1. ¿Imaynan wakin tarikunku Diosmanta willaq purisqankupi? (Qhaway kay parrafopaq fotota).

 MAY munaypunin Jehová Diosmanta jujkunaman willayqa, chayta ruwaspan rikuchishanchis payta munakusqanchista, runamasinchista munakusqanchistapas. Wakin hermanokunaqa kusisqan chay ruwaypi participanku, wakinmi ichaqa mana. ¿Imaraykun chay pasanman? Wakin hermanonchiskunapas hermananchiskunapas juj chikan p’enqalin kanku, p’enqakunkun jujkunawan rimayta. Wakinqa manchakunkun mana reqsisqanku runaq wasinta riyta, wakintaq manchakunku jujkuna k’aminanta imapas ninankuta. Wakintaqa juch’uymantapachan yachachirqanku ama piwanpas discutinanpaq, chaymi paykunamanqa mana gustanchu piwanpas rimayqa. Chay hermanokunaqa munakunkun Jehová Diostaqa, ichaqa manan paykunapaqqa facilchu mana reqsisqanku runakunawan rimayqa. Chaywanpas paykunaqa, Diostaq kamachiwashanchis chayta ruwanapaq chayqa kallpachakunkun chay ruwaypi participanankupaq. ¡Maytachá Jehová Diosqa kusikun paykunawanqa!

2. Manchakushanki Diosmanta willaypi participayta chayqa, ¿imaraykun mana pisipanaykichu?

² Qanrí, ¿imaniwaqtaq? ¿Kusisqachu Diosmanta willanki, icha manchakunkichu mayninpi? Manchakunkichus chay ruwayta chayqa ama llakikuychu. Chhayna kasqanchismi mayninpiqa rikuchin humilde sonqo kasqanchista. Wakinmanqa manan gustawanchischu alayritaraq imapas ruwayqa, ni piwan discutiypas. Chaymantapas manan pipas munasunmanchu jujkuna k’amiwananchistaqa, yanapayta munashaqtinchis pipas imaniwananchistapas. Janaq pacha Papanchisqa allintan yachan imakunapis tarikushanchis chayta. Yanapaytan payqa munawashanchis (Isa. 41:13). Kaypin yachasunchis pisqa yanapaykunamanta. Chaykunan yanapawasun ama nishuta manchakunanchispaq, Diosmanta willaypi kusisqa participananchispaqpas.

 DIOSPA SIMINMI KALLPATA QOSUNKI

3. ¿Iman Jeremiasta kallpacharqan Diosmanta willananpaq?

³ Ñaupa tiempomantapachan Diospa siminqa kamachinkunata kallpacharqan imachus ruwanankuta junt’anankupaq. Chaypaq yachasun profeta Jeremiasmanta. Paytan Jehová Dios kamachirqan palabranta juj runakunaman willamunanpaq. Paymi ichaqa mancharikurqan, jinaspa nirqan: “Noqaqa manan allin rimaqchu kani, sinchi waynallaraqmi kani”, nispa (Jer. 1:6). ¿Iman payta yanapanman karqan amaña manchakunanpaq? Diospa siminmi. Jeremías kikinmi nirqan: “Nina jinaraqmi simin sonqoypi raurarirqan, nina jinaraqmi tulluykunata rupharichirqan, manañan aguantayta atirqaniñachu”, nispa (Jer. 20:​8, 9). Paypa kausasqan tiempopi Diosmanta willayqa manan facilchu karqan, ichaqa Diospa kamachisqan willakuymi sonqonpi raurarirqan. Chay kallpawanmi Jeremiasqa junt’arqan imachus ruwananta.

4. ¿Imapaqmi yanapawasunchis Diospa palabranta leeypas, chaypi yuyaymanaypas? (Colosenses 1:​9, 10).

⁴ Noqanchistapas Diosmanta willakuy apasqanchismi kallpachawasun tukuy sonqo willananchispaq. Apóstol Pablopas chaytan nirqan. Colosas llaqtapi iñiqkunaman qelqashaspan willarqan imaynas cheqaq yachayqa “Jehová Diospaq jina kausananchispaq” yanapawasunman chayta, imaynas tukuy allin kaqta ruwananchispaq yanapawasunman chaytapas (leey Colosenses 1:​9, 10). ¿Iman chay allin kaq ruway kanman? Chayqa Diosmanta allin willakuykunata willaymi. Chhaynaqa, sichus Diospa palabranta leesun, chaypitaq yuyaymanasun chayqa astawanmi Jehová Diospi iñisunchis. Allintan reparasun imaraykus gobiernonmanta willakuytapas apananchispuni chayta.

