1, 2. a) ¿Iman jucha, imatan ruwasunman chay juchata vencenanchispaq? (Qhaway “Yachanapaq willakuy” nisqata). b) ¿Imatan yachasunchis kaypi jamuq yachachikuykunapipas? (Qhaway “Leeqkunapaq willakuy” nisqata).

 ¿YACHAYTA munawaqchu may tukuytas Jehová Dios munakusunki chayta? Yachayta munanki chayqa allinta t’aqwiriy imatas ruwarqan juchamantapas wañuymantapas libranasuykipaq chayta. Juchaqa juj jatun enemigon, a noqallanchismantaqa manan chay enemigotaqa venceyta atisunmanchu. Llapanchismi juchasapa runa kanchis, jucharaykutaqmi runaqa wañunchispas (Rom. 5:12). Ichaqa kashanmi juj allin willakuy: Manan sapanchischu kashanchis, Jehová Diosmi noqanchiswan kashan. Paypa yanapayninwanqa vencesunmi atipasunmi chay enemigotaqa.

² Jehová Diosqa soqta waranqa wata jinañan runakunata yanapashan jucha contra qaqata sayanankupaq. Ichaqa, ¿imaraykun pay chayta ruwan? Munakuwasqanchisraykun. Payqa munakunmi runakunata, chaymi qallariymantapacha yanapashan chay jucha contra qaqata sayanankupaq. Chaymantapas Diosqa yachanmi imaynas juchaqa wañuyman apawanchis chayta. Manataqmi payqa pipas wañunanta munanchu, aswanmi wiñaypaq kausananchista munan (Rom. 6:23). Qanpas wiñaypaq kausanaykitan munan. Chayta allinta yachananchispaqmi kaypi yachasunchis kinsa tapuykunamanta: 1) ¿Ima chayamunanmantan  Jehová Dios willarqan runakuna chayta suyakunankupaq? 2) ¿Imatan ruwarqanku ñaupa tiempo runakuna Jehová Dioswan amigontin kanankupaq, payman qayllaykunankupaq? 3) ¿Imatan Jesús ruwarqan runakunata juchamanta wañuymantawan librananpaq?

¿IMA CHAYAMUNANMANTAN JEHOVÁ DIOS WILLARQAN?

3. ¿Imaynapin ñaupa taytanchiskuna juchaman urmarqanku?

³ Jehová Diosqa ñaupa warmi-qharita kamashaspaqa kusisqa kausanankutan munarqan. Paykunamanqa juj munay kausaytan qorqan. Iskayninkutan casarachirqan jinaspa nirqan kay pachata runakunawan junt’achinankupaq. Llapa kay pachatan Edén huertata jina tukuchinanku karqan. Ichaqa juj kamachikuytan paykunaman qorqan. Chayllatan kasukunanku karqan, mana kasukuqtinkuqa wañunankun karqan. Yachasqanchis jinapas paykunaqa manan kasukurqankuchu. Juj millay espiritun paykunata tentarqan, jinaspa juchaman urmarqanku. May munakuq Taytankupi confianankumantaqa chay millay espiritupin confiarqanku. Chaymantaqa Diospa nisqanman jinan tukuy imapas pasarqan. Paykunaqa pisi-pisimantan machuman payaman tukupurqanku chaymantataq wañupurqanku (Gén. 1:​28, 29; 2:​8, 9, 16-18; 3:​1-6, 17-19, 24; 5:5).

4. ¿Imaraykun Jehová Dios cheqnikun juchata, imaraykun yanapawanchis chay contra qaqata sayananchispaqpas? (Romanos 8:​20, 21).

