1955 watapin nacerqani, kinsa hermanon kayku, noqaqa sullk’a kaqmi kani. Finlandia nacionpa uray ladonpin wiñarqani Vantaa nisqa llaqtapi.

Manaraq naceshaqtiymi mamayqa bautizakusqa Jehová Diospa testigon kananpaq. Papaymi ichaqa mana Bibliamanta yachayta munarqanchu. Chaymi mamitayta jark’aq ama Bibliamanta yachachiwanankupaq, ni juñunakuykunamanpas apawanankupaq. Chaymi mamitayqa papay mana wasipi kashanankama Jehová Diosmanta yachachiwaqku.

Erqellaraq kasqaymantapachan Diosllatapuni kusichiyta munarqani. Juj kutinmi qanchis wataypi kashaqtiy profesoray sinchita phiñakurqan yawarwan ruwasqa tortachata mana mijusqaymanta. Makinwan simiyta kicharispan cucharapi chay mijunata simiyman winayta munarqan. Chaymi noqaqa makinpi takarqani, jinaspa mijunata cucharantinta pampaman wijch’uchirqani.

Chunka iskayniyoq wataypi kashaqtiymi papayqa wañukapurqan, chay qhepamanñan juñunakuyman riyta atirqani. Hermanokunaqa anchatan munakuwarqanku, chaymi yanapawarqan astawan Jehová Diosta serviyta munanaypaq. Bibliaqa sapa p’unchaymi leeq kani, qelqanchiskunatapas allintan estudiaq kani, chaykunan yanapawarqan astawan Jehová Diosta munakunaypaq. Chaymi bautizakapurqani 1969 watapi, 8 agosto killapi, chunka tawayoq wataypi kashaspa.

Colegioyta tukusqay qhepamanmi precursor kapurqani. Chaymantataq Pielavesi llaqtachaman  astakapurqani, chaypi Diosmanta willaypi yanapakunaypaq.

Chay llaqtachapin Sirkka nisqa sutiyoq hermanata reqsirqani, paywanmi noqaqa kasarakapurqani. Payqa humilde sonqo warmin karqan, jinaspapas anchatan Jehová Diosta munakuq, chhayna kasqanmi anchata gustawarqan. Chaymantapas payqa imachus kaqnillanwanmi kausaq. Paypas noqapas Jehová Diostaqa tukuy sonqoykuwanmi serviyta munarqayku. Liston kasharqayku mayman kachawanankupaqpas imata ruwanaykupaqpas. 1974 watapi, 23 marzo killapin noqaykuqa casarakapurqayku. Chay qhepallamanmi Karttula nisqa llaqtaman ripurqayku, chaypi astawan Diosmanta willaypi yanapakunaykupaq.

Jehová Diospa gobiernonmanta willaytan ñaupaqman churarqayku, chaymi payqa tukuy necesitasqaykuta qowarqanku. Casarakusqaykumantapachan chaytaqa allinta repararqayku (Mat. 6:33). Karttula llaqtapiqa bicicletapin Diosmanta willaq riq kayku, ichaqa sasan chiri tiempopiqa karqan. Chaymantapas karukunatan rinayku karqan Diosmanta willaq, chaymi necesitarqayku juj carrota. Ichaqa manan qolqeyku karqanchu rantikunaykupaq.

Juj kutinmi juj kaq wayqey visitamuwasqaku, paymi carronta qowarqanku. Chay carromantaqa manan imatapas pagarqaykuchu, aswanpas gasolinallatan jich’anayku karqan, chaywanmi kusisqa kasharqayku.

Chaypin astawanqa repararqayku Jehová Diosqa tukuy necesitasqaykuta qowasqankuta. Paypa gobiernollantan ñaupaqmanqa churanayku karqan.

