1. ¿Imatan llapapas ruwananchis, imaraykun mayninpi mana facilchu chay kanman?

 SAPA p’unchaymi imaymana decisionta ruwananchis ¿riki? Wakinqa facil-llan chayqa, facil-llatan piensarunchis imatas tutamantan mijusunchis, ima horastas puñuqpas ripusunchis chaytaqa. Wakinmi ichaqa sasa. Manan facilchu imawansi jampichikusunchis, imatas ruwana kusisqa kausanapaq, imaynatas familiata uywasunchis, imaynatas Diostapas adorasun chaykuna qhawariyqa. Chaykunata qhawarispaqa llapapas munasunmanmi noqanchispaqpas familianchispaqpas allin lloqsinanta ¿riki? Astawanqa munasunman Diospa munayninman jina imatapas ruwaytan (Rom. 12:​1, 2).

2. ¿Imakunan yanapawasun allinta piensaspa imatapas ruwananchispaq?

² Kaypin yachasunchis imatapas allinta ruwananchispaq kinsa yanapaykunamanta: 1) Ñaupaqtaqa allintan imatapas yachananchis, 2) allintan qhawarinanchis imatas Jehová Dios piensan chayta, 3) allintan tanteananchis mayqensi allin kanman chayta. Yachallasuntaqmi imatas ruwana allin reparaq kanapaq chaytapas (Prov. 2:11).

LLIUTAN ALLINTA YACHANA

3. ¿Imaraykun manaraq imatapas ruwashaspa allintaraq chaymanta yachana? Juj ejemplota willay.

³ Allinta piensaspa imatapas ruwanapaqqa allintan yachana, allintan reqsina imatas ruwana kanqa chayta. ¿Imarayku? Chaypaq piensasun juj doctorpi. Juj doctorqa manan onqosqamanqa ima tratamientotapas qonmanchu manaraq imatapas allinta yachashaspaqa ¿riki? Kaqtan noqanchispas ruwananchis,  manaraq imatapas ruwashaspan allinta qhawarinanchis imas ruwana kashan, maymansi rina kashan, imaynas chaykuna chayta. ¿Imaynatan chayta ruwasunman?

4. Proverbios 18:13 textoq nisqanman jina, ¿imaraykun allinpuni llapanta yachay? (Qhaway kay parrafopaq fotota).

⁴ Chayta ruwanapaqqa yaqapaschá imaymanata tapukusunman. Chaypaq kaypi piensasun: Juj juñukuymansi invitawasunman, chayqa juj chhikan kusirikunapaqsi kanman. ¿Risunmanchu chayman icha manachu? Manachus allinta reqsinki chay invitaqta, manataqchus allinta yachanki imakunas chay fiestapi kanqa chayta chayqa, yaqapaschá tapukuwaq: “¿Maypin chay fiesta kanqa, jayk’aqmi aparikunqa? ¿Jayk’a runakunan jamunqaku? ¿Pin chaypi umallinqa? ¿Pikunan chayman rinqa? ¿Imakunatan chaypi ruwakunqa? ¿Kanqachu tomanakuna?”, nispa. Chaykunata tapukunki chayqa allin yuyaywanmi imatapas ruwanki (leey Proverbios 18:13).

5. ¿Imatawanmi ruwana allinta piensaspa imatapas ruwanapaq?

⁵ Chaykunataña allinta yachanki chaypas astawan piensariy. Yaqapaschá yacharunki chay fiestaman Diosta mana serviq runakuna rinanta, tomanakunapas askha kananta; comuntapaschá imapas ruwakunqa, manapaschá pipas chayta qhawarinqachu (1 Ped. 4:3). Diosmanta willaq rinaykiwan, juñunakuyman rinaykiwan imapaschá tupanqa. Llapa chaykunatapas  allinta qhawarinki chayqa, allin yuyaywanmi imatapas ruwanki. Ichaqa manan chayllachu kanan. Yaqapaschá qanqa allintaña yachanki imaynas kanqa chayta. Ichaqa, ¿imaninmanmi Jehová Dios chaymanta? (Prov. 2:6).

ALLINTAN QHAWARINA IMATAS JEHOVÁ DIOS PIENSAN CHAYTA

6. Santiago 1:5 textoq nisqanman jina, ¿imatan Jehová Diosmanta mañakunanchis?

⁶ Diospa yanapayninta mañakuy. Imaynatas pay imatapas qhawarin chayta allinta reparanaykipaq. Payqa allintan yuyayta qosunki, “askhatapunin chayta qosunki” (leey Santiago 1:5). Chay yuyay qosqanwanmi allinta reparanki imas payman gustan chayta.

7. ¿Imatan ruwana imatas Dios piensan chayta yachanapaq? Juj ejemplota willay.

