1, 2. a) ¿Imaynatan Jehová Dios qhawarin yuyaypi juchallikuqta? b) ¿Juchallikuq ima ruwanantan Dios munan?

 JEHOVÁ Diosqa manan jinallatachu qhawan juchapi puriq runataqa (Sal. 5:​4-6). Payqa kamachikusqankuna respetananchista simintapas kasukunanchistan munan. Chaywanpas payqa yachanmi juchasapa kaypi mayninpi pantananchista (Sal. 130:​3, 4). Ichaqa manan jinatachu qhawan paypa khuyapayakuq kayninta q’ewispa mana p’enqarikuspa juchallapi puriq runakunataqa (Jud. 4). Bibliaq willasqan jina, Diosta mana manchakuq chay millay runakunaqa armagedón guerrapin “chinkachisqa kanqaku” (2 Ped. 3:7; Apo. 16:16).

² Ichaqa Diosqa manan munanchu pipas chinkachisqa kanantaqa. Ñaupaq yachachikuykunapi yachamusqanchis jina, payqa munashan lliupas juchankumanta pesapakuspa payman kutirikunankutan (2 Ped. 3:9). Chaymi umalliqkunaqa Jehová Dios jina qhawarinanku juchapakuq runakunataqa. Pacienciawanmi yanapananku, chhaynapi cambiaspa Diosman kutirikunankupaq. Chaywanpas wakin juchapakuqkunaqa manan chaskikuyta munankuchu chay yanapayta (Isa. 6:9). Umalliqkuna kallpachakushankuña paykunata yanapanankupaq chaypas juchallapin puriyta munanku. ¿Imatan ruwana chay pasaqtin?

 “QANKUNA UKHUMANTA T’AQAPUYCHIS”

 3. a) Bibliaq nisqanman jinaqa, ¿imatan ruwana juchanmanta mana arrepientekuq runawan? b) ¿Imaraykun nisunman “payllataqmi t’aqasqa kananpaqqa juchayoq” nispa?

³ Juchallikuq runa mana arrepientekunchu manataq umalliqkunaq yuyaychasqantapas kasukunchu chayqa, 1 Corintios 5:13 textoman jinan ruwakunan. Chaypin nin: “Qankuna ukhumanta t’aqapuychis juchallikuq runata”, nispa. Pipas Diospa llaqtanmanta t’aqasqa kanqa chayqa, payllataqmi juchayoq chhaynapi tarikunanpaqqa, imachus tarpusqantan cosechashan (Gál. 6:7). ¿Imaraykun chayta ninchis? Payqa umalliqkuna yanapashaqtinmi kallpachashaqtinmi mana juchanmanta arrepientekuyta munarqanchu (2 Rey. 17:​12-15). Imachus ruwasqanwanmi rikuchirqan Jehová Diospa siminta mana respetasqanta (Deut. 30:​19, 20).

 4. ¿Imaraykun juñunakuypi willakun pipas Diospa llaqtanmanta t’aqasqa kaqtin?

⁴ Pitapas Diospa llaqtanmanta t’aqakun chayqa, juñunakuypin willakun imaynas chay runaqa manaña Diospa testigonchu chayta. a Ichaqa, ¿imaraykun chayta ruwakun? Manan chay runata pisichanapaqchu, aswanpas iñiqkuna Bibliaq nisqanta kasukunankupaqmi. Juchallikuqmanta rimaspan Bibliapi nin: “Ama chhayna runawanqa juñukuychischu, amapuni chhayna runawanqa mijuychispaschu”, nispa (1 Cor. 5:​9-11). Ichaqa, ¿imaraykutaq chaytari nishanman? Bibliapin nillantaq: “¿Manachu yachankichis pisi levaduralla llapa masata poqochisqanta?”, nispa (1 Cor. 5:6). ¿Imaninantaq chayri? Pipas juchanmanta mana arrepientekuq runawan juñukunman chayqa yaqapaschá iñiynin pisiyanman, pisipaqmi Diospa kamachikuynintapas qhawaripunman (Prov. 13:20; 1 Cor. 15:33).

 5. ¿Imaynatan qhawarinanchis Diospa llaqtanmanta t’aqasqa runakunata, imarayku?