1978 watapin precursorkunapaq escuelapi kashaqtiyku, chay escuelapi juj kaq yachachikuq Raimo Kuokkanen a niwarqanku Galaad Escuelapaq solicitudta junt’anaykupaq. Chaymi inglés simita yachayta qallarirqayku Galaad Escuelaman rinaykupaq. Ichaqa 1980 watapin Finlandia sucursalpi llank’anaykupaq niwarqanku, chaymi Galaad Escuelaman rinaykupaq solicitudta mana junt’arqaykuchu. Chay tiempopiqa manan Betelpi llank’aqkunaqa Galaad Escuelaman rinankupaq solicitudta junt’ayta atirqankuchu. Noqaykuqa maypichus Jehová Dios servinaykuta munarqan chaypin serviyta munarqayku, manan noqaykuq munasqaykupichu. Chaymi Finlandia sucursalpi llank’ayta chaskikurqayku. Ichaqa inglés simitaqa  yachashallarqaykun “yaqapas atikuqtinqa jamuq watakunaman Galaad Escuelapaq solicitudta junt’asuman” nispayku.

Pisi watakuna qhepamanqa Betelpi llank’aqkunapas atirqankuñan Galaad Escuelapaq solicitudta junt’aytaqa, Umalliq T’aqan chayta willakamurqan. Chaymi kaq ratopacha solicitudta junt’arqayku. Noqaykuqa kusisqan Betelpiqa llank’asharqayku, ichaqa maytan munasharqayku maypichus yanapakuyta atiykuman chayman riytapas. Chayllamanmi Galaad Escuelaman invitawarqanku 79 clase nisqaman; 1985 watapi, setiembre killapitaq graduakurqayku. Chaymantataq Colombia nacionman rinaykupaq niwarqanku.

Colombia nacionman chayaqtiykun sucursalpi llank’anaykupaq niwarqanku. Tukuy atisqaytan chaypi llank’anaypaq kallpachakurqani. Ichaqa juj wata qhepamanmi juj llank’ayman cambiawanankuta munarqani. Chay kutillapin chaytaqa mañakurqani. Chaymi cambiawarqanku Neiva llaqtapi misionerokuna jina llank’anaykupaq. Chayqa kasharqan Huila nisqa departamentopin.

Diosmanta willayqa gustawallaqpunin. Chaymi Finlandia nacionpi solterollaraq kashaspa precursor kashaspaypas tutallamanta Diosmanta willayta qallariq kani, chaytaqa tutakaman ruwaq kani. Casarakusqay qhepamanpas esposaywanqa chhaynatan Diosmanta willaq kayku, illarimuymanta hasta tutakaman puriq kayku. Karukunaman Diosmanta willaq rispaykuqa mayninpiqa carropin puñuq kayku. Chhaynapi qhepantin tutamanta willayta qallarinaykupaq.

Ancha kusisqan jujmanta Diosmanta willaypi llank’arqayku. Iñiq t’aqaykuqa pisi-pisimantan sumaqta wiñayta qallarirqan, Colombiapi hermanokunaqa munakuq, respetakuq, sumaq sonqon karqanku.

Neiva llaqtaq qayllanpiqa askhan llaqtachakuna kasharqan. Chay llaqtachakunapiqa manan juj testigopas karqanchu. Chay llaqtachakunaman chayayqa peligroson karqan, callekunapin nishu maqanakuy kaq. Astawanqa mana chaymanta kaqkunapaqmi peligroso karqan. ¿Imaynatan chay llaqtachakunaman Diospa palabran chayanman karqan? Chaypin sapa kuti piensaq kani. Chaymi Jehová Diosmanta mañakuyta qallarirqani pillapas chay llaqtachakunamanta Neiva llaqtapi tiyaspa testigo kapunanpaq. Chaymantapas mañakurqanin chay runa bautizakusqan qhepaman iñiyninpi astawan wiñananpaq, jinaspa llaqtanman kutipuspa Diosmanta willamunanpaq. Chay piensasqayqa noqapaqqa allinmi kasharqan, ichaqa Jehová Diosqa aswan allintaraqmi piensashasqa.

Chay qhepallamanmi juj waynachaman Bibliamanta yachachiyta qallarirqani. Paypa sutinmi karqan Fernando González, payqa Algeciras llaqtachamantan kasqa. Chay llaqtachapipas manan ni juj testigollapas karqanchu. Payqa Neiva llaqtapin llank’arqan, chaymi llaqtanmantaqa 50 kilómetros mastaraq llank’ananman purinan karqan. Payqa allintan Bibliata estudianaykupaq qelqakunata preparakuq, qallariymantapachan juñunakuykunamanpas rirqan. Biblia estudiayta qallarisqayku semanallapin payqa llaqtamasin runakunata juñuspa Bibliapi imachus yachasqanta paykunaman yachachisqa.

