1. ¿Imaraykun nisunman “Abrahanpa imachus suyakusqanqa junt’akunanpunin karqan” nispa?

 JEHOVÁ Diosmi Abrahanman willarqan imaynas mirayninmanta jamuq runawan llapa kay pacha nacionkuna bendecisqa kananku karqan chayta (Gén. 15:5; 22:18). Abrahanqa confiarqanmi Jehová Diospi, yacharqanmi chay nisqanqa junt’akunanta. Ichaqa tiempowanqa ñan Abrahanqa pachaj watanpiña kasharqan, esposanpas isqon chunka watanpiñan kasharqan, manataqmi juj wawankupas karqanraqchu (Gén. 21:​1-7). Chaywanpas “Abrahanqa iñiywanmi suyakurqan askha nacionkunaq taytan kananta, mana atikuq jinaña chay karqan chaypas” (Rom. 4:18). Yachasqanchis jina Diospa imachus nisqanqa junt’akurqanmi: Abrahanqa wawayoqmi karqan, chay suyakusqan wawanpa sutinmi karqan Isaac. Ichaqa, ¿imaynapitaq Abrahanri yachanman karqan Jehová Diosqa siminta junt’ananpuni kasqanta?

2. ¿Imaraykun nisunman “Abrahanqa confiarqanmi Diospa promesan junt’akunanpi” nispa?

² Abrahanqa allintan reqsirqan Jehová Diosta, chaymi payqa “tukuy sonqowan confiarqan” imaynas Diosqa promesantaqa junt’ananpuni karqan chaypi (Rom. 4:21). Chhayna iñiq kasqanraykun Diosqa Abrahantaqa chaninpaq jap’irqan (Sant. 2:23). Romanos 4:18 textopin willashan Abrahanpa iñiyninmanta suyakuyninmantawan. Chaymi rikuchin imaynas iñiyninqa suyakuyninwan kuskalla puriq chayta. Kunanqa Romanos pisqa capitulopi apóstol Pabloq suyakuymanta imachus nisqanta t’aqwirisun. Chaypin astawan yachasun imas suyakuy chayta.

3. ¿Imaninmi apóstol Pablo suyakuymanta?

³ Apóstol Pabloq willasqan jina, imachus suyakusqanchisqa “manan yanqachu” (Rom. 5:5). Chaymantapas payqa willarqanmi  imaynas imachus suyakusqanchisqa aswan fuerte kanman chayta. Chaykunata allinta entiendenapaqmi qhawarisun Romanos 5:​1-5 textota; chaykunata qhawarisqanchisman jina piensay imaynas suyakusqaykiqa tiempoq pasasqanman jina aswan fuerteman tukupurqan chaypi. Kaypi yachasqanchisqa astawanmi yanapasunki suyakuyniykiqa aswan fuerteraq kananpaq. Ñaupaqta rimasun imaynas chay munay suyakusqanchisqa mana yanqapaqchu chaymanta.

4. ¿Imamantan rimashan Romanos 5:​1, 2?

⁴ (Leey Romanos 5:​1, 2). Apóstol Pabloqa Roma llaqtapi iñiqkunamanmi chay textopi nisqan simikunataqa qelqarqan. Chay llaqtapi iñiqkunaqa Jehová Diosmanta Jesusmantawanmi yacharqanku, chaymantataq paykunapi iñirqanku, jinaspa cristianoman tukupurqanku. Jinan Diosqa iñisqankurayku paykunata “chaninpaq jap’irqan”, jinaspa santo espiritunwan jawirqan otaq ajllarqan. Chaymantapachan paykunaqa juj munay suyakuyta suyakusharqanku.

5. ¿Imatan suyakushanku ajllasqa iñiqkuna?

⁵ Juj kutinmi apóstol Pabloqa willarqan imatachus chay ajllasqa iñiqkuna suyakushanku chayta. Éfeso llaqtapi iñiqkunaman qelqashaspan willarqan Diospa “ancha sumaq qhapaq herencia qonanmanta” (Efes. 1:18). Colosas llaqtapi iñiqkunaman qelqashaspataq willarqan imaynas chay suyakusqankuqa “janaq pachapi” kasharqan chayta (Col. 1:​4, 5). Chhaynaqa, chay ajllasqa iñiqkunaqa janaq pachamanmi ripunqaku, chaypin wiñaypaq kausanqaku; chaypin Cristowan kuska gobiernanqaku (1 Tes. 4:​13-17; Apo. 20:6).

6. ¿Imanirqanmi hermano Frederick suyakuymanta?