⁵ ¿Imaynatan qhawarinanchis Diospa llaqtanmanta t’aqasqa kaqkunata? Manaña paykunawan juñukusunchu chaypas paykunataqa chinkasqa ovejakunata jinan qhawarinanchis. Juj chinkasqa ovejaqa kutimullanmanmi tropanmanqa. Yachasqanchis jina chay ovejaqa otaq runaqa Diosman entregasqan karqan. Kunanqa manapaschá promesa ruwasqanman jinachu kausashan. Ichaqa khuyapayakuq Jehová Diosqa suyashallanqan paytaqa, punkuqa kichasqallan kashan kutimunanpaqqa (Ezeq. 18:31). Chhaynaqa juj runa t’aqasqaña karqan chaypas, ¿imatan umalliqkuna ruwankuman Diosqa paykunata suyashasqanta rikuchinankupaq?

¿IMAYNATAN UMALLIQKUNA YANAPANKUMAN T’AQASQA KAQKUNATA?

 6. ¿Imatan umalliqkuna ruwanqaku Diospa llaqtanmanta t’aqasqa kaqkunata yanapanankupaq?

⁶ Pipas Diospa llaqtanmanta t’aqasqa kanman chayqa, ¿manañachu umalliqkuna paywan jayk’aqpas rimananku? ¿Payllamantachu kutimunan Diosman? Chayqa manan chhaynachu. Payta yanapaq umalliqkunaqa t’aqasqa kananta willashaspaqa, willanallankutaqmi imatas ruwanan kutimpunanpaq chayta. Ichaqa manan chayllachu, aswanmi willanqaku imaynas kinsa killamanta jina paywan juñukuyta munankuman chayta. Juchallikuq runa “ya” ninqa chayqa, jujmanta juñukuspaqa umalliqkunaqa valekunqakun chay runa juchanmanta arrepientekunanpaq, Diosman kutimpunanpaqpas. Chay kutipaq manaraq cambiarqanchu chaypas  umalliqkunaqa kallpachakunqakun juj kutikunatawan visitanankupaq.

 7. ¿Imaynatan umallikuna rikuchinkuman Jehová Dios jina khuyapayakuq kasqankuta t’aqasqa kaqkunata yanapashaspa? (Jeremías 3:12).

⁷ Umalliqkunaqa mayqen t’aqasqa kaqtapas yanapaspaqa Jehová Dios jina khuyapayakuq kasqankutan rikuchinanku. Yachasqanchis jina ñaupa Israel runakunata yanapashaspaqa, Diosqa manan paykuna arrepientekunankutaraqchu suyarqan. Aswanmi pay chay runakunata kallpacharqan kutimpunankupaq. Iskay yachachikuypi yachamusqanchis jina, Jehová Diosqa Oseasta imachus pasasqanwanmi rikuchirqan chay runakunata khuyapayasqanta. Oseastaqa Diosmi kamachirqan esposanwan kutinakapunanpaq. Juchapiña chay warmi purisharqan chaypas chaytan ruwanan karqan (Os. 3:1; Mal. 3:7). Umalliqkunapas Jehová Dios jinan tukuy atisqankuta ruwananku t’aqasqa kaqkunata Diosman kutichimunankupaq (leey Jeremías 3:12).

 8. ¿Imaynatan chinkasqa churimanta Jesuspa willasqan rikuchin Jehová Diosqa may khuyapayakuq kasqanta? (Lucas 15:7).

⁸ Iskay kaq yachachikuypi yachasqanchista yuyarisun. Chaypi yachasqanchis jina, Jesuspa willasqan willakuypi taytaqa paymi wawanman phawarirqan, abrazaykuspataq much’aykurqan (Luc. 15:20). Chay taytaqa manan wawan perdonta mañakunantaraqchu suyarqan, aswanmi pay phawaspa sumaqta chaskirqan. Umalliqkunapas kaqtan ruwananku t’aqasqa kaqkunawanqa, kallpachakunankun chay chinkasqa ovejakunata wasiman kutichimunankupaq (Luc. 15:​22-24, 32). Mayqenpas kutimuqtinqa ancha kusikuymi kan janaq pachapipas kay pachapipas (leey Lucas 15:7).

 9. ¿Imaninmi Jehová Dios juchapakuqkunata?