5. ¿Iman yanapawasunman Bibliata allinta entiendenanchispaq?

⁵ Diospa palabran yanapawananchispaqqa manan apurasqachu comunta leerunanchis. Chhaynaqa, ¿imatan ruwawaq juj textota mana entiendespayki? Jinata saqerparinaykitaqa, yaqapaschá chayta entiendenaykipaq maskhawaq Índice de las publicaciones Watch Tower nisqapi, otaq Qelqakuna t’aqwinapaq nisqapi. Tiempota jap’ispa allinta estudianki chayqa astawanmi Diospa siminpi confianki (1 Tes. 5:21). Astawanchus Diospa siminpi confianki chayqa, kusisqan willanki imachus yachasqaykimanta.

ALLINTA PREPARAKUSPAQA KUSISQAN DIOSMANTA WILLANKI

6. ¿Imaraykun allinta preparakunanchis Diosmanta willaq rinanchispaq?

⁶ Diosmanta willaq rinaykipaq allinta preparakunki chayqa, facil-llatan piwanpas rimanki. Jesuspas manaraq predicaq rishaqtinkun  discipulonkunataqa allinta prepararqan (Luc. 10:​1-11). Discipulonkunaqa Jesuspa nisqanman jinan Diosmanta willarqanku, chhaynapin paykunaqa kusisqa kutimurqanku chay ruwasqankumanta (Luc. 10:17).

7. ¿Imaynatan preparakusunman Diosmanta willaq rinapaq? (Qhaway kay parrafopaq fotota).

⁷ ¿Imaynatan Diosmanta willaq rinapaq preparakusunman? Diosmanta willaq rispaqa sonqomantan rimananchis. Chaymantapas sapanka runapas jujniraytan piensanku, chayman jinan iskay otaq kinsata preparakusunman imaynatas paykunawan rimasunman chayta. Chhaynapin runakunawan rimaspaqa tranquilo kasunchis, kusisqa rimasunchis, sumaq sonqowantaq rimasunpas.

8. ¿Imapin t’uru mankaman rijch’akunchis?

⁸ Apóstol Pabloqa juj riqch’anachiywanmi yachachirqan Diosmanta willayta aparisqanchismanta. Nirqanmi: “T’uru mankakuna jinaña kayku chaypas, chay qhapaq kayqa noqaykupin kashan”, nispa (2 Cor. 4:7). Ichaqa, ¿imataq chay qhapaq kayri? Chayqa Diospa gobiernonmanta allin willakuykuna willasqanchismi, chayta ruwasqanchiswanmi askha runakuna salvakushanku (2 Cor. 4:1). ¿Imataq t’uru mankakunari? Chayqa allin willakuykunata willaq Diosta serviqkunan kanchis. Apóstol Pabloq tiemponpi comerciantekunaqa t’uru mankakunapis apaqku ancha valorniyoq cosaskunata, chaykunapiqa apaqkus alimentokunata, vinota otaq qolqetapas. Kunan tiempopipas Jehová Diosqa ancha valorniyoq allin willakuykunata apananchispaqmi kamachiwarqanchis. Paymi kallpata qowasunchis, chay allin willakuykunata llapa runakunaman chayachinanchispaq.

DIOSPA YANAPAYNINTA MAÑAKUY

9. ¿Imatan ruwasunman runata ama manchakunanchispaq? (Qhaway kay parrafopaq fotota).

⁹ Mayninqa yaqapaschá nisunman: ‘‘Manapaschá munanqakuchu uyarikuyta’’ nispa. Runakunata imapaschá manchakusunman. ¿Imatan ruwasunman chhaynapi tarikuspanchis? Apostolkunapas mayninqa chhaynapin tarikurqanku. Juj kutinmi paykunata prohibirqanku Diosmanta willanankuta. Paykunan ichaqa manchasqa kanankumantaqa Jehová Diospa yanapayninta mañakurqanku, chhaynapi “mana manchakuspa Diospa siminta willanankupaq”. Jehová Diosqa uyarimurqanmi paykunaq mañakusqankuta (Hech. 4:​18, 29, 31). Noqanchispas chhaynapi tarikushanchis chayqa, mañakusun Jehová Diospa yanapayninta. Mañakusun sonqonchismanta runa manchakuyta orqonanpaq chaymantaq jujkuna munakuyta churananpaq.

