1. ¿Imata ruwaspan Jehová Diospa sonqonta kusichinchis?

 KAYPI piensay: ¿Imaynan kawaq sichus juj munakusqayki amigoykiman juj munay regalota qowaq, paytaq chayta juj k’uchuman wijch’uykunman chay? Llakikuwaqchá chayta yacharuspaqa. Ichaqa, ¿imatan ruwawaq chay amigoyki chay qosqayki regalowan churakuqtin, chaymantapas chay regalomanta “gracias” nisuqtiyki? Maytachá kusikuwaq ¿riki? Chhaynatan Jehová Diospas juj munay regalota qowarqanchis. Wawan Jesustan noqanchisrayku wañunanpaq kay pachaman kachamurqan. ¡May munakuq kayninpin chayta ruwarqan! Chaymantan Jehová Diosta “gracias” ninanchis. Chayta ruwaspan Jehová Diospa sonqonta kusichisunchis (Juan 3:16; Rom. 5:​7, 8).

2. ¿Imakunamantan kaypi yachasunchis?

² Agradecesqaña kashanchis chay munay regalomanta chaypas, manapaschá ñaupaqpi jinañachu chayta valorashanchis. Chayqa juj regalota juj cajaman winaruspa juj k’uchuman wijch’uykuy jinan kanman. Ichaqa chay ama pasawananchispaqqa Jehová Diospa Jesuspa imakunachus ruwasqankupin piensananchis, chaypin sapa kutilla yuyaymanananchis. Kay yachachikuymi chayta ruwananchispaq yanapawasunchis. Chayraykun kaypi yachasunchis imaraykus Jesuspa wañusqan allinninchispaq karqan chayta, ima bendicionkunatas jamuq tiempoman chaskisunchis chaytapas. Chaymantapas yachasunmi imaynatas Jehová Diospa may munakuq kasqanmanta agradecesqa kasqanchista rikuchisunman chaytapas.

¿IMAPIN YANAPAWANCHIS JESUSPA IMACHUS RUWASQAN?

3. ¿Imaraykun allinninchispaq karan Jesuspa wañusqan?

³ Jesuspa wañusqanraykun Jehová Diosqa juchanchiskunata perdonapuwanchis. Ichaqa manan obligasqachu Jehová Diosqa  chayta ruwan, aswanpas munakuwasqanchisraykun. Chhayna kasqanraykun Davidpas Jehová Diosman takishaspa nirqan: “Qanqa Diosníy Jehová, sumaq sonqo Diosmi kanki, liston kashanki juchata perdonanaykipaqpas”, nispa (Sal. 86:5; 103:​3, 10-13).

4. ¿Pikunaraykun Jehová Dios wawanta qorqan? (Lucas 5:32; 1 Timoteo 1:15).

⁴ Wakinmi ninku: “Noqaqa manan Jehová Diospa perdonawananpaq jinachu kani”, nispa. Ichaqa llapanchispas juchayoq kasqanchisraykun mana chayta chaskikunanchispaq jinachu kanchis. Chaymanta rimashaspan apóstol Pablopas nirqan: “Manataqmi apóstol nisqa kanaypaq jinapaschu kani”, nispa. Chaymantataq nirqan: “Ichaqa Dios ancha sumaq sonqo kasqanraykun kay llank’anapi kashani”, nispa (1 Cor. 15:​9, 10). Arí, apóstol Pabloq nisqan jina, juchanchismanta pesapakuqtinchisqa Jehová Diosqa perdonapuwanchismi. Ichaqa, ¿imaraykun chayta ruwan? Anchata munakuwasqanchisraykun. Chhaynaqa sichus piensashanki Jehová Diospa perdonninta mana chaskikunaykipaq chayqa, kayta yuyariy: Jehová Diosqa manan wawantaqa kachamurqan chanin runakunarayku wañunanpaqchu, aswanpas juchasapakunarayku wañunanpaqmi, chhaynapi juchanchismanta pesapakuspa Diosman kutirikunanchispaq (leey Lucas 5:32; 1 Timoteo 1:15).

5. ¿Imaraykun mana ninachu “Jehová Diostataq servishani chayqa perdonasqapunin kasaq”, nispa?