⁹ Kaykama yachamusqanchis jina, Jehová Diosqa manan jinallataqa qhawanmanchu juchapi puriqtaqa. Chaywanpas payqa manan pitapas qonqarparinchu, aswanmi munan chay runakuna payman kutimunankuta. Oseas 14:4 textopin willashan imaynatas Dios paykunata qhawarin chayta. Chaypin nin: “Mana kasukuq kayninkutan qonqachipusaq, sonqomantan paykunataqa munakusaq. Phiñakuyniyqa karunchakunñan paykunamanta”, nispa. Chay simikunaqa umalliqkunata kallpachananpaq jinan kashan ¿riki? T’aqasqa kaqkunatapas maytachá yanapan Diosman kutimpunankupaq.

10, 11. ¿Imaynatan umalliqkuna yanapanqaku ñaupaqkunapi Diospa llaqtanmanta t’aqasqa kaqkunata?

¹⁰ Wakinqa yaqapaschá unayña Diospa llaqtanmanta t’aqasqa karqanku. Wakinninkuqa ñapaschá qonqapunkuña chay tiempopi ruwasqanku juchatapas. Wakinninkuqa manapaschá yuyankuñachu imaraykus t’aqasqa karqanku chaytapas. ¿Imatan paykunawan ruwakunqa? Imaynaña paykuna kashanku chaypas, umalliqkunaqa kallpachakunqakun paykunata maskhanankupaq. Atikuqtinqa paykunawan kuskan mañakunqaku, munakuywantaq kallpachanqaku Diospa llaqtanman kutimpunankupaq. Ichaqa unaytaq paykunaqa Diospa llaqtanmanta karupi kasharqanku chayqa, pisichá kashanku iñiyninkupiqa. Chhayna kaqtinqa kutimuyta munanqaku chayqa, umalliqkunaqa estudiota chaskinankupaqmi organizanqaku. Manaraq Diospa llaqtanman kutimunkuchu chaypas estudiankumanmi. Ichaqa llapa chaykunataqa umalliqkunan qhawarinqaku.

¹¹ Umalliqkunaqa Jehová Dios jina khuyapayakuqmi kananku. Kallpachakunankun llapa atisqanku runakunata Diospa llaqtanman kutichimunankupaq. Chay runakunamanta mayqenpas arrepientekunqa juchankunatapas saqepunqa chayqa, chaskisqan kanqa  Diospa llaqtanpi. Chaypaqqa manan unayraqchu pasanan (2 Cor. 2:​6-8).

12. a) ¿Pikunatan allin yuyaywan qhawarinanku umalliqkuna? b) ¿Imaraykun mana ninanchischu “kay juchata ruwaqqa manachá Diospa khuyapayasqanqa kanmanchu” nispa? (Qhaway willakuyta).

¹² Mayninqa umalliqkunaqa manan apuraychu pitapas Diospa llaqtanman jaykurachinanku. ¿Imarayku? Pipas juj sullk’a wawata abusarqan, Diosmanta t’aqakuspapas pay contra jatarirqan, casarakuynin tukupunanpaqpas yuyaypi ima mana allintapas ruwarqan chayqa, allintan reparana cheqaqtapunichus chay runa arrepientesqa kashan icha  manachus chayta (Mal. 2:14; 2 Tim. 3:6). Umalliqkunaqa kallpachakunankun iñiqkunata cuidanankupaq. Chaywanpas allintan qhawarinanku imaynas Jehová Diosqa arrepientesqa runakuna kutimunanta munashan chayta. Umalliqkuna allin yuyaywanña qhawarinanku wakin juchapi tarikuqkunata chaypas manan ninankuchu “kay juchata ruwaqqa manachá Diospa khuyapayaynintaqa chaskinmanchu”, nispaqa b (1 Ped. 2:10).

¿IMATAN RUWANANKU WAKIN IÑIQKUNA?

13. ¿Imaynatan qhawarinanchis umalliqkunaq anyasqan iñiqta, imaynatan qhawarinanchis Diospa llaqtanmanta t’aqasqa kaqkunata?

