1. Pipas jatun juchaman urman chayqa, ¿ima ruwaytan atikunman?

 33 YACHACHIKUYPI yachamusqanchis jina apóstol Pablon Corinto llaqtapi iñiqkunata yuyaycharqan juchapi puriq hermanowan imatachus ruwananku karqan chayta. Chay runaqa manataq arrepientekurqanchu chayqa, iñiqkuna ukhumantan t’aqasqa kanan karqan. Ichaqa Romanos 2:4 textopi nisqan jina, atikunmanmi pitapas juchanmanta arrepientekunanpaq yanapaytaqa. ¿Imaynatan umalliqkuna chaypi yanapakunkuman?

2, 3. Juj hermano jatun juchaman urmasqanta yacharusunman chayri, ¿imatan ruwananchis, imarayku?

² Juj hermanos jatun juchaman urmanman, chaytas noqanchisqa yacharusunman. Iñiqkuna ukhumanta t’aqasqa kananpaq jinas chay juchaqa kanman. ¿Imatan ruwasunman chhaynapi tarikuspa? Umalliqkuna chay hermanota yanapanankupaqqa kallpachananchismi payta juchanta umalliqkunaman willakunanpaq. Manachus umalliqkuna yachanqaku chayqa, ¿imaynatan paykunata yanapayta atinkuman? (Isa. 1:18; Hech. 20:28; 1 Ped. 5:2).

³ Ichaqa, ¿imatan ruwasunman chay hermano umalliqkunawan mana rimayta munaqtin? Yanapasqa kanantataq munashanchis chayqa, noqanchismi chayta willananchis. Chayta ruwaspan payta munakusqanchista rikuchishanchis. Manan munasunmanchu mayqen hermanopas Diospa llaqtanmanta t’aqakunantaqa. Chaymantapas juchallapi kanman chayqa, Jehová Diosmantan karunchakunman, Diospa llaqtantapas manan allintachu qhawarichinman. Chhaynaqa, juchapi urmaq hermanota Jehová Diostapas munakunchis chayqa, willasun umalliqkunaman paypa juchanta (Sal. 27:14).

 ¿IMAYNATAN UMALLIQKUNA YANAPANKU JATUN JUCHAMAN URMAQ HERMANOTA?

4. ¿Imapaqmi umalliqkuna juñukunku jatun juchaman urmaq iñiqwan?

⁴ Mayqen iñiqpas jatun juchaman urman chayqa, umalliqkunan paykuna ukhumanta wakin umalliqkunata ajllanqaku chay hermanota yanapanankupaq. a Ichaqa allin yuyaywanmi humilde sonqowanmi chaytaqa ruwananku. Yanapaytaña munanqaku arrepientekunanpaq chaypas wakinqa manapaschá cambiayta munanqakuchu (Deut. 30:19). Wakinqa manan rey David jinachu munayta uyarikunku (2 Sam. 12:13). Aswanpas Diospa yuyaychasqantaña qhawachishanchis chaypas k’ullun churakunku (Gén. 4:​6-8). Chaywanpas umalliqkunaqa tukuy atisqankutan kallpachakunanku chay hermanota arrepientekuyman apanankupaq. ¿Imakunapin piensananku chay yanapaq umalliqkuna chay juchapakuq iñiqmasiwan juñukuspanku?

5. ¿Imapin umalliqkuna piensananku juchapakuq runawan rimaspanku? (2 Timoteo 2:​24-26; qhaway kay parrafopaq dibujota).

⁵ Umalliqkunaqa Jehová Diospa chinkasqa ovejanta jinan rikunanku juchaman urmaq iñiqkunataqa (Luc. 15:​4, 6). Chaytaqa rikuchinqaku chay juchapakuqwan imaynatachus rimasqankupin. Paywan rimaspaqa manan chiri sonqochu kananku, nitaqmi k’araqtachu rimananku. Aswanmi llamp’u sonqo sumaq sonqo kananku (leey 2 Timoteo 2:​24-26). Tukuy tiempon paykunaqa sumaqta munayta rimapayananku, sonqonman chayanankupaq jinan rimananku.

6. ¿Imaynatan umalliqkuna sonqonkuta preparankuman manaraq juchapakuq runawan juñukushaspanku? (Romanos 2:4).

