1, 2. ¿Ima llakikuykunapin mayninpi tarikusunman Jehová Diosta serviqkuna?

 KAY vidapiqa qonqaymi ima llakipipas tarikusunman, mana piensaymi imapas chayamuwasunman. Chaypaq juj chhikanta yachasun wakin iñiqmasikunamanta. Hermanonchis Luismanta a yachasun. Juj kutinsi payta doctor nisqa: “Cuerpoykipin cáncer onqoy kashan. Chay cancerqa mana reqsisqan, manañan unaytachu kausanki”, nispa. Hermananchis Monikamanta yachallasuntaq, payqa qosanwan kuskas allinta Jehová Diosta servishasqaku, qosanqa umalliqsi kasqapas, ichaqa juj p’unchaysi payqa juj llaki noticiata yacharusqa. Qosansi askha wataña mana allin kausaypi purishasqa. Hermananchis Oliviamanta yachallasuntaq, payqa solterallan. Paypa tiyasqan llaqtamansi jatun wayra jamushasqa, chayta rikuspas payqa ayqekusqa. Chayman kutinanpaqsi ichaqa wasinqa q’ala thunisqa kapushasqa. Rikusqanchis jina, chay iñiqmasinchiskunaqa qonqayllan sinchi llakipi tarikurqanku. Qanpas yaqapaschá chhayna llakipi tarikushanki.

² Jehová Diosta serviqkunaqa llapa runakuna jinan sasachakuykunapi tarikunchis, onqonchis ima. Chaymantapas Diospa llaqtanta cheqnikuq runakunatan aguantananchis kallantaq. Jehová Diosqa manapaschá chaykunamantaqa jark’awasunchu, ichaqa promesanman jinan yanapawasun (Isa. 41:10). Paypa yanapayninwanqa ima sasachakuypiña tarikuspapas atisunmi kusisqa kayta, allin yuyaywanmi ima decisiontapas ruwasun, manataqmi paymantaqa karunchakusunchu. Kaypin yachasun imakunatas Jehová Dios ruwan yanapawananchispaq chayta. Tawa yanapaykunamantan yachasun. Yachallasuntaqmi imakunatas noqanchispas ruwananchis chay yanapayninta chaskikunanchispaq chaytapas.

 JEHOVÁ DIOSMI WAQAYCHAWASUN

3. ¿Iman sasa noqanchispaq kanman sinchi llakipi tarikuqtinchis?

³ Sinchi llakipi tarikushanchis chayqa, sasapaschá kanqa allin yuyaywan imatapas ruway. Sonqo nanasqa tarikuspapaschá mana allintachu imatapas piensasun, manapaschá imatapas ni imayna ruwaytapas atisunchu. Chaymi pasasqa ñaupaqpi rimamusqanchis hermanakunawan. Hermananchis Olivian nin: “Wasiyta q’alata thunisqata rikuspan sinchita llakikurqani, manan imanaykutapas atirqanichu”, nispa. Hermana Monikapas nillantaqmi: “Qosaypa engañawasqanta yacharuspaqa sinchi llakisqa phiñasqan kasharqani. Cuchillowanpas sonqoyta winaruwankuman jinaraqmi kasharqani. Chayllapiñan sapa p’unchay piensaq kani. Chaymi manaña ima ruwaytapas atiqchu kani, noqaqa manan jayk’aqpas piensarqanichu chhaynapi tarikunaytaqa”, nispa. ¿Imaynatan Jehová Dios yanapawasunman chhayna mana aguantay llakikunapi tarikuqtinchis?

4. Filipenses 4:​6, 7 nisqan jina, ¿imatan Jehová Dios qowasun?

⁴ ¿Imaynatan Jehová Dios yanapawanchis? Bibliaq nisqan jina, payqa “thaj kaytan” qowasun (leey Filipenses 4:​6, 7). Jehová Diospa thaj kayninqa sonqonchistan tiyaykachinqa, thaj nichinqa, chaytaqa amigonkunamanmi Jehová Diosqa qon, chay thaj kayqa jatunpunin, “runaq mana entiendey atisqanmi”. ¿Jayk’aqllapas sinchi llakipi tarikushaspa tukuy sonqomanta Jehová Diosmanta mañakurqankichu? Chaymantaqa yaqapaschá thaj kapurqanki. Chayqa Jehová Diospa qosqan “thaj kaymi karqan”.