⁷ Diosmanta mañarukuspaqa allinta reparay imaninchus pay chayta. ¿Imaynatan chayta ruwasunman? Chaypaq kaypi piensasun: Mana reqsisqanchis llaqtata viajaspaqa yaqapaschá chaypi tiyaq runakunata tapurikusunchis. Tapurikuspaqa atenton uyarisun imachus nisqantaqa ¿riki? Manan jinallaqa pasapusunmanchu. Chhaynan Dioswanpas. Paypa yanapayninta mañakuspaqa atenton payta uyarinanchis. Chaypaqqa imatachá ruwayta munashanchis chaymanta rimaq textokunatan maskhananchis. Ñaupaqpi rimamusqanchis fiestamanta rimallasuntaq. Chayman risunchus manachus chay decisionta ruwanapaqqa yaqapaschá Bibliapi maskhasunman fiestakunamanta, mana allin compañerokunamanta, Diospa gobiernonta ñaupaqta churaymanta rimaq textokunata (Mat. 6:33; Rom. 13:13; 1 Cor. 15:33).

8. ¿Imatan ruwawaq imachus yachay munasqaykita tarinaykipaq? (Qhaway kay parrafopaq fotota).

⁸ Mayninqa yaqapaschá jujpaq yanapayninta  necesitanki. Yaqapaschá juj allin yuyayniyoq hermano otaq hermana yanapasunki. Chaywanpas qan kikiykipunin maskhanayki chaymanta rimaq qelqakunataqa. Guía de estudio para los testigos de Jehová nisqapi, Allinta kausanapaq Bibliapi yanapaykuna nisqa libropi iman kashan askha munay yachachikuykuna. Chaykunata maskhaspaqa piensanayki imaynatas Diosta kusichiwaq chaypin.

9. ¿Imatan ruwana ima ruway munasqanchispas Diosman gustanchus icha manachus chayta yachanapaq? (Efesios 5:17).

⁹ ¿Imatan ruwasunman ima ruway munasqanchispas Diosman gustanchus icha manachus chayta yachananchispaq? Chaypaqqa allintan payta reqsinanchis. Proverbios 9:10 nin: “Allin reparaq kanapaqqa ch’uyay-ch’uya Diostan reqsina”, nispa. ¿Imaninantaq chayri? Allin yuyaywan imatapas ruwanapaqqa allintan reqsina Jehová Diosta. Yachanan imatas munakun, imatataqsi cheqnikun chayta. Yachanan imatas runakunapaq munan chaytapas. Chayrayku tapukuy: “Yachanitaq Jehová Dios imayna kasqanta chayqa, ¿kay ruwasqay payta kusichinmanchu?”, nispa (leey Efesios 5:17).

10. Imaynaña llaqtanchispi, familianchispi costumbre kanman chaypas, ¿imaraykun Diospa siminta ñaupaqta kasukunanchis?

¹⁰ Jehová Diosta kusichinapaqqa mayninqa yaqapaschá familianchispa, amigonchiskunaq mana munasqanta ruwana kanqa. Chaypaq casarakuy munaq juj hermanapi piensasun: Paypa papanqa mamitanpas, yaqapaschá munanqa allin herenciata chaskiq runawan casarakunanta. Chay runa Diosta servisqanpi manaña allinchu kashan chaypas yaqapaschá papanqa kallpachanqa paywan casarakunanpaq. Allinmi chay taytaq ususin allin kananpi piensasqanqa, ama pisichikunanpaq piensaspachá chaytaqa ruwashan. Ichaqa, ¿pin chay ususinta yanapanqa Dioswan allinpi kananpaq? ¿Imatan Jehová Dios piensanman chaymanta? Chaypiqa yaqapaschá Mateo 6:33 texto yanapanqa, chaypin nin: “Diospa gobiernonta chanin kaynintawan ñaupaqta maskhaychis”, nispa. Respetananchisña papanchista mamitanchista chaypas, respetananchisña comunidadpi runakunata chaypas astawanqa kallpachakunanchis Jehová Diospa sonqonta kusichinapaqmi.

ALLINTAN TANTEANA MAYQENSI ALLIN KANMAN CHAYTA

11. ¿Filipenses 1:​9, 10 textopi ima nisqanmi yanapasunkiman imatas ruwanki chayta allinta qhawarinaykipaq?

¹¹ Bibliata t’aqwisqayki qhepamanqa allintan qhawarinayki mayqen ruwaysi aswan allin kanman chayta (leey Filipenses 1:​9, 10). ¿Imaynatan chayta ruwawaq? Chaypaqqa yachanaykin allin reparaq kayta. Allintan reparanayki imas kanqa jujninta ruwaqtiyki, imataqsi kanqa juj kaqta ruwaqtiyki chayta. Mayninqa facil-llan kanqa mayqenta ajllakuypas, mayninmi ichaqa sasa kanqa. Sasaña kanqa chaypas allin reparaq kanki chayqa atillankin mayqen ajllakuytapas.