10. ¿Ima yanapaykunan kashan Diosmanta willananchista junt’ananchispaq? (Isaías 43:​10-12).

 ¹⁰ Jehová Diosmi ajllawarqanchis paypa testigon kananchispaqqa, paymanta rimananchispaq (leey Isaías 43:​10-12). Payqa yanapawasunmi mana manchakuspa predicananchispaq. Payqa tawa formapin yanapayta qowanchis. Juj, Jesuswanmi yanapachiwashanchis, payqa tukuy tiempon noqanchiswan kashan (Mat. 28:​18-20). Iskay, angelkunawanmi yanapachiwashanchis (Apo. 14:6). Kinsa, santo espirituntan qowanchis, chaypa yanapayninwanqa yuyarillasunmi imatapas (Juan 14:​25, 26). Tawa, hermanonchiskunawan hermananchiskunawan iman yanapachiwanchis. Rikusqanchis jina, manan sapallanchischu kashanchis Diospa siminta willaypiqa. Jehová Diospa yanapayninwanqa hermanokunaq yanapayninwanpas atillasunmi mana manchakuspa Diosmanta willaytaqa.

RUNAKUNAQ TIEMPONMAN JINA TIEMPOYKITA T’AQAY

11. ¿Imatan ruwawaq llapa runakunaman Diosmanta willakuyta chayachinaykipaq? (Qhaway kay parrafopaq fotota).

¹¹ Mayninpiqa manan runakunaqa wasinkupichu tarikunku. Chay pasasuqtiyki, ¿imatan ruwanki? ¿Llakikunkichu? Ama llakikuychu, aswanpas tapukuy: “¿Maypin kashankuman? ¿Llank’anankupichu, icha rantikuqchu rinkuman karqan?”, nispa (Hech. 16:13). Yaqapaschá callekunapi predicawaq. Joshua sutiyoq hermanon nin: “Noqaqa mercado punkukunapi carrokunaq sayasqankunapi iman predicani, chaykunapiqa kusatan runakunaqa uyarikunku”, nispa. Chaymantapas chay hermanoqa tardenkunas esposanwan kuska runakunaq wasinta rinku, domingonkunapas kuska p’unchay pasaytas rinku, chay ratukunaqa chaypis runakunaqa kashanku (Efes. 5:​15, 16).

12. ¿Imaynatan yachasunman imakunapichus runakuna creenku chayta, imakunamantachus yachayta munanku chaytapas?

¹² Wakin runakunaqa manapaschá munanqakuchu imachus willasqanchista uyarikuyta, chhayna kaqtinqa allinta qhawariy imakunapis paykuna creenku imakunatas yachayta munankuman chayta. Ñaupaqpi rimamusqanchis hermanonchis Joshuawan esposanwanqa tratadokunapi tapuyman jinas piwanpas rimanku, ¿Imaniwaqmi Bibliamanta?, nisqa tratadota qhawachinankupaqsi ninku: “Wakin runakunaq piensasqanman jinaqa Diosmantas Bibliaqa jamun, wakintaq mana chhaynatachu piensanku. Personaykiri, ¿imaninkitaq?”, nispa. Chhaynata  rimapayaspas paykunaqa askha runakunawan rimanku.

13. ¿Imaraykun nisunman “runakunaña mana uyarikunqachu chaypas kusikunan” nispa? (Proverbios 27:11).

¹³ Mayninqa manapaschá pipas uyarikuyta munanqachu, ichaqa manan chaywanqa llakikunanchischu. ¿Imarayku? Paykunaman willaq rispan noqanchisqa kasukushanchisña Jehová Diosta Jesustapas (Hech. 10:42). Chhaynaqa manaña runakuna uyarikuyta munanqachu chaypas, k’amiwasunña chaypas kusikusun, paykunaman rispaqa ñan Diosninchispa munaynintaqa ruwashanchisña. Payqa ancha kusisqan kashan siminta willananchispaq tiempota qokusqanchismanta (leey Proverbios 27:11).

14. ¿Imatan ruwananchis mayqen hermanopas juj allin sonqo runata tariqtin, imarayku?