Fernandoqa soqta killa estudiasqayku qhepallamanmi 1990 watapi bautizakapurqan, chay qhepamantaq precursor regular kapurqan. Kunanqa ñataq Algeciras llaqtachapi kanña juj testigo chayqa, Sucursalqa aswan confianzawanmi chay llaqtachaman precursor especialkunata kacharqanku,  1992 watapi febrero killapitaq juj iñiq t’aqata chaypi kichakurqan.

Fernandoqa manan Algeciras llaqtallapichu qhepakurqan, aswanpas casarakusqan qhepamanmi esposanpiwan San Vicente del Caguán nisqa llaqtachaman astakapurqanku chaypipas runakuna Diosmanta yachanankupaq. Chay llaqtapiqa manan ni juj testigollapas karqanchu, tiempowanmi ichaqa chaypipas juj iñiq t’aqa kapurqan. Paykunataqa 2002 watapin watukuq umalli kanankupaq nirqanku, kunankamapas chay llank’aypin yanapakushanku.

Llapa chaykunata rikuymi yachachiwarqan Diosmanta mañakuspaqa imatapunichus munashani chayta sut’ita ninaypaq. Payqa mana piensasqanchis ruwanakunataraqmi ruwanman munaynin junt’akunanpaqqa. Jinaspapas paymi “cosechata oqariq dueñoqa” (Mat. 9:38).

1990 watapin Bogotá llaqtapi watukuq umalli kanaypaq niwarqanku. Esposaywan noqawanqa juj iñiqmasikuna jinallan kayku, manan allin estudioyoqchu kayku. Chaymantapas noqaykuqa manan jayk’aqpas jatun llaqtapiqa tiyarqaykuchu. Chaymi manchakusharqayku chay llaqtapi watukuq umalli jina yanapakuyta. Jehová Diosmi ichaqa Filipenses 2:13 nisqanman jina yanapawarqanku. Chaypin nin: “Diosmi qankunataqa munayninman jina kallpachashasunkichis, paymi tanqasunkichis ima ruwayta munanaykichispaqpas, payllataqmi atiytapas qosunkichis chayta ruwanaykichispaq”, nispa.

Juj tiempo qhepamanmi Medellín llaqtapiñataq watukuq umalli kanaypaq niwarqanku, chay llaqtamantaqa ñan qallariypi juj chikanta willamurqaykichisña. Chaypi tiyaq runakunaqa manañan imatapas manchakuqkuñachu, yachasqañan kasqaku wañuchinakuspa runakunaq kausasqanman. Juj kutinmi juj runaman yachachisharqani, chayllamanmi balakuna t’ojamurqan. Noqaqa pampamanñan wijch’ukunay karqan, yachachisqay runan ichaqa tranquilo leeshallarqan Bibliata, tukuruspataq niwarqan: “Juj ratulla lloqsirusaq”, nispa. Payqa wawankunata aysaykuspañan kutirqamusqa, manan manchasqachu payqa kasharqan. Jinan niwarqan: “Disculpaykuway, wawaykunata apamuqmi rirqani”, nispa.

Manan chay kutillapichu mancharikurqani. Juj kutinmi wasin-wasinta Diosmanta willashaqtiyku esposayqa phawaylla jamushasqa. Payqa sinchi manchasqallañan jamushasqa uyanpas yuraqmanraqmi tukushasqa. Jinan niwarqan: “Juj runan balawan t’ojachimuwan”, nispa. Chayta uyarispan noqapas mancharikurqani. Chay qhepamanñan yacharqayku, mana esposaytachu wañuchiyta munasqaku aswanpas juj runatan.

Tiempowanqa pisi-pisimantan chhayna kausayman yachakapurqayku. Chaypi tiyaq hermanokunaqa aswan sasachakuykunapiraqmi tarikurqanku, ichaqa aguantasqankuta Jehová Diospi confiasqankuta rikuspan anchata admirakurqayku. Chaykunata rikuspan piensaq kayku: “Paykunatapas Jehová Diosqa yanapashantaq chayqa, noqanchistapas yanapawallasunmi”, nispa. Noqaykuqa kasukuqpunin kayku iñiq t’aqapi umalliqkunata, cuidakuspan puriq kayku. Ichaqa manan nishutachu chaykunamanta llakikuq kayku, vidaykutaqa Jehová Diospa makinmanmi saqerqayku.