⁶ Umalliqkunaqa allintan sonqonkuta preparananku. Chaypaqqa apóstol Pabloq nisqanpin piensananku. Paymi willarqan imaynas “Diosqa sumaq sonqo kayninpi juchankumanta pesapakunankupaq” yanapayta munashan chayta (leey Romanos 2:4). Jehová Dios jinan paykunapas sumaq sonqo kananku. Chaymantapas allintan yuyarinanku imaynas paykunaqa michiqkuna kanku chayta, Jesuspa ejemplontataqmi qatikunankupas (Isa. 11:​3, 4; Mat. 18:​18-20). Chhaynataq chayqa juchallikuq hermanowan manaraq juñukushaspan paykunaqa Diospa yanapayninta mañakunanku. Bibliapi qelqanchiskunapi iman yuyaychaykunata maskhananku. Chaymantapas Diosmantaqa mañakunankun imaraykuchus chay hermano juchapakurqan chayta allinta reparanankupaq. Chaymantapas chay juchapakuq iñiqmantan parlarinqaku. Imakunas juchaman apanman karqan, imakunas pasanman karqan, imatas  piensanman karqan chaykunamantan parlarinqaku (Prov. 20:5).

7, 8. ¿Imaynatan umalliqkuna rikuchinkuman Jehová Dios jina pacienciakuq kasqankuta juchapi puriqwan juñukuspanku?

⁷ Umalliqkunaqa Jehová Dios jina pacienciakuqmi kananku. Allintan yuyarinanku imaynatas Jehová Dios juchapakuqkunata qhawarirqan chayta. Chaypaq yuyarisun wakin juchapakuq runakunawan imatachus ruwarqan chayta. Cainta yanapashaspaqa sumaqllatan paytaqa rimapayarqan. Willarqanmi imaynas cambiaqtinqa payta chaskinman karqan chayta, willarqanmi mana cambiaqtin imachus pasanan karqan chaytapas (Gén. 4:​6, 7). Rey Davidtapas munayllatan yanaparqan. Payta yanapananpaqmi profeta Natanta kacharqan. Chay profetaqa juj rijch’anachiyta willaspan Davidpa sonqonta kuyurichirqan (2 Sam. 12:​1-7). Israel runakunamanpas “sapa kutillanmi” Jehová Diosqa profetakunata kacharqan juchankuta saqespa payman kutimunankupaq (Jer. 7:​24, 25). Chaymantapas Jehová Diosqa chay runakunata yanapananpaqqa manan juchankuta saqespa payman kutimunankutaraqchu suyarqan. Aswanmi juchapi purishaqtinku pay yanaparqan arrepientekunankupaq.

⁸ ¿Imaynatan umalliqkuna Jehová Diosta qatikunkuman jatun juchapi urmaqwan rimaspanku? 2 Timoteo 4:2 nisqan jina, pacienciawanmi paykunataqa yanapananku. Kallpachakunankun llamp’u simillawan munayllata rimapayanankupaq. Umalliqkunachus reneganqaku colerasqa rimanqaku chayqa, yaqapaschá juchapakuqqa mana uyarikuyta munanqachu, manapaschá arrepientekuytapas munanqachu.

9, 10. ¿Imatan umalliqkuna ruwankuman juchallikuq hermanota piensachinankupaq?

⁹ Umalliqkunaqa imakunachus chay hermanota juchaman aparqan chaytan allinta qhawarinanku. Chaypaqqa yaqapaschá kay tapuykunapi piensankuman: ¿Pisi-pisimantachu iñiynin pisiyarqan? ¿Manachu estudiasharqan Bibliata, manachu predicaqpas lloqsisharqan, pisitachu Diosmantapas mañakusharqan? ¿Jinatachu qhawarqan sonqonpi mana allinkuna wiñananta? ¿Mana allin compañerokunachu mana allin kusirikuykunachu sonqonta q’ewinman karqan? ¿Allintachu reparan imaynas Papan Jehová Dios chay ruwasqanwan tarikushan chayta?

¹⁰ Juchallikuq hermano imaraykuchus juchaman urmarqan chayta reparakunanpaqqa, yaqapaschá umalliqkunaqa imaymanata tapurinanku kanqa. Ichaqa munakuywanmi chaytaqa ruwanqaku, manataqmi mana rimanakunataqa tapunankuchu (Prov. 20:5). Chaymantapas yaqapaschá Natán jina rijch’anachiykunawan ejemplokunawan ima chay hermanota yanapankuman. Chhaynata ruwanqaku chayqa, yaqapaschá ñaupaq juñukuyllapiraq payqa sonqonta nanachikunqa, arrepientekunqa imapaschá.