12, 13. ¿Imaynatan allin reparaq kay yanapasunkiman llank’anata allinta ajllakunaykipaq?

¹² Chayta allinta entiendenapaq kaypi piensasun: Llank’anatas maskhashanki familiaykita uywanaykipaq, iskay llank’anatas tarirunki. ¿Mayqentan ajllakunki? Chaypaqqa allintan yachanayki sapanka llank’anamanta. Ima llank’anan chay llank’ana, ima horasmanta ima horaskaman llank’akun, wasimanta karupichu kashan, chaykunatan qhawarinayki. Iskaynin llank’anapas allin kashan Diosta serviq runapaq chayqa yaqapaschá ajllakuyta munanki mayqen llank’anas gustasunki chayta, maypis allinchata pagasunkiku chayta. Ichaqa manan chaykunallatachu qhawarinayki.

 ¹³ ¿Chay llank’anamanta jujnin jark’asunki juñunakuykunaman rinaykita chayri? ¿Tiempoykipas mana aypasunkichu familiaykita yanapanaykipaq chayri? Qhawarinaykin chaykunatapas. Jehová Diosta familiaykitawanmi imamantapas ñaupaqmanqa churanayki. Chaykunaman jina imatapas ruwanki chayqa Jehová Diosqa bendecinqan ima decisión ruwasqaykitapas.

14. ¿Imaynatan allin reparaq kaypas munakuq kaypas yanapawasunman jujkunata ama urmachinapaq?

¹⁴ Allin reparaq kasun chayqa manan noqanchispaq gustollanchispichu piensasunchis jujkunapipas piensasunmi, chhaynapin “mana pitapas urmachisunchu” (Filip. 1:10). Chaypiqa astawanqa piensananchis imayna p’achawansi churakusun, imaynatas allichakusunpas sumaqchakusunpas chayta qhawarispan. Yaqapaschá  noqanchispaqqa juj gustonchis kanmanña. Ichaqa, ¿chayta jujkuna mana allinpaq qhawarinman chayri? ¿Iñiqkunapas mana iñiqkunapas chaywan p’enqakunkuman ofiendekunkumanpas chayri? Allin reparaq kasun chayqa “jujkunaq” allinnintan maskhasun manan munaynillanchistachu (1 Cor. 10:​23, 24, 32; 1 Tim. 2:​9, 10). Chhaynapin rikuchisun jujkuna munakusqanchista respetasqanchistapas.

15. ¿Imapin allinta piensanayki manaraq ima decisiontapas ruwashaspayki?

¹⁵ Ima jatun ruwaypas ruwanayki kanqa chayqa, allintapuni piensay imakunas ruwana kanqa chay munasqaykita ruwanaykipaq chaypi. Jesuspas willarqanmi imaynas ñaupaqta “allinta tanteakuna” chayta (Luc. 14:28). Chhaynaqa allinta piensay jayk’a tiempotas may tukuy kallpatas chayman churanki chayta. Wakintaqa yaqapaschá familiaykiwan rimanayki kanqa chhaynapi paykunapas apoyanasuykipaq ¿Imaraykun allinpuni kanman chaykunata allinta piensaspa ruway? Allinta piensanki chayqa yaqapaschá reparanki imaynas wakin ruwaykunata mat’irinayki kanqa chayta, yaqapaschá jujniraymanta ima chayta ruwakunman. Familiaykitapas tapurinki chayqa paykunapas yanapasunkin ima decisión ruwasqaykipas allin lloqsinanpaq (Prov. 15:22).

ALLIN KANANPAQ JINA RUWAY

16. ¿Imatan ruwana ima ruway munasqanchispas allin lloqsinanpaq? (Qhaway “ Iman yanapasunkiman allinta piensaspa imatapas ruwanaykipaq”, nisqa willakuyta).

¹⁶ Kaypi yachasqanchisman jina imatapas ruwanki chayqa, allinmi ima ruwasqaykipas kanqa. Ñataq allintaña yachanki imachus ruwanaykimanta, ñataq Bibliapi textokunatapas qhawarinkiña, imachus Jehová Diosman gustan chaytapas qhawarinkiñataq chayqa, kunanqa Jehová Diospa yanapayninta mañakuy ima ruway munasqaykipas allin lloqsinanpaq.

17. ¿Imatan ruwana allinta piensaspa imatapas ruwanapaq?

¹⁷ Ñaupaqkunaqa yaqapaschá ima ruwasqaykipas allinkama lloqsirqasunki. Chaywanpas manan yuyayniykipichu ni experienciaykipichu confianayki, aswanpas Jehová Diospa yachayninpin. Paymi qosunki yachayta, allin yuyayta, allin reparaq kaytapas, chhaynapin allinta piensaspa imatapas ruwanki (Prov. 2:​1-5). Arí, Jehová Diosqa yanapasunkipunin paypaq sonqonpaq jina imatapas ruwanaykipaq (Sal. 23:​2, 3).