5. ¿Imaynatan Diospa qosqan thaj kay waqaychan yuyayninchista sonqonchistapas?

⁵ Diospa qosqan thaj kaymanta rimashaspan Filipenses 4:7 texto nillantaq: “Chhaynapin sonqoykichista yuyayniykichista ima [ . . . ] waqaychanqa”, nispa. Chay “waqaychanqa” nisqa simiqa griego rimaypiqa soldadokunaq rimayninmantan jamun. Chhaynatan niqku llaqtata cuidaq soldadokunata. Paykunan llaqtata cuidaqku chhaynapi chaypi tiyaq runakunaqa thajlla tranquilolla kanankupaq. Chhaynan Diospa qosqan thaj kaypas, chay thaj kaymi yanapawasun sonqonchispas yuyayninchispas thaj kananpaq, tranquilo kananpaq (Sal. 4:8). Manaña sasachakuyninchis apuraychu allichakunman chaypas, Ana jinan thaj kasunchis (1 Sam. 1:​16-18). Thaj kaspaqa allin yuyaywanmi imatapas ruwasunchis.

6. ¿Imatan ruwananchis Diospa qosqan thaj kayta chaskinanchispaq? (Qhaway kay parrafopaq fotota dibujotapas).

⁶ ¿Imatan noqanchis ruwasunman? Ñaupa tiempo runakunaqa atiqkun soldadokunaq yanapaynin mañakuyta, chhaynapi llaqtata allinta cuidanankupaq. Paykuna jinan noqanchispas Jehová Diospa yanapayninta mañakunanchis cuidawananchispaq. Thaj kayninta  qowananchiskaman mañakushanallanchis (Luc. 11:9; 1 Tes. 5:17). Chaytan ruwasqaku ñaupaqpi rimamusqanchis hermano Luispas esposanwan kuska, paymi nin: “Pisi killakunallañan kausanki nispa niwaqtinkuqa manan yuyayniypipaschu kasharqani. Chhaynapi tarikuspaqa manan allintachu imatapas ruwanki. Ichaqa Diospa yanapayninta mañakusqaykun yanapawarqanku allinta piensaspa imatapas ruwanaykupaq”, nispa. Paykunaq willakusqankuman jinaqa sapa kutillansi tukuy sonqomanta Jehová Diospa thaj kayninta mañakuqku. Chaymantapas mañakuqkus sonqonku tiyaykunanpaq, allin yuyayta qonanpaqpas. Jehová Diosqa qosqas mañakusqankuta. Qanpas chhayna llakipi tarikushanki chayqa, mañakushallay Diospa yanapayninta. Payqa qosunkin thaj kayta, sonqoykitan tiyaykachinqa, allin yuyaytataqmi qosunkipas (Rom. 12:12).

JEHOVÁ DIOSMI ALLINTA SAYACHIWASUN

7. ¿Imaynan mayninpi tarikusunman sinchi llakipi rikukuspa?

⁷ Ima llakipipas tarikushanchis chayqa, manapas yuyayninchispichu kashasunman jinapaschá imatapas piensasun ruwasunpas. Sinchi llakisqataq kashasunman chayqa, lamar-qochapi kayman jaqayman apakachasqa barco jinapaschá tarikusun. Chhaynapin hermanonchis Luispa esponsanpas tarikusqa. Paymi nin: “Qosaypa wañupusqan qhepamanqa sapallaymi rikukapurqani. Mayninqa nishutan llakikuynillaypi piensaq kani. Mayninpin ichaqa sinchi phiñasqa kaq kani qosay manaña noqawan kuskachu kasqanrayku”, nispa. Maynin p’unchaykunaqa sapallanpas kashanman jinas tarikuq, fracasomanpas jaykunman karqan jinas kaq. Manas imaynamanta ruwayta atisqachu qosanpa wakin ruwanankuna ruwayta. Payqa sinchita aytikushaq lamar-qocha ukhupipas kashanman jinas kasqa. ¿Imaynatan Jehová Dios yanapawasunman chhayna sinchi llakisqa tarikuqtinchis, mana imanakuytapas atiqtinchis?