¹³ 34 yachachikuypi yachamusqanchis jina juñunakuypichus pimantapas willakamunqa “payqa wanachisqan kapun” nispa chayqa, paywanqa juñukullasunmanmi. Arrepientekuntaq juchanmanta chayqa payqa Diospa llaqtallanpin kashan (1 Tim. 5:20). Chaymantapas payqa iñiqkunaq kallpachananta, yanaparinanta iman necesitashan (Heb. 10:​24, 25). Ichaqa pipas Diospa llaqtanmanta t’aqasqa kanman chayqa manan paywanqa juñukunanchischu. Arí, Bibliaq nisqan jina “manan paywanqa juñukunanchischu ni mijunanchispaschu” (1 Cor. 5:11).

14. ¿Imatan iñiqkuna concienciankuman jina ruwankuman Diospa llaqtanmanta t’aqasqa mayqen runawanpas? (Qhaway kay parrafopaq fotokunata).

¹⁴ Chhaynaqa, ¿manachu ni rimaykunanchispas Diospa llaqtanmanta t’aqasqa kaqkunata? Manan chayqa chhaynachu. Arí, manapaschá paywanqa amigota armasunchu, ichaqa sapankanchismantan kanqa pipas reqsisqanchis t’aqasqa runata invitasunchus juñunakuyman icha manachus chayqa. Sapankan Bibliawan yachachisqa conciencianchisman jina chaytaqa ruwasunchis. Jamunqa chayri ¿imatataq ruwasun? Ñaupaqqa manan paytaqa napaykunachu karqan, kunanmi ichaqa sapankamanta chayqa kanqa. Sapankan Bibliawan yachachisqa conciencianman jina napaykunqapas manapas. Ichaqa manan allinchu kanman paykunawan unayta rimayqa ni amigota armaypas.

15. ¿Imayna juchamantan rimashan 2 Juan 9-11 textopi? (Qhaway “ ¿Kaq juchamantachu rimasharqanku apóstol Juanpas Pablopas?” nisqa willakuyta).

 ¹⁵ Ichaqa yaqapaschá pipas ninman: “Bibliapiqa pipas napaykuqqa mana allinkuna ruwaqmasinmanñan tukupushan nispamá riki nishan”, nispa (Leey 2 Juan 9-11). Chaypiqa rimashan Diosmanta t’aqakuq apóstata runakunamanta, jucha ruwayta ch’eqerichiq runakunamanta iman (Apo. 2:20). Chhaynaqa pipas jujkunata tanqashanman Diosmanta t’aqakunankupaq, mana allinkunata ruwanankupaqpas chayqa umalliqkunaqa manan chay runataqa visitanankuchu. Ichaqa, maytan munasunman chay runa cambiananta. Cambianankamaqa manan paytaqa napaykunanchischu ni juñunakuykunamanpas invitananchischu.

JEHOVA DIOS JINA KHUYAPAYAKUQ KASUN

16, 17. a) ¿Juchapakuqkuna imata ruwanankutan Jehová Dios munan? (Ezequiel 18:32). b) ¿Imaynatan umalliqkuna rikuchinkuman Jehová Diosta yanapaqkuna kasqankuta?

¹⁶ Kay pisqa yachachikuykunapi yachamusqanchis jina Jehová Diosqa manan munanchu pipas chinkachisqa kanantaqa (Leey Ezequiel 18:32). Aswanmi payqa munashan llapa juchapakuqkuna paywan allipunanankuta (2 Cor. 5:20). Chaymi payqa unaymantapacha allin ñanmanta t’aqakuq llaqtanpi runakunata juj runakunatapas kallpacharqan payman kutimpunankupaq. Kay tiempopiqa umalliqkunan chay ruwaypi Jehová Diosta yanapashanku. Chaymi paykunaqa kallpachakunanku chay jatun ruwayta allinta junt’anankupaq (Rom. 2:4; 1 Cor. 3:9).

¹⁷ Mayqen runapas juchanmanta arrepientekuspa kutimpun chayqa may jatun kusikuymi janaq pachapiqa kan. Janaq pacha papanchis Jehová Diosqa sapanka ovejanpaq kutimpusqanwanmi mayta kusikun. Chhaynaqa piensashallasun Diospa munakuq kayninpi, khuyapayakuq kayninpi, sumaq sonqo kayninpipas. Chaykunapi piensasun chayqa astawanmi payta munakusunchis (Luc. 1:78).