⁴ Llakiña chay willakuy chaypas, Jehová Diosqa imaraykus juchata cheqnikun chayta yachananchispaqmi chay pasasqanta qelqachirqan. Juchaq rijurisqanraykun noqanchisqa kamaqninchismanta karupi kashanchis, chay juchan wañuymanpas apawanchis (Isa. 59:2). Chaychá chay millay espirituqa otaq Satanasqa munakun juchata. Llapa runakuna juchallapi purinankutan payqa munan. Payqa “allintan ruwashani” nispapaschá nirqan Edén huertapi runata pantachishaspaqa. Manachá reparallarqanpaschu may jatun munakuqchus Jehová Dios chaytaqa. Jehová Diosqa manan cambiarqanchu imatachus Adán Evaq wawankunapaq munasharqan chaytaqa. Runakunata munakusqanraykun payqa juj munay willakuyta willachirqan (leey Romanos 8:​20, 21). Chaymantapas payqa yacharqanmi wakin runakuna payta munakunankuta, paypa yanapayninta maskhanankutapas. Paytaq kamaq karqan chayqa manan payman asuykuy munaqkunataqa jinatachu qhawarparinan karqan, yanapananmi karqan juchamanta librakunankupaq. Ichaqa, ¿imatan Jehová Dios ruwanman karqan?

5. ¿Jayk’aqmi Jehová Dios willarqan juj munay willakuyta, imaynatan chayta ruwarqan? (Génesis 3:15).

⁵ (Leey Génesis 3:15). Jehová Diosqa Satanaspaq sentenciata willashaspan willallarqantaq juj munay willakuyta. Paymi willarqan juj “miray” chayamunanmanta. Chay miraymi Satanasta ñut’unan karqan, tukuy mana allin ruwasqantataq allinman tukuchipunan karqan (1 Juan 3:8). Ichaqa manaraq chay pasashaqtinqa chay mirayqa ñak’arinanmi karqan, Satanasmi wañuchinan karqan. Jehová Diosqa maytachá sufrinan karqan chaywanqa. May nanayña kanan karqan chaypas allinpaqmi chaykunaqa pasanan karqan. ¿Imarayku? Askha runakunan juchamanta wañuymantawan librasqa kananku karqan.

¿IMATAN RUWARQANKU ÑAUPA RUNAKUNA DIOSWAN AMIGONTIN KANANKUPAQ?

6. ¿Imatan ruwarqanku Abelpas Noepas Jehová Diosman asuykunankupaq?

⁶ Tiempoq pasasqanman jinaqa sut’itan Jehová Diosqa rikuchirqan imaynas runakunaqa payman asuykuyta atisunman chayta. Payta serviq ñaupaq runaqa Abelmi karqan. Payqa Adán Evaq iskay kaq wawankun karqan. Abelqa tukuy sonqon Jehová Diosta munakurqan. Chaymi paypa sonqonta kusichiyta munaspa  sacrificiota jaywaq. Payqa oveja michiqmi karqan, ovejankunamantan allin kaqkunata ajllarqan Jehová Diosman sacrificiota jaywananpaq. ¿Imaynatan Jehová Dios chayta qhawarinman karqan? Payqa “Abeltapas jaywasqan ofrendatapas allinpaqmi qhawarirqan” (Gén. 4:4). Qhepamanqa wakin runakunapas jaywarqankun chhayna ofrendataqa. Jujninmi karqan Noé, paypa ofrendantapas sumaqtan Jehová Diosqa chaskirqan (Gén. 8:​20, 21). Chaykunata sumaqta chaskispan Jehová Diosqa rikuchisharqan imaynas runakunaqa atisunman paywan amigo kayta chayta. b

7. ¿Imatan yachasunman Abrahán wawanta sacrificiopi jaywayta munasqanmanta?

⁷ Abrahanpas tukuy sonqon Diospiqa iñirqan. Paytan Jehová Diosqa kamachirqan churin Isaacta sacrificiota jina jaywananpaq. Abrahanqa maytachá llakikurqan chayta uyarispaqa, ichaqa kasukurqanmi chay kamachikuyta. Ofrendata jaywananpaq wawanta ñak’ananña kashaqtinmi Jehová Diosqa payta sayachirqan. Ichaqa chayqa juj allin ejemplon karqan Diospi iñiqkunapaqqa. Abrahanpa ruwasqanta jinan Jehová Diospas munakusqan wawanta sacrificiopi jaywanan karqan. Runakunata munakusqanraykun payqa chayta ruwanan karqan (Gén. 22:​1-18).

8. ¿Ima chayamunantan rikuchirqan Israel runakunaq jaywasqanku sacrificiokuna? (Levítico 4:​27-29; 17:11).