8. Isaías 33:6 nisqan jina, ¿imatan Jehová Dios ruwanqa llakipi tarikuqtinchis?

⁸ ¿Imaynatan Jehová Dios yanapawanchis? Bibliapi nisqan jina payqa allintan tajyachiwasun, sayachiwasunchis (leey Isaías 33:6). Chaypaq piensasun juj barcopi: Lamar-qochapi sinchi wayra kaqtinqa kayman jaqaymanmi barcoqa aytikuyta qallarin. Ama nishuta aytikunanpaqmi wakin barcomanqa iskaynin ladonman rafrata jina churanku. Chhaynapin barcoqa tuytullan, pasajerokunapas manan nishutachu reparanku aytikusqanta. Ichaqa wakin barcoman chay rafra jina churasqankuqa puriqtinmi allinta barcota tuytuchin. Sichus noqanchispas munasunman llakipi tarikushaqtinchis Jehová Dios yanapawananchista tajyachiwananchista chayqa, ñaupaqllamanmi purinanchis, mana sayaspan servishanallanchis payta.

9. ¿Imaynatan yanapawasunman Diospa llaqtanpi qelqakuna videokunapas llakipi kaqtinchis sonqonchis thaj kananpaq? (Qhaway kay parrafopaq fotota dibujotapas).

 ⁹ ¿Imatan noqanchis ruwasunman? Sinchi llakisqa sonqo nanasqa kashanchis chayqa, tukuy atisqanchistan kallpachakunanchis Diosman astawan qayllaykunanchispaq. Ichaqa manapaschá ñaupaqpi jinachu imatapas ruwasunchis. Jehová Diosqa entiendewanchismi chayta (tupanachiy Lucas 21:​1-4 textowan). Chaywanpas kallpachakunanchismi Diospa palabranta estudiananchispaq, chaypi yuyaymanananchispaqpas. Diospa llaqtanpiqa imaymana yanapaykunan kan, kashanmi qelqakuna videokunapas, chaykunan yanapawasunchis ama nishuta llakikunanchispaq. Chay videokunata qelqakunata iman tarinki JW Library^® nisqapi, Índice de las publicaciones Watch Tower nisqapi, jinallataq Guía de estudio para los testigos de Jehová nisqapi ima. Ñaupaqpi rimamusqanchis hermananchis Monikapas chaykunawansi yanapachikusqa sonqon nanayta qallariqtin. Chaykunapis coleray, traición, lealtad nisqa simikunata maskhasqa; chaykunamanta willaq yachachikuykunatas leesqa sonqon tiyaykunankama. Paymi nin: “May sonqo nanasqan chaykunata qelqaq kani, leeyta tukuspan ichaqa thaj kaq kani. Jehová Diospas abrazaykushawanman jina kaq kani. Leesqaypin reparaq kani imaynas Jehová Diosqa allinta entiendewan chayta”, nispa. Qantapas yanapasunkin Jehová Diosqa allin sayasqa, allin tajyasqa kanaykipaq (Sal. 119:​143, 144).

JEHOVÁ DIOSMI AYSARIWASUN

10. ¿Imaynan kasunman sinchi llakipi tarikuspa?

