Apóstol Pablon Timoteoman juj cartata apachirqan. Timoteopas Pablo jinan umalliq karqan, chaypin juj partepi nirqan: “Diospa ñaupanpi, Cristo Jesuspa ñaupanpi, ajllasqa angelkunaq ñaupanpi iman kamachiyki allinta imatapas yachaspa ama pimanpas sayapakuspa kay kamachikuykunata junt’anaykipaq”, nispa (1 Tim. 5:21). ¿Pikunan kankuman chay “ajllasqa angelkuna”?

Ñaupaqtaqa qhawarisun pikunas mana kankumanchu chayta. Chaypiqa Pabloqa manachus jina 144.000 ajllasqa iñiqkunamantachu rimashanman karqan. Timoteoman chay cartata qelqashaqtinqa chay janaq pachapaq ajllasqa iñiqkunaqa manaraqmi kausarichisqachu karqanku. Arí, manan mayqen apostolpas ni mayqen ajllasqapas espíritu cuerpotaqa chaskirqanraqchu, chhaynaqa manan paykunachu kanman chay “ajllasqa angelkunaqa” (1 Cor. 15:​50-54; 1 Tes. 4:​13-17; 1 Juan 3:2).

Chay angelkunaqa manachus jina Noepa tiemponpi Diosmanta t’aqakuq angelkunapaschu kankuman. Chay t’aqakuq angelkunaqa Satanaspa partenmantan churakurqanku supaykunamanmi tukupurqanku, Jesuspa contranpitaqmi kasharqankupas (Gén. 6:2; Luc. 8:​30, 31; 2 Ped. 2:4). Qhepa tiempomanqa llapa chay angelkunatan Jesusqa waranqa watapaq wisq’apunqa, chaymantataq paykunaqa Satanaswan kuska ch’usaqman tukuchisqa kapunqaku (Jud. 6; Apo. 20:​1-3, 10).

1 Timoteo 5:21 textopiqa Jehová Diosmanta Jesusmantawan kuskamantan apóstol Pabloqa chay “ajllasqa angelkunamanta” rimaspaqa rimashan, chhaynaqa chay angelkunaqa Diosta serviq angelkunan kankuman.

Angelkunaqa askha waranqanpin kanku (Heb. 12:​22, 23). Sapankan imaymana llank’anata chaskinku, manataqmi paykunaqa kaq ratuchu imatapas ruwanku (Apo. 14:​17, 18). Juj kutipas juj angel-llan 185.000 Asiria soldadokunata wañuchinanpaq kamachisqa karqan (2 Rey. 19:35). Chaymantapas Jesuspa willasqanman jinaqa, yaqachus jina juj t’aqa angelkuna juñunqaku “gobiernonpi llapa juchaman apaqkunata mana allin ruwaq runakunatapas” (Mat. 13:​39-41). Juj t’aqa angelkunachus jina “ajllasqakunatapas juñunqaku” janaq pachaman rinankupaq (Mat. 24:31). Salmos 91:11 textopi nisqanman jina, wakin angelkunaqa kausayninchispi cuidawananchispaqmi churasqa kanku (Mat. 18:10; tupanachiy Mateo 18:10; 4:​11, Lucas 22:43 textokunawan).

Chhaynaqa 1 Timoteo 5:21 textopi willasqan ajllasqa angelkunaqa Diospa allin angelninkunan kanku, yaqapaschá paykunataqa ajllakurqan Diospa llaqtanpi ima ruwaypipas yanapakunankupaq. Chay pisqa capitulopiqa apóstol Pabloqa umalliqkunamantan rimasharqan, chaypin juj hermanokunatapas nirqan umalliqkunata respetanankupaq. Umalliqkunapas allinta piensaspan “mana pimanpas sayapakuspan” imachus ruwanankutaqa ruwananku karqan. ¿Imarayku? Paykunaqa Diospa ñaupanpi, Jesuspa ñaupanpi, ajllasqa angelkunaq ñaupanpi iman hermanokunataqa servishanku. Chhaynaqa Jehová Diospas, Jesuspas, ajllasqa angelkunapas qhawashankun imaynatas umalliqkuna iñiqkunata atiendeshanku chayta. Chhaynaqa angelkunaqa imaymana ruwaypin yanapakushanku, wakinmi Diosta serviqkunata cuidashanku, wakinqa predicación aparisqanchistan qhawarishanku, imachus rikusqankutataq Jehová Diosman willashanku (Mat. 18:10; Apo. 14:6).