BIBLIAPI griego rimaypi “carreta” nispaqa imaymana clase carretakunamantan rimashan (Hech. 8:​28, 29, 38). Ichaqa Etiopía llaqtayoq umalliq viajasqan carretaqa manachus jina soldadokunaq apakachasqanku carretachu nitaq carrera carretachu kanman karqan, chayqa jatun carretachus jinan kanman karqan. ¿Imaraykun chayta nishanchis? Chaytan kaypi qhawarisunchis.

Chay Etiopía llaqtayoq runaqa jatun umallin karqan, karutataqmi viajamurqanpas. Paymanta rimaspan Bibliapi nin: “Jinan Felipeqa rirqan, chayllamanmi rikurqan Etiopía llaqtapi reinaq kamachin jatun umallita, paymi reinaq llapa qhapaq kayninkunamanta encargasqa karqan”, nispa (Hech. 8:27). Chay tiempopi Etiopía nacionqa jatunmi karqan, chayqa kunan tiempo Egipto nacionpa uray ladon kuskanmanta Sudán nacionkaman karqan. Chay runaqa manapaschá kaq carretallapichu sapa kutinpas viajaq; kay kutipiqa karutataq viajanan karqan chayqa, askhatachá imatapas apakunan karqan. Chaymantapas chay tiempopiqa imaymana clase carretakunapin runakunaqa viajaqku. Chay carretakunamanta wakinqa tawa ruedayoqmi karqan, jawanmanta tapasqataqmi karqanpas. Bibliamanta sut’inchaq juj libropin nin: “Chay carretakunapiqa askhatan imatapas apaqku, tiyaspa imaraqmi tranquilo viajaqku, chaymantapas yaqachus jina chay carretakunaqa karuta purinman karqan”, nispa (Acts—An Exegetical Commentary).

Chay umalli runaqa Felipeq qayllaykunanpaqqa leesharqanmi. Imachus pasasqanmanta willaspan Bibliapi nin: “Chaymi Felipeqa carretaq ladonman phawaspa uyarirqan profeta Isaiaspa qelqasqanta leeshaqta”, nispa (Hech. 8:30). Chay carretakunaqa manan phawaylla purinankupaq jinachu ruwasqa karqanku. Chaychá chay Etiopía llaqtayoq runaqa leespa viajasharqan, jinaspa Felipepas juj chhikanta phawarispa ayparqan.

Chay Etiopía llaqtayoq runan Felipeta “valekurqan carretanman seqaspa ladonpi tiyaykunanpaq” (Hech. 8:31). Carrerapi phawaq carretakunata purichiqqa sayaspallan riq. Pasajerokunata apaq carretakunan ichaqa jatun karqan, chaypiqa tiyaspan runakunaqa riqku, chaychá chay umallipas Felipetaqa ladonpi tiyaykunanpaq nirqan.

Hechos 8 capitulopi willasqanrayku, chay tiempopi imapas imaynachus kasqanta yachakusqanrayku iman qelqanchiskunapiqa manaña chay Etiopía llaqtayoq runataqa guerrapaq carretapichu nitaq carrera phawana carretapichu dibujakun, aswanpas aswan jatun carretapiñan dibujakun.