¹⁰ Ima desgraciapipas llakipipas tarikuqtinchisqa, llakiq ñit’isqantaq kashanchis chayqa, manapaschá ni kallpanchispas kanqachu. Chakin q’ewisqa carrerapi phawaq runa jinapaschá kasunchis. Manapaschá facilchu kapunqa ñaupaqpi imakunachus ruwasqanchista ruway, manapaschá ganasninchis chaykunapaq kapunqañachu. Elías jinapaschá kumparayasqalla kayta munasunchis, manapaschá puñunanchismanta jatariyta munasunchu (1 Rey. 19:​5-7). ¿Imaynatan Jehová Dios yanapawasunman chhayna pisi kallpa tarikuqtinchis?

11. Salmos 94:18 textopi nisqan jina, ¿imatawanmi Jehová Dios ruwan yanapawananchispaq?

¹¹ ¿Imaynatan Jehová Dios yanapawanchis? Bibliaq nisqan jina, payqa aysariwasunsi jap’iwasunsi (leey Salmos 94:18). Imaynan carrerapi phawaq runaqa chakin q’ewisqa kaspaqa jujpa yanapayninta necesitan, chhaynatapaschá noqanchispas necesitasunchis Jehová Diospa yanapayninta, chhaynapi ñaupaqllaman purinanchispaq. Pay kikinmi niwanchis:  “Noqa Diosniyki Jehová Diosqa, paña makiykimantan jap’ishayki. Noqan niyki: Ama manchakuychu, noqan yanapasayki, nispa” (Isa. 41:13). Rey Davidpas allintan repararqan imaynas Jehová Diosqa paywan kuska kasharqan chayta, imaynas payta jap’isharqan chayta. Chaychá nirqan: “Paña makiykin qaqata jap’iwan”, nispa (Sal. 18:35). Ichaqa, ¿imaynatataq Jehová Diosri jap’iwanchis?

12. ¿Pikunawanmi Jehová Dios yanapachiwasunchis sinchi llakisqa tarikuqtinchis?

¹² Mayninpiqa jujkunawanmi Jehová Diosqa yanapachiwanchis, chayqa pay kikinpas jap’ishawasunman jinan. Chaytan Davidwanpas ruwarqan. Juj kutinmi Davidqa sinchi llakisqa kasharqan, chay tiempopin amigon Jonatán payta watukuq rirqan, jinaspa payta kallpacharqan (1 Sam. 23:​16, 17). Eliasmanpas juj yanapaqtan Jehová Diosqa qorqan, paymi karqan Eliseo. Eliseoqa imaymanapin Eliasta yanapaq (1 Rey. 19:​16, 21; 2 Rey. 2:2). Noqanchistapas yaqapaschá Jehová Diosqa familianchiskunawan, amigonchiskunawan, umalliqkunawan ima yanapachiwasunman. Ichaqa sinchi llakisqa tarikuspaqa yaqapaschá munasun sapallanchis kayta. Entiendenapaqmi chayqa. Ichaqa, ¿imatan ruwananchis Jehová Diospa yanapayninta chaskikunanchispaq?

13. ¿Imatan mana ruwananchischu Jehová Diospa yanapayninta chaskikunanchispaq? (Qhaway kay parrafopaq fotota dibujotapas).

¹³ ¿Imatan noqanchis ruwasunman? Manapunin jujkunamantaqa t’aqakunanchischu. Jujkunamanta t’aqakuspaqa nishutan problemallanchispi piensasunman, manataqmi imatapas allintachu ruwasunman (Prov. 18:1). Mayninpiqa sinchi llakipi tarikuspaqa llapapas munasunpunin juj ratullapas sapallanchis kayta, ichaqa manapunin nishutaqa sapallanchisqa kananchischu. Chhaynata jujkunamanta t’aqakusunman chayqa, Jehová Diospa yanapaynintapas wijch’uykushasunman jinan kanman. Chaymi sinchi llakipiña sasachakuypiña tarikushasunman chaypas, sumaqta chaskikunanchis familianchispa, amigonchiskunaq, umalliqkunaq yanapaynintapas. Paykunataqa Jehová Diospa kachamusqan yanapaqkunata jinan qhawarinanchis (Prov. 17:17; Isa. 32:​1, 2).

