1. ¿Imatan Dios munan runakunapaq?

 LLAPAPAS libren kanchis imatas ruwasun chayta ajllakunanchispaq. Chhaynatan Jehová Diosqa kamawasqanchis. Ichaqa pipas Jehová Diosta servinanpaq paypa munayninta ruwananpaq ajllakun chayqa, jatun ruwaytan chay runaqa ruwashan, Diospa familianmanmi jaykushan. Jehová Diosqa maytan munanman llapa runakunapas chayta ruwananta. ¿Imarayku? Payqa llapa runakunatan munakun, allin kausanankutataqmi munanpas. Chaymantapas paywan allinpi kananchistan munan, wiñaypaq kausananchistataqmi munanpas (Deut. 30:​19, 20; Gál. 6:​7, 8).

2. ¿Imaynatan Jehová Dios qhawarin juchankumanta arrepientekuq runakunata? (1 Juan 2:1).

² Ichaqa Jehová Diosqa manan pitapas obliganmanchu payta servinanpaqqa. Aswanmi jinallata saqen sapanka runa ima decisiontapas ruwananpaq. Ichaqa, ¿iman pasanman mayqen bautizasqa iñiqpas Diosta mana kasukuspa jatun juchata ruwaqtin? Manachus juchanmanta arrepientekun chayqa Diospa llaqtanmantan t’aqasqa kanan (1 Cor. 5:13). Chaywanpas Jehová Diosqa chay runa payman kutimunantan munan. Chayraykun wawantapas kachamurqan. Arí, juchankumanta arrepientekuqkuna perdonasqa kanankupaqmi kachamurqan (leey 1 Juan 2:1). Jehová Diosqa may munakuq Diosmi. Chaymi runakunataqa kallpachashallan juchankuta saqespa payman kutimpunankupaq (Zac. 1:3; Rom. 2:4; Sant. 4:8).

3. ¿Imakunamantan kaypi yachasunchis?

³ Jehová Diosqa juchatapas juchallikuqtapas pay jina qhawarinanchistan munan. Kaypin yachasunchis imaynatas chayta ruwasunman chayta. Chaypaq kay kinsa tapuymanta  yachasun. 1) ¿Imaynatan Corinto llaqtapi iñiqkuna qhawarirqanku juj runa juchapi purisqanta? 2) ¿Imatan ruwana pipas juchanmanta arrepientekuqtin? 3) Bibliaq willasqanman jina, ¿imaynatan Jehová Dios qhawarin jatun juchaman urmaqkunata?

JATUN JUCHA KAQTIN IMACHUS RUWAKUSQAN

4. ¿Iman pasasharqan Corinto llaqtapi kaq iñiqkuna ukhupi? (1 Corintios 5:​1, 2).

⁴ (Leey 1 Corintios 5:​1, 2). Apóstol Pablon kinsa kaq viajasqanpi uyarisqa imaynas Corinto llaqtapi iñiqkuna ukhupi mana allin ruway aparikusharqan chayta. Chay llaqtapi kaq iñiq t’aqapis juj hermano papanpa warminwan kashasqa. Chayqa sinchi mana allinmi kasharqan, “chhayna qhelli ruwayqa manan ni mana iñiqkuna ukhupipas rikukusharqanchu”. Iñiqkunapas manas paytaqa imanisqakupaschu, aswanpas allinpaqsi qhawarichiqku. Paykunaqa “Diosqa khuyapayakuqmi juchasapa runakunawanqa” nispapaschá chaytaqa ruwasharqanku. Diosmi ichaqa mana allinpaqchu qhawarisharqan chayta. Chay runaqa chhayna qhelli kausayta apaspaqa Diospa llaqtantan p’enqayman churasharqan, jujkunapaqpas mana allin ejemplon kasharqan. ¿Imaninmanmi karqan apóstol Pablo chay llaqtapi iñiqkunata?