Mayninpiqa manan piensasqaykuman jinapunichu imapas karqan. Juj kutinmi juj señorata visitasharqani, chayllamanmi uyarirqani iskay  warmikunata jina k’aminakushaqta. Noqaqa manan chay discutisqankuta qhawayta munarqanichu. Ichaqa wasiyoqmi niwarqan imachus pasashasqanta qhawarinaypaq. Chaypiqa manan warmikunachu k’aminakushasqaku, aswanpas iskay lorochakunallan vecinokuna jina bullachakushasqaku.

1997 watapin Escuela de Entrenamiento Ministerial nisqapi yachachiq kanaypaq niwarqanku. b Noqamanqa gustawaqmi chay escuelakunaman riy, ichaqa manan jayk’aqpas piensarqanichu chaypi yachachiq kanaypaqqa.

Chaymantataq superintendente de distrito kanaypaq niwarqanku. Tiempowanqa manañan chayqa kapurqanñachu, chaymi jujmanta watukuq umalli kapurqani. Kunankamaqa kinsa chunka wata masñan Diospa llaqtanpi kaq escuelakunapi yachachishani, watukuq umalli ima kashani. Chay llank’aykunapiqa imaymana bendicionkunatan chaskirqani, ichaqa manan chayraykuchu imapas fácil karqan.

Noqaqa fuerte caracterniyoqmi kani. Chhayna kayqa yanapawarqanmi mayninpi sasachakuykunata atipanaypaq, mayninpin ichaqa mana yanapawarqanchu iñiq t’aqapi hermanokunata yanapanaypaq, k’araqtan mayninpiqa hermanokunata anyaq kani. Juj kutinmi wakin hermanokunata phiñarikurqani, “hermanokunawanqa munakuqmi kanaykichis” nispan nirqani. Ichaqa noqa kikiymi mana sumaqtachu paykunata yuyaychasharqani, chaypin reparakurqani cambianay kasqanta (Rom. 7:​21-23).

Chhayna genioyoq kasqayraykun mayninpiqa pisiparqani (Rom. 7:24). Chaymi juj kutinpas Jehová Diosta mañakurqani amaña misionero kanaypaq, aswanpas Finlandia nacionman kutipunaypaq. Ichaqa chay p’unchaypi juñunakuypi rimamusqankun anchata kallpachawarqan Jehová Dios serviypi kallpachakushanallaypaq, imapichus cambianay kaqtinpas cambianaypaq. Manan jayk’aqpas qonqasaqchu Jehová Diosqa sut’itapuni mañakusqayta uyarimuwasqantaqa. Chaymantapas payqa sumaqllatan yanapawarqan cambianaypaq.

Maytan Jehová Diosta agradecekuyku tukuy tiempoykuwan llaqtanpi yanapakusqaykumanta. Chaymantapas gracias ninin Jehová Diosta juj munay esposata qowasqanmanta. Payqa anchatan munakuwan, tukuy tiempotaqmi yanapawashan.

Ñan 70 wataymanña jaykurusaq. Chhaynaqa manañan Diospa llaqtanpi Escuelakunapi yachachisaqñachu, manañan watukuq umalliqpaschu kasaqpas. Ichaqa manan chaymantaqa llakikunichu. ¿Imarayku? Yachanin, Diosta jatunchanapaqqa mana jatun llank’anayoqraqchu Diospa llaqtanpiqa kana. Aswanpas Jehová Diosqa munan juch’uyaykukuspa tukuy sonqomanta servinanchistan. Munanmi agradecekuq kananchistapas (Miq. 6:8; Mar. 12:​32-34).

Jehová Diosta servisqaymantapachan imaymana llank’ayta llaqtanpi chaskikurqani. Ichaqa chaykunataqa manan jujkunamanta aswan allin kasqayraykuchu, nitaq allin yachayniyoq kasqayraykuchu chaskikurqani. Aswanmi Jehová Diosqa juchayoq runaña kani chaypas munakuyninpi llapa chaykunata qowarqan. Paypa yanapaynillanwanmi chay ruwaykunatapas junt’ayta atirqani. Chaypin sut’ita yachani Jehová Dios atiyninwan yanapawasqanta (2 Cor. 12:9).