¹⁴ Mayninqa yaqapaschá mayqen hermanonchispas juj allin sonqo runata tarinqa, payqa estudianqa imapaschá, chayqa may kusikunapaqmi llapapaqpas ¿riki? ¿Imaraykun chayta ninchis? Juj Qhawaq revistakunapi nisqan jina, runakunata maskhayqa juj chinkasqa wawata maskhay jinan. Askhamantan chinkasqa wawataqa maskhakun, sapankan t’aqa-t’aqa maskhanku. Chay wawata tarispaqa manan jujllachu kusikun ¿riki? Aswanpas llapankun mayta kusikunku. Chhaynan jujkunaman Diosmanta yachachiypas. Allin sonqo runata maskhaspaqa llapanchismi t’aqa-t’aqa maskhayta qallarinchis, mayqenpas juj allin sonqo runata tariqtinqa, chay runa juñunakuykunamanpas jamuqtinqa llapanchismi kusikunanchis.

MUNAKUQ KASQAYKITA RIKUCHIY

15. ¿Iman yanapawasun allin willakuykunata astawan willananchispaq? (Mateo 22:​37-39; qhaway tapanpi kaq).

¹⁵ Sichus Jehová Diostapas runamasinchistapas munakusunchis chayqa, astawanmi munasunchis allin willakuykuna willayta (leey Mateo 22:​37-39). Chaymantapas Jehová Diosqa maytan kusikun paymanta willaqta rikuwaspanchisqa. Kusikunmi runakuna palabranta estudiayta qallariqtinkupas. Yachasqanchis jinapas Diospa siminta uyarikuspa kasukuqkunaqa salvasqan kanqaku (Juan 6:40; 1 Tim. 4:16).

16. ¿Imaynatan Diosmanta willaspa kusisqa kasunman aunque manaña wasimanta lloqsiyta atisunmanchu chaypas? Juj ejemplotawan willay.

¹⁶ Ichaqa wasiykimanta mana lloqsiyta atishankichu ¿chayri? Chhaynapi tarikushanki chayqa, imaymana formapin rikuchiwaq Jehová Diostapas runamasiykitapas munakusqaykita. Hermanonchis Samuelmanta esposan Daniamantawan yachasunchis. Coronavirus onqoy tiempopiqa paykunaqa manan atirqankuchu wasinkumanta lloqsimuyta. Chay tiempopiqa telefononta, cartakunata  qelqaspa imallas predicaqku, Zoom nisqantas estudiotapas qoqku. Chaymantapas hermanonchis Samuelpis cáncer onqoyta tarisqaku. Tratamiento ruwasqanku tiempopiqa clinicapis payqa predicaq. Paymi nin: “Mayninqa sinchi llakiq ñit’isqan kaspan mana ima ruwaytapas atinkichu, manan kallpaykipas kanchu. Ichaqa chay ratokunapi yuyarinki Jehová Diosta servisqaykita chayqa, kallpatan kusikuytan chayqa qosunki”, nispa. Chay tiempopis hermananchis Daniapas wijch’ukusqa jinaspa kinsa killa mana sayariyta atisqachu. Sayarispapas soqta killas silla de ruedas nisqallapi purisqa. Paymi willakun: “Atisqayman jinan imatapas ruwaq kani. Visitamuwaqniy enfermerakunamanmi Diosmanta willaq kani, wasiyman imachus mañakusqayta apamuqkunatapas rimapayaqmi kani. Medicamento vendeqkunatapas telefonontan Diosmanta rimapayaq kani”, nispa. Rikusqanchis jina Samuelwan Daniawanqa sinchi sasapiña tarikurqanku chaypas, tukuy atisqankutan ruwaqku Diosmanta willanankupaq, chaywantaqmi paykunaqa kusisqa kaqku.

17. ¿Imatan ruwana kaypi yuyaychaykuna yanapawananchispaq?

¹⁷ Kay yachachikuypi llapa yuyaychaykunata kasukusunchis chayqa, kusisqan Diosmanta willasunchis. Imaynan mijunata wayk’uqtinchis imaymanakunata churaqtinchis sumaq lloqsin. Chhaynan kay yuyaychaykunapas, kaypi llapan yachasqanchisman jinachus imatapas ruwasunchis chayqa, manan manchakusunchu Diosmanta willayta, aswanmi kusisqa chay ruwaytaqa aparisunchis.