5. ¿Imanirqanmi Pablo Corinto llaqtapi iñiqkunata, imaninantan chaywan nisharqan? (1 Corintios 5:13; qhaway kay parrafopaq dibujota).

⁵ (Leey 1 Corintios 5:13). Diospa yuyaychasqan kaspan apóstol Pabloqa chay llaqtapi iñiqkunata nirqan imaynas chay juchapakuq runata t’aqapunanku karqan chayta. Chaymantapacharí, ¿imaynatan qhawarinanku karqan? Pabloq nisqan jina t’aqakunankun karqan chay runamantaqa, manan paywanqa ni mijunankupaschu karqan (1 Cor. 5:​1, 2). Piwanpas kuska mijuspaqa faciltan paywan yachanarukusunman. Chaychá Pabloqa sut’inta nirqan imaynas chay runawanqa mana ni mijunankupaschu karqan chayta. Chhaynapin iñiqkunaqa waqaychasqa kasharqanku mana allin ruwaymanta (1 Cor. 5:​5-7). Chaymantapas chayta ruwaspan juchapakuqtaqa yanapakunan karqan imaynas Diosmanta nishuta karunchakurqan chayta reparakunanpaq; juchanmanta p’enqarikunanpaq, chhaynapi arrepientekunanpaq ima.

6. ¿Imaynatan apóstol Pabloq apachisqan carta yanaparqan Corinto llaqtapi iñiqkunata, juchapakuq runatapas?

⁶ Chay Corinto llaqtapi iñiqkunaman cartata apachisqan qhepamanqa, Pabloqa yachaytan munasharqan imatachus iñiqkuna ruwarqanku chayta. Ichaqa chayllamanmi Titoqa  Pabloq kasqanman chayamurqan imaymana willakuykuna apariykusqa. Chay iñiqkunaqa allintan Pabloq cartanta chaskikusqaku (2 Cor. 7:​6, 7). Pabloq nisqanman jinan chay juchapakuq runawanpas ruwasqaku. Chay cartata chaskisqanku killakuna qhepamanqa chay juchapakuq runapas arrepientekapusqañan. Saqepusqan mana allin ruwasqanta, Diospa munayninman jinañan kausayta qallaripusqa (2 Cor. 7:​8-11). Chhaynataq kasharqan chayqa, ¿imata ruwanankupaqmi Pablo paykunata yuyaychanman karqan?

¿IMATAN RUWANA PIPAS JUCHANMANTA ARREPIENTEKUQTIN?

7. ¿Imaynatan juchapakuq runata yanaparqan Diospa llaqtanmanta t’aqasqa kasqan? (2 Corintios 2:​5-8).

⁷ (Leey 2 Corintios 2:​5-8). Pabloq nisqan jina, chay runataqa yaqa llapankuñan anyasqaku. Chaymi nirqan: “Chayllaña kachun”, nispa. ¿Imaninantan chaywan nisharqan?  Chay runata anyasqankuqa allinninpaqmi kasharqan. ¿Imarayku? Chaywanmi payqa arrepientesqa kasharqan (Heb. 12:11).

8. ¿Imatan iñiqkuna ruwananku karqan juchapakuq runa Diospa llaqtanman kutimpuqtin?

⁸ Chhaynataq kasharqan chayqa, Pabloq nisqan jina chaypi iñiqkunaqa “tukuy sonqowanmi payta perdonapunanku karqan kallpachananku iman” karqan. Chaymantapas wajmantan payta munakapunanku karqan. Chaypaqqa manan Diospaq llaqtallanmanchu jaykuchinanku karqan. Imachus rimasqankuwan ruwasqankuwan iman rikuchinanku karqan payta perdonasqankuta munakusqankuta ima. Arí, llapa ima ruwasqankupin rikuchinanku karqan Diospa llaqtanman kutimusqanmanta kusisqa kasqankuta.