⁸ Israel runakunatapas Jehová Diosqa kamachirqanmi juchankumanta imaymana sacrificiota jaywanankupaq (leey Levítico 4:​27-29; 17:11). Ichaqa chay sacrificiokuna jaywasqankuqa juj jatun sacrificio chayamunantan rikuchirqan. Chay jatun sacrificioqa llapa runakunatan juchamanta libranan karqan. Profetakunaq willasqanman jinaqa Diospa kachamusqan miraymi Diospa wawanmi chaytaqa ruwanan karqan. Payqa ñak’arispan wañunan karqan, ovejata jinan sacrificananku karqan (Isa. 53:​1-12). ¡May admirakunapaqmi chayqa ¿riki?! Jehová Dios kikinmi may munakusqan wawanta kachamunan karqan runakunarayku wañunanpaq, sapankanchis juchamanta wañuymantawan librasqa kananchispaq.

¿IMATAN JESÚS RUWARQAN RUNAKUNATA LIBRANANPAQ?

9. ¿Imanirqanmi bautizaq Juan Jesusmanta? (Hebreos 9:22; 10:​1-4, 12).

⁹ 29 watapin bautizaq Juanqa Nazaret llaqtayoq Jesusta rikuspa nirqan: “¡Qhawariychis, paymi Diospa corderonqa, paymi kay pachamanta juchata chinkachinqa!”, nispa (Juan 1:29). Chayta nisqanwanmi rikuchisharqan imaynas Jesusqa prometesqa miray karqan chayta. Paymi runakunarayku vidanta sacrificiopi jaywanan karqan. Jehová Diospa nisqanman jinapunin imapas ruwakusharqan, runakunaqa ñan librasqaña kashananku karqan juchamanta wañuymantapas (leey Hebreos 9:22; 10:​1-4, 12).

10. ¿Imaynatan Jesús rikuchirqan juchapi kashaq runakunata wajaq jamusqanta?

¹⁰ Jesusqa juchapi kashaq runakunatan maskhaq, paykunatan invitaq qatikunankupaq. Payqa allintan yacharqan imaynas jucha causa imaymana mana allinkunapi tarikushanchis chayta. Chaymi payqa juchapi puriqmanta reqsisqa warmikunata qharikunata maskhaq. Pay kikinmi nirqan: “Qhali runakunaqa manan doctorta necesitankuchu, onqosqakunan ichaqa necesitanku”, nispa. Chaymantataq nirqan: “Manan chanin runakunata wajaqchu jamuni, aswanpas juchasapakunata wajaqmi”, nispa (Mat. 9:​12, 13). Jesusqa chaypi nisqanman jinapunin ruwarqan. Juj kutinpas juchapi puriqmanta reqsisqa warmitan may munakuywan perdonapurqan (Luc. 7:​37-50). Unuman  jamuq Samaria warmitapas sumaqtan Jesusqa qhawarirqan yacharqanña millay kausay apasqanta chaypas (Juan 4:​7, 17-19, 25, 26). Diosqa wañusqakunata kausarichinanpaq iman Jesusmanqa atiyta qorqan. Chay atiywanmi jucharayku kaq wañuyta jujpaqkama chinkachinqa (Mat. 11:5).

11. ¿Imaraykun juchapi puriq runakuna Jesuswan thaj kaqku?

¹¹ Imayna juchapiña kashaq runakunapas Jesusmanqa mana manchakuspan qayllaykuqku. Payqa sumaqtan munakuywanmi chay runakunata chaskiq. Jesuspa ladonpiqa thajmi chay runakunapas kaqku (Luc. 15:​1, 2). Chaymantapas Jesusqa kallpachaq alabaq iman chay runakunataqa paypi iñisqankumanta (Luc. 19:​1-10). Jesusqa janaq pacha Taytan jinapunin karqan, tukuy sonqon chay runakunata khuyapayaq (Juan 14:9). Arí, tukuy ima ruwasqanpi rimasqanpi iman rikuchirqan imaynas payqa Dios jina khuyapayakuq sumaq sonqo chayta. Chaymantapas Jesusqa tukuy atisqantan kallpachakuq juchasapa runakunata yanapananpaq. Allin ñanman allin kausayman jaykunankupaqmi yanapaq (Luc. 5:​27, 28).