11. ¿Imaynatan Jesús qhawarirqan juchapakuq runakunata?

¹¹ Umalliqkunaqa Jesuspa ejemplontan qatikunanku. Juj kutinmi Jesusqa Saulota nirqan: “Saulo, Saulo, ¿imanaqtinmi qatikachashawanki?”, nispa. Chhaynata tapuspan payqa Saulota reparachisharqan imaynas chay ruwasqanqa mana allinchu kasharqan chayta (Hech. 9:​3-6). Jezabel sutiyoq warmimanta rimaspapas nirqanmi: “Tiempotapas qonin chay juchanmanta pesapakuspa Diosman kutirikunanpaq”, nispa (Apocalipsis 2:​20, 21).

12, 13. ¿Imaynatan umalliqkuna rikuchinkuman juchallikuq runaman tiempo qosqankuta? (Qhaway kay parrafokunapaq fotokunata).

¹² Jesús jinan umalliqkunapas kananku. Manan apuraychu ninanku: “Manan arrepientekunchu”, nispaqa. Wakinqa jujllapin arrepientekunku, wakinmi ichaqa tiempotaraq necesitanku. Chhayna kaqtinqa umalliqkunaqa  juj kutikunatawanmi paykunawan juñukunanku. Yaqapaschá paykunaqa ñaupaq kuti juñukusqankupi imakunachus nikusqanpi piensanqaku, jinaspa Jehová Diosmanta perdonta mañakunqaku (Sal. 32:5; 38:18). Juj kutipi juñukunankupaqqa yaqapaschá jujnirayña piensaynin kanqa.

¹³ Chay juchallikuq arrepientekunanpaqqa umalliqkunaqa paypin piensananku, munakuywanpunin qhawarinanku. Diosmantapas mañakunankun yanapanankupaq kallpachakusqankuta bendecinanpaq, chay juchapakuqpas yuyayman kutinanpaq, juchanmanta arrepientekunanpaq (2 Tim. 2:​25, 26).

14. ¿Pin jatunchasqa kanan juj runa juchanmanta arrepientekuqtin, imarayku?

¹⁴ Chay juchallikuq arrepientekunqa chayqa, may kusikunapaqmi chayqa (Luc. 15:​7, 10). Ichaqa, ¿pin jatunchasqa kanan chay runa arrepientekusqanmanta, umalliqkunachu? Manan. Apóstol Pablon chaymanta rimaspa nirqan: “Yaqapas Diosqa chay mana kasukuqkunata yanapanman juchankumanta pesapakunankupaq”, nispa (2 Tim. 2:25). Chhaynaqa, Jehová Diosmi jatunchasqa kanan chay runa arrepientekusqanmantaqa. Paymi yanaparqan chay runa piensayninta cambiananpaqqa. Pabloqa willallarqantaqmi imas pasan chay arrepientekuq runawan chayta. Chay qhepamanqa payqa allintan entienden imas cheqaq yachachikuy chayta; yuyaymanmi kutin chhaynapitaq Satanaspa trampanmanta ayqekun (2 Tim. 2:26).

15. ¿Imatan umalliqkuna ruwananku juchallikuqta yanapashanallankupaq?

¹⁵ Juchallikuq runa arrepientekunqa chayqa, umalliqkunaqa visitashallanqakun paytaqa iñiyninpi yanapanankupaq. Yanapanqakun Satanaspa tentasqan contra qaqata sayanankupaqpas, ch’uya sonqollawanpuni Diosta servinankupaqpas (Heb. 12:​12, 13). Chaymantapas umalliqkunaqa manan jujkunamanqa willanqakuchu imakunatas chay hermano ruwarqan chaytaqa. Chaywanpas yaqapaschá wakintaqa iñiq t’aqaman willana kanqa. ¿Imakunan chay kanman?

 “LLIUPA ÑAUPANPIN ANYANKI”

16. ¿Pikunamantan Pablo rimasharqan 1 Timoteo 5:20 textopi “lliupa ñaupanpi” nisqanwan?