9. ¿Imaraykun wakinpaq mana facilchu kanman karqan chay juchapakuq runata perdonay?

⁹ ¿Llapallankuchu sumaqta chaskinkuman karqan chay iñiqta? Manapaschá, Bibliaqa manan willanchu chaytaqa. Yachasqanchis jina chay iñiqqa Diospa llaqtantan mana allinta qhawarichirqan, wakintaqa p’enqayman imapaschá churarqan. Chhaynataq karqan chayqa wakinqa manapaschá allinpaqchu qhawarirqanku hermanokuna payta sumaqta chaskisqankutaqa. “Noqaykutaq Diospa llaqtan limpio kananpaq kallpachakushayku, khayna qhellita ruwaqtataq munayta chaskishanku” nirankupaschá (tupanachiy Lucas 15:​28-30 textowan). Mayqenninkupas chhaynata piensasharqanku chayqa, ¿imaraykun llapanku kallpachakunanku karqan chay runata sonqomanta sumaqta chaskinankupaq?

10, 11. ¿Imakunan pasanman karqan umalliqkuna chay arrepientekuq runata mana chaskiqtinku?

¹⁰ ¿Umalliqkuna chay runata jark’ankuman karqan chay runa Diospa llaqtanman kutimpunanta chayri? Kutimpunmanña karqan chaypas, ¿llapa hermanokuna payta mana sumaqtachu chaskinkuman karqan chayri? Chhayna kaqtinqa yaqapaschá “llakiq ñit’isqan tarikuspa pisipapunman” karqan. “Yanqapaqñan imatapas ruwayman” nispapaschá ninman karqan. Manapaschá Dioswan allinpi kananpaqpas kallpachakunmanchu karqan.

¹¹ Wakin iñiqkunapas juchanmanta arrepientekuq runata mana perdonaspaqa, paykunapas Diosmantan t’aqakushankuman karqan. ¿Imaraykun chayta ninchis? Paykunaqa manan Dios jina khuyapayakuqchu, ni perdonakuqchu kashankuman karqan. Aswanpas millay sonqo Satanás jinan kashankuman karqan. Arí, mana perdonaspaqa Satanaspa herramientan jinan kashankuman karqan. Satanasmi paykunawan chay runaq iñiyninta chinkachishanman karqan (2 Cor. 2:​10, 11; Efes. 4:27).

12. ¿Imaynatan iñiqkuna rikuchinanku karqan Jehová Dios jina kasqankuta?

¹² ¿Imaynatan Corinto llaqtapi iñiqkuna rikuchinkuman karqan Jehová Dios jina kasqankuta Satanastataq cheqnikusqankuta? Juchapakuq runakunata Jehová Dios jina qhawarispan. Ichaqa, ¿imaynatan Jehová Dios qhawarin juchapakuq runakunata? Chaymanta rimaspan David nirqan: “Qanqa Diosníy Jehová, sumaq sonqo Diosmi kanki, liston kashanki juchata perdonanaykipaqpas”, nispa (Sal. 86:5). Profeta Miqueaspas nirqanmi: “Diosníy, ¿pin qan jina kanman? Qanqa jucha perdonaqmi, llaqtaykimanta puchuqta pampachaqmi kanki”, nispa (Miq. 7:18). Profeta Isaiaspas khaynatan nirqan: “Mana allin ruwaq runaqa saqepuchun chay ñanninta, millay runapas wijch’upuchun mana allin piensayninta, jinaspa Jehová Diosman kutipuchun, payqa khuyapayanqan payta, Diosninchisman jampuchun, payqa llapantan perdonanqa juchankunata”, nispa (Isa. 55:7).

13. ¿Imaraykun chay arrepientekuq runata jujmanta Diospa llaqtanpi chaskina karqan? (Qhaway “ ¿Jayk’aqmi Corinto llaqtapi runa kutimpurqan Diospa llaqtanman?” nisqa willakuyta).

