Nueva Zelanda nacionmanta juj hermanas juj kutin Preocupémonos unos por otros nisqa videota qhawasqa, chaypis willasqa imaynas Jehová Diosqa mana khuyapayallanchu runakunataqa chayta, aswanpas imaynatas paykunata yanapan chayta (Isa. 63:​7-9). Chay videota qhawasqansi paytaqa yanapasqa yanapanata necesitaq runakunata maskhananpaq. Chay videota qhawasqan qhepamansi payqa rantikuq lloqsisqa, jinas rikusqa mana wasiyoq callellapi tiyakuq warmita, chaysi mijunata rantispa payman apasqa, ichaqa manas mijunallatachu qosqa, aswanpas ¿Jayk’aqllapas tukukunmanchu nak’ariykuna? nisqa tratadowansi Diosmanta willayta qallarisqa.

Chayta uyarispas chay warmiqa waqayta qallarisqa. Payqa juch’uychanmantapachas Jehová Diosta reqsisqa, ichaqa askha watakunañas paypa llaqtanmanta t’aqakapusqa. Ichaqa chay p’unchaykunallas Jehová Diosmanta mañakusqa jujmanta llaqtanman pusapunanpaq. Chayta uyarispas hermananchisqa khuyapayaspa juj Bibliata payman saqesqa, jinaspa Bibliata estudianankupaq nisqa. a

Jehová Dios jinan noqanchispas llapa runakunata khuyapayananchis, familianchiskunawanpas iñiq t’aqapi hermanonchiskunawanpas khuyapayakuqmi kananchis. Khuyapayakuq kasqanchistan rikuchillasuntaq maypiña kaspapas Diosmanta willaspa.