⁶ Chay janaq pachapaq ajllasqa iñiqkunaqa tukuy sonqon valoranku chay suyakusqankuta. Chaypaq rimasun Frederick Franz hermanomanta, paymi 1991 watapi nirqan: “Imachus suyakusqanchistaqa chaskisunpunin. 144.000 juch’uy t’aqa ukhupi kaqkunaqa llapa suyakusqanchistan chaskisun, mana  piensasqanchiskunataraqmi Diosqa qowasun”, nispa. Chay hermanonchisqa wañukapunankaman unayta Jehová Diosta servirqan. Paymi nirqan: “Suyakuyqa ancha allinpunin, manapunin chayqa pisiyarqanchu. [ . . . ] Aswanpas unay tiempota suyakuspan chay suyakuyniykuta astawan valorayku. Suyakuyqa manan yanqapaqchu, waranqa watakunataña suyakunanchis kaqtinpas suyakushanallanchismi. Kunanqa ñaupaqmantapas astawanraqmi valorani chaytaqa”, nispa.

7, 8. ¿Imatan yaqa llapa iñiqkunapas suyakushanku? (Romanos 8:​20, 21).

⁷ Ichaqa kay pachapi yaqa llapa Jehová Diosta serviqkunaqa jujniray kausaytan suyakushanku. ¿Imayna kausaymi chay kanman? Paykunaqa Diospa gobiernonpin kay pachapi wiñaypaq kausanqaku, chaytan Abrahanpas suyakurqan (Heb. 11:​8-10, 13). Apóstol Pablopas willarqanmi chay chhayna kananmantaqa (leey Romanos 8:​20, 21). Qhepa tiempomanta jamuq tiempomanta Bibliapi imachus willasqanta yachashaqtiykiqa, ¿imataq masta gustarqasunki? Yaqapaschá juchamanta librakuspa ch’uya runa kaymanta yachasqayki. Gustarqasunkichá imaynas familianchiskunapas amigonchiskunapas kausaripunqa chaymanta yachaypas. Llapa ima yachasqaykichá munay karqan. Chaykunatan Diosqa suyachishawanchis. ¡May munaypunin kanqa jamuq tiempoman kausayqa!

⁸ Rikusqanchis jina, llapa Diosta serviqkunapaqqa juj munay suyakuymi kashan. Wakinqa janaq pachapi wiñaypaq kausaytan suyakushanku, wakintaq kay pachapi wiñaypaq kausayta. Chay suyakusqanchisqa p’unchaymanta p’unchaymanmi aswan fuerte kanan. ¿Imatan chaypaq ruwasunman? Chayta yachanapaq astawan qhawarisun apóstol Pabloq imachus qelqasqanta. Chayta yachaspan reparasun imaynas suyakusqanchisqa mana yanqachu chayta.

9, 10. ¿Imapin apóstol Pablo jina llapanchis tarikusunchis? (Romanos 5:3; qhaway kay parrafokunapaq fotokunata).

⁹ (Leey Romanos 5:3). Apóstol Pabloq nisqanman  jinaqa, suyakusqanchis aswan fuerte kananpaqqa imaymana sasachakuytas pasananchis. ¡Mana creey atiymi chayqa ¿riki?! Yachasqanchis jina, llapa iñiqkunamanmi imaymana sasachakuykuna llakikuykuna chayamuwanchis. Chaymanta rimashaspan Tesalónica llaqtapi iñiqkunata apóstol Pablo nirqan: “Qankunawan kashaspaykuqa “imaymana sasachakuykunatan pasasun” niqmá kaykichis riki; chhaynapunitaqmi karqanpas ¿riki?”, nispa (1 Tes. 3:4). Corinto llaqtapi iñiqkunatapas nirqanmi: “Asia provinciapi ñak’arisqaykumantaqa yachanaykichistan munayku; [ . . . ] “kunanqa wañupullasunñachá” nisharqaykuraqmi”, nispa (2 Cor. 1:8; 11:​23-27).

¹⁰ Kay tiempopipas chhaynan kashan, Bibliaq nisqanman jinaqa llapa iñiqkunan imaymana llakipi sasachakuykunapi tarikusun (2 Tim. 3:12). ¿Imakunapin tarikurqanki Jesuspi iñisqaykimantapacha, payta qatikuyta qallarisqaykimantapacha? Yaqapaschá amigoykikuna familiaykikuna ima qanta asipayarqasunkiku; k’amirqasunkiku, ñak’arichirqasunkiku imapaschá. Llank’anapipas honrado kasqaykiraykupaschá imaymana sasachakuypi tarikurqanki (Heb. 13:18). Autoridadkunapas yaqapaschá sumaq suyakuykunamanta willasqaykirayku qan contra jatarirqanku. Imapiña tarikurqanki imapiña tarikusun chaypas, apóstol Pabloq nisqanman jinaqa kusikunanchismi chaykunapi tarikusqanchismanta, ¿imarayku?

11. ¿Imaraykun yachananchis aguantaq kayta?

¹¹ Romanos 5:3 textopi nisqan jina, “sasachakuykunaqa aguantaq kananchispaqmi yanapawasun”. Manan pipas librechu kanchis ima llakimantapas sasachakuymantapas. Chaymi llapanchis yachananchis aguantaq kayta, aguantaq kasun chayqa chaskisunpunin imachus suyakusqanchista. Manan munasunmanchu Jesuspa willasqanpi qhepaman kutipuq runakuna jina kaytaqa. Muju t’akaq runamanta rimashaspan willarqan pisi jallp’ayoq qaqaman chayaq mujumanta. Chay pisi jallp’a jina sonqoyoq runakunaqa kusisqan Diospa siminta uyarikunku, Diospa siminrayku “ñak’ariy qatikachay kaqtintaq qhepaman kutipunku” (Mat. 13:​5, 6, 20, 21). Ichaqa manan pipas munasunmanchu qatikachasqa, jark’asqa, cheqnisqa kaytaqa, ni ñak’ariykunapi tarikuytapas; ichaqa chaykunata yanapawasunmanmi. ¿Imaraykutaq chayta ninchis? Chaymanta qatiqpi yachasun.

12. ¿Imakunapin yanapawasun aguantaq kay?

¹² Santiagon aguantaq kaymanta rimashaspa nirqan: “Imaymanata aguantaspan qankunaqa allin preparasqa kankichis, chhaynapi tukuy imapipas junt’asqa kanaykichispaq, allinpuni kanaykichispaqwan, arí, mana imapas faltanasuykichispaq”, nispa (Sant. 1:​2-4). Chhaynaqa aguantaq kayqa juj ruwanayoqmi kashan. ¿Imatataq ruwananri kashan? Aguantaq kaymi yanapawasun pacienciakuq kananchispaq, allin iñiq kananchispaq, tukuy sonqo Diospi confiananchispaqpas. Ichaqa manan chayllachu. Chhaynaqa, ¿imapiwantaq yanapawasumanri? Chayta qhawarisun.

13, 14. ¿Iman kanqa aguantaq kasun chayqa? ¿Imaraykun nisunman “suyakuyninchispas aswan fuerten kanqa” nispa? (Romanos 5:4).

¹³ (Leey Romanos 5:4). Aguantaq kasun chayqa, “Diospa sumaq qhawarisqanmi kasun” (Rom. 5:4). ¿Imaninantaq chayri? ¿Ñak’arisqanchiswanchu Dios kusikunqa? Manan, aswanpas aguantasqanchista rikuspan. Chhaynaqa imapiña tarikuspapas tukuy sonqo Diosta servisun chayqa, kusikunqan payqa. ¡May munaymi Diosta kusichiyqa ¿riki?! (Sal. 5:12).

¹⁴ Abrahanmanta rimallasuntaq. Paytaqa imaymanakunata aguantasqanraykun Diosqa allinpaq qhawarirqan, amigonta jinan paytaqa qhawarirqan; arí, chanin runan Diospaqqa  karqan (Gén. 15:6; Rom. 4:​13, 22). Chaymi noqanchiswanpas pasallanqataq. Diosqa allinpaqqa qhawariwasun, manan may tukuytachus payta servishanchis chayraykuchu, nitaq imakunatas llaqtanpi ruwashanchis chayraykuchu, aswanpas pay sonqollapuni kasqanchisrayku aguantaq kasqanchisrayku iman. Chhaynaqa llapanchispas Diostaqa kusichisunmanmi: Kuraqña, onqosqaña, ima ruwaytaña yachanchis manaña chaypas, paytaqa kusichisunmanmi. Yaqapaschá kunanpacha ima llakipipas ima sasachakuypipas tarikushanki; chay pasashasunki chayqa, kaypi allinta piensay: Junt’aq sonqollapuni kanki chayqa, Diosqa allinpaqmi qhawarisunki. ¡May munaymi chayta yachayqa ¿riki?! Chaymi yanapawasun suyakuyninchispas aswan fuerte kananpaq.

15. ¿Imatawanmi Pablo nirqan, imatan yaqapas tapukusunman?

¹⁵ Apóstol Pabloq nisqan jina, aguantaq kasun chayqa, allinpaqmi Diosqa qhawariwasun. Chaykuna nisqan qhepamanmi Pabloqa nillarqantaq: “Diospa sumaq qhawarisqan kaytaq suyakuyta qowasun, chay suyakuyqa manataqmi yanqachu”, nispa (Rom. 5:​4, 5). Ichaqa ñaupaqtan Romanos 5:2 textopi Pabloqa nillarqantaq: “Noqanchisqa Dios jatunchawananchistan suyakushanchis, chaymi kusisqa kashananchis”, nispa. Chhaynaqa yaqapaschá tapukusunman: “Pabloqa ñataq rimarqanña suyakuymanta chayqa, ¿imaraykutaq jujmantari rimarqan?”, nispa. Chayta qhawarisun.

16. ¿Imaynapin pipas Bibliaq willasqanta cheqaqpaqpuni rikunman? (Qhaway kay parrafopaq fotokunata).

¹⁶ Chaywanmi Pabloqa willasharqan imaynas suyakuyninchisqa astawanraq yapakunman chayta. Chaypaq kaypi piensasun: Kay pacha paraíso kananmanta chayraq uyarishaspaqa yaqapaschá nirqanki: “Yanqachá chayqa kanman, manachus jina cheqaqchu kanman”, nispa. Ichaqa Bibliata estudiasqaykiman jinachá, Diostapas astawan reqsisqaykiman jinapaschá astawan chaypiqa confiarqanki, yacharqankitaq  imaynas kay pachaqa paraisopuni kanqa chayta.

17. ¿Imaynatan Diospa promesankunata suyakusqayki yapakurqan bautizakusqayki qhepamanpas?

¹⁷ Bautizakusqayki qhepamanpas Diospa promesanta suyakusqaykiqa aswan fuertechá karqan. Yachasqaykiman, iñiyninpipas wiñarisqaykiman jinachá astawanraq yapakurqan (Heb. 5:13–6:1). Romanos 5:​2-4 textopi nisqan imapaschá qanpi junt’akurqan, imaymana llakikuypipaschá tarikurqanki, rikurqankichá imaynas Jehová Diosqa allinpaq qhawarisunki chaytapas. Jehová Diosqa kusisqataq qanwan kashan chayqa, astawanraqchá paypa promesankunapiqa confianki. Promesankunata suyakusqaykipas qallariymantaqa aswan fuertechá kunanqa kashan, cheqaqpunichá qanpaqqa chaykunaqa. Tukuy sonqochá chaykunataqa valoranki, chayman jinachá familiaykitapas sumaqta qhawarinki, allin yuyaywanchá imatapas ruwanki, manachá comuntachu tiempotapas usuchinki.

18. Jehová Diospa nisqanman jinaqa, ¿iman junt’akunqapuni?

¹⁸ “Diospa sumaq qhawarisqan kaytaq suyakuyta qowasun” nisqan qhepamanmi Pabloqa willarqan juj allin willakuyta. Chay willasqanpin rikuchirqan imaynas chay suyakusqanchisqa junt’akunqapuni chayta. ¿Imaraykun chayta ninchis? Pablo kikinmi Diospa sutinpi nirqan: “Chay suyakuyqa manataqmi yanqachu; Diosqa qowasqanchis santo espirituwanmi munakuyninta rikuchiwanchis”, nispa (Rom. 5:5). Chhaynaqa imachus suyakusqanchisqa chayamunqapunin, junt’akunqapunin.

19. ¿Imapin tukuy sonqo confiananchis?

¹⁹ Abrahantaqa yuyarinanchispunin. Jehová Diosmi payman juj promesata willarqan, allinpaqmi qhawarirqan, amigonta jinan rikurqan. Abrahanpa imachus suyakusqanqa junt’akurqanpunin. Bibliapin nin: “Chay promesataqa pacienciawan suyakusqan qhepatañan Abrahanqa chaskirqan”, nispa (Heb. 6:15; 11:​9, 18; Rom. 4:​20-22). Noqanchispas Abrahán jina Dios sonqollapuni kasun chayqa, chaskisunpunin imachus suyakusqanchistaqa. Chay imachus suyakusqanchisqa junt’akunqapunin. ¡May kusikunapaqmi chayqa ¿riki?! (Rom. 12:12). Apóstol Pablon nirqan: “Suyakuyta qoq Diosmantan mañakuni paypi confiasqaykichisrayku ancha kusikuywan thaj kaywan ima junt’aykunasuykichispaq, chhaynapi santo espirituq atiyninwan suyakuyniykichispi aswan kallpachasqa kanaykichispaq”, nispa (Rom. 15:13).