 ¹³ Chaymantapas Jehová Dios jina kasqankuta rikuchinankupaqqa, sumaqtan chaskinanku karqan chay juchanmanta arrepientekuq runata, munakuywanmi chaskinanku karqan. Chayta ruwaspan rikuchinanku karqan “tukuy imapi kasukuq” kasqankuta. Manaraq unaychu kasharqan chay runaq t’aqasqa kasqan chaypas t’aqasqa kaspan payqa arrepientekurqan (2 Cor. 2:9). Chhaynataq karqan chayqa, manan nishutaraqchu suyana karqan Diospa llaqtanman kutimpunanpaqqa.

JEHOVÁ DIOS JINA KHUYAPAYAKUQMI KANA

14, 15. ¿Imatan yachasunman Corinto llaqtapi juchapakuq hermanowan imachus ruwakusqanmanta? (2 Pedro 3:9; qhaway kay parrafopaq fotota).

¹⁴ Corinto llaqtapi juchallikuq hermanowan imatachus ruwakusqantaqa qelqakurqan yachachisqa kananchispaqmi (Rom. 15:4). ¿Imatan chay willakuymanta yachasunman? Jehová Diosqa manan jinallatachu qhawan llaqtanpi ima millay juchapas kanantaqa. Payqa manan munanchu pipas juchapi purishaspa allin iñiqkunawan kuska kanantaqa. Chaymantapas Jehová Diosqa khuyapayakuq Diosña chaypas, manan jinatachu qhawan kamachikuyninkunata mana kasukuq runataqa  (Jud. 4). Jinallata qhawanman chayqa, manachá khuyapayashanmanchu allin sonqo iñiqkunata (Prov. 13:20; 1 Cor. 15:33).

¹⁵ ¿Imatawanmi chay willakuymanta yachasunman? Jehová Diosqa manan munanchu pipas chinkachisqa kanantaqa. Payqa llapa runakuna salvasqa kanankutan munan, chaymi listo kashan pipas arrepientekuqtaqa khuyapayananpaq (Ezeq. 33:11; leey 2 Pedro 3:9). Chaytan rikunchis Corinto llaqtapi arrepientekuq hermanowan imachus pasasqanpi. Jehová Diospa yuyaychasqan kaspan apóstol Pablo iñiqkunata kallpacharqan chay hermanota perdonapunankupaq, sumaqta chaskipunankupaqwan.

16. ¿Imaniwaqmi imaynatachus Corinto llaqtapi juchapakuq hermanota qhawarikurqan chaymanta?

¹⁶ Corinto llaqtapi juchapakuq hermanota imachus pasasqanmi rikuchiwallanchistaq imaynas Jehová Diosqa ch’uya, munakuq, chanin chayta (Sal. 33:5). ¡¿Manachu chayta yachay kallpachawanchis Diosninchis Jehová Diosta jatunchananchispaq?! Chaymantapas llapanchismi juchasapa runakuna kanchis, llapanchistaqmi necesitanchis paypa perdonasqan kayta. Chhaynaqa, maytan gracias ninchis juchanchis perdonasqa kananpaq Jehová Dios wawanta kachamusqanmantaqa ¿riki? Chaymantapas may kusikunapaqmi Jehová Dios llaqtanta kamachin runakunatapas mayta munakusqanta yachayqa.

17. ¿Imakunamantan yachasunchis jamuq yachachikuypi?

¹⁷ ¿Imaynatan qhawarikun kay tiempopi jatun juchaman urmaqkunata? ¿Imaynatan umalliqkuna chay runaman rikuchinkuman Jehová Dios munakusqanta, arrepientekunanpaq yanapay munasqankutapas? ¿Imatan iñiqkuna ruwananku pipas Diospa llaqtanmanta t’aqasqa kaqtin, jinallataq pipas Diospa llaqtanman kutimpuqtin? Chay tapuykunamantan yachakunqa jamuq yachachikuypi.