JEHOVÁ DIOSMI SONQOCHAWASUN

14. ¿Ima sasachakuykunapi tarikuspan sinchita mancharikusunman?

¹⁴ Llakipi tarikuspaqa yaqapaschá maynin ratukunaqa manchasqa ima kasunchis. Bibliapipas willashanmi imaynas wakin Dios sonqo runakunaqa llakipi sasachakuykunapi tarikuspanku sinchi manchasqa karqanku chayta (Sal. 18:4; 55: 1, 5). Noqanchispas yaqapaschá chhayna manchasqa kasunman ima llakipas chayamuqtin. Mayninpiqa yaqapaschá escuelapi compañerokuna, llank’anapi compañerokuna, familiakuna, hasta gobiernokunapas jark’awasunman. Wakinqa yaqapaschá sinchi onqosqa kaspa wañuy patapi tarikusunman, chhaynakunapi tarikuspaqa mana piniyoq wawakuna jinapaschá manchasqa kasunman. Ichaqa, ¿imaynatan Jehová Dios yanapawasunman?

15. Salmos 94:19 textopi nisqan jina, ¿imatan Jehová Dios ruwanqa?

¹⁵ ¿Imaynatan Jehová Dios yanapawanchis? Payqa sumaqtan sonqochawanchis (leey Salmos 94:19). Chaypaq kaypi piensasun: Juj chicachas sinchi parata uyarispa rayokunaq t’ojasqanta uyarispa, manchasqa kaspa mana puñuyta atishanmanchu. Chayllamansi papan jamunman jinaspa payta oqllaykunman, paypa oqllayninpiqa thajsi puñurakapunman. Astawanña rayo t’ojashan chaypas tranquilos puñukapunman. Chhaynatapaschá noqanchispas ima llakiwanpas sasachakuywanpas manchasqa kaspaqa, janaq pacha Papanchispa oqllaykuwananchista munasunchis. Ichaqa, ¿imatan ruwananchis pay sumaqta sonqochawananchispaq?

16. Jehová Dios sonqochawananchista munashanchis chayqa, ¿imatan ruwananchis? (Qhaway kay parrafopaq fotota dibujotapas).

¹⁶ ¿Imatan noqanchis ruwasunman? Sapa kutillanmi Jehová Dioswan parlananchis, palabrantapas leenanchis, chayman yachasqan kananchis (Sal. 77:​1, 12-14). Chayta ruwasun chayqa, ima llakipiña tarikuspapas, imapas ruwananchismantaqa paypa yanapaynintan ñaupaqta maskhasun. Jehová Dioswan parlaspaqa sut’itan willakunanchis imakunas llakichishawanchis, imakunatas manchakushanchis chayta, kasukunanchistaqmi palabran Bibliapi imachus niwasqanchistapas (Sal. 119:28). Chhayna llaki tiempokunapi tarikushanchis chayqa, Bibliapi Job libro, Salmos libro, Proverbios libro iman mastaqa kallpachawasun, kallpachawasunmi Mateo 6 capitulopas. Sichus Jehová Dioswan parlallanki chayqa, leenkitaq palabrantapas chayqa, allintan reparanki paypa sonqochayninta.

17. ¿Imatan manapuni qonqananchischu?

¹⁷ Kaytaqa manan qonqananchischu: Ima llakipiña tarikusun chaypas, Jehová Diosqa noqanchiswanpunin kanqa. Manan jayk’aqpas payqa saqerpariwasunchu (Sal. 23:4; 94:14). Kaypi yachasqanchis jina, payqa allintan waqaychawasun, allintan sayachiwasun, sumaqtan aysariwasun, sonqochawasun ima. Profeta Isaiasmi Jehová Diosta nirqan: “Qanpi suyakuqkunatan waqaychanki, qanpi confiaqkunamanmi thaj kayta qonki”, nispa (Isa. 26:3). Chhaynaqa, tukuy sonqo Jehová Diospi confiay, chaskikuy llapa ima yanapaynintapas. Chayta ruwanki chayqa, aguantallankin ima sasachakuytapas.