachishan” (Apo. 12:9). Chhaynaqa sichus Diospa llaqtan contra, mayqen umalliq contrapas ima yanqa rimaytapas uyarisun chayqa ama kasusunchu, aswanpas Jesusta discipulonkunatawan imatachus ruwarqanku chayta yuyarisun. Bibliaqa willarqanñan imaynas Jehová Diospa testigonkunaqa qatikachasqa kananku karqan chayta, imaynas paykuna contra yanqa cuentokunata rimananku karqan chaytapas (Mat. 5:​11, 12). Sichus allinta reparasun maymantachus ima rimaypas jamushan chayta, cuidakusuntaq chaykunamanta chayqa manan engañachikusunchischu. Ichaqa, ¿imaynatan chaykunamanta cuidakusunman?

17. ¿Imatan ruwananchis yanqa willakuykuna chayamuwaqtinchis? (2 Timoteo 1:13; qhaway “ ¿Yanqa willakuychu chayaramusunki? ¿Imatan kunan ruwanki?”, nisqa willakuyta).

¹⁷ Amapuni Diospa llaqtan contrapi ima cuentotapas uyarisunchu. Apóstol Pabloqa sut’itan  chaymantaqa rimarqan. 1 Timoteo 1:​3, 4 nisqan jina manan ima yanqa cuentotapas uyarinachu. Timoteotapas nirqanmi: “Ichaqa amapunin uyarinkichu yanqa rimaykunataqa”, nispa (1 Tim. 4:7). Chaypaq kaypi piensasun, yaqapaschá juj wawaqa imatapas pampamanta oqarispa siminman winakunqapacha; yuyayniyoq runaqa manan chaytaqa ruwanmanchu ¿riki? Chhaynaqa manan Diospa llaqtan contrapi ima yanqa rimaytapas ni ima cuentotapas uyarinanchischu, aswanpas Diosmanta jamuq ancha allin yachachikuykunallatan uyarinanchis (leey 2 Timoteo 1:13).

18. ¿Imaynatan rikuchisunman Diospa llaqtanpi confiasqanchista?

¹⁸ Kaypi yachasqanchis jina, Diospa llaqtanqa Jesuspa kinsa ejemplontan qatikushan, ichaqa manan chaykunallachu Jesuspa ejemplonqa. Bibliata allinta estudianki chayqa imaymanakunamantan yachanki, chhaynaqa estudiashallay Bibliata. Kallpachay hermanokunatapas Diospa llaqtanpi tukuy sonqo confianankupaq. Jehová Diostapas servishallay, amataq imawanpas aysachikunkichu Diospa llaqtanmantaqa, chay llaqtanwanmi Diosqa kay pachapi munayninta ruwachishan (Sal. 37:28). Chay llaqtallapin sumaq kausayqa munanakuypas kan, may munaymi chay llaqtapi kayqa ¿riki? ¡Chhaynaqa valorasun chay llaqtapi kasqanchista!