¹⁶ (Leey 1 Timoteo 5:20). Apóstol Pablo umalliq Timoteota nisqan jina, juchapakuq runataqa “lliupa ñaupanpin anyana” karqan. ¿Imaninantaq chayri? Manan llapa iñiq t’aqaq ñaupanpiraqchu anyana. Aswanpas chay juchamanta yachaq hermanokunaq ñaupanpin. Yaqapaschá paykunaqa chay juchata rikurqanku, otaq chay hermano paykunaman willakurqan. Ichaqa, ¿imaynatan umalliqkuna chayta ruwankuman? Mana reparachikuq jinallan paykunaqa chay hermanokunaman willanqaku imaynas chay juchallikuq hermanoqa ña yanapayta chaskinña, imaynas anyasqaña kashan chayta.

17. ¿Imatan ruwana yaqa llapa iñiq t’aqa hermanoq juchapakusqanta yachaqtin, imarayku?

¹⁷ Yaqa llapa iñiq t’aqaña chay hermanoq juchapakusqanta yachan ¿chayri? Otaq yaqapas yacharunqaku ¿chayri? ¿Imatan ruwana? Chhayna kaqtinqa llapa iñiq t’aqamanmi willana anyasqa kasqanta. Juj umalliqmi chaytaqa willanqa. Ichaqa, ¿imaraykutaq chaytari ruwana? Apóstol Pabloq nisqan jina, paykunapas manchakunankupaqmi. Chhaynapi ama ima jatun juchamanpas jaykunankupaq.

18. ¿Imatan umalliqkuna ruwananku mayqen bautizasqa wawapas jatun juchaman urmaqtin? (Qhaway kay parrafopaq fotota).

¹⁸ Wakinqa manaraq 18 watanpi kashaspan bautizakunku. ¿Imatan ruwana paykunamanta mayqenpas jatun juchaman urmaqtin? Chhayna kaqtinqa umalliqkunan iskay umalliqta ajllananku paywan juñukunankupaq. Paykunaqa papanwan mamitanwan otaq piqpa makinpichá kashan paywan iman juñukunqaku. Chaypin papanta mamitantawan tapunqaku imatas ruwashanku chay wawanku Dioswan allipunananpaq chayta. Chay wawanku tayta-mamanpa  yanapasqanta allinta chaskikushan chayqa, manapaschá mastaqa imatapas ruwakunqañachu. Chaymantapas tayta-mamakunan encargasqa kashanku wawankuta wanachinankupaqqa (Deut. 6:​6, 7; Prov. 6:20; 22:6; Efes. 6:​2-4). Ichaqa chay umalliqkunaqa rimallanqakun juchallikuqpa tayta-mamanwanqa. Tapurinqakun allintachus yanapayta chaskikushan icha manachus chayta. Ichaqa juj bautizasqa wawa mana arrepientekunqachu mana cambiaytapas munanqachu ¿chayri? ¿Imatan ruwana? Chhayna kaqtinqa umalliqkunatan ajllakunqa payta yanapanankupaq. Paykunan papanwan mamitanwan otaq piqpa makinpichá kashan paywan ima juñukunqaku.

“JEHOVÁ DIOSQA ANCHA MUNAKUQMI”

19. ¿Imaynatan umalliqkuna rikuchinkuman Jehová Diosta qatikusqankuta juchapakuq iñiqta yanapashaspa?

¹⁹ Jujkunata yanapanankupaq ajllasqa umalliqkunaqa kallpachakunankun Diospa llaqtanta ch’uyata jap’inankupaq, chaytapunin Jehová Diosqa munan (1 Cor. 5:7). Chaywanpas kallpachakunankun juchapakuq runata yanapanankupaq; arrepientekunanpaqmi yanapananku. Chaypaqqa munakuywanmi paykunata yanapananku, chhaynapin Jehová Diosta qatikusqankuta rikuchinqaku. Payqa “ancha munakuqmi” khuyapayakuqmi (Sant. 5:11). Apóstol Juanpa imachus qelqasqanpi piensasun. Paymi nirqan: “Wawallaykuna, kay cartataqa qelqamushaykichis ama ima juchamanpas urmanaykichispaqmi. Ichaqa, pipas ima juchamanpas urman chayqa, kashanmi yanapaqninchis, payqa Jesucriston, payqa chaninmi, janaq pacha Taytawantaqmi kashanpas”, nispa (1 Juan 2:1).

20. ¿Imatan jamuq yachachikuypi yachasunchis?

²⁰ Mayninqa wakin iñiqkunaqa manapunin juchankumanta arrepientekuyta munankuchu. Chhayna kaqtinqa paykunataqa iñiqkunamantan t’aqana. Ichaqa, ¿imaynatan umalliqkuna chayta ruwanku? Jamuq yachachikuypin chayta yachasunchis.