1. ¿Imapin masta piensanku yaqa llapa runakunapas?

 YAQAPASCHÁ repararqanki, kay tiempo runakunaqa yaqa llapankupas paykunallapin masta piensanku ¿riki? Wakinqa imakunachus ruwasqankumanta maykunamanchus chayasqankumantan redes sociales nisqakunaman fotokunata videokunata ima churanku, alabakuq jina jatunchakuq jinan chaykunata ruwanku. Kamaqninchis Jehová Diosta jatunchaqkunan ichaqa pisilla kanku. Ichaqa, ¿iman Jehová Diosta jatunchay? ¿Imaraykun payta jatunchananchis? ¿Imaynatan payta jatunchasunman? Chaykunamantan kaypi yachasunchis. Yachallasuntaqmi imaynas pisi tiempollamanta pay kikin sutinta jatunchanqa chaytapas.

¿IMAN JEHOVÁ DIOSTA JATUNCHAY?

2. ¿Imaynatan Jehová Dios Sinaí orqopi rikuchirqan may jatun atiyniyoq kasqanta? (Qhaway dibujota).

² Bibliaq willasqanman jinaqa Jehová Diosqa may jatun Diosmi. Israel runakuna Egipto llaqtamanta lloqsimushaqtinkun Jehová Diosqa chhayna kasqanta rikuchirqan. Sinaí orqoman chayaqtinkun llapa Israel runakuna chaypi juñukurqanku, Diospa siminta uyariqmi chaypi juñukurqanku. Chayllamanmi Sinaí orqota manchakuy yana phuyu junt’aykurqan, orqomantapas askhan q’osñi q’osñirimurqan, lliphipipiy rayo t’ojay iman karqan, oveja waqra tocaypas manchakuytaraqmi uyarikurqan (Éx. 19:​16-18; 24:17; Sal. 68:8). Llapa chayta rikuspaqa maytachá mancharikurqanku Israel runakunaqa. Maytachá admirakurqanku Jehová Diosqa may jatun atiyniyoq kasqanta rikuspaqa.

3. ¿Iman Jehová Diosta jatunchay?

 ³ Chhayna jatuntaq Jehová Dios chayqa, ¿noqanchis atisunmanchu payta jatunchayta payta alabayta? Arí atisunmanmi. Chaypaqqa pay may atiyniyoqchus may munakuqchus kasqantan lliuman willananchis. Chaymantapas imataña ruwanchis chaypas paytan jatunchananchis. Paypa atiyninwanmi llapa imatapas ruwayta atinchis (Isa. 26:12). Chaytan rey Davidpas ruwarqan. Juj kutinmi payqa llapa Israel runakunaq ñaupanpi Jehová Diosta nirqan: “Qanqa Jehová Diosníy, ancha jatunmi atiyniyoqmi kanki, qanqa k’ancharinkiraqmi ancha munaypunin kanki. Janaq pachapi kaqkunapas kay pachapi kaqkunapas lliumi qanpa”, nispa. David mañakuyta tukuqtin jinan Israel runakunaqa Jehová Diosta yupaycharqanku (1 Crón. 29:​11, 20).

4. ¿Imaynatan Jesús jatuncharqan Jehová Diosta?

⁴ Jesuspas kay pachapi kashaspaqa Jehová Diostan jatunchaq, paytan alabaq. Ima milagrotapas ruwaspaqa sut’itan willakuq imaynas Diospa atiyninwan chayta ruwashan chayta (Mar. 5:​18-20). Chaymantapas imayna rimasqanpi jujkunata imayna qhawarisqanpin rikuchiq Jehová Diosta jatunchasqanta. Chaypaq yachasun juj kuti imachus pasarqan chayta. Juj kutinmi Jesusqa juj sinagoga nisqapi yachachisharqan, chaypin kasharqan chunka pusaqniyoq wataña millay espirituq onqochisqan warmipas. Chay espirituq onqochisqanmi chay warmiqa k’umusqalla puriq. Maytachá payqa chaywan sufrirqan. Chayta rikuspan Jesusqa munakuywan nirqan: “Ususíy, onqoyniykimantan kacharichisqa kanki”, nispa. Jinan payqa llamiykurqan, chay warmitaq kaq ratu recto sayaripurqan. Chayta rikuspan chay warmiqa Diosta jatunchayta qallarirqan (Luc. 13:​10-13). Rikusqanchis jina chay warmiqa Jehová Diostan jatunchayta qallarirqan, karanmi razonnin chayta ruwananpaq. Noqanchispaqpas imaymanan razón kan Jehová Diosta jatunchananchispaq.

¿IMARAYKUN JEHOVÁ DIOSTA JATUNCHANANCHIS?

5. ¿Imakunan razón kan Jehová Diosta respetananchispaq?

⁵ Jehová Diosta jatunchaspaqa payta respetasqanchistan rikuchisun. Imaymanan razón kan payta respetananchispaqqa. Payqa tukuy atiyniyoq Diosmi, kallpanpas mana tukurikuqmi (Sal. 96:​4-7). May yachayniyoq kasqanpas tukuy ima kamasqanpin sut’ita rikukun. Pay kaqtinmi kausashanchis, paymi llapa ima necesitasqanchistapas qowanchis (Apo. 4:11). Payqa manan jayk’aqpas saqewasunmanchu (Apo. 15:4). Paypa llapa ima ruwasqanpas allinkaman, siminpa llapa rimasqantapas junt’anpunin (Jos. 23:14). Chaychá profeta Jeremiasqa nirqan: “Llapa nacionkunapi kaq yachaysapakunamantapas reykunamantapas manan pipas qan jinaqa kanchu”, nispa (Jer. 10:​6, 7). Chhaynaqa imaymanan razón kashan payta respetananchispaq ¿riki? Ichaqa manan paytaqa respetanallanchischu, munakunanchis iman.

6. ¿Imakunan razón kashan Jehová Diosta munakunanchispaq?

⁶ Jehová Diosta jatunchaspaqa payta munakusqanchistan rikuchisun. Imaymanan razón kan payta munakunanchispaqqa. Jehová Diosqa ¡may sumaq sonqo Diosmi, may khuyapayakuqmi, llakipayakuqmi! (Sal. 103:13; Isa. 49:15). Ima ñak’ariypipas tarikushanchis chayqa paypas ñak’arinmi llakikunmi (Zac. 2:8). Payqa yanapawanchismi paywan amigontin kananchispaqpas (Sal. 25:14; Hech. 17:27). Chaymantapas payqa humilde sonqo Diosmi. “Cielota jallp’a pachatawan qhawarinanpaqmi k’umuykamun, pampamanta wajcha runata oqarinanpaqmi k’umuykamun” (Sal. 113:​6, 7). ¿Pin mana munanmanchu chhayna sumaq sonqo Diosta jatunchayta? (Sal. 86:12).

7. ¿Imatan llapanchispas ruwananchis?

⁷ Jehová Diosta jatunchaspaqa jujkunamanmi payta reqsichisun. Runakunaqa pantasqatan  Diosmantaqa imatapas yachanku. ¿Imarayku? Satanasmi llapa kay pachapi imaymana yanqa cuentokunata Jehová Diosmanta ch’eqerichin. Chaykunawanmi runakunaqa ñausayasqa jina kashanku (2 Cor. 4:4). Wakin runakunan Jehová Diosta qhawarinku millay Diosta jina, mana sonqoyoqta, vengakuqta jina. Wakinqa kay pachapi mana allinkuna pasasqanmantapas Diostan juchachanku, ichaqa noqanchispa yachasqanchisman jinaqa manan chayqa chhaynachu. Chaymi noqanchisqa sut’ita runakunaman willananchis imaynapunis Dios chayta, chayta ruwaspan payta jatunchasunchis. (Isa. 43:10). Kunanqa Salmos 96 capitulota allinta t’aqwirisunchis. Chaypin willashan Jehová Diosta jatunchaymanta. Chayta t’aqwirispan yachasunchis imakunata ruwaspas Jehová Diosta jatunchasunman chayta.

¿IMAYNATAN JEHOVÁ DIOSTA JATUNCHASUNMAN?

8. ¿Imaynatan Jehová Diosta jatunchasunman? (Salmos 96:​1-3).

⁸ Siminchiswan jatunchasun (leey Salmos 96:​1-3). Chay textokunapin willashan imaynas Jehová Diosman takinanchis chayta, imaynas sutinta jatunchananchis chayta, imaynas salvaq kasqanmanta allin willakuykunata willananchis chayta, imaynas may jatun kasqanta juj nacionkunaman willananchis chaytapas. Chaykunata ruwaspan noqanchisqa rikuchisunchis janaq pacha Taytanchista jatunchasqanchista. Ñaupa tiempo judío runakunapas apostolkunaq tiempompi Jesusta qatikuqkunapas tukuy atisqankutan ruwarqanku Jehová Diosmanta jujkunaman willanankupaq (Dan. 3:​16-18; Hech. 4:29). ¿Imaynatan paykunata qatikusunman?

9, 10. ¿Imatan yachasunman hermananchis Angelinamanta? (Qhaway kay parrafopaq fotota).

⁹ Estados Unidos nacionpi Angelina sutiyoq hermanamanta yachasunchis. a Payqa llank’ananpis Diospa sutinta altoman churasqa. ¿Imaynata? Payqa chayraqsi llank’anaman jaykusqa. Chaypis juj juñukuyman invitasqaku, chaypis llank’aqkuna reqsinakunankupaq chayraq jaykumuqkuna willakunanku kasqa pis kanku chayta. Payqa Diosta servisqanmantas fotokunata ajllakusqa imaynas Diosta servispa kusisqa kashan chayta rikuchinanpaq. Ichaqa manaraq payman tupashaqtinsi juj llank’aqmasin willakusqa imaynas payqa Testigo familiapi uywasqa karqan chayta. Ichaqa imakunapichus creesqanchismantas burlata jina rimasqa. Chaymanta rimaspan Angelina nin: “Chiri jump’iraqmi oqariwasharqan, sonqoypas phawarunman jinaraqmi kasharqani. Ichaqa sonqollaypin nisharqani:  ¿Jinatachu kunan qhawasaq Jehová Diosmanta pipas yanqata rimananta, icha defiendesaqchu payta?”, nispa.

¹⁰ Compañeron rimayta tukuqtinsi Angelinaqa sonqollanpi Diosmanta mañakusqa. Jinaspa llamp’u simillawan nisqa: “Chhaynaqa igualchá kanchis. Noqapas Testigo familiapin uywasqa karqani, kunankamapas chayllapin kashani”, nispa. Chay ratuqa jujniraysi kashasqaku, ichaqa Angelinaqa sumaqllatas rimasqa. Diospa llaqtanpi imakunatachus ruwarqan chaykunamantas wakin fotokunata paykunaman qhawachisqa. Munayllatas willakusqa imakunapichus creen chaytapas (1 Ped. 3:15). Pay rimayta tukunanpaqqa ñaupaqninta rimaq compañeronpas thajñas kapusqa. Paypas yuyarisqas Diospa llaqtanpi kashaspa imaynachus karqan chayta. Angelinan nillantaq: “Manan imapas kanmanchu Jehová Diosta serviy jinaqa, maypiña kaspapas paymanqa sayapakunanchispunin”, nispa. ¿Cheqaqmi chay nisqanqa riki? Pipas kamaqninchis Diosmanta yanqata riman chayqa, chaytaqa sut’inchananchispunin sayapakunanchismi paymanqa.

11. ¿Imaynatan ñaupa tiempokunamantapacha Diosta serviqkuna rikuchishanku Salmos 96:8 textoman jina imapas ruwasqankuta?

¹¹ Kaqninchiskunawan jatunchasun (leey Salmos 96:8). Jehová Diosta serviqkunaqa ñaupa tiempomantapachapas imachus kaqninkunawan iman Jehová Diostaqa jatunchaqku (Prov. 3:9). Ñaupa tiempo Israel runakunapas templota ruwakunanpaq allichakunanpaq imaqa imaymanakunatan churaqku (2 Rey. 12:​4, 5; 1 Crón. 29:​3-9). Jesusta wakin qatikuqkunapas “imachus kaqninkuwanmi” Jesusta apostolninkunatawan atiendeqku (Luc. 8:​1-3). Jesuspa ripusqan qhepamanpas iñiqkunaqa sasachakuypi tarikuq iñiqkunamanmi yanapaykunata apachiqku (Hech. 11:​27-29). Kay tiempopipas imanchischus kan chayta qospa iman Jehová Diostaqa jatunchasunman, ichaqa sonqomantan chaytaqa qonanchis.

12. ¿Imaynatan imapas qosqanchis Jehová Diosta jatunchan? (Qhaway kay parrafopaq fotota).

¹² Imaynatachus imapas qosqanchis Diosta jatunchan chayta yachanapaq juj hermanamanta yachasun. 2020 watapin Zimbabue ladopi unay tiempo mana parapas ni unupas kapurqanchu. Askha runakunan yarqaypi kasharqanku, wañuy patapiraqmi tarikusharqanku. Paykuna ukhupin kasharqan Prisca sutiyoq hermananchis. Chhaynaña tiempo kasharqan chaypas payqa sapa miercolesta sapa viernesta imas Diosmanta willaq lloqsiq, chajra llank’ana tiempo chayamuqtinpas payqa kaqllas lloqsishasqa. Chayta rikuspas llaqtamasinkunaqa burlapi jina nisqaku: “Chaypi purinaykimantaqa  manachu llank’awaq, mana chayqa yarqaymantan wañunki”, nispa. Paysi ichaqa kusisqa niq: “Jehová Diosqa manan jayk’aqpas imatapas kamachinkunamanqa faltachinchu”, nispa. Manaraq unaychu kashaqtinsi paymanqa juj yanapay chayasqa. Donacionkuna churasqanchiswanmi Diospa llaqtanmanta payman yanapayta apachikurqan. Chayta rikuspas llaqtamasinkunaqa admirakusqaku, jinaspa nisqaku: “Cheqaqtamá Diosniykiqa mana runankunataqa saqesqachu. Noqaykupas munaykumanmi paymanta astawan yachayta”, nispa. Paykunamanta qanchis runakunas juñunakuykunaman riyta qallarisqaku.

13. ¿Imaynatan imayna kausasqanchiswan Jehová Diosta jatunchasunman? (Salmos 96:9).

¹³ Imayna kausasqanchiswan jatunchasun (leey Salmos 96:9). Ñaupa tiempo sacerdotekunaqa Jehová Diospa wasinman jaykunankupaqqa allintan maqchikunanku karqan, limpion kananku karqan (Éx. 40:​30-32). Noqanchispas tukuy atisqanchistan kallpachakunanchis limpio purinanchispaq. Astawanqa limpio kausaytan apananchis, chaytan Diosqa munan (Sal. 24:​3, 4; 1 Ped. 1:​15, 16). Tukuy atisqanchistan kallpachakunanchis “ñaupa kausayninchista” saqepunanchispaq, “mosoq runa” kaywantaqmi p’achawan jina churakunanchis. ¿Imaninantaq chayri? Llapa millay sonqo kayta qhelli kausayta iman saqepunanchis. Jehová Dios jinataqmi piensananchis, paytan qatikunanchis (Col. 3:​9, 10). Jehová Diospa yanapayninwanqa atillasunmi chayta. Paypa atiyninwanqa may millayta kausaq runapas cambiallanmanmi.

14. ¿Imatan yachasunman Jackmanta? (Qhaway kay parrafopaq fotota).

¹⁴ Jack sutiyoq runamanta yachasunchis. Chay runaqa sinchi millaysi kasqa, manas pitapas khuyapayaqchu. Chayraykus paytaqa Demonio nispa sutiyasqakupas. Paytaqa imaymana mana allin ruwasqanmantas wañuchisqa kananpaq sentenciapusqaku. Chay p’unchay chayamushanankamas ichaqa carcelta riq juj hermanowan Bibliata estudiayta qallarisqaku. Imayna millay kausaytaña aparqan chaypas payqa cambiapusqas, jinas tiempowanqa Testigo jina bautizakapusqa. Payqa allintapunis cambiapusqa, chaysi wañuchisqanku p’unchayqa wakin guardiakunapas waqasqaku paymanta. Chay carcelpi llank’aq jujnin guardian nin: “Ñaupaqqa Jackqa llapa presokunamantapas aswan millaymi karqan. Chaymantan ichaqa aswan llamp’u sonqo kapurqan”, nispa. Jackta wañuchipusqanku qhepamansi hermanokunaqa carcelta kutillasqakutaq juñunakuyta apariq, chay juñukuymansi jamusqa mana jayk’aq  jamuq juj presochasqa runa. ¿Iman payta kallpachanman karqan chayman rinanpaq? Payqa admirasqas kashasqa Jack vidanta cambiasqanmanta. Yachaytapunis munashasqa imatas ruwanan Jehová Diosta adorananpaq chayta. ¿Imatan chay willakuymanta yachasunman? Imayna kausasqanchisqa jatunchanqapunin janaq pacha Taytanchistaqa (1 Ped. 2:12).

¿IMAYNATAN JEHOVÁ DIOS SUTINTA JATUNCHANQA?

15. ¿Imatan Jehová Dios pisi tiempollamanta ruwanqa sutinta jujpaqkama jatunchananpaq? (Salmos 96:​10-13).

¹⁵ (Leey Salmos 96:​10-13). Salmos 96 capituloq tukuyninpiqa Jehová Diostaqa qhawarichin justiciata ruwaq reyta jinan. Chhaynaqa, ¿imaynatan Jehová Dios sutinta jatunchanqa? Kay pachamanmi justiciata apamunqa. Pisi tiempollamantan Jatun Babiloniata, llapa pantasqa religionkunata ch’usaqman tukuchinqa sutinta qhellichasqankumanta (Apo. 17:​5, 16; 19:​1, 2). Chay Jatun Babilonia ch’usaqman tukuchisqa kasqanta rikuqkunaqa, yaqapaschá wakinqa noqanchiswan kuska Jehová Diosta jatunchayta munanqaku. Chay qhepamanqa Armagedón guerrapin Diosqa Satanaspa kamachisqan llapa kay pachata ch’usaqman tukuchipunqa. Arí, paypa sutinta cheqnikuqkunata, sutinta qhellichaqkunatan ch’usaqman tukuchinqa. Payta munakuqkunata payta jatunchaqkunatan ichaqa salvanqa (Mar. 8:38; 2 Tes. 1:​6-10). Cristoq gobiernasqan waranqa wata tukuypaqqa Jehová Diosqa allintañan ch’uyanchapunqa sutintaqa (Apo. 20:​7-10). Chay tiempoqa “imaynan lamar-qochaqa unuwan junt’a kashan, chhaynan kay jallp’aqa Jehová Diospa jatun kayninmanta yachaywan junt’a kanqa” (Hab. 2:14).

16. ¿Imata ruwananchispaqmi tukuy atisqanchista kallpachakunanchis? (Qhaway kay parrafopaq dibujota).

¹⁶ ¡May munaychá kanqa kay pachapi llapa kausaqkuna Diospa sutinta jatunchananku tiempo chayamuqtinqa! Chay p’unchay chayamunankama tukuy atisqanchista kallpachakusun Diosninchista jatunchananchispaq payta alabananchispaq, chayta ruwaymi imamantapas aswan allinqa. Chayraykun Umalliq T’aqaqa 2025 watapaq Salmos 96:8 textota ajllarqan, chaypin nin: “Jehová Diospa sutinta jatunchaychis”, nispa.