12. ¿Imatan Jesús willakurqan imayna wañunanmanta?

¹² Jesusqa yacharqanñan imakunapichus tarikunan karqan chayta. Qatikuqnin runakunamanpas willaqmi imaynas traicionasqa kaspa k’aspipi warkusqa kanan karqan chayta (Mat. 17:22; 20:​18, 19). Yacharqanmi imaynas sacrificio ruwasqanwan kay pachamanta jucha pichasqa kanan karqan chaytapas. Bautizaq Juanpa willasqanman ñaupa profetakunaq willasqanman jinan kanan karqan. Chaymantapas Jesusqa nirqanmi: “Noqan ichaqa warkusqa  kaspay imaymana clase runakunata noqaman jamuchisaq”, nispa (Juan 12:32). Chaymantapas Jesuspi iñiqtaqa, paypa ejemplonta qatikuqtaqa sumaqtan Jehová Diosqa chaskinan karqan, juchamanta iman payqa librasqa kanan karqan (Rom. 6:​14, 18, 22; Juan 8:32). Jesusqa yacharqanña imayna wañunanta chaypas mana manchakuspan wañurqan chhaynapi chaykuna junt’akunanpaq (Juan 10:​17, 18).

13. ¿Imaynatan Jesús wañurqan, iman chay wañusqanmanta karqan? (Qhaway kay parrafopaq dibujokunata).

¹³ Jesustaqa paypa willakusqanman jinan traicionarqanku, jinaspa apapurqanku. Chaypin payqa k’amisqa yanqamanta tumpasqa ima karqan. Chaymantataq sentenciarqanku, imaymanapin sufrichirqankupas. Chaymantaqa soldadokunaqa maymanchus apanankuman apaspan juj k’aspipi clavarqanku. Jesús chaykunapi ñak’arishaqtinqa maytachá janaq pacha Taytanpas ñak’arirqan. Payqa tukuy atiyniyoqña chaypas aguantakurqanmi nanayninta. ¿Imarayku? Runakunata munakusqanrayku. Jesuspa willasqan jina, “Diosqa anchatapunin runakunata munakurqan, chaymi sapallan Churinta kachamurqan, pipas paypi iñisqanta rikuchiqqa ama wañunanpaq aswanpas wiñay kausayniyoq kananpaq” (Juan 3:16).

14. ¿Imatan yachasunman Jesuspa sacrificio ruwasqanmanta?

¹⁴ Jesuspa sacrificio ruwasqanmi rikuchin maytapunis Jehová Dios Adán Evaq wawankunata munakun chayta. Chaymi rikuchillantaq maytapunis Jehová Diosqa qantapas munakusunki chayta. Admirakunapaqmi juchamanta wañuymantawan librawananchispaq Diospa tukuy ima ruwasqanta yachayqa ¿riki? Noqanchisraykun sonqo nanaynintapas aguantakurqan (1 Juan 4:​9, 10). Payqa yanapaytan munawanchis jucha contra qaqata sayananchispaq, atipananchistataqmi munanpas.

15. ¿Imatan ruwananchis Diospa qosqan regalota chaskinanchispaq?

¹⁵ Diospa sapallan wawanpa sacrificio ruwasqanqa Diospa jatun regalonmi. Gracias chay ruwasqanraykun llapanchispas atisunman juchanchismanta perdonasqa kayta. Ichaqa Diospa perdonasqan kananchispaqqa juj ruwaytan ruwanallanchistaq. ¿Imataq chayri? Chaymanta rimashaspan bautizaq Juanpas Jesuspas nirqan: “Janaq pacha gobiernon qayllaykamunña, chayrayku juchaykichismanta pesapakuspa Diosman kutirikuychis”, nispa (Mat. 3:​1, 2; 4:17). Chhaynaqa, perdonasqa kanapaqqa janaq pacha Taytanchismanpas asuykunapaqqa, juchanchismantan pesapakunanchis otaq arrepientekunanchis. Ichaqa, ¿imaynatan rikuchisunman arrepientesqa kasqanchista? ¿Imaynatan chay yanapawasunman jucha contra qaqata sayananchispaq? Qatimuqpin chaykunata yachasunchis.