⁵ Wakinqa unayñapaschá Jehová Diosta servishanchis, ichaqa manan chayraykuchu ninanchis: “Payta servisqaymantaqa Jehová Diosqa perdonawanqapunichá”, nispaqa. Arí, Jehová Diosqa valoranmi payrayku imaymana ruwasqanchista (Heb. 6:10). Ichaqa manan payta servisqanchisraykuchu perdonnintaqa chaskikunchis, aswanpas Jesuspa wañusqanraykun perdonasqa kanchis. Chayraykun mana ninanchischu: “Jehová Diosta servisqayraykuchá perdonasqaqa kani”, nispaqa. Chhaynata piensashasunman chayqa, yanqapaqpas wiraqochanchis Jesús sacrificiota ruwanman karqan jinatan qhawarishasunman (tupanachiy Gálatas 2:21 textowan).

6. ¿Imaraykun apóstol Pablo tukuy atisqanta kallpachakuran Jehová Diosta servinanpaq?

⁶ Yachasqanchis jina, apóstol Pabloqa imaymanatan ruwarqan Jehová Diosta servinanpaq. Ichaqa, ¿imaraykun chayta ruwarqan? Manan chay jawa perdonasqa kayta munaspachu, aswanpas Jehová Dios may sumaq sonqo kasqanmanta agradecekuspan chaytaqa ruwarqan (Efes. 3:7). Noqanchispas pay jinan kananchis, manan perdonasqa kayta munaspallachu Jehová Diostaqa servinanchis, aswanpas Jehová Dios sumaq sonqo kasqanmanta khuyapayakuq kasqanmanta agradecekuspan chaytaqa ruwananchis.

7. ¿Imaraykun Jesuspa wañusqan allinninchispaq kallarqantaq? (Romanos 5:1; Santiago 2:23).

⁷ Chaymantapas Jesuspa wañusqanraykun kunanqa atinchis Jehová Dioswan allin amigontin kayta. a Ñaupaq yachachikuypi yachamusqanchis jina, runakunaqa juchayoqñan nacemunchis, chaymi mana allinpichu Jehová Dioswan karqanchis. Kunanmi ichaqa Jesuspa wañusqanrayku paywan allinpi kashanchis, amigontin iman kayta atinchis (leey Romanos 5:1; Santiago 2:23).

8. ¿Imaraykun paywan rimayta atisqanchismanta Jehová Diosta agradecekunanchis?

⁸ Manan chayllapaschu, Jehová Dioswan amigontin kasqanchisraykun paymanta mañakuyta atinchis. Payqa manan juñunakuypi kashaspa mañakusqallanchistachu uyarimun, sapallanchispi mañakusqanchistapas uyarimunmi.  Diosmanta mañakuyqa maytan yanapawanchis, mañakusqanchis qhepamanqa thajmi kapunchis ¿riki? Mañakuspaqa Diosmanpas astawanmi asuykunchis astawanmi munakapunchispas (Sal. 65:2; Sant. 4:8; 1 Juan 5:14). Jesuspas kay pachapi kashaspaqa sapa kutillanmi Taytanmanta mañakuq. Payqa yacharanmi mañakusqanta Jehová Dios uyarimushasqanta, yacharanmi chayta ruwaspa Taytanman astawan asuykushasqantapas (Luc. 5:16). Chayraykun Jehová Diosta “gracias” ninanchis wawan Jesuspa sacrificakusqanmanta. Paypa wañusqanraykun kunanqa atinchis Jehová Dioswan amigontin kayta, paymanta mañakuyta ima.

¿IMAPIN YANAPAWASUNCHIS JAMUQ TIEMPOPI?

9. ¿Imatan Jesuspa wañusqanrayku jamuq tiempopi chaskikusunchis?

⁹ ¿Imatan mosoq pachapi chaskikusunchis Diosta kasukuq runakuna? Jesuspa wañusqanraykun wiñay kausayta chaskisunchis. Wakin runakunaqa manan chaypi creenkuchu, juj mosqoylla kananpaqmi piensanku. ¿Imarayku? Waranqa-waranqa watakunaña askha runakuna wañusqankurayku. Ichaqa Jehová Diosqa manan wañunanchispaqchu kamawarqanchis, aswanpas wiñaypaq kausananchispaqmi. Sasapaqña chayta kunan qhawasunman chaypas junt’akunqapunin chayqa. Jehová Diosqa ñan chayta chaskinanchispaq wawanpa kausayninta qonña (Rom. 8:32).

10. ¿Imatan janaq pachapaq ajllasqa iñiqkuna waj t’aqa ovejakunapas suyakushanku?

¹⁰ Jehová Diosqa chay suyakuyninchispi piensananchista chayta kusisqa suyakunanchista iman munan. Chaytan janaq pachapaq ajllasqa iñiqkunapas ruwanku. Paykunaqa maytan munashanku janaq pachamanta Jesuswan kuska kamachikamuyta (Apo. 20:6). Waj t’aqa ovejakunapas kusisqan suyakushanku juj munay paraisota. Chaypiqa manañan nanaypas ni ñak’ariypas kanqañachu (Apo. 21:​3, 4). Qanrí, ¿munashankiñachu chay munay paraisopi kausayta? Chhayna kaqtinqa allinmi, chayqa manan yanqachu. Jehová Diosqa kay pachapi kausananchispaqmi kamawarqanchis. Chhaynaqa, ¡may munaychá kanqa kay pachapi juj sumaq paraisopi kausayqa!

11, 12. ¿Ima munay bendicionkunatan mosoq pachapi chaskikusunchis? (Qhaway kay parrafopaq dibujokunata).

 ¹¹ Arí, mosoq pachapi kausayqa munaypunin kanqa. Chaypiqa manañan kanqachu onqoypas ni wañuypas, chaymi chaykunamantaqa manaña llakikusunñachu (Isa. 25:8; 33:24). Chaypiqa imachus munasqanchistan Jehová Diosqa qowasun. Chhaynataq chayqa, ¿chay mosoq kausaypi ima ruwaytan munashanki? ¿Phalaq animalkunamantachu yachayta munashanki? ¿Guitarra tocaytachu, takiytachu, dibujaytachu yachayta munashanki? Llapa chaykunatan mosoq pachapiqa ruwasun. Chaymantapas chaypiqa askhataq ruwana kanqa chayqa necesitakunqan arquitectokuna, wasi jatarichiyta yachaqkuna, chajrata llank’aqkuna, mijuna wayk’uqkuna, jardinerokuna ima; chaypi juj ruwaykunapi iman yanapakuyta atisun (Isa. 35:1; 65:21). Chaymantapas wiñaypaqtaq kausasun chayqa, imaymana ruwaytachá chaypiqa yachasun.

¹² Chaymantapas paraisopiqa llapa kausarimpuqkunatan chaskisunchis. ¡May munaychá chayqa kanqa! (Hech. 24:15). Chaymantapas chaypiqa yachashallasunmi Jehová Diosmanta kamasqankunamanta ima (Sal. 104:24; Isa. 11:9). Astawanqa ch’uya concienciawanmi chaypiqa mana imamanta juchachakuspa Jehová Diosta servisunchis. ¡¿Manachu chay munay bendicionkunata chaskikuy aswan allin kay pachapi juj ratu kusirikuymantaqa?! (Heb. 11:25). Arí, chay kausayta suyakuyqa aswan allinmi kay pachapi imatapas chaskiymantaqa. Ichaqa chay suyakusqanchisqa manan mosqoyllachu, chayqa Jesuspa wañusqanraykun pisi tiempollamanta junt’akunqa.

ANCHA MUNAKUQ KASQANMANTA JEHOVÁ DIOSTA AGRADECEKUSUN

13. ¿Imata ruwaspan rikuchisunman Jehová Dios sumaq sonqo kasqanmanta agradecesqa kasqanchista? (2 Corintios 6:1).

¹³ ¿Imata ruwaspan rikuchisunman Jehová Dios wawanta qowasqanchismanta agradecesqa kasqanchista? Dios serviyta ñaupaqman churaspan (Mat. 6:33). Noqanchisqa manañan “munasqanchista ruwananchispaqchu kausananchis, aswanpas Cristollapaqñan kausananchis” (2 Cor. 5:15). Chayta ruwaspan Jehová Dios may sumaq sonqo kasqanmanta agradecesqa kasqanchista rikuchisunchis (leey 2 Corintios 6:1).

14. ¿Imata ruwaspan rikuchisunman Jehová Diospa yuyaychayninkunapi confiasqanchista?

¹⁴ ¿Imaynatan rikuchillasunmantaq Jehová Diospa sumaq sonqo kasqanmanta agradecesqa kasqanchista? Yuyaychayninkunata kasukuspan. Ichaqa, ¿imaynatan chayta ruwasunman? Manaraq juj carrerata estudiashaspa manaraq juj llank’anata chaskikushaspan imaynatachus Jehová Dios chaykunata qhawarin chaykunapi piensarinanchis, chayman jinataq ruwananchis (1 Cor. 10:31; 2 Cor. 5:7). Jehová Diospa yuyaychayninkunaman jina imatapas ruwasun chayqa, astawanmi payman asuykusunchis, astawanmi promesankunapipas confiasunchis (Rom. 5:​3-5; Sant. 2:​21, 22).

15. ¿Imakunata ruwaspan rikuchisunman Jehová Dios wawanta qowasqanchismanta may agradecesqa kasqanchista?

 ¹⁵ Jehová Dios wawanta qowasqanchismanta agradecido kasqanchistaqa rikuchillasuntaq, Jesuspa wañusqanta yuyarina p’unchaykunapi Diospa munayninta astawan ruwaspan. Kallpachakunanchismi chaypi kananchispaq jujkunata invitamunanchispaqpas (1 Tim. 2:4). Jujkunata invitamushaspaqa willananchismi imaraykus chay p’unchayqa juj jatun p’unchay chayta. Chaymantapas jw.org paginapin qhawachisunman ¿Imaraykun wañuran Jesús? Jinallataq Jesuspa wañusqanta yuyarisun nisqa videokunata. Umalliqkunapas kallpachakunankun iñiypi chiriyapuqkunata invitamunankupaq. Chay chinkasqa ovejakuna Diospa llaqtanman kutimpuqtinkuqa may kusikuychá kanqa kay pachapipas janaq pachapipas (Luc. 15:​4-7). Chaymantapas Jesuspa wañusqanta yuyarina tutaqa astawanqa kallpachakunanchis chayllaraq jamuqkunata sumaqta chaskinanchispaqmi. Unaymanta jamuqkunatapas sumaqtan chaskinanchis, kallpachananchis iman. Chhaynaqa, ¡llapa jamuqkunata sumaqta chaskisun! (Rom. 12:13).

16. ¿Imaraykun Jesuspa wañusqanta yuyarina p’unchaykunapi astawanraq kallpachakunanchis Diosmanta willaq lloqsinapaq?

¹⁶ Chaymantapas chay p’unchaykunaqa astawanraqmi Diosmanta willaq lloqsinanchis. Chayta ruwaspan rikuchisunchis Jehová Diospas Jesuspas imachus ruwasqankumanta agradecesqa kasqanchista. Chay p’unchaykuna astawanraq lloqsisun chayqa sut’itan reparasun Jehová Diospa yanapayninta, chhaynapitaq astawan paypi confiasun (1 Cor. 3:9). Chaymantapas chay p’unchaykunaqa kallpachakusun Jesuspa imakunachus ruwasqanmanta ajllasqa textokunata leenapaq. Chay textokunataqa t’aqwirisunmanmi sapallanchispi Bibliata estudiashaspapas.

17. ¿Imata rikuspan Jehová Diosqa astawan kusikun? (Qhaway “ ¿Imakunata ruwaspan rikuchisunman agradecido kasqanchista?”, nisqa willakuyta).

¹⁷ Ichaqa imapipas tarikusqaykirayku mana atinkichu kaypi llapa yuyaychaykunaman jina ruwayta chayqa, ama llakikuychu. Jehová Diosqa manan jayk’aqpas jujkunawanqa comparawasunmanchu. Aswanmi payqa sonqonchis ukhupi imaynachus kashanchis chayta qhawashan. Chaymantapas payqa allintan yachashan wawanta qowasqanchismanta may agradecesqa kasqaykita (1 Sam. 16:7; Mar. 12:​41-44).

18. ¿Imakunamantan Jehová Diostapas Jesustapas “gracias” ninanchis?

¹⁸ Kaypi yachasqanchis jina, Jesuspa wañusqanraykun juchanchiskunamanta perdonasqa kanchis, paypa wañusqanraykun Jehová Dioswanpas amigontin kayta atinchis, chayraykun jamuq tiempopipas wiñay kausayta chaskikusunchis. Chhaynaqa, Jehová Diosta “gracias” nisun munakusqan wawanta qowasqanchismanta (1 Juan 4:19). Jesustapas “gracias” nisun; paypas munakuwasqanchisraykun vidanta sacrificiopi jaywarqan (Juan 15:13).