1. ¿Imaraykun allinpuni Jesuspa wañupusqanta sapa wata yuyariy?

 ¡JESUSPA sacrificio ruwasqanqa may jatunmi ¿riki?! (2 Cor. 9:15). Jesuspa chay sacrificio ruwasqanraykun Jehová Dioswanqa allinpi kashanchis, chayraykun wiñay kausaytapas chaskisunchis. Imaymanan razón kashan Jehová Diosta “gracias” ninanchispaq, munakuwasqanchisraykun wawan Jesustapas noqanchisrayku kachamurqan (Rom. 5:8). Chaykunata ama qonqananchispaqmi Señor Jesusqa kamachikurqan wañupusqan p’unchayta ama qonqananchispaq, sapa watanmi chaytaqa yuyarinanchis (Luc. 22:​19, 20).

2. ¿Imatan yachasunchis kay yachachikuypi?

² Kay 2025 watapiqa sábado 12 p’unchay abril killapin Jesuspa wañupusqantaqa yuyarikunqa. Chaymanqa llapallanchischá risunchis. Chay p’unchay chayamunankaman ichaqa llapallanchis piensasun imatas Jehová Diospas Jesuspas noqanchisrayku ruwarqanku chaypi. a Chaypaqmi astawan kaypi yachasunchis Jesuspa sacrificio ruwasqanmanta, yachasunmi imaynas Jehová Diospas Jesuspas chayta. Qatimuq yachachikuypitaq yachasunchis imaynapis Jesuspa sacrificio ruwasqanqa allinninchispaq chayta, imaynatas chaymanta agradecido kasqanchista rikuchisunman chaytapas.

JESUSPA SACRIFICIO RUWASQANMI DIOSPA IMAYNA KASQANTA RIKUCHIN

3. ¿Imaynapin juj runaq wañusqanwan waranqanpi runakuna librasqa kankuman? (Qhaway kay parrafopaq dibujokunata).

³ Jesuspa sacrificio ruwasqanqa Jehová Dios chanin Dios kasqantan rikuchin (Deut. 32:4). ¿Imaraykun chayta ninchis? Adán  mana kasukuq kasqanraykun llapanchis herenciata jina chaskirqanchis juchata wañuytawan (Rom. 5:12). Chay juchamanta wañuymantawan kacharichiwananchispaqmi Jehová Diosqa Jesusta kachamurqan. Ichaqa, ¿imaynapin juj runalla llapa runakunata libranman karqan? Chaymanta rimaspan apóstol Pabloqa nirqan: “Imaynan juj runallaq [Adanpa] mana kasukusqanrayku askha runakuna juchasapa kapurqanku, chhaynallataqmi juj runallaq [Jesuspa] kasukusqanrayku askha runakuna chaninpaq jap’isqa kapunqaku”, nispa (Rom. 5:19; 1 Tim. 2:6). Sut’in kashan ¿riki? Juj runallaq juchallikusqanraykun llapanchis juchasapa kapurqanchis, juj runalla ch’uya sonqo kasukuq kasqanraykun librasqapas kasunchis.

4. ¿Imaraykun nisunman “manan allinchu kanman karqan Adanpa miraynin runakunamanta kasukuq kaqkunata wiñaypaq kausachiyqa” nispa?

⁴ Ichaqa, ¿wañunanpunichu karqan Jesús librasqa kananchispaq? Adanpa miraynin runakunamanta kasukuq kaqkunata kausachillanman karqan Jehová Dios ¿chayrí? Paykunaman wiñay kausayta qonman karqan ¿chayrí? Runakunaq qhawarisqanman jinaqa yaqapaschá chayqa allin kanman karqan, ichaqa yachasqanchis jinapas Jehová Diosqa chanin Diosmi. Payqa manan jinallataqa qhawanmanchu Adanpa juchapakusqantaqa, chayta ruwanman chayqa yanqatapas rimanman jinachá kanman.

5. ¿Imaraykun nisunman “Jehová Diosqa chanin kaqtapunin allin kaqtapunin ruwanqa” nispa?

⁵ Ichaqa manachus Jehová Dios Jesusta kachamunman karqan ¿chayrí? ¿Iman pasanman karqan? ¿Iman pasanman karqan Adanpa juchasapa wawankuna jinalla wiñaypaq kausaqtinku? Chaytachus Dios ruwanman karqan chayqa manachá chaninchu kanman karqan. Runakunapas ninkumanchá karqan “chhaynataq Dios chayqa imakunatawanchá mana allinta ruwanqa”, nispa. “Wakin promesa ruwasqantapas manapaschá junt’anqachu”, nispa. Ichaqa manan chaymantaqa llakikunañachu Jehová Diosqa allintapunin imatapas ruwan. Sapallan wawanña wañunan karqan chaypas chanin kaqtan ruwarqan. ¿Imatan chaymanta yachasunman? Jehová Diosqa allin kaqtapunin ruwanqa.

6. ¿Imaraykun nisunman “Jesuspa sacrificio ruwasqanqa Jehová Dios jatun munakuq kasqantan rikuchin” nispa? (1 Juan 4:​9, 10).

⁶ Kaykama yachasqanchis jina, Jesuspa sacrificio ruwasqanmi rikuchin imaynas Jehová Diosqa chanin Dios chayta. Ichaqa manan chayllatachu rikuchin ancha munakuq kasqantawanmi rikuchin (Juan 3:16; leey 1 Juan 4:​9, 10). Munakuwasqanchisraykun Jehová Diosqa wawanta kachamurqan noqanchisrayku wañunanpaq, chhaynapi wiñaypaq kausananchispaq familian ukhupi kananchispaqwan. Chaypaq kaypi piensay: Adanqa juchallikusqan qhepamanqa Diospa familianmantan lloqsipurqan. Noqanchisqa  chay familiamanta karupin nacerqanchis. Ichaqa Jesuspa wañusqanraykun iñiqkunaqa Diostapas kasukuqkunaqa jujmanta payman asuykapushanku, paypa familianmantan kapushanku. Imapiña juchallikurqanku chaypas perdonta mañakuqtinkuqa perdonanmi Jehová Diosqa. Paypa perdonasqan runakunaqa munaytan paykunapura kausanku. ¿Manachu chaykuna rikuchin ¡Jehová Diosqa may munakuq kasqanta!? (Rom. 5:​10, 11).

7. ¿Imaraykun nisunman “Jesuspa ñak’arisqanpi piensasun chayqa allintan reparasun Diospa munakuyninta” nispa?

⁷ Imakunatas Jehová Dios aguantarqan chayta allinta entiendesun chayqa, astawanmi rikusun paypa munakuyninta. Satanaspa rimasqanman jinaqa, manas pipas atinmanchu sasa tiempokunapi Diosta serviytaqa. Chay yanqa kasqanta rikuchinanpaqmi Jehová Diosqa jinallata qhawarqan Jesuspa ñak’arinanta (Job 2:​1-5; 1 Ped. 2:21). Jesusta k’amishaqtinku, jasut’ishaqtinku, k’aspimanpas warkushaqtinkuqa Jehová Diosqa rikusharqanmi llapa chaykunata. Jehová Diosqa rikurqanmi Jesuspa may nanaywan wañusqantapas (Mat. 27:​28-31, 39). Jehová Diosqa atinmanmi karqan llapa chaykunata sayachipuyta. “Diospa Churinmi kani, nintaq chayqa, Diosyá librachun munakun chayqa”, nispa runakuna nishaqtinpas Diosqa sayachipunmanmi karqan Jesuspa sufrisqanta (Mat. 27:​42, 43). Ichaqa sayachinmanchus karqan chayqa manan librasqachu kasunman karqan, manan imapas suyakuyninchis kanmanchu karqan. Chaypi piensaspan Jehová Diosqa jinallata qhawarqan wawanpaq sufrinanta, wañunankama ñak’arinanta.

8. ¿Imaraykun nisunman “Jehová Diosqa maytachá llakikurqan Jesusta ñak’ariqta rikuspaqa” nispa? (Qhaway kay parrafopaq dibujota).

⁸ Rikusqanchis jina, Jehová Dios ancha atiyniyoqña chaypas manan jark’arqanchu Jesuspa ñak’arinanta ni wañunantapas. Ichaqa manan chaywanqa nisunmanchu: “Mana sonqoyoqchá payqa”, nispaqa. Jehová Diosqa sienteq Diosmi, chayraykun noqanchispas mayninqa llakikunchis, waqanchis, kusikunchis ima; chhaynatan payqa kamawasqanchis. Paymanta rimaspan Bibliapi nin: “Sonqontan k’irirqanku” “llakichirqankun”, nispa (Sal. 78:​40, 41). Chaypaq piensasun Abrahanpi Isaacpi ima. Jehová Diosmi Abrahanta kamachirqan wawan Isaacta sacrificiota jina jaywananpaq (Gén. 22:​9-12; Heb. 11:​17-19). Abrahanqa llakisqachá kasharqan, nanasqachá kasharqan wawanta sacrificiopi jaywananpaq alistakushaspaqa. Jehová Diospas chhaynachá tarikurqan Jesusta wañuchinankukama ñak’arichisqankuta rikuspaqa. Maytapunichá payqa llakikurqan, maytachá sonqonpas nanarqan (jw.org nisqa paginapi qhaway Paykuna jina kay: Abrahán (iskay kaq parte) nisqa videota).

9. ¿Imaniwaqmi Jehová Dios qantapas juj kamachinkunatapas mayta munakuwasqanchismanta? (Romanos 8:​32, 38, 39).

⁹ Jesuspa sacrificio ruwasqanmi rikuchin imaynas Jehová Diospa munakuyninqa may jatunpuni  chayta. Manan mayqen amigonchispas ni familianchispas pay jinaqa munakuwasunmanchu (leey Romanos 8:​32, 38, 39). Jehová Diosqa noqanchis kikinchismantapas astawanraqmi munakuwanchis. Chaypaq kaypi piensariy: ¿Munashankipunichu wiñaypaq kausayta? Jehová Diosqa qanmantapas astawanraqmi munashan. ¿Munashankipunichu juchaykikuna pichasqa kapunanta? Jehová Diosqa qanmanta astawanraqmi munashan. ¿Imatan ruwananchis chaykunata chaskinanchispaq? Kasukuqmi kananchis, noqanchisrayku imachus ruwasqanpin tukuy sonqo iñinanchis. Nisqanchis jina, Jesuspa sacrificio ruwasqanqa Jehová Dios mayta munakuwasqanchistan rikuchin. Dios kay pachata gobiernapuqtinqa astawanraqmi yachasunchis paypa munakuyninmanta (Ecl. 3:11).

SACRIFICIO RUWASQANMI JESUSPA IMAYNA KASQANTA RIKUCHIN

10. a) ¿Imatan manapuni munarqanchu Jesús? b) ¿Imaynatan Jesús Diospa sutinta ch’uyancharqan? (Qhaway “ Jesús Jehová Diospa sutinta ch’uyanchan”, nisqa willakuyta).

¹⁰ Jesusqa Taytan allin qhawarisqa kanantan munan (Juan 14:31). Chaymantapas Jesusqa manan munaqchu runakuna imaymanata k’amisqanwan Taytan pisipaq qhawarisqa kananta, sutin qhellichasqa kanantapas. Chaymi nirqan: “Taytáy, munanki chayqa kay copata noqamanta karunchay”, nispa (Mat. 26:39). Jesusqa wañupunankaman manapuni Diosmantaqa t’aqakurqanchu chhaynapin payqa Diospa sutinta ch’uyancharqan.

11. ¿Imaynatan Jesús rikuchirqan maytapuni runakunata munakusqanta? (Juan 13:1).

¹¹ Jesusqa vidanta sacrificiopi qospan rikuchillarqantaq imaynas sapanka runakunamanta llakikun chayta. Payqa qatikuqnin runakunapin astawanqa piensan (Prov. 8:31; leey Juan 13:1). Manaraq wañupushaspan Jesusqa yacharqanña imaynas imaymanapi ñak’arinan  karqan chayta, imaynas wañunankama sufrichinanku karqan chayta. Chaywanpas manan chayraykuchu yanqa-yanqallata predicarqan, aswanpas tukuy sonqomantan Diosmantaqa yachachirqan, sonqomantan jujkunata yanaparqan. Wañupunanña kashaqtinpas apostolkunaq chakintan maqchirqan, chaywanmi juj jatun yachayta paykunaman qorqan. Chaymantapas allintan paykunataqa kallpacharqan (Juan 13:​12-15). K’aspipi warkusqa kashaspapas chaypi kaq suwatan munayta rimapayarqan. Mamitan Mariatapas Juanmanmi encargarqan (Luc. 23:​42, 43; Juan 19:​26, 27). Chaykunata ruwaspan Jesusqa rikuchirqan imaynas runakunataqa anchatapuni munakurqan chayta. Vidanta qospan astawanraq rikuchirqan maytapuni runakunata munakusqanta.

12. ¿Imakunatawanmi Jesús noqanchisrayku ruwashan?

¹² Jesusqa “juj kutillatan wañurqan” chhaynapi juchata chinkachipunanpaq (Rom. 6:10). Chaywanpas payqa kunankamapas llank’ashallanmi, imaymana allinkunata qowananchispaqmi payqa llank’ashan. Paymi kamachiqninchis, paymi Uma Sacerdotenchis, paymi kay pachapi Diospa llaqtantapas umallishan (1 Cor. 15:25; Efes. 5:23; Heb. 2:17). Paymi churasqa kashan janaq pachapi ajllasqakunata juñunanpaq, ancha askha runakunata juñunanpaqpas chaykunataqa ruwanqa manchay ñak’ariy tiempo manaraq tukushaqtinmi (Mat. 25:32; Mar. 13:27). b Chaymantapas paymi qhawarishan kay tiempopi payta qatikuqkuna iñiyninkupi allin alimentasqachus kashanku icha manachus chayta (Mat. 24:45). Waranqa wata kamachikusqan tiempopas payqa llank’ashallanqan, noqanchisraykun imaymana allinkunata ruwanqa. Kaykama rikusqanchis jina Jehová Diosqa wawanta kachamushaspaqa, manan noqanchisrayku wañunallanpaqchu kachamurqan, noqanchisrayku imaymana allinkunata ruwananpaq iman kachamurqan.

YACHASHALLAY DIOSMANTAPAS JESUSMANTAPAS

13. ¿Imaraykun nisunman “allinta piensarisun chayqa astawanmi yachasun Diospa munakuyninmanta Jesuspa munakuyninmantapas” nispa?

¹³ Imatachus Jehová Diospas Jesuspas noqanchisrayku ruwarqanku chaypi allinta piensasun chayqa, astawanmi yachasun paykunaq munakuwasqanchismanta. Chaypaqqa yaqapaschá leewaq Jesuspa wañupusqanta yuyarinapaq semanakunapi Mateo, Marcos, Lucas, Juan librokunamanta mayqentapas. Chayta leespaqa ama jujllapichu llapanta leeruy, aswanpas  pisi-pisimanta leey, piensarispa leey; mayqenkunachá yanapasunki astawan Jehová Diosta Jesustapas munakunaykipaq chaykunapi piensariy. Chaymantapas imachus yachasqaykita jujkunaman willariy.

14. Salmos 119:97 textopi nisqanman jina, ¿imatan ruwananchis Jesuspa sacrificio ruwasqanmanta jujkunamantapas astawan yachananchispaq? (Qhaway kay parrafopaq fotota).

¹⁴ Unayña Jehová Diosta servishanki chayqa yaqapaschá niwaq: “¿Imatawanmi yachayman Diospa chanin kasqanmanta, munakuyninmanta, Jesuspa sacrificio ruwasqanmantapas?”, nispa. Ichaqa imaymanan chaykunamantaqa yachana kashan, ¿iman yanapasunkiman chaykunamanta astawan yachanaykipaq? Chaykunamanta rimaq qelqanchiskunata leey, chaypi kaq ima textotapas mana allintachu entiendenki chayqa, astawan chayta t’aqwiriy, chaypi yachasqaykipitaq piensariy. Piensay imatas Jehová Diosmanta Jesusmantapas yacharqanki chaypi (leey Salmos 119:97).

15. ¿Imaraykun maskhashanallanchis Bibliapi kaq qorikunata?

¹⁵ Bibliata leespaqa estudiaspapas tukuy sonqowan chaytaqa ruway, ganaswan leey. Bibliata leeyqa qorita maskhay jinan, qorita maskhaq runakunaqa unaymi chayta maskhanku. Wakinqa askha p’unchaymi chayta maskhaspa kanku, pacienciawanmi chayta ruwanku. Imayniraq juch’uytaña tarinku chaypas, paykunapaqqa anchatan chayqa valen. Bibliapi kaq yachaykunaqa qorimantapas astawanraqmi valen (Sal. 119:127; Prov. 8:10). Chhaynataq chayqa pacienciawan chayta leey, amapuni saqeychu Biblia leeytaqa, sapa p’unchaypas leellaypuni (Sal. 1:2).

16. ¿Imaynatan qatikusunman Jehová Diosta Jesustapas?

¹⁶ Estudiaspaqa piensay imaynatas chaypi nisqanman jina ruwawaq chaypi. Yaqapaschá piensawaq imaynas Jehová Dios jina lliutapas igualta qhawarinayki chaypi, piensawaqmi Jesús Diosta munakusqanpipas, payta munakusqanraykun Jesusqa imaymanapi ñak’arirqan. Chaykunapi piensasun chayqa, faciltan kallpachakusun hermanonchiskunata yanapananchispaq, sasaña kanqa chaypas chaytan ruwasun. Kallpachakusunmi Diospa siminta jujkunaman willananchispaqpas, Jesuspa sacrificio ruwasqanmanta willananchispaqpas.

17. ¿Imatan yachasunchis qatimuq yachachikuypi?

¹⁷ Allinta entiendesun Jesuspa sacrificio ruwasqanta chayqa, astawanmi Jehová Diostapas Jesustapas munakusunchis. Paykunapas astawanmi noqanchista munakuwasunchis (Juan 14:21; Sant. 4:8). Chhaynaqa kallpachakusun Jesuspa sacrificio ruwasqanta allinta entiendenanchispaq. Qatimuq yachachikuypin yachasunchis imaynapis Jesuspa sacrificio ruwasqan allinninchispaq chayta, imaynatas chaykuna ruwasqanmanta Jehová Dioswan agradecido kasqanchista rikuchisunman chaymantawan.