¿Yuyashankichu kay watapaq Qhawaq qelqanchiskunapi yachachikuykunata? Chayta yachanaykipaq kaypi tapuykunata kutichiy:

¿Imaynatan yuyayninchista mosoqyachisunman? (Rom. 12:2).

Yuyayninchista mosoqyachinapaqqa manan allin ruwaykunallatachu ruwananchis. Aswanpas sonqonchistan allinta t’aqwirikunanchis, jinaspa tukuy atisqanchista ruwananchis Bibliaq nisqanman jina kausananchispaq (w23.01, 8, 9 paginakunapi).

¿Imatan ruwananchis kay pachapi imakunachus pasasqanta allin yuyaywan qhawarinanchispaq?

Kay pachapi imakunachus pasasqanta yachaypas, profeciakuna imaynachus junt’akusqanta yachaypas allinmi. Ichaqa manan chaykunamanta rimaspaqa imachus piensasqanchistachu rimananchis, chayta ruwasunman chayqa iñiqmasikunatan t’aqanachisunman. Chhaynaqa Jehová Diospa llaqtanpi imachus willakamusqallantan rimananchis (1 Cor. 1:10) (w23.02, 16 paginapi).

¿Imaynapin jujniray Jesuspa bautizakusqan discipulonkunaq bautizakusqanwan?

Jesusqa manan noqanchis jinachu Diosman prometekunan karqan, payqa Diosman prometesqa nación ukhupiñan nacerqan. Chaymantapas Jesusqa ch’uya runan karqan, chaymi payqa manan ima juchamantapas arrepientekunanchu karqan (w23.03, 5 paginapi).

¿Imatan ruwasunman juñunakuykunapi hermanonchiskuna astawan comentanankupaq?

Pisillatan rimananchis, chhaynapin askha hermanokuna comentayta atinqaku. Chaymantapas comentaspaqa manan llapantachu kutichinanchis, chhaynapi juj hermanokunapas wakinta kutichinankupaq (w23.04, 23 paginapi).

¿Imaninantan nishanman “Ch’uya Ñanmanta” rimaspa Isaías 35:8 texto?

Judío runakunapaqqa chay “Ch’uya Ñanqa” Babiloniamanta Israelman kutinanku rijch’anachiy ñanllan karqan. Kay tiempokunapiri, ¿iman chay “Ch’uya Ñan” kanman? Manaraq 1919 wata chayamushaqtinmi chay “Ch’uya Ñantaqa” allichayta qallarikurqan, chaytaqa ruwakurqan Bibliakunata imprimispa, juj simikunaman t’ijraspa iman. Chay “Ch’uya Ñanqa” Diospa llaqtanta paraíso espiritual nisqamanmi apashan, jamuq tiempopitaq imaymana bendicionkunata Diospa gobiernonpi chaskisun (w23.05, 15-19 paginakunapi).

¿Ima iskay rijch’anachiy warmikunamantan Proverbios capítulo 9 rimashan?

Proverbios libroqa “mana yuyayniyoq warmimantan” rimashan, chay warmiq nisqanta kasukuyqa “wañuymanmi” apawachis. Chaymantapas rimashanmi “cheqaq yachayta” representaq warmimanta, chay warmiq nisqanta kasukuyqa “allin reparaq kayman” kausayman ima apawanchis (Prov. 9:​1, 6, 13, 18) (w23.06, 22-24 paginakunapi).

¿Imaynatan Jehová Dios rikuchirqan k’umuykukuq kasqanta Lotwan rimaspa?

Jehová Diosmi Lot-ta kamachirqan Sodoma llaqtamanta lloqsispa orqo-orqo ladokunaman ayqekunanpaq. Lotmi ichaqa Zóar llaqtaman ayqekunanpaq rogakurqan, jinan Jehová Diosqa Lotpa munasqanman jina ruwarqan (w23.07, 21 paginapi).

¿Imatan ruwanman juj warmi qosan pornografía nisqata qhawaqtin?

Yuyarinanmi mana paychu juchayoq kasqanta. Aswanpas Jehová Dioswan amigontin kasqanpin piensanan, chaymantapas yuyaymanananmi imaynatas Jehová Diosqa ñaupa tiempopi llakiq ñit’isqa warmikunata yanaparqan chaypi. Jinaspapas qosantan yanapallanmantaq ama jujmanta chay juchaman urmananpaq (w23.08, 14-17 paginakunapi).

¿Imaynatan allin reparaq kay yanapawasunman pipas imachus creesqanchista iskayachiyta munaqtin?

Chay runaq imayna tapukusqanpin reparasunman imachus piensasqanta, imachus llakichisqantapas. Chaymi yanapawasun sumaqllata rimapayananchispaq (w23.09, 17 paginapi).

¿Imatan yachasunman María allin kallpachasqa kananpaq imachus ruwasqanmanta?

Mariaqa Jesuspa maman kasqanta yacharuspan jujkunaq yanapayninta maskharqan. Paytaqa ángel Gabrielmi kallpacharqan. Chaymantapas Elisabetmi Bibliaq nisqanwan jina kallpacharqan. Chhaynatan noqanchistapas hermanonchiskuna kallpachawasun (w23.10, 15 paginapi).

¿Imaynatan Jehová Dios mañakusqanchisman kutichimun?

Jehová Diosqa llapa mañakusqanchistan uyarimuwanchis, chaymantapas munayninman jinan mañakusqanchista kutichimun (Jer. 29:12). Jehová Diosqa mayninpin jujniraymanta kutichimun mañakusqanchisman, chhaynaña kaqtinpas yanapawasunpunin payqa (w23.11, 21, 22 paginakunapi).

Romanos 5:2 textopin suyakuymanta rimashan; chhaynaqa, ¿imaraykun tawa versiculopi jujmanta suyakuymanta rimashallantaq?

Allin willakuykunata uyarispan juj runaqa yachan kay pacha juj sumaq paraíso kapunanta, jinan payqa chay sumaq paraisota suyakun. Ichaqa, sasachakuykunata ñak’ariykunata aguantaspan chay suyakuypi astawanraq confian; Jehová Dios sumaqta qhawarisqanta yachaspapas astawanmi payman asuykun (w23.12, 12